ARTIKULO KʼAWUAITA 14
«Mawũãtrʉ jõmaʉ̃ba kʼawuadayi marara mʉ̃ kʼaidubemarata»
«Mawũãtrʉ jõmaʉ̃ba kʼawuadayi marara mʉ̃ kʼaidubemarata, mayirainʉ yiya kãgapanʉbʉrʉ» (JUAN 13:35).
TRÃBI 106 Cultivemos amor verdadero
KʼÃRẼTA ŨDUDAITAa
Jeowa ʉ̃rʉ Kʼawuabipanʉrã ãyirainʉ yi kãga ũdubibʉrʉdera, ¿ẽbẽrarãbara sãwũã krĩchapanʉ? (Akʉra parrapo 1).
1. ¿Ẽbẽrarãbara kʼãrẽta akʉpanʉ Jeowa ʉ̃rʉ Kʼawuabipanʉrã ãba yi jʉrebʉma wãbʉrʉdera? (Akʉra potota).
KRĨCHARA ẽbẽra juwa jidapanʉta Jeowa ʉ̃rʉ Kʼawuabipanʉrã ãba yi jʉrebʉma jʉ̃ẽbʉrʉta, aramaʉ̃ta mebẽrãbara ãyaʼa ibiade bia zebʉra jaradayi akʉza ãyaʼa ũdudayi mebẽrãbara wãrĩnu ãyirainʉ yi kãga ũdubipanʉta. Maʉ̃ta ode wãne yi kima wẽrãba jarayi: ‹Jeowa ʉ̃rʉ Kʼawuabipanʉrãbara bia edapanʉ wuabemara ẽbẽrata›.
2. ¿Kʼãrẽa ʉ̃kʉrʉ mebẽrãra jĩgara wãbʉ Jeowadeba?
2 Jeowa ʉ̃rʉ Kʼawuabipanʉrã ãyirainʉ yi kãga ũdubipanʉra jõmaʉ̃ba akʉpanʉ. Mamina ãyira nekayirua omiara (1 Juan 1:8). Maʉ̃ba dayirãba ãyita bia ũdukʼawuadara, kʼawuadayi kʼãrẽne aña obʉta (Rom. 3:23). Mamina ʉ̃kʉrʉ mebẽrãba mawũã aña obʉta mejãcha akʉbʉdeba jĩgara wãbʉ Jeowadeba.
3. ¿Kʼãrẽta ũdubibʉ wãrĩnu Jesu kʼaidubemaʼarabara? (Juan 13:34, 35).
3 Jẽda akʉra naʉ̃ artikulo testodebemata (akʉra Juan 13:34, 35). ¿Sãwũã kʼawuapanʉ saʉ̃ta wãrĩnu Jesu kʼaidubemaʼarata? Daizeze Bedʼeabara jarabʉ Jesu kʼaidubemarabara ãyirainʉ wãrĩnu kãgabʉta ũdubidaibasita, mawũã jara ẽ ãya aripe obʉ kʼarea jõmaʉ̃ba ũdukʼawuadaibasita. Jesubara jara ẽ basi ‹mawũãtrʉ maraba kʼawuadayi› marara mʉ̃ kʼaidubemarata, awuarabʉrʉ jarasi Jesubara: «Mawũãtrʉ jõmaʉ̃ba kʼawuadayi marara mʉ̃ kʼaidubemarata». Naʉ̃neba Jesubara jarakĩrãbasi ẽbẽra jõmaʉ̃ba ũdukʼawuaibasita iyi kʼaidubemara wãrĩnu yi kãga ũdubipanʉta, mawũã kristiano awaʉba kʼawua ẽ baibasita.
4. ¿Ʉ̃kʉrʉ ẽbẽrabara kʼãrẽta widibʉ kristiano wãrĩnuara ʉ̃rʉ?
