Ĩjãra Jeowa Juez so zʉbʉria akʉbʉ ʉ̃rʉ

1. ¿Kʼãrẽta jaradiasi Jeowaba Abrahánʼa?

EWARI dããrabade Jeowaba zokʼasi angelta Abrahánʼa jaramarẽã jõbita pʉwʉrʉ Sodoma Gomorraʉ̃me. Abrahánba soiduba Daizeze ʉ̃rʉ ĩjãbasimina biʼia kʼawua ẽ basi kʼãrẽa mawũã oira, maʉ̃ kʼarea widisi: «¿Bʉara wãrĩnu makenaika ẽbẽrarã biarata ẽbẽrarã kayiruabawara? ¿Baribʉrʉ naʉ̃ drʉa Juezbara aripe oi ẽka?» (Gén. 18:​23-33). Jeowaba Abrahánʼa ibiade jara ũrĩbisi iyara makena ẽãta ẽbẽra bia obera. Naʉ̃ bedʼeara idi dayirãita yibia akʉza zarea diabʉ.

2. ¿Kʼãrẽa ĩjãseapanʉ Jeowaba ẽbẽrarã kʼawua oi jidabʉrʉdera so zʉbʉria ũdubita akʉza aripe oita?

² ¿Kʼãrẽa ĩjãseapanʉ Jeowaba ẽbẽrarã kʼawua oi jidabʉrʉdera aripe oita? Daizeze Bedʼeade jarabʉ Jeowabara akʉbʉta sota (1 Sam. 16:7). Naʉ̃ba jarakĩrãbʉ Jeowabara akʉbʉta ẽbẽrarã aba abakaʉ sode kʼãrẽ krĩchabʉta (1 Rey. 8:39; 1 Crón. 28:9). Jeowara buru bia ẽbẽrarãira, maʉ̃ba edaʉde dayirãbara biʼia kʼawua ẽ Jeowaba kʼãrẽa mawũã obʉra. Pabloba jarasi Daizezeba kʼãrẽ oi krĩchabʉra ẽbẽrarãbara bia kʼawua ẽãta (Rom. 11:33).

3, 4. (1) ¿Kʼãrẽta widiseabʉ edaʉde? (2) ¿Kʼãrẽta kʼawuadai naʉ̃ artikulodera? (Juan 5:​28, 29).

³ Kʼawuapanʉ Jeowaba nekʼãrẽ aripe obʉta, mawũãmina edaʉde Abrahánba widida kĩrãkʼa dayirãbida widiseabʉ, ¿Jeowaba Sodomanebema akʉza Gomorradebema ẽbẽra makenana kĩrãkʼa, makena zebʉrʉra jẽda piradrʉika? ¿Ãyisida piradrʉika Jeowaba ẽbẽra bia ẽã obe piradrʉbibʉrʉdera? (Hech. 24:15).

⁴ Jẽda kĩrãbedaya kʼãrẽ kʼawuadapeadata jẽda piradrʉi ʉ̃rʉ. Aranʉweda biʼia jara ũrĩbisida kʼãrẽta jarakĩrãbʉta jẽda piradrʉita ewari jõmaʉ̃nẽ bʼaita akʉza yi jẽda piradrʉi kʼawua odaitaa (akʉra Juan 5:​28, 29). Naʉ̃ kʼãwũã biʼia jara ũrĩbidapeadaba kʼarebabʉ dayirãba maʉ̃ ʉ̃rʉ sãwũã krĩchabadata awuara krĩchaita, maʉ̃ ʉ̃rʉ bedʼeadayi naʉ̃ artikulode akʉza wuarebemanebida. Nããra kʼawuadayi Jeowaba aripe obʉdebema dayirãba kʼawuabʉta akʉza dayirãba kʼawua ẽãta.

DAYIRÃBA KʼAWUA ẼÃTA

5. ¿Nawedara kʼãrẽta berabarita jarapanasi ẽbẽrarã Sodoma akʉza Gomorrade beidara ʉ̃rʉra?

