Akʉbʉ yi kʼẽrẽpabʉra bia wãta

Maʉ̃ kʼarea mʉ̃ra ipidasi, krĩchabasi baera mʉ̃ neũdukʼawuabara Daizezedebema oitabʉ ẽãta. Aramaʉ̃ta mʉ̃a iyaʼa widisi: «¿Daizeze Bedʼea ʉ̃rʉra bʉara wiña kʼawuabʉka?». Mʉ̃ neũdukʼawuaba jarasi yi papara Jeowa ʉ̃rʉ Kʼawuabipanʉrãta, maʉ̃neba iyara wiña kʼawuasita Daizeze Bedʼea ʉ̃rʉ. Mʉ̃a audre kʼawuakĩrãkʉasi baera, jarasi mʉ̃aʼa audre jara ũrĩbimarẽã.

Maʉ̃ ewaridera mejãcha bedʼeasida, adewara mʉ̃ neũdukʼawuaba jarasi naʉ̃ drʉara Diaruba zokʼabʉta. Mʉ̃ara naʉ̃ra ũrĩkabasi. Mʉ̃a ũrĩbasi baera naʉ̃ drʉara Daizezeba zokʼabʉta, mamina mʉ̃ dabʉba akʉbʉdera awuarabasi. Mʉ̃ poaga 26 basimina, mʉ̃a nekʼãrẽ mejãcha ũdubasi mʉ̃ krĩcha zroma obibʉta (Juan 14:30).

Mʉ̃ zezebara abionta manejabasi Fuerza Aérea de Estados Unidos, maʉ̃ kʼarea bia kʼawuabasi gorogororabara badu ewaride bombara jẽzabita. Vietnamne yõpanasidera mʉ̃ra estudiabasi unibersidad Californiane. Maʉ̃ne mʉ̃ra marcha obasi unibersidade estudiapanʉbawara, maʉ̃ kʼarea jenenerabara daita kʼaidu pẽwãsida akʉza gasta balbʉesida dai ʉ̃rʉ, maʉ̃ba bia ñababe ẽ basi, adewara bia ũdu ẽ basi. Maʉ̃ ewadera mejãcha yõpanasi, politikorata beasida akʉza ẽbẽrarãra mejãcha marcha opanasi. Mawũẽra jõmaʉ̃ba awuara krĩchapanasi.

1970de mʉ̃ra wãsi Alaskaeda trajade, mama plata mejãcha ganasi. Maʉ̃ tẽã wãsi Londresma (Inglaterra), mama edasi motota, maʉ̃ba mʉ̃yi wãkĩrãma wãsi. Mawũãbʉta jedeko bio berabarida tẽã mʉ̃ra wãsi Áfricaeda, mama ũdusi ẽbẽrarã mʉ̃ kĩrãkʼa yõneba jĩga wãnarata.

Mʉ̃a kʼawuasi Daizeze Bedʼeadeba naʉ̃ drʉara Diaruba zokʼabʉta akʉza mʉ̃ dabʉba akʉbʉba wãrĩnu ĩjãbʉ mawũãbʉta, maʉ̃ kʼarea mʉ̃yikʉza widibasi ¿Daizezeba zokʼa ẽ bʉrʉ naʉ̃ drʉata, iyara kʼãrẽta onʉmʉ? Maʉ̃ ʉ̃rʉ audre kʼawuakĩrãbasi.

Maʉ̃ tẽã panʉsida mʉ̃a bedʼea widibadara, adewara ũdusi ẽbẽrarã Jeowaʉ̃me kʼẽrẽpabʉta bedʼea zroma erpanʉmina akʉza maʉ̃rãra mʉ̃a mejãcha kãga zesi.

IRLANDA DEL NORTE «MEJÃCHA YÕBɄ DRɄA»

Mʉ̃ jẽda Londresʼeda wãsidera, mʉ̃ra bedʼeasi mʉ̃ neũdukʼawua papaʉ̃me, iya mʉ̃aʼa diasi Daizeze Bedʼeata, maʉ̃ tẽã mʉ̃ra wãsi Ámsterdamʼma (Países Bajos), mama mebẽã abaʉba ũdusi mʉ̃a Daizeze Bedʼea lebʉta akʉza iya kʼarebasi mʉ̃a audre kʼawuaita Daizeze ʉ̃rʉ. Maʉ̃are mʉ̃ra wãsi Dublín, Irlandama, mamaʉ̃ba akʉ jʉ̃ẽsi sukursalta, mama ũdusi mebẽã Arthur Matthewsta. Aramaʉ̃ta mʉ̃a jarasi Arthur Matthewsʼa mʉ̃aʼa Daizeze Bedʼeata jaradiamarẽã, mawũã jaradiasi iyara.