4 Ʉ̃kʉrʉ ẽbẽrarã Jeowa odepanʉra ẽãbara widiseabʉ, ¿sãwũã kãgaba ũdubibʉ wãrĩnu Jesu kʼaidubemaʼarata? ¿Jesubara sãwũã kãgabʉta ũdubisi iyi kʼaidupanʉra 12 panʉara? Akʉza idi ewadera, ¿sãwũã Jesude kĩrãkʼa oseapanʉ? Ẽbẽrarã buru kʼoepanʉrabida krĩchaseabʉ nama widibʉ ʉ̃rʉ, mawũã odara wuabemara wãrĩnu kãgabʉta ũdubidayi ãya aña opanʉmina (Efes. 5:2).
¿KʼÃRẼA KÃGABA ŨDUBIBɄ WÃRĨNU JESU KʼAIDUBEMAʼARATA?
5. Jara ũrĩbira Juan 15:12, 13ba jarabʉta.
5 Jesuba jarasi iyi kʼaidubemarãra ũdukʼawuadaita wuabemara wãrĩnu kãga ũdubibʉ baera (akʉra Juan 15:12, 13). Jesubara jarasi yi kʼaidubemara: «Zhiya zhi kʉãgʼaudua marãta mʉã kʉãgʼa kĩrãkʼa». ¿Kʼãrẽta jarakĩrãbʉ maʉ̃ba? Jesubara jara ũrĩbisi wuabema kãga ũdubita zareabʉmina dayirãbara oũdubibarata, maʉ̃ba dayirãba ũdubʉrʉde awuru mebẽãta beadaitabʉta, maʉ̃ bari dayi bebʉta diayi.b
6. ¿Daizeze Bedʼeabara sãwũã ũdubibʉ kãgara audre yibiata?
6 Daizeze Bedʼeabara audre jarabʉ kãga ʉ̃rʉ. Ẽbẽra mejãchaʉba kãga naʉ̃ testota: «Daizezera kãga» (1 Juan 4:8). «Kãgara wuabemarãra bʉyikʉza kãgabʉ kĩrãkʼa» (Mat. 22:39). «Kãgabara jõma kĩrãduabʉ kayirua opanʉra» (1 Ped. 4:8). «Kãgara jõka» (1 Cor. 13:8). Naʉ̃ra testoba dayirã ũdubibʉ kʼãrẽaba yibiata wuabemara kãga ũdubira.
7. ¿Kʼãrẽa Diarubara ẽbẽrarãra ãyirainʉ yi kãga zebi ẽ bayi?
7 Ẽbẽra mejãchaʉba widibʉ: ¿Sãwũã kʼawuai saʉ̃ religionba wãrĩnu jarabʉ kʼawuaita? Religionʼra jõmaʉ̃ba jarapanʉ wãrĩnuta jaradiabʉta, mamina aba abakaʉba awuara jaradiapanʉ Daizeze ʉ̃rʉ. Diarubara mejãcha sewa zebʉrʉ ẽbẽrarãra religion zeri ẽãra mejãcha obʉrʉdeba, mamina Diarubara oẽ bayi naʉ̃ra religionʼrãra ãyirainʉ yi kãgapanamarẽã. Jeowabʉrʉ oseabʉ ẽbẽrarãra ãyirainʉ yi kãgapanamarẽã, kãgara Jeowadeba zebʉ baera. Ẽbẽrarã Jeowa jaure zarea erbʉtrʉ ãyirainʉ wãrĩnu yi kãga ũdubiseapanʉ (1 Juan 4:7). Maʉ̃ kʼarea Jesubara jarasi iyi kʼaidubemaratrʉ wãrĩnu ãyirainʉ yi kãga ũdubidaita.
8, 9. Jeowa ʉ̃rʉ Kʼawuabipanʉrã ãyirainʉ yi kãga ũdubipanʉ baera, ¿ẽbẽrarãbara kʼãrẽta kʼawuapanʉ maʉ̃neba?