⁵ Nawedara dayirã kartaranera jarapanasi kʼãrẽta berabaribasita ẽbẽrarã bia ẽã obʉra Jeowaba kʼawua obʉrʉdera, maʉ̃ba jarapanasi ẽbẽrarã Sodoma akʉza Gomorradebemarãra jẽda piradrʉ ẽ baibasita. Mamina Zõrãrã Burubiadebemaraba maʉ̃ ʉ̃rʉ bia krĩchada kʼãrãpe akʉza yiwidʼida kʼãrãpe kʼawuasida dayirãbara jarabeda ẽãta maʉ̃ra ẽbẽrarãra jẽda piradrʉita mawũã ẽ bʉrʉ piradrʉ ẽãta, ¿kʼãrẽa mawũã jarabeda ẽ?

6. ¿Saʉ̃ yizaba ũdubibʉ Jeowaba ẽbẽrarã bia ẽã obe sãwũã kʼawua odata akʉza kʼãrẽta jara ẽ Daizeze Bedʼeaba?

⁶ Daizeze Bedʼeade mejãcha jara ũrĩbibʉ nebʉrara ẽbẽra bia ẽãta obera Jeowaba sãwũã kʼawua oda ʉ̃rʉ. Bari jaraita, kue zroma zesi ewaridera Jeowabara ẽbẽrarã jõma makenasi, mamina Noéta akʉza iyi mebẽrãra makena ẽ basi akʉza Jeowaba israelitara ẽjũã bia diaya adamae pʉwʉrʉrata 7basi, maʉ̃ra ẽbẽrarã makenaira Jeowabara israelitarata zokʼasi adewara Jeowaba 185.000 asiriora makenasi angel abaʉdeba (Gén. 7:23; Deut. 7:​1-3; Is. 37:​36, 37). Mamina Daizeze Bedʼeabara jara ẽ Jeowabara maʉ̃ra ẽbẽrarã jipa makenasita akʉza wua piradrʉbi ẽ baita.

7. ¿Kue zroma zeside ẽbẽrarã makenana ʉ̃rʉ akʉza israelitaraba Canaánʼnebemara makenana ʉ̃rʉra kʼãrẽta kʼawuada ẽ dayirãbara? (Akʉra poto ).

⁷ Maʉ̃ra yizaranera dayirãba kʼawua ẽ Jeowaba ẽbẽrarã aba abaka sãwũã kʼawua odara, adewara biʼia kʼawuada ẽ maʉ̃ra ẽbẽrarãba Jeowa ʉ̃rʉ kʼawuapanasi kʼawuaita akʉza ãya kayirua oda kʼarea jẽda krĩchasida kʼawuaita (2 Ped. 2:5). Daizeze Bedʼeade kue zroma zeda ʉ̃rʉ jara ũrĩbibʉrʉdera eda jarabʉ Noébara Daizeze bedʼeata jaradiabasita, mamina biʼia kʼawuada ẽ Noéba jãba zroma onʉmʉena Daizeze bedʼeasida jaradiabasi kʼawuaita ẽbẽra aba abakaʉa adewara biʼia kʼawuada ẽ ẽbẽrarã Canaánʼnebadaraba Jeowa ʉ̃rʉ kʼawuasida kʼawuaita akʉza ãya kayirua obada kʼarea jẽda krĩchasida kʼawuaita.

8. ¿Kʼãrẽta kʼawuada ẽ ẽbẽrarã Sodoma akʉza Gomorradebemara ʉ̃rʉ?