Mʉ̃ara Daizeze Bedʼeara kʼawuakĩrã estudia jʉ̃drʉsi maʉ̃ kʼarea jõma lesi Jeowa ʉ̃rʉ Kʼawuabipanʉrãba librorata akʉza kartarata ʉ̃tʉ zebibʉta akʉza Daizeze Bedʼeara jõma lesi, adewara kongregasione ãba yi jʉrepanʉnera akʉbasi sãwũã wũãwũãraba panʉbʉta ẽbẽra buru biaraba widi zebʉdata. Bari jaraita: «¿Kʼãrẽa bʉ mejãcha kayiruara? ¿Kʼai Daizezera? ¿Sãwũãdogo dayirã beibʉrʉdera?». Mawũẽra mʉ̃ neũdukʼawuarãra Jeowa ʉ̃rʉ Kʼawuabipanʉrãbasi, mʉ̃ badamaera mʉ̃a kʼaita ũduka basi baera. Mebẽrãbara kʼarebasida Jeowa audre kãgaita akʉza iya zokʼabʉ aripe oita.

1972de mʉ̃ra buru kʼoesi. Mʉ̃ buru kʼoedata poaga aba berabaribʉrʉde yi nãã edebari ba jʉ̃drʉsi, maʉ̃ tẽã mʉ̃ra wãsi pʉwʉrʉ Newry Irlanda del Nortema. Mama basi kongregasion aba, mʉ̃ra wãsi maʉ̃ra kʼarebade. Mõbe mʉ̃a arrendasi de aba pʉwʉrʉdeba jĩgabʉta, maʉ̃ra meabʉ baera audura pakarata biobasi. Mʉ̃a diskurso diaira pakara jara ũrĩbibasi, naʉ̃rabara paja kobʉ baera mʉ̃ bedʼeata ũrĩbʉ kĩrãkʼabasi. Ãya mʉ̃ara ũrãgʼa diabe ẽ basi sãwũã bedʼeai ʉ̃rʉra, mamina kʼarebabasi mʉ̃a ẽbẽrarã akʉita mʉ̃a diskurso diabʉde. 1974de, mʉ̃ra yi nãã edebari 130 ora babisida akʉza mebẽã Nigel Pittsida, mamaʉ̃ba ʉ̃ta iyiʉ̃me neũdukʼawua bia basida.

Maʉ̃ ewaridera Irlanda del Nortedera mejãcha yõbasi, ʉ̃kʉrʉ ẽbẽrabara jarapanasi «Irlanda del Norte mejãcha yõbʉ drʉa». Ẽbẽrabara badua ũdupanasi ode yõpanʉta, batapanʉta akʉza karru jẽzabipanʉta, adewara badua yõpanasi politikorainʉ akʉza religionrainʉ, mamina katolikoraba akʉza religion protestanteraba kʼawuapanasi Jeowa ʉ̃rʉ Kʼawuabipanʉrãra politikade eda wã ẽãta. Naʉ̃ba iduaribibasi Daizeze Bedʼea aduʼa jaradiaita. Yi de kaurabara kʼawuapanasi sama akʉza kʼãrẽ ewaride yõnaita, maʉ̃ba daiʼa jarapanasi jʉra kʼawuapanamarẽã akʉza mainʉ wãna ẽ marẽã.