8 Idi ewadera Jesuba jarada kĩrãkʼa iyi kʼaidubemarabara wãrĩnu kãgabʉta ũdubipanʉ. Maʉ̃ra ẽbẽra jõmaʉ̃ba ũdukʼawua wã. Bari jaraita, mebẽã Ianba kĩrãbebʉ iyi asamblea eda jʉ̃ẽkata jʉ̃ẽside kʼãrẽ ũdudata. Maʉ̃ asambleara osida estadiode, Ianbara maʉ̃ asamblea oi nãã akʉ jʉ̃ẽnabasi ẽbẽra jemenebarabʉta estadiode. Ianba jarabʉ: «Mʉ̃ Jeowa ʉ̃rʉ Kʼawuabipanʉrã asamblea eda jʉ̃ẽsidera jipa awuara ũdusi. Ãyara wuabemarata bia edapanasi, bia yopanasi, bia wua jʉ̃panasi akʉza ãyi wũãwũãra kʼẽrẽpapanasi, adewara ũdusi ãyira aduʼa sobiapanʉta. Mʉ̃a maʉ̃ta kãgabasi, mʉ̃a kĩrãbe ẽ maʉ̃ asambleade ãya jaradiadara, mamina kĩrãbebʉ Jeowa ʉ̃rʉ Kʼawuabipanʉrã sãwũã pananara».c Dayirãbara mawũã wuabemarata bia edapanʉ dayirãinʉ wãrĩnu kãga ũdubipanʉ baera akʉza mebẽrã wawia ũdubipanʉ, ãyita wãrĩnu kãgapanʉ baera.
9 Mebẽã Johnbida abarika nebiata ũdusi Jeowa ʉ̃rʉ Kʼawuabipanʉrã ãba yi jʉrepanʉma jʉ̃ẽkata jʉ̃ẽside. Iya jarabʉ: «Mʉ̃ mama jʉ̃ẽsidera mʉ̃ra bia edasida, maʉ̃ba mʉ̃a krĩchasi naʉ̃ra ẽbẽrabara nemitia okata, mawũã ãyirainʉ yi kãga ũdubipanʉba mʉ̃a ĩjãsi naʉ̃ra religion wãrĩnuarata».d Naʉ̃ nebʉraba ũdubibʉ Jeowa ʉ̃rʉ Kʼawuabipanʉrãra wãrĩnu Jesu kʼaidubemaʼarata.
10. ¿Sõbede dayirãbara wuabemara wãrĩnu kãgabʉta ũdubiseapanʉ? (Akʉra notata).
10 Naʉ̃ artikulode jarada kĩrãkʼa mebẽrã jõmaʉ̃ta nemitia omiara. Maʉ̃ba edaʉde dayimabʉta oda ẽ bayi akʉza aña jaradayie (Sant. 3:2). Maʉ̃nera wuabemara wãrĩnu kãgabʉta ũdubibara dayi sãwũã bedʼeabʉrʉdeba akʉza obʉrʉdeba. Dayirã ʉ̃rʉ nemitia obʉdadera, ¿sãwũã ũdubiseabʉ Jesude kĩrãkʼa wuabemara wãrĩnu kãgabʉta? (Juan 13:15).
¿JESUBARA SÃWŨÃ ŨDUBISI IYI KʼAIDUBEMARA KÃGABASITA?
Jesu kʼaidubemaraba aña osidera Jesubara ãyi kãgabʉta ũdubisi. (Akʉra parrapo 11-13 bayeda).
