¿Kʼawuaseabʉka saʉ̃ta wãrĩnuarata?

1. ¿Kʼãrẽta krĩchapanʉ kʼãwũã wãrĩnune edabʉ baera?

DAIZEZE pʉwʉrʉbara mejãcha kãga Daizeze Bedʼeara, maʉ̃ba kʼarebabʉ baera ĩjã audre erbaita (Rom. 10:17). Wãrĩnu ĩjãpanʉ Jeowaba diasita kongregasionʼra mawũã audre ĩjãta erpanamarẽã (1 Tim. 3:15). Ũrĩpanʉ dayirã yi nãã edebari bedʼeata, ãya dayirã Daizeze Bedʼea ʉ̃rʉ wãrĩnuta jaradiabʉ baera akʉza jaradiabʉ sãwũã Daizeze odebaibarata (Heb. 13:17).

2. Santiago 5:19​ba jarabʉdebara, ¿Daizeze ode bʉrara kʼãrẽta berabariseabʉ?

² Dayirãba kʼawuapanʉmina wãrĩnu ʉ̃rʉ akʉza ĩjãpanʉmina organizasionba jarabʉta, mawũãsidu Daizezedeba jĩga wãseabʉ (akʉra Santiago 5:19). Diaruitara biga bayi Daizeze Bedʼeaba jarabʉta ĩjã ẽ wãnamarẽã akʉza Jeowa organizasionba jarabʉta (Efes. 4:14).

3. ¿Kʼãrẽa wãrĩnuare baibara? (Efesios 6:​13, 14).

³ (Akʉra Efesios 6:​13, 14). Aranʉbai Diarubara sewidata jarayi mawũã nokʼorata Jeowa ʉ̃rʉ bamarẽã (Apoc. 16:​13, 14). Akʉza kʼawuapanʉ Diarubara ewariza zarea oita Daizeze pʉwʉrʉ sãwũã sewaita (Apoc. 12:9). Maʉ̃ kʼarea yibia bayi dayirãba kĩrãkita kʼawuaita saʉ̃ta wãrĩnuta akʉza saʉ̃ta sewidata, mawũã oita wãrĩnuba jarabʉta (Rom. 6:17; 1 Ped. 1:22). Naʉ̃ta oibara zʉbʉria zromaneba ẽdrʉita.

4. ¿Kʼãrẽta kʼawuadai naʉ̃ artikulodera?

⁴ Naʉ̃ artikulode kʼawuadayi nekʼãrẽ bia ũme bʉ ʉ̃rʉ akʉza maʉ̃raba sãwũã kʼarebaseabʉta kʼawuaita wãrĩnura Daizezedeba zebʉta, adewara organizasionba jarabʉta ĩjãita. Adewara nekʼãrẽ ũbea kʼawuadaya, maʉ̃raba kʼarebayi wãrĩnuare bʼaita.

KʼÃRẼ NEBIATA ERBAIBARA KʼAWUAITA SAɄ̃TA WÃRĨNUTA

5. ¿Kʼãrẽne abarika bʉ Daizezeʼa wawia ũdubita akʉza kʼawuaita saʉ̃ta wãrĩnuta?

⁵ Jeowaʼa wawia ũdubita. Jeowaʼa wawia ũdubibara jarakĩrãbʉ oẽ baita Jeowaba kãga ẽãta iyita kãgapanʉ baera. Daizezeba dayirã biʼia akʉmarẽãra kʼawuakĩrãpanʉ saʉ̃ta wãrĩnuta akʉza saʉ̃ta sewidata. Adewara saʉ̃ta nekayiruata akʉza saʉ̃ta nekayirua ẽãta (Prov. 2:​3-6; Heb. 5:14). Edaʉde ẽbẽrarãbara opanʉ ne kʼãrẽ Jeowaba kãga ẽãta ẽbẽrarã wawiabʉ kʼarea, maʉ̃ kʼarea dayirãbara audre Daizezeʼa wawiata ũdubikĩrãpanʉ ẽbẽrarã ũdubi kaude.

6. Ẽbẽrarã 10 panʉra mia orda wãnarãra, ãyi perabʉ kʼarea, ¿Kʼãrẽta osida?