⁸ Adewara dayirãba kʼawuapanʉ Sodoma akʉza Gomorradera basita yumakẽrã Daizeze nãã bia obʉta, maʉ̃ra Lot basi. Mamina biʼia kʼawuada ẽ Lotba ẽbẽrarã naʉ̃ pʉwʉrʉdebema jõmaʉ̃a Daizeze ʉ̃rʉ jaradiasi kʼawuaita. Naʉ̃ra ẽbẽrarã maʉ̃ pʉwʉrʉdebemarãra nekayirua omiarabasi mamina, ¿ãyi aba abakaʉba bia kʼawuabasika saʉ̃ta bigata akʉza saʉ̃ta biga ẽãta? Kʼawuada ẽ basi baibara. Daizeze Bedʼeaba jarabʉ ẽbẽrarã mejãchaʉta Lot deidu jʉ̃ẽsidata, ẽbẽrarã Lot deda jʉ̃ẽnapeadata wawa oita. Adewara jarabʉ maʉ̃ra ẽbẽrarã bio jʉ̃ẽnanera edabasita zõrãrãta akʉza warrarata (Gén. 19:4; 2 Ped. 2:7). Mawũẽra, ¿jaraseapanʉka Daizeze so zʉbʉria akʉbʉbara jipade piradrʉbi ẽ baita ẽbẽrarã maʉ̃ pʉwʉrʉranebemara? Maʉ̃ra kʼawuada ẽ, mamina kʼawuapanʉ Jeowaba Abrahánʼa jarasita maʉ̃ pʉwʉrʉdera mia 10bida ba ẽ basita ẽbẽrarã bia opanʉrãra (Gén. 18:32). Maʉ̃ kʼarea jaraseapanʉ maʉ̃ra ẽbẽrarãbara bia ẽãta opanasita akʉza Jeowaba maʉ̃ kʼarea makenasita ãyira. Mamina, ¿maʉ̃ba jarakĩrãbʉka Daizezeba ẽbẽrarã bia ẽ opanʉra jẽda piradrʉbibʉrʉdera maʉ̃ra ẽbẽrarã mia abaʉta jẽda piradrʉ ẽ baita? Mawũã ẽ, maʉ̃ra bia kʼawuada ẽ.

9. ¿Kʼãrẽta kʼawuada ẽ dayirãbara Salomón ʉ̃rʉ?

⁹ Daizeze Bedʼeade jara ũrĩbibʉ sãwũã ʉ̃kʉrʉ ẽbẽrarãba nããra bia obeadata, tẽã bia ẽãta ojʉ̃drʉsidata. Bari jaraita, nokʼo Salomónta. Iyara Jeowara biʼia ũdukʼawuabasi akʉza kʼawuabasi sãwũã yiwidʼibarabasita Jeowaʼa, mamina tẽã iya daizeze zeri ẽãra yiwidʼi jʉ̃drʉsi, Jeowara maʉ̃ kʼarea mejãcha kĩrʉsi adewara pʉwʉrʉ Israeldebemarãra mejãcha zʉbʉriasi Salomónba kayirua oda kʼarea. Daizeze Bedʼeade jara ũrĩbibʉ Salomón beida tẽãra iyira iyi zõrãrã joudapeadamae jousidata. Bari jaraita, nokʼo David joudapeadamae (1 Rey. 11:​5-9, 43; 2 Rey. 23:13). ¿Mamina maʉ̃ba jarakĩrãbʉka Jeowabara Salomónʼra jẽda piradrʉbita? Mawũã ẽ, maʉ̃ra biʼia kʼawuada ẽ Daizeze Bedʼeaba jara ẽ baera. Ʉ̃kʉrʉraba krĩchapanʉ Salomónʼra jẽda piradrʉita Daizeze Bedʼeaba naʉ̃ta jarabʉ baera: «Beibʉrʉdera ẽdrʉbʉ baera kʼayiruadeba» (Rom. 6:7). Mamina naʉ̃ba jarakĩrãbʉ ẽ ẽbẽrarã beidara jõma jẽda piradrʉita akʉza ãyira beisi baera jẽda piradrʉbidaibarata. Jẽda piradrʉira Jeowaba nebia bari diabʉ kĩrãkʼabʉ. Jeowabʉrʉ kʼawuabʉ kʼairata jẽda piradrʉbita, iya piradrʉbikĩrãta piradrʉbiyi mawũã Jeowaba kãgabʉta ewari jõmaʉ̃nẽ omarẽã (Job 14:​13, 14; Juan 6:44). ¿Maʉ̃ nebiara Jeowaba Salomónʼa diaika? Dayirãbara kʼawuada ẽ, Jeowabʉrʉ kʼawuabʉ, mamina dayirãbara kʼawuapanʉ Jeowaba nekʼãrẽra jõma aripe obʉta.