11. Santiago Juanʼʉ̃meba odabara, ¿kʼãrẽta ũdubisida? (Akʉra potorata).
11 Jesubara jʉ̃ã ẽ basi iyi kʼaidubemaraba jõma aripe odamarẽã, ãyira nekayirua omiabasi baera. Awuarabʉrʉ kʼarebasi ãya nemitia opanʉra wua oda ẽ marẽã, mawũã Jeowaba ãyita bia akʉmarẽã. Ewari aba Juanba Santiagoʉ̃meba zokʼa bʉesida ãyi papata Jesuʼa jaramarẽã ãyi ʉ̃tʉ jʉ̃ẽbʉrʉde jewedabimarẽã aba juwarare, aba juwaʼãkare (Mat. 20:20, 21). Santiagoba akʉza Juanʼʉ̃meba odabara ũdubisida ãyira wuabemara ʉ̃ta krĩchabʉta (Prov. 16:18).
12. ¿Santiago Juanʼʉ̃mebʉrʉ aña osidaka? Jara ũrĩbira.
12 Maʉ̃ ewaridera Santiago Juanʼʉ̃mebʉrʉ aña oda ẽ basi. Akʉra kʼãrẽta osidata wuabemara Jesu kʼaidubemarabida, akʉra kʼãrẽta osidata: «Zhi diezba maʉ̃ta ũrĩnaĩ kĩrũsidʼa mebẽrãta ũme panʉã» (Mat. 20:24). Dayirãba krĩchaseabʉ naʉ̃ra 10 panʉraba sãwũã bedʼeadata Santiagoʼa akʉza Juanʼa, adewara Santiagoba Juanʼʉ̃meba ãyaʼa kʼãrẽ jaradata. Yi 10 panʉraba jarasidabaibara: ‹Marara kʼaipe kʼãwũã Jesu kʼawa bʉemarẽã widipanʉra, dayirã jõmaʉ̃ta trajapanʉ Jesuita, adewara dayirã jõmaʉ̃ba abarika kʼawuapanʉ›. Jesu kʼaidubemara ãyirainʉ mawũã bedʼeadaba ibiade pana ẽ basi.
13. ¿Kʼãrẽta osi Jesubara iyi kʼaidubemaraba aña osidera? (Mateo 20:25-28).
13 ¿Kʼãrẽta osi Jesubara iyi kʼaidubemaraba mawũã osidera? Mejãcha kĩrʉ ẽ basi, adewara krĩcha ẽ basi awuru ẽbẽra jʉrʉita ãyirainʉ yõpanʉ ẽãta, awuarabʉrʉ kʼarebasi ãyira wuabemara edabʉta krĩchadamarẽã (akʉra Mateo 20:25-28). Akʉza soiduba ibiade edasi, kʼaita yi zroma bʼai kʼarea yõpanasimina (Mar. 9:34; Luc. 22:24).
14. ¿Jesu kʼaidubemarabara kʼãrẽta akʉ warisida?
14 Jesubara bia krĩchasi iyi kʼaidubemara iyi kʼaidu jʉ̃drʉi nãã sãwũãbadata (Juan 2:24, 25). Ãyi ewaridera nokʼo religionʼrabara jaradiapanasi audre yibia bʼaibarata wuabemaraira, maʉ̃ta akʉ warisi ãyara (Mat. 23:6; akʉra bideota nota Mateo 23:6debʉta Asientos del frente en la sinagoga). Religion nokʼorabara mawũã jaradiapanasi krĩchapanasi baera ãyira audre yibiata wuabemarairaf (Luc. 18:9-12). Jesubara kʼawuabasi iyi kʼaidubemaraba maʉ̃ta akʉ warisi baera naʉ̃ra kĩrãkʼa krĩchaseabasita (Prov. 19:11). Jesubara jʉ̃ã ẽ basi iyi kʼaidubemaraba jõma aripe odaita, adewara ãya aña osidadera mesera kĩrʉ ẽ basi. Jesubara kʼawuabasi ãyara nebia okĩrãbʉta, maʉ̃ kʼarea ibiade jaradiasi ãyira wuabemara edabʉta krĩchadamarẽã, adewara wuabemara kãgabʉta ũdubidamarẽã yãrã ʉ̃tabʉta krĩchai kaude.