Mamina edaʉde daibara bedʼea zromata ũdupanasi, bari jaraita ewari aba mʉ̃ra Denisʼʉ̃me Daizeze Bedʼea jaradia jʉ̃ẽsi Jeowa ʉ̃rʉ Kʼawuabipanʉrã neẽãmae akʉza ewari abapai jʉ̃ẽsi mamara. Mama ẽbẽra wẽrã abaʉba jarasi daira mia ordamiata, iya mawũã jarasibaibara daira ãyi pʉwʉrʉdebema bedʼeata bia bedʼea ẽ basi baera, maʉ̃ba daira mejãcha daʉperasi. Daita ibiade bedʼeapanasibʉrʉ gorogororabawara, naʉ̃ba oseabasi daita beadamarẽã, mawũã ẽ bʉrʉ dai sãkokoma batadamarẽã. Daiba bus zeita jʉ̃ãpanʉena zesida ẽbẽrarãta, maʉ̃rãra bedʼeasida ẽbẽra wẽrã dai ʉ̃rʉ imitia bedʼeadaʉ̃me, maʉ̃ tẽã maʉ̃ra ẽbẽrarãra daima zesida daibawara bedʼeaita. Maʉ̃ta bus zesidera bedʼeasida bus manejabʉme, maʉ̃ba daibara krĩchasida pʉwʉrʉdeba ãĩ bʉeya bedʼeapanʉta. Dai busdeba u bae kʼãrãpe yi bus manejabʉʼa widisida: «¿Jari ẽbẽrarãbara dai ʉ̃rʉ widisidaka?». Aramaʉ̃ta yi bus manejabʉba jarasi: «Mʉ̃a kʼawuabʉ maraba opanʉra, maʉ̃ kʼarea krĩcha orarãidua».

1976de asamblea distrito Dublínʼne odadea mʉ̃ane ũdukʼawuasi ẽbẽra wẽrã aba, yi trʉ̃ra Pauline Lomax, iyira Inglaterradeba zedatabasi akʉza yi nãã edebari 130 ora obasi. Iyara Jeowadeta nããra bʉebasi, adewara eda krĩchabʉta ũdubibasi akʉza ẽbẽra biabasi, iya akʉza yi mebẽã Rayʼʉ̃meba warraraenaʉba ũdukʼawuabasi Daizeze Jeowara. Mawũã ũdukʼawuadata poaga aba berabaribʉrʉde mʉ̃ra juwa jidasi Paulineʉ̃me akʉza daira yi nãã edebaribasida Ballymenane, Irlanda del Nortede.

Maʉ̃ tẽã daira zõrãrã kongregasion akʉbari babisida pʉwʉrʉ Belfast Londonderryde akʉza awuru pʉwʉrʉ mejãcha yõpanʉmae. Daira mejãcha sobiapanasi mama ũdusida baera mebẽrã Jeowa ode wãita ãya nekʼãrẽ ĩjãbadata, ẽbẽra awuru jʉrabadata, jõma amaesida baera Jeowaba jarabʉ oita. Maʉ̃ kʼarea Jeowabara ãyaʼa nebiata mejãcha diasi akʉza kʼarebasi.

Mʉ̃ra poaga 10 bayeda basi Irlandade, maʉ̃ tẽã daira poaga 1981ne zokʼa bʉesida eskuela Galaad 72ma. Galaadʼdeba ẽdrʉda tẽã daira zokʼa bʉesida Sierra Leona, Áfricaeda.

SIERRA LEONA: MEBẼRÃ KʼẼRẼPAPANASI NEKʼÃRẼ MEJÃCHA NEẼBASIMINA

Daira 11 misionerorabawara ãbapanasi de abaʉde, mama basi bañota ũme, neobarita aba, teleponota aba akʉza labadorata. Luzʼra wãbasi badu ũmadaʉde, kʼawua ẽ basi daya sõbede wãira, adewara de ʉ̃trera mejãchabasi kadota, adewara de edrebida ũduseabasi damata.

Mama bʼaira jipa zarebasimina, ẽbẽrarãbara ũrĩkĩrãdebasi Daizeze Bedʼeara. Mejãchaʉta Daizeze Bedʼea kʼawua jʉ̃drʉ kʼãrãpe buru kʼoepanasi. Ẽbẽra maʉ̃ pʉwʉrʉdebemabara mʉ̃ra jarasida «Señor Robert» akʉza mʉ̃ kima jarasida «Señora Robert». Betelde mejãcha trajabʉ baera Daizeze Bedʼeara mejãcha jaradia ẽ basi, maʉ̃ kʼarea ẽbẽrabara mʉ̃ kima jarasida «Señora Pauline» akʉza mʉ̃ta jarasida «Señor Pauline». Paulinebara kãgabasi mawũã jaradamarẽã.