⁶ Ẽbẽrarã wawia ũdubipanʉbʉrʉ Daizezeʼa wawia ũdubi kaude, mawũãra wãrĩnu ẽãta ĩjã wãnañi. Krĩchadadrʉ, Jeowaba zokʼasi ẽbẽrarã 12 bʉta israelitara drʉa diaya adama orda wãmarẽã. Maʉ̃ranebema 10 bʉba audre wawiata ũdubisi Canaánʼnebemara Jeowaʼa wawia ũdubi kaude. Maʉ̃ kʼarea ãya jarasi: «Kaʉ̃ra ẽbẽrarãbawarara yõbeda ẽ, audre zareabarabʉ baera dayirãira» (Núm. 13:​27-31). Wãrĩnu cananeorãra audre zarea barachʉasi israelitarãira, maʉ̃ kʼarea ãya jaraside maʉ̃rabawara yõnaẽãta, Jeowaba sãwũã kʼarebabʉta kĩrãduasida. Adewara ãyara krĩchaibarabasi Jeowaba omarẽã zokʼadata akʉza krĩchaibarabasi Jeowaba ãyi sãwũã kʼarebadata. Ãya maʉ̃ta osibʉrʉ kʼawuakasida cananeorãra kʼãrẽ ẽãta Daizeze nããra. Mamina Calebta Josuéʉ̃mera jipa awuara panasi, ãyara ĩjãta ũdubisida akʉza jʉrʉsida Daizezeba biʼia akʉmarẽã ãyita, maʉ̃ kʼarea pʉwʉrʉra jarasida: «Jeowaba dayirãta bia akʉbʉbʉrʉ, edeyi maʉ̃ drʉaeda mõbe maʉ̃ta diayi» (Núm. 14:​6-9).

7. ¿Kʼãrẽba kʼarebai audre Jeowa wawia ũdubidaita? (Akʉra potota).

⁷ Dayirãba nekʼãrẽ jidai naweda nãã krĩchaibara Jeowaba kãgabʉde obʉ kʼawuaita, maʉ̃ta odara Jeowaʼa audre wawiata ũdubidayi (Sal. 16:8). Bʉa Daizeze Bedʼea akʉnʉmʉne krĩchara: «Mʉ̃ra mama basibʉrʉ, ¿kʼãreta okasi?». Bari jaradaita, bʉa maʉ̃ra yumakẽrãra 10ba jarabʉta ũrĩbʉbʉrʉ, ¿bʉra maʉ̃ra ẽbẽra 10ba jarabʉ kʼarea peraika mawũã ẽ bʉrʉ Jeowata wãrĩnu wawia ũdubibʉ baera oika Jeowaba kãgabʉta? Israelitara mejãchaʉba Josuéba Calebʼʉ̃meba wãrĩnu jarabʉta ĩjãna ẽ basi baera eda wã ẽ basi Daizezeba Drʉa diaya abʉma (Núm. 14:​10, 22, 23).

8. ¿Kʼãrẽ nebia erbaita zarea odaibara akʉza kʼãrẽã?

⁸ Edabʉta krĩchaita. Jeowabara wãrĩnuta jaradiabʉ jari yi eda krĩchapanʉrãra (Mat. 11:25). Dayirãba wãrĩnu kʼawua jʉ̃drʉsidera iduaribisi wuabemaraba jaradiamarẽã (Hech. 8:​30, 31). Maʉ̃ kʼarea jʉra kʼawua bʼaibara ʉ̃ta bʼaita krĩcha ẽ baita. Dayirãta ʉ̃ta bʉta krĩchabʉbʉrʉ dayirãba krĩchabʉtrʉ audre yibia bayi Daizeze Bedʼeaba jarabʉira mawũã ẽ bʉrʉ organizasionba jarabʉira.

9. ¿Kʼãrẽba kʼarebai eda bʼaita krĩchaita?

⁹ Kĩrãbepanʉbʉrʉ Jeowara audre yi zromata dayirãira, maʉ̃ba kʼarebayi eda bʼaita krĩchaita (Sal. 8:​3, 4). Adewara yiwidʼibʉrʉde Jeowaʼa widibaibara eda bʼaita krĩchabimarẽã akʉza iyaʼa idu yi jaradiabita. Mawũã odara iya kʼarebayi iyi organizasioneba akʉza iyi Bedʼeadeba mawũã iyide kĩrãkʼa krĩchadamarẽã. Daizeze Bedʼea ʉ̃rʉ akʉbʉrʉde krĩchara kʼãrẽta krĩchabʉta Jeowabara eda bʼai krĩchai ʉ̃rʉ akʉza ʉ̃ta bʼai krĩchabʉ ʉ̃rʉ. Bʉaʼa kongregasione pribilegio zromata diadara audre zarea obara eda bʼaita krĩchaita.

KʼÃRẼBA KʼAREBAI WÃRĨNUARE BʼAITA

10. ¿Jeowabara kʼairata zokʼa zebʉrʉ iyi pʉwʉrʉa jaradiaita?