DAYIRÃBA KʼAWUAPANɄTA

10. ¿Jeowabara ẽbẽrarã beakĩrãbʉka? (Ezequiel 33:11 akʉza akʉra potota).

¹⁰ (Akʉra Ezequiel 33:11). Jeowaba jara ũrĩbibʉ iyi sãwũã sentibʉta ẽbẽrarã iya kʼawua oibaradera. Apostol Pedro bida Ezequielba jarada kĩrãkʼa jara ũrĩbisi, iya jarasi Jeowabara kãga ẽãta mia abaʉ ẽbẽrata beimarẽãra (2 Ped. 3:9). Naʉ̃ bedʼeaba aduʼa babibʉ dayirãra, kʼawuabibʉ baera Jeowaba ẽbẽra abaʉta beabʉrʉdera mawũã krĩña beabʉ ẽãta, awuarabʉrʉ kʼawuabʉ kʼãrẽa mawũã oibarata. Jeowabara so zʉbʉriata ũdubibʉ, maʉ̃ba iya oseabʉdera so zʉbʉria akʉbʉ iya kãgata.

11. ¿Kʼairata jẽda piradrʉda ẽ bai akʉza maʉ̃ra sãwũã kʼawuapanʉ?

¹¹ Dayirãba kʼawuabʉdera, ¿kʼairata jẽda piradrʉ ẽ bai? Daizeze Bedʼeaba ʉ̃kʉrʉ yizarata jara ũrĩbibʉ.b Bari jaraita, Jesuba jarasi Judas Iscariotera jẽda piradrʉ ẽ baitac (Mar. 14:21; adewara akʉra Juan 17:12). Judasbara biʼia kʼawuabasi iya kʼãrẽ onʉmʉra Jeowa ʉ̃rʉ basita akʉza yi Warra ʉ̃rʉ, mawũãsidu osi iyara (akʉra naʉ̃ testota Marcos 3:29).d Adewara Jesuba jarasi ʉ̃kʉrʉ religion nokʼora iyi ewaridebemarasida jẽda piradrʉ ẽ baita iyi ʉ̃rʉ panasi baera (Mat. 23:33; akʉra Juan 19:11 nota «del hombre»). Pabloba jarasi apostatara jẽda krĩcha ẽãrãra jẽda piradrʉ ẽ baibasita (Heb. 6:​4-8; 10:29).

12. ¿Kʼãrẽta kʼawuapanʉ Jeowaba ẽbẽrarã so zʉbʉria akʉbʉ ʉ̃rʉ? Yizata jara ũrĩbira.

¹² ¿Kʼãrẽta kʼawuapanʉ Jeowaba ẽbẽrarã so zʉbʉria akʉbibʉ ʉ̃rʉ? Dayirãba nãã jarasida Jeowabara so zʉbʉria ũdubibʉta akʉza iyara kãga ẽãta mia abaʉ ẽbẽrata beimarẽãra. ¿Sãwũã ũdubibʉ Jeowabara ẽbẽrarã so zʉbʉria akʉbʉta? ¿Jeowabara sãwũã ũdubi zebʉrʉ mia kʼaita bei ẽ marẽã kãgabʉta? Iya maʉ̃ra ũdubisi nokʼo Davidba kayirua zroma oda kĩrãduaside. Davidʼra mia beasi akʉza ãĩbasi mawũãsidu Davidʼra jẽda krĩchasi, maʉ̃ kʼarea Jeowaba so zʉbʉria akʉ kʼãrãpe kĩrãduasi iya kayirua odara (2 Sam. 12:​1-13). Nokʼo Manasésbida kayirua zromata mejãcha osi, mawũãsidu Jeowaba iyira so zʉbʉria akʉ kʼãrãpe kĩrãduasi iya kayirua odara, Manasésta jẽda krĩchasi baera (2 Crón. 33:​9-16). Maʉ̃ra yizaraba ũdubibʉ Jeowabara so zʉbʉria ũdubibʉta yi ẽbẽrarã so zʉbʉria ũdubibara. Jeowabara jẽda piradrʉbiyi naʉ̃ra ẽbẽrarãra ãya kʼawuabasi baera ãya odara kayirua zromabasita akʉza maʉ̃ kʼarea jẽda krĩchasida baera.

