Kãgata ũdusida

YOMARA, yi mebẽrã Marcelo akʉza Hiver Guatemalade panʉ. Yomarara Jeowa ʉ̃rʉ Kʼawuabipanʉrãwabara Daizeze Bedʼea kʼawua jʉ̃drʉsi adewara yi mebẽrãsida Daizeze Bedʼea kʼawua jʉ̃drʉsida. Mamina ãyi ũbeara dauberrepanʉ, adewara brailera lebeda ẽ basi ãyara. Maʉ̃ kʼarea ãyi nejaradiabaribara le ũrĩbibasi kartarãra akʉza yi bersikulorasida.

Maʉ̃ kʼarea ãyitara zarebasi ãyidoba ãba yi jʉrebarieda wãira jĩgara chuasi baera 40 minuto. Mamina mebẽrã kongregasionebemarabara kʼarebasi ãba yi jʉrebarieda edeita. Bʼaita Kristianora kĩrãkʼa akʉza Trajaita Daizezeita, maʉ̃ asignasion opanʉnera mebẽrãba kʼarebapanasi ãya burude kʼawuamarẽã ãya oũdubita.

Mayo 2019de ãyibʉmae ãba yi jʉre jʉ̃drʉsida. Maʉ̃ ewade juwa jidapanʉra yi nãã edebarirata wãsi ãyi panʉinʉ. Naʉ̃ra juwa jidapanʉraba ãyi ũbea jaradiasida le kʼawuaita akʉza bʉ kʼawuaita brailede, ãya kʼawua ẽ basimina braile sãwũã jaradiaita. Maʉ̃ kʼarea ãyira wãsida bibliotekaeda, mama ũdusida libro braile sãwũã kʼawuaita akʉza maʉ̃ kʼawua kʼãrãpe wuabemara jaradiasida.

Maʉ̃neba ãyi ũbeaʉba mesera kʼawuasida brailera, maʉ̃ba kʼarebasi audre Jeowa neũdukʼawua badaita.a Idira Yomarara, Marcelora Hiverʼʉ̃me, ãyira yi nãã edebari 70 ora. Marcelora zõrãrã kʼarebabari. Ãyi ũbeaweda mejãcha trajapanʉ Daizezeita sobiade akʉza wuabemarasida ãya mawũã opanʉneba sobiapanʉ.

Ãyara mebẽrã biga diapanʉ kʼarebasida baera. Yomaraba jarabʉ: «Dai Jeowa ʉ̃rʉ Kʼawuabipanʉrãʉ̃me yi ũdudadeba yẽta, ãyara mejãcha kãgata ũdubi zebʉrʉ daiʼa». Marceloba jarabʉ: «Kongregasione mejãcha erbʉ neũdukʼawuarata akʉza naʉ̃ drʉa jõmaʉ̃nẽ mejãchabʉ mebẽrã naʉ̃ra kĩrãkʼa Jeowa ode panʉta». Yomaraba yi mebẽrãbawaraʉba jʉ̃ãpanʉ ẽjũã kĩrãwãreã ũdudaita (Sal. 37:10, 11; Is. 35:5).