¿DAYIRÃBARA SÃWŨÃ JESUDE KĨRÃKʼA OSEAPANɄ?
15. ¿Kʼãrẽta kʼawuapanʉ Santiago Juanʼʉ̃me berabarideba?
15 Nekʼãrẽta kʼawuadaya Juan Santiagoʉ̃meba odadeba. Santiago Juanʼʉ̃mebara aña osida Jesuʼa jarasida baera ãyita nããra bʉemarẽã, mamina wuabemarabida aña osida, maʉ̃ kʼarea mejãcha kĩrʉsida baera. Mawũãsidu Jesubara iyi kʼaidubemara 12 panʉra ibiade edasi. ¿Kʼãrẽta kʼawuapanʉ maʉ̃neba? Awuruba aña obʉrʉdera maʉ̃ awa akʉnʉma ẽ baibara, dayikʉzabida bia akʉibara sãwũã bedʼeadogota akʉza kʼãrẽta oita krĩchabʉta. Mawũã berabaribʉrʉdera dayikʉza krĩchaseabʉ: ‹¿Kʼãrẽa mʉ̃ra mejãcha kĩrʉkʉ iya oda kʼarea? ¿Wabida waebʉka mʉ̃a aña krĩchabʉta ara oita? ¿Ẽbẽra mʉ̃ ʉ̃rʉ nemitia odara bedʼea zroma erbʉka? ¿Naʉ̃ ẽbẽraba mʉ̃ ʉ̃rʉ wãrĩnu nemitia osibʉrʉ iyaʼa kãga ũdubiseabʉka akʉza kĩrãduaseabʉka iya nemitia odara?›. Wuabemara wãrĩnu kãga ũdubidara Jesu kʼaidubemaʼarata ũdubidayi.
16. ¿Adewara kʼãrẽta kʼawuapanʉ Jesu yizadeba?
16 Jesu yizabara dayirã jaradiabʉ krĩchaibarata kʼãrẽa mebẽrãbara aña obʉta (Prov. 20:5). Jesubara akʉseabasi ẽbẽraba kʼãrẽta krĩchabʉta ãyi sodera. Dayirãbara mawũã obe ẽ, mamina kĩrãduaseabʉ ãya aña obʉta (Efes. 4:1, 2; 1 Ped. 3:8). Dayirãba bia kʼawuapanʉbʉrʉ mebẽrã sãwũã badata Daizeze ode wãi nãã, naʉ̃ba kʼarebayi dayirãba kĩrãduaita ãya aña obʉra. Akʉdaya yiza aba.
17. ¿Kʼãrẽ nebiata ũdusi kongregasion akʉbari zõrãrã abaʉba mebẽã abaʉta bia ũdukʼawuaside?
17 Kongregasionʼra akʉbari zõrãrã Áfricadebemaba mebẽã abaʉ ʉ̃rʉ krĩchasi naʉ̃ra ẽbẽra bia ẽ basita. ¿Kʼãrẽta osi kongregasionʼra akʉbari zõrãrãbara? Iya jarasi: «Mʉ̃ iyaʼa bedʼea ẽ baita krĩchai kaude, krĩchasi iyi audre ũdukʼawuaita. Mawũã obʉrʉba ũdukʼawuasi kʼãrẽa maʉ̃ mebẽãra ẽbẽra bia ẽ kĩrãkʼabʉta». Akʉza mebẽãba jarabʉ: «Mʉ̃a kʼawuaside mebẽã zarea obʉta wuabema ẽbẽra bia edaita akʉza audre bia owãta mʉ̃ara audre kãgasi akʉza neũdukʼawua biabasida». Dayirãta zarea opanʉne mebẽrã audre bia ũdukʼawuaita, naʉ̃ba kʼarebayi mebẽrã kãga ũdubita.
18. ¿Kʼãrẽta widiseapanʉ mebẽã abaʉba dayimabʉ ẽãta osibʉrʉ? (Proverbios 26:20).