13. (1) ¿Jeowabara kʼãrẽa so zʉbʉria ũdubisi Nínivedebemarãra? (2) ¿Tẽã kʼãrẽta jarasi Jesuba Nínivedebemara ʉ̃rʉ?

¹³ Adewara kʼawuapanʉ Jeowabara so zʉbʉria ũdubisita ẽbẽrarã Nínivedebemarabida. Daizezeba Jonásʼa jarasi iyara akʉbʉta Nínivedebemaraba kʼãrẽ kayirua obʉra. Mamina Nínivedebemaraba jẽda krĩchasidadera Daizezebara kĩrãduasi ãyi kayiruara. Jonásʼra maʉ̃ kʼarea mejãcha kĩrʉsi, mamina Daizezeba iyaʼa kĩrãbebisi naʉ̃ra ẽbẽrarã Nínivedebemarabara kʼawua ẽ basita saʉ̃ta biata akʉza saʉ̃ta bia ẽãta (Jon. 1:​1, 2; 3:10; 4:​9-11). Tẽã Jesuba maʉ̃ yizata zokʼasi jara ũrĩbita Jeowaba nekʼãrẽ aripe obʉta akʉza so zʉbʉria ũdubibʉta adewara Jesuba jarasi maʉ̃ra ẽbẽrarã Nínivedebemarãra jẽda piradrʉibasita Daizezeba ẽbẽrarã kʼawua oi ewaride (Mat. 12:41).

14. ¿Jeowaba kʼawua oi ewari zebʉrʉdera kʼãrẽba sãwũãi ninibitarãra?

¹⁴ Mamina, ¿kʼãrẽta jarakĩrãbʉ Jeowaba ninibitara iya kʼawua oi ewaride jẽda piradrʉbi jarabʉbara? Jesuba jarasi ʉ̃kʉrʉra jẽda piradrʉibasita ãyi kʼawua odamarẽã (Juan 5:29). Maʉ̃nera iyara jarakĩrãbasi iya mil poaga bayeda zokʼai ewarita, maʉ̃ ewaride jẽda piradrʉi baera yi bia obeta akʉza yibia ẽã obeta (Hech. 24:15). Yi bia ẽã oberãra jẽda piradrʉdayi kʼawua odaita. Maʉ̃ mawũã berabaribʉrʉdera Jeowaba Jesuʉ̃meba akʉyi maʉ̃ra ẽbẽrarãba ãya kʼawua wãta wãrĩnu oũdubidai kʼawuaita. Nínivedebema abaʉta Jeowa yiwidʼi ẽ bʉrʉ Jeowaba kãgabʉ kĩrãkʼa, maʉ̃ ẽbẽrarã Jeowabara zokʼai babi ẽ bayi (Is. 65:20). Mamina jari ẽbẽrarã Jeoware kʼẽrẽpapanʉrãra ewari jõmaʉ̃nẽ bayi (Dan. 12:2).

15. (1) ¿Kʼãrẽa jarabeda ẽ Sodoma akʉza Gomorrade beidara mia abaʉta jẽda piradrʉ ẽãta? (2) ¿Judas 7de jarabʉbara kʼãrẽta jarakĩrãbasi? (Akʉra rekuadro «¿Kʼãrẽta jarakĩrãbasi Judasbara?»).