¹⁰ Jeowa organizasionba jarabʉta ĩjã bʼaidʉa. Israel pʉwʉrʉdera Jeowabara zokʼasi Moisésta maʉ̃are Josuéta, mawũã iyi pʉwʉrʉa jaradiaita (Jos. 1:​16, 17). Israelitaraba maʉ̃ra ʉ̃rʉ ĩjãbasidera ãyira bia wãbasi. Siglo nããbemanera Jeowaba zokʼasi 12 apostolera mawũã kongregasion kristiana jaradiamarẽã (Hech. 8:​14, 15). Maʉ̃ tẽã, awuru zõrãrã Jerusalénʼnebemaba kʼarebasi ãyira, «kongregasionʼrabara audre zarea ĩjã wãsida akʉza ewariza wari wãsida» zõrãrãba jarabʉta ĩjãpanasi baera (Hech. 16:​4, 5). Idi ewadebida dayirãra Jeowaba nebia diabʉ iyi organizasionba jarabʉta ũrĩpanʉne. ¿Jeowara sãwũã bʉ ẽbẽrarã iya jidada bedʼeata dayirãba ũrĩna ẽ bʉrʉ? Maʉ̃ bedʼea panʉita akʉdaya kʼãrẽta berabarisita israelitara Daizezeba Drʉa diaya adama wãibasidade.

11. ¿Kʼãrẽta berabarisi jari ẽbẽrarã Moisés bedʼea ũrĩ ẽ badara? (Akʉra potota).

¹¹ Israelitara Jeowaba Drʉa diaya adama wãbaside ʉ̃kʉrʉ yumakẽrãrãra Moisés ʉ̃rʉ aña bedʼea jʉ̃drʉsida akʉza iya sãwũã zokʼabada ʉ̃rʉ. Ãya jarasida: «Pʉwʉrʉra jõma neneẽãbʉ [bari Moisés awa ẽ], Jeowara ãyi ẽzadrabʉ» (Núm. 16:​1-3). Wãrĩnu Jeowaitara pʉwʉrʉra jõma neneẽãbasi, mamina iya jidasi Moisésta iyi pʉwʉrʉ daucha jʉre edemarẽã (Núm. 16:28). Maʉ̃ kʼarea ãyi Moisés ʉ̃rʉ imitia bedʼeabʉde wãrĩnubaira Jeowa ʉ̃rʉbʉrʉ imitia bedʼeabasi. Ãyara krĩcha ẽ basi Jeowaba kʼãrẽ kãgabʉta, awuarabʉrʉ krĩchapanasi ãya kãgabʉtrʉ. ¿Ãyara kʼãrẽta kãgabasi? Ãyita bia akʉdamarẽã akʉza nokʼo babidamarẽã. Jeowabara makenasi maʉ̃ra yumakẽrãrãra akʉza iyi kʼaidu pananarasida (Núm. 16:​30-35, 41, 49). Idi ewadebida Jeowabara bia akʉ ẽ jari ẽbẽrarã iyi organizasionba jarabʉ bedʼeata ũrĩ ẽ bʉrʉ.

12. ¿Kʼãrẽa ĩjãseapanʉ Daizeze organizasionba jarabʉta?

¹² Bʉ kʼãrẽa Jeowa organizasionba jarabʉ ũrĩra. Dayirã organizasion nãã edebariba Daizeze Bedʼea bia ũrĩbʉrʉdera ãyara nekʼãrẽ mesera obʉ mawũã Daizeze Bedʼeaba jarabʉ kĩrãkʼa oita akʉza Daizezeba zokʼabʉde yiwidʼita (Prov. 4:18). Mawũã opanʉ Jeowata sobiabikĩrãbʉ baera, ãya nekʼãrẽ jidabʉrʉdera nãã jʉrʉbʉ Daizeze Bedʼeadebemane, maʉ̃ra bedʼea bia baera.

13. ¿Kʼãrẽpe bedʼea biara akʉza kʼãrẽta odaibara?

¹³ «Obara bedʼea bia mʉ̃a bʉaʼa jaradiadara» (2 Tim. 1:13). ¿Saʉ̃ maʉ̃ra bedʼea biarãra? Jesúsba jaradiada Daizeze Bedʼeade eda bʉta (Juan 17:17). Maʉ̃ bedʼeadeba jõma zebʉ dayirãba ĩjãpanʉra, Daizeze organizasionba jaradiabʉ maʉ̃ta odamareã, maʉ̃ta ora bia wãñi.

14. ¿Kʼãrẽta osida ʉ̃kʉrʉ kristianora Tesalónicadebemarãra?