18 Edaʉde dayirãbara ara okĩrãbʉ mebẽã abaʉba dayimabʉ ẽã odata, mamina bigabayi dayikʉza widita: «¿Mʉ̃a kʼawuabʉka jõma kʼãrẽ berabaridara? (Prov. 18:13). ¿Iyara mawũã oamabasika? (Ecl. 7:20). ¿Mʉ̃abida iyide kĩrãkʼa abarika obarika? (Ecl. 7:21, 22). ¿Iyiʉ̃me bedʼeara wuabʉrʉ wãbika bedʼea zromara?» (akʉra Proverbios 26:20). Dayirãba nama widibʉ ʉ̃rʉ bia krĩchadara idu berabaribiseabʉ bedʼea zromara, mawũã kãgabʉta ũdubidaita.
19. ¿Kʼãrẽta oita krĩchabʉ bʉra?
19 Jeowa ʉ̃rʉ Kʼawuabipanʉrã jõmaʉ̃ba ũdubipanʉ wãrĩnu Jesu kʼaidubemaʼarata. Dayirã aba abakaʉba ũdubipanʉ wãrĩnu Jesu kʼaidubemata, mebẽrã kãga ũdubipanʉne ãya dayimabʉ ẽãta opanʉmina. Dayirãba opanʉneba kʼarebadayi wuabema ẽbẽrarãba kʼawuadamarẽã dayirãra religion wãrĩnuarade panʉta. Maʉ̃ kʼarea ãyabida orrakĩrãnañi mawũã Jeowa odepanaita. Dayirãra zarea odaibara wuabemara kãga ũdubidaita, mawũã jõmaʉ̃ba kʼawuadayi dayirãra wãrĩnu Jesu kʼaidubemaʼarata.
TRÃBI 17 «Quiero»
a Ẽbẽra mejãchaʉba kʼawuakĩrãpanʉ Jeowa ʉ̃rʉ, dayirãba wãrĩnu kãgabʉta ũdubipanʉ baera. Dayirãra nemitia omia baera edaʉde zare mebẽrã kãga ũdubita akʉza bia edadaita. Naʉ̃ artikulode kʼawuadayi kʼãrẽa yibiata wuabemara kãga ũdubira, adewara kʼawuadayi Jesuba sãwũã kãga ũdubisita wuabemaba aña opanasimina akʉza kʼawuadayi sãwũã dayirãba Jesude kĩrãkʼa oseapanʉta.
b Akʉra libro «Ven sé mi seguidor», yi 17 parrapo 10 akʉza 11.
c Akʉra artikulo «Al fin mi vida tiene sentido» La Atalaya, 1 noviembre 2012de pagina 13 akʉza 14.
d Akʉra artikulo «Mi vida parecía ideal» La Atalaya, 1 mayo 2012de pagina 18 akʉza 19.
e 1 Corintios 6:9, 10de jarabʉ nemitia zroma ʉ̃rʉ, maʉ̃ra zõrãrãba akʉdaibarata, mamina naʉ̃ parrapodera maʉ̃ ʉ̃rʉ bedʼeabʉ ẽ.
f Naʉ̃ra religionebema abaʉba jarasi: «Naʉ̃ drʉa jõmaʉ̃nẽ 30 panʉbʉbʉrʉ yibiata Abrahán kĩrãkʼa. Mawũã 30bʉbʉrʉ mʉ̃ warrata mʉ̃me maʉ̃ne edabʉ, mamina 10 panʉbʉrʉ mʉ̃ warrata mʉ̃me maʉ̃ne edabʉ akʉza juesomabʉbʉrʉ mʉ̃ warrata mʉ̃me maʉ̃ne edabʉ, mawũã ẽ bʉrʉ ũmepaibʉbʉrʉ maʉ̃ra mʉ̃ warra akʉza mʉ̃, mamina abapaibʉbʉrʉ maʉ̃ra mʉ̃».