¹⁵ Jesuba jarasi Daizezeba ẽbẽrarã kʼawua oi ewaridera, Sodoma akʉza Gomorradebemarãra audre bia wãibasita jari ẽbẽrarã Jesu ʉ̃rʉ ĩjã ẽ badaraira akʉza iya jaradiabʉ ʉ̃rʉ ĩjã ẽ badaraira (Mat. 10:​14, 15; 11:​23, 24; Luc. 10:12). ¿Kʼãrẽta jarakĩrãbʉ naʉ̃ba? ¿Jesuba jaradaba ũdubisika iyi ewaridebema ẽbẽrarãta aukʼara ẽbẽra kayiruabasita Sodoma akʉza Gomorradebemaraira? Mawũã ẽ, aukʼara bedʼeanʉma ẽ basi, iya jaradara wãrĩnubasi. Ninibitarãra ʉ̃rʉ bedʼeasidebida aukʼara bedʼea ẽ basi. Naʉ̃ra nebʉrãra ũmene Jesuba jarasi naʉ̃ bedʼeata «kʼawua odai ewari», iya maʉ̃ bedʼea jarasidera iyabaʉ ewari ʉ̃rʉ bedʼeakĩrãbasi. Sodoma Gomorra akʉza Nínivedebemarabara nemitiata osida, mamina Nínivedebemarãra Jeowaba ewarita diasi ãya nemitia obʉ jẽda krĩchadamarẽã. Kĩrãbedadrʉ Jesuba jaradata, jẽda piradrʉita kʼawua odaita maʉ̃ne jẽda piradrʉdayi yi nemitia obeadarasida (Juan 5:29). Maʉ̃ne jẽda piradrʉseabʉ ʉ̃kʉrʉ ẽbẽrarã Sodomanebemarata akʉza Gomorradebemarata, dayirãbara maʉ̃rabida Daizeze Bedʼea jaradiaseabayi.

16. ¿Kʼãrẽta kʼawuapanʉ Jeowaba ẽbẽrarã jẽda piradrʉbi ʉ̃rʉ? (Jeremías 17:10).

¹⁶ (Akʉra Jeremías 17:10). Naʉ̃ bersikulode ũdubibʉ dayirãba kʼãrẽta kʼawuapanʉta Jeowa ʉ̃rʉ, iyara biʼia kʼawua obʉta ũdukʼawuabʉ baera ẽbẽrarã so sãwũãbʉta akʉza ãya kʼãrẽ krĩchabʉta. Ẽbẽrarã jẽda piradrʉbi ewari zebʉrʉdera Jeowabara ẽbẽra aba abaka kʼawua oyi iya kʼãrẽ odadeba. Jeowabara so zʉbʉria ũdubikĩrã, maʉ̃ba iya ẽbẽra abaʉʼa so zʉbʉria ũdubibaradera ũdubibʉ, mamina ẽbẽra abaʉa kʼãrẽa so zʉbʉria ũdubita neẽ bʉrʉ ũdubi ẽ. Daizeze Bedʼeaba dajada jara ẽ bʉrʉ ẽbẽra aba jẽda piradrʉ ẽ baita dayirãbara jara ẽ baibara kʼai ẽbẽrata jẽda piradrʉita mawũã ẽ bʉrʉ jẽda piradrʉ ẽãta.

NAɄ̃ DRɄA JUEZBARA ARIPE OYI

17. ¿Ʉ̃ra zeidera kʼãrẽba sãwũãi ẽbẽrarã beidapeadarãra?