¹⁴ ¿Kʼãrẽta berabariseabʉ dayirãba ĩjã ẽ bʉrʉ bedʼea bia ʉ̃rʉ? Akʉdaya kʼãrẽta berabarisita siglo nããbemane. Ʉ̃kʉrʉ kristianorabara jarapanasi Daizeze ewarira zesita. Ʉ̃kʉrʉba krĩchasida apostol Pabloba bʉsita karta maʉ̃ ʉ̃rʉ bedʼeabʉta. Ʉ̃kʉrʉ mebẽrã Tesalónicadebemaraba maʉ̃ ʉ̃rʉ audre bia jʉrʉi kaude ĩjã kʼãrãpe jaradia jʉ̃drʉsida. Ãya Pabloba jaradiadata kĩrãbesidabʉrʉ maʉ̃ yi edebi ẽ bakasi (2 Tes. 2:​1-5). Apostol Pablobara ũrãgʼa diasi jõma ĩjãna ẽ bamarẽã ãya kʼãrẽ ũrĩbʉra akʉza ãyita mawũã berabari ẽ bamarẽã, naʉ̃ karta ũmenebemata bʉsi naʉ̃ba jarabʉ: «Mʉ̃ra Pablo, naʉ̃ bedʼeara mʉ̃ juwaba bʉbʉrʉa, mʉ̃a karta jõma obʉra kʼãwũã bʉbʉ. Mʉ̃a kʼãwũã bʉchu» (2 Tes. 3:17).

15. ¿Kʼãrẽta odaibara yi sewabida ẽ baita? Jarada yiza aba (Akʉra potota).

¹⁵ Pabloba kʼãwũã tesalonisensesʼra jaradiadaba, ¿kʼãrẽta jaradiabʉ dayirãʼa? Dayirãba ũrĩnara bedʼea bia dayirãma bʉta mamina Daizeze Bedʼeaba jarabʉ kĩrãkʼa bʉ ẽ bʉrʉ, maʉ̃ne jʉra kʼawuapanaibara. Unión Soviéticade ẽbẽrarã Daizeze pʉwʉrʉra jʉrapanʉraba kartata dedekasida, ãyaʼã krĩchabisida maʉ̃ kartara sentral mundialdeba zesita. Maʉ̃ kartadera jarabasi awuru organizasionta omarẽã. Maʉ̃ karta wãrĩnu kĩrãkʼa basimina yi kʼẽrẽpa pananarãra maʉ̃ne eda bae ẽ basi, ãya biʼia kʼawuapanasi baera Daizeze Bedʼeade kʼawuada kĩrãkʼa ba ẽ basita. Idi ewade, maʉ̃ne kĩrãkʼa Daizeze pʉwʉrʉ jʉrapanʉrãbara internetʼta zokʼapanʉ mawũã Jeowa pʉwʉrʉta ãba ba ẽ bamarẽã akʉza mawũã aña krĩchabidaita. Maʉ̃ kʼarea dayirãra jʉra kʼawuapanaibara akʉza dayirãba ũrĩpanʉra kʼawuaibara wãrĩnu Daizeze Bedʼeaba jarabʉ kĩrãkʼa bʉta (2 Tes. 2:2; 1 Juan 4:1).

16. Romanos 16:​17, 18​ba jarabʉdebara, ¿kʼãrẽta oibara ẽbẽra abaʉta wãrĩnuneba jĩga wãsibʉrʉ?

¹⁶ Jeowaʉ̃me kʼẽrẽpa panʉrabawara ãba bʼaidua. Jeowabara kãgabʉ ãba yiwidʼidamarẽã. Maʉ̃ta opanʉ jõmaʉ̃ta wãrĩnuare bʉbʉrʉ. Yi wãrĩnuneba jĩga wãbʉrʉbara obʉ kongregasionta ãba ba ẽ bamarẽã. Maʉ̃ kʼarea Daizezebara jarabʉ maʉ̃ra ẽbẽrarãneba jĩgara bamarẽã, maʉ̃ta oda ẽ bʉrʉ dayirãsida wãrĩnuneba jĩga baseabʉ (akʉra Romanos 16:​17, 18).

17. ¿Kʼãrẽta berabariseabʉ dayirãba wãrĩnuta kʼawuapanʉbʉrʉ akʉza maʉ̃are bʉbʉrʉ?

¹⁷ Dayirãba kʼawuapanʉbʉrʉ saʉ̃ta wãrĩnuta akʉza maʉ̃are panʉbʉrʉ dayirãra bia panañi Daizezeʉ̃me, adewara dayirãba ĩjãbʉra zarea bayi (Efes. 4:​15, 16). Diaruba sewida jarabʉa idu yi edebi ẽ bayi akʉza Jeowaba kʼarebayi zʉbʉria zroma zebʉrʉdera. Wãrĩnuare bara, mawũã Jeowara bʉare bayi (Filip. 4:​8, 9).