Mebẽrã mejãchaʉta nekʼãrẽ neẽbasi, mamina Jeowabara diabasi ãya nesidabʉta (Mat. 6:33). Mʉ̃a kĩrãbebʉ mebẽã aba iya plata erbasita yiko edaita iyita akʉza yi wũãwũãraita, mamina maʉ̃ ewaridepai, mamina iya plata erbadara jõma diasi mebẽã malariaba kayabʉʼa, maʉ̃ba iya remediota edamarẽã. Maʉ̃ tẽã ẽbẽra wẽrã abaʉba orrasi mebẽã plata diadata. Mõbe naʉ̃ ẽbẽra wẽrãba jarasi iyita terumarẽã, maʉ̃ tẽã pagasi maʉ̃ bari. Maʉ̃ kĩrãkʼabʉra bio berabarisi.

NIGERIADE: AWURU KULTURATA KʼAWUASI

Daira Sierra Leonane panʉta 9 poagabasi, mamina tẽãne daira zokʼa bʉesida Betel Nigeriadebemama. Maʉ̃ Betelra yi zromabasi, mʉ̃ara mʉ̃ya trajo obʉta obasi opisinane, mamina mʉ̃ kimaitara zarebasi awuru trajo oita. Iyira 130 ora diabaribasi baera akʉza mejãcha erbasi ẽbẽrarã Daizeze ode wãkĩrãpanʉrata, mamina Beteldera trajaibarabasi wua kasuide, maʉ̃ kʼarea iyitara zareabasi maʉ̃ trajo oira, mamina sobiabasi iya kʼawuaside mebẽrãbara bia akʉbʉta iya trajo obʉra, adewara iyira zarea osi mebẽrã Beteldebema so zarea diaita.

Daibara nekʼãrẽ bio kʼawuaibarabasi nama Nigeria kulturadebemata. Ewari aba mebẽã wẽrã Betelde trajamarẽã trʉ̃napeadara mʉ̃me daʉcha zesida. Mʉ̃a juwa wuaside iyi saludaita, aramaʉ̃ta iyira mʉ̃ nãã sãkokodekʉba totosi. Naʉ̃ mebẽã wẽrãba mawũã oira mʉ̃ara kʼawua ẽ basi, aramaʉ̃ta mʉ̃a waña krĩchasi testo ũme ʉ̃rʉ Hechos 10:25 akʉza 26, adewara Apocalipsis 19:10, mʉ̃yikʉza widisi: «¿Mʉ̃a naʉ̃ta iyaʼa jara ũrĩbibaraka?». Aramaʉ̃ta mʉ̃a krĩchasi: «Iyira trʉ̃sida Betelʼeda traja zemarẽã, mawũẽra iya kʼawuabʉ Daizeze Bedʼeaba kʼãrẽta jaradiabʉra».

Mawũã berabarida tẽã iyiʉ̃me bedʼeasi akʉza jara ũrĩbibasi kʼãrẽta oibarata Betelde, mamina mʉ̃a audre kʼawuakĩrãbʉ baera iya kʼãrẽa mawũã odata, audre jʉrʉsi iya oda ʉ̃rʉ. Mʉ̃a tẽã kʼawuasi maʉ̃ pʉwʉrʉdera yumakẽrãba, yuwẽrãba mawũã opanʉta ẽbẽrarã wawia ũdubita, mawũã ẽbẽra abaʉʼa yiwidʼibʉta ũdubibʉ ẽãta maʉ̃bara. Adewara Daizeze Bedʼeadera jarabʉta ʉ̃kʉrʉ ẽbẽraba mawũã odata (1 Sam. 24:8). Mawũẽra mʉ̃ra mejãcha sobiabasi kʼãrẽ bedʼea jara ẽ basi baera mebẽã sopʉabita.

Mama mebẽrã bio ũdukʼawuasida poaga biobata Jeowaʉ̃me kʼẽrẽpabʉta. Bari jaraita daibara ũdukʼawuasida mebẽã Isaiah Adagbonata.b Iyara kʼawuasi Daizeze Bedʼeara wũãwũãenaʉ̃ba, mamina iyira kayabasi yagaba (lepra). Mawũẽra mebẽãra zokʼa bʉesida ẽbẽrarã yagaba panʉrama, iyitrʉ abapai Jeowa ʉ̃rʉ Kʼawuabipanʉrãbasi. Ẽbẽraba Daizeze Bedʼea jaradiamarẽã kãgade ẽ basimina, iyara kʼarebasi ẽbẽra yagaba kayabʉrata 30 Daizeze ode wãmarẽã akʉza mama kongregasion aba osi.