¹⁷ Adánta akʉza Evaʉ̃me Diaru kʼaidu wãnaneba ʉ̃ta ẽbẽra mejãchaʉta bei zebʉrʉ naʉ̃ drʉa jõmaʉ̃mae, beira ẽbẽrarã nejʉra (1 Cor. 15:26). ¿Kʼãrẽta berabari naʉ̃ra ẽbẽrarãʉ̃me? Bʉ ʉ̃kʉrʉ ẽbẽrarã jẽda piradrʉbʉrʉde ʉ̃ta wãita, maʉ̃rãra 144.000ra, ãyira Jesuare kʼẽrẽpapanʉ akʉza beikabayi (Apoc. 14:1). Adewara ẽbẽra mejãcha Jeowaʼa kãga ũdubi badarata jẽda piradrʉyi Jeowaba biata obera jẽda piradrʉbibʉrʉde. Jesuba mil poaga bayeda zokʼabʉde akʉza maʉ̃ tẽã Diaruba ẽbẽrarã sewabʉrʉde ãyita kʼẽrẽpapanʉbʉrʉ ewari jõmaʉ̃nẽ panañi (Dan. 12:13; Heb. 12:1). Adewara Jesuba mil poagabayeda zokʼabʉrʉde jẽda piradrʉyi ẽbẽrarã bia ẽãta oberasida, maʉ̃rane edapanʉ ẽbẽrarã Jeowa ʉ̃rʉ kʼawua ẽ badarata akʉza ʉ̃kʉrʉ yi kayirua obeadarata. Maʉ̃ne ãya kayirua oda kʼarea jẽda krĩchaseabʉ akʉza Jeoware kʼẽrẽpabaseapanʉ ewari jõmaʉ̃nẽ (Luc. 23:​42, 43). Mamina jari ẽbẽrarã krĩña Jeowaba jʉrata odapeadarãra akʉza Jeowa ʉ̃rʉ badarãra Jeowabara jẽda piradrʉbi ẽ bayi (Luc. 12:​4, 5).

18, 19. (1) ¿Kʼãrẽa kʼawuapanʉ Jeowaba ẽbẽrarã sãwũã kʼawua obʉra aripe obʉta? (Isaías 55:​8, 9). (2) ¿Kʼãrẽta kʼawuadai wuarebema artikulodera?

¹⁸ Dayirãbara bia kʼawuapanʉ Jeowaba nekʼãrẽ kʼawuabʉrʉdera jõma biʼia obʉta. Abarika Abrahánʼne kĩrãkʼa dayirãba kʼawuapanʉ Jeowara naʉ̃ drʉa jõmaʉ̃nẽbema juezta akʉza iyira kayirua okata, iyira buru biata adewara so zʉbʉria ũdubibʉta, adewara iyara iduaribibʉ yi Warrabida ẽbẽrarãta kʼawua omarẽã (Juan 5:22). Jeowaba akʉza yi Warra Jesuʉ̃mebʉrʉ kʼawuapanʉ ẽbẽra aba abakaʉ sode kʼãrẽta bʉra (Mat. 9:4). Maʉ̃ba ãya ẽbẽra aba abaka kʼawua obʉrʉdera aripe odayi.

¹⁹ Zarea odaibara ĩjãita Jeowaba ẽbẽrarã sãwũã kʼawua obʉra aripe obʉta akʉza kĩrãbedaibara dayirãbara kʼawua ẽãta sãwũã kʼawua oita ẽbẽrarã awuarabʉrʉ Jeowabʉrʉ biʼia kʼawuabʉta sãwũã kʼawua oita ẽbẽrarã (akʉra Isaías 55:​8, 9). Maʉ̃ kʼarea dayirãbara ĩjãpanʉ Jeowaba akʉza yi Warraʉ̃meba jõma ewari jõmaʉ̃nẽ aripe opanʉta. Adewara Jesubara yi Zezeba nebia erbʉta ũdubibʉ iyara jõma daucha obʉ akʉza so zʉbʉria ũdubibʉ (Is. 11:​3, 4). Zʉbʉria zroma zebʉrʉdera, ¿Jeowabara sãwũã kʼawua oi ẽbẽrarãra? ¿Dayirãba kʼãrẽta kʼawuapanʉ maʉ̃ ʉ̃rʉ? akʉza ¿kʼãrẽta kʼawuada ẽ? Yi wuarebema artikulode panʉnañi maʉ̃ra bedʼeara.