Lepanʉraba widipanʉta
¿1 Timoteo 5:21ne «angelera jidadapeada» abʉra kʼaira?
Pabloba naʉ̃ bedʼeata jarasi Timoteoa, iyira Pablo kĩrãkʼa zõrãrã kongregasionebemabasi: «Mʉ̃a Daizeze kĩrãbita, Jesús kĩrãbita akʉza angelera jidadapeada kĩrãbita bʉa jarabʉ nama jarabʉta jõma daucha ũdubimarẽã, yãrã mitia akʉ ẽã» (1 Tim. 5:21). ¿Kʼaira maʉ̃ra angelera jidadapeadara?
Nããra kʼawuadayi kʼaira ẽãta maʉ̃rãra. Kʼawuapanʉ Pablora maʉ̃nera 144.000ra ʉ̃rʉ bedʼea ẽ basita, ¿kʼãrẽa mawũã kʼawuapanʉ? Pabloba Timoteoa maʉ̃ karta bʉsidera Jesús kʼaidubemarãra akʉza wuabema ʉ̃ta wãirãra waidide nama egorode panasi. Maʉ̃ba ãyi ẽ basi angelera jidadapeadara (1 Cor. 15:50-54; 1 Tes. 4:13-17; 1 Juan 3:2).
Mia angelera Noé ewaride Jeowa bedʼea ũrĩ ẽ badara ẽ. Maʉ̃ra angelerãra Diaruare wãsida, mawũã angelera kayiruara basida akʉza Jesús nejʉra (Gén. 6:2; Luc. 8:30, 31; 2 Ped. 2:4). Aranʉbai naʉ̃ra angelerãra Jesúsba zobea daukʉrenʉmʉne ibalbʉeyi mil poaga bayeda, maʉ̃ tẽã makenañi ãyita akʉza Diaruta (Jud. 6; Apoc. 20:1-3, 10).
1Timoteo 5:21ne bedʼeabʉ Daizeze ʉ̃rʉ akʉza Jesús ʉ̃rʉ, maʉ̃ne eda jarabʉ naʉ̃ra angelera jidadapeadarasida, maʉ̃ kʼarea jaraseapanʉ maʉ̃ra angelerãra kʼẽrẽpapanʉta adewara ãyibawara trajabʉta.
Mejãchabʉ angelera kʼẽrẽpabʉta (Heb. 12:22, 23). Krĩcha ẽ baibara angelera jõmaʉ̃ba iyabaʉta opanʉta (Apoc. 14:17, 18). Bari jaraita, ewari aba Jeowaba angel abaʉʼa jarasi 185 mil gorogorora asiriorata makenamarẽã (2 Rey. 19:35). Jesúsba jaradadeba kʼawuapanʉ bʉta ʉ̃kʉrʉ angelerata ẽbẽrarã nemitia opanʉrata akʉza Daizezeba zokʼabʉde bʉ ẽãrata ãĩ bʉeita iyi Nokʼodeba (Mat. 13:39-41). Bʉbaibara awuru angelerata 144.000ra waidide nama egorodebʉta ãba jʉredape ʉ̃ta edeirata (Mat. 24:31). Adewara awuru angeleraba kʼarebabʉ dayirãta neida berabari ẽ baita Salmo 91:11ne jarabʉ kĩrãkʼa (Mat. 18:10; naʉ̃ testoʉ̃me akʉra Mateo 4:11; Lucas 22:43).
1 Timoteo 5:21ne angelera jidadapeada abʉra trajapanasibaibara kongregasion akʉita. Testora naʉ̃ bersikulo nãã akʉza tẽã jarabʉba ũdubibʉ bedʼeanʉmasita zõrãrã kongregasionebemara ʉ̃rʉ akʉza ũrãgʼabasita mebẽrãba naʉ̃ra zõrãrã wawia ũdubidamarẽã. Zõrãrãbara ãyi trajora biʼia oibarabasi, yãrã mitia akʉ ẽã akʉza nekʼãrẽ oita jidaibarade mesera jida ẽ baibarabasi, ¿kʼãrẽa? Pabloba Daizeze jaure zareadeba jara ũrĩbisi nekʼãrẽ jipade yibiata, iya jarasi Jeowaba, Jesúsba akʉza angelera jidadapeadaraba akʉpanʉta zõrãrãba kongregasionebemara sãwũã edapanʉta. Mawũẽra kʼawuapanʉ bʉta ʉ̃kʉrʉ angelera Jeowaita trajabʉta kongregasionʼra akʉbʉde, bari jaraita ãya akʉpanʉ Jeowa ode panʉrata, akʉpanʉ sãwũã jaradiapanʉta, mõbe ãya ũdubʉta Jeowaʼa jarapanʉ (Mat. 18:10; Apoc. 14:6).