KENIA: MAMARA MEBẼRÃBARA MɄ̃RA BIA EDASIDA

1996de daira zokʼa bʉesida sukursal Kenianebemama, mʉ̃ra maʉ̃ pʉwʉrʉeda jʉ̃ẽ ẽãbʉta dããrabasi, maʉ̃ Beteldera mejãchabasi yerrerata maʉ̃rabara zrʉgabasi mebẽrãba neta edebadara. Ewari aba mebẽã Beteldebemabara, iyi kuartode bentanata ewa amaesi, mawũẽra yerrera eda zeda kʼãrãpe yikora makosida. Maʉ̃ne mebẽãra iyi kuartoma eda zebʉrʉdera, ũdusi yerrerata maʉ̃ kʼarea mejãcha jʉrasi. Yerrerasida maʉ̃ kʼarea mejãcha bʉgadrʉ wãsi bentanane.

Tẽã juneane mʉ̃ kimaʉ̃me wãsida kongregasion suajili bedʼeabʉma, mama jʉ̃ẽnata dããra ẽãne mʉ̃aʼa jarasida Ãba yi jʉrebarimae Daizeze Bedʼeadema libro akʉita jaradiamarẽã, mamina mʉ̃ara bia bedʼeabe ẽ basi suajili bedʼeara, maʉ̃ kʼarea mʉ̃ara bia estudiabasi ãba yi jʉrei nãã, maʉ̃ba kʼawuabasi sãwũã widita suajili bedʼeade. Mamina mebẽã abaʉba panʉbasibʉrʉ iyi bedʼedeba, maʉ̃ kʼarea krĩcha obasi mʉ̃a jõma ũrĩ ẽ bai baera iya jarabʉta, mamina mʉ̃ra so perabasi mebẽrã kʼarea mʉ̃a mawũã obʉ kʼarea, mawũãsidu mebẽrãbara mʉ̃ra bia edasida akʉza eda krĩchabʉta ũdubisida.

ESTADOS UNIDOSDE: DAIZEZETA MEJÃCHA ĨJÃPANɄ NEKʼÃRẼ BIATA ERPANɄMINA

Kenianera daira ewari bio pana ẽ basi, maʉ̃ tẽã poaga 1997de daira zokʼa bʉesida Betel Nueva Yorkma. Maʉ̃ pʉwʉrʉdera plata mejãcha ũdubʉ baera jʉra kʼawuapanaibarabasi (Prov. 30:8, 9). Mawũãsidu mebẽrãbara Daizeze wãrĩnu ĩjãpanʉta ũdubipanʉ, ãyi ewarita akʉza ãya nekʼãrẽ bia erbʉra zokʼa ẽ audre nekʼãrẽ bia ũduya, awuarabʉrʉ zokʼabʉ maʉ̃ra Jeowa organizasion kʼarebaita.

Daiba ũdu zebʉrʉ sãwũã mebẽrãbara Daizeze wãrĩnu ĩjãbʉta ãya bedʼea zroma awuara erpanʉmina. Irlandadera mebẽrãbara Daizeze wãrĩnu ĩjãbʉta ũdubisida yõ mejãchabʉmina; Áfricadera mebẽrãbara Daizeze wãrĩnu ĩjãbʉta ũdubisida nekʼãrẽ neẽbʉmina akʉza wuabemaraneba jĩgabasimina akʉza Estados Unidosdera mebẽrãbara Daizeze wãrĩnu ĩjãbʉta ũdubisida, ãya nekʼãrẽ nebia erbʉmina. Jeowara mejãcha sobiabʉbaibara mebẽrã iyiʉ̃me kʼẽrẽpabʉta ũdubʉrʉde ãya bedʼea zroma awuara erpanʉmina.

Ewarira mesera berabari wã (Job 7:6). Atiara daira trajabapanʉ Warwick Nueva Yorkde akʉza mejãcha sobiapanʉ trajapanʉ baera mebẽrã wãrĩnu ãyirainʉ yi kãga ũdubipanʉbawara adewara sobiapanʉ Jesuta kʼarebapanʉ baera. Aranʉ iyi ode kʼẽrẽpapanʉra nebiata mejãcha diayi (Mat. 25:34).