Dayirãra doba panʉ ẽ

1, 2. (1) ¿Kʼãrẽa kʼawuapanʉ bedʼea zroma erpanʉnera doba ba ẽ baita? (2) ¿Kʼãrẽta kʼawuadai naʉ̃ artikulodera?

DAYIRÃ bedʼea zroma erbʉdera abapai sentiseabʉ, maʉ̃ba oi zromane aduada kĩrãkʼa sentiseabʉ. Mamina dayirãra abapai bʉ ẽ Jeowaba kʼawuabʉ dayirã sãwũã sentinʉmʉra akʉza kʼãrẽ sãwũã berabarinʉmʉra. Jeowaba naʉ̃ta jarabʉ iyi ode kʼẽrẽpa panʉra: «Mʉ̃a kʼarebayi» (Is. 41:10).

² Naʉ̃ artikulode kʼawuadayi bedʼea kimare Jeowaba sãwũã kʼarebabʉta dayirãra. Aba, jaradiabʉ dayirãʼa. Ũme, dayirãba nesidabʉta diabʉ. Ũbea, bia akʉbʉ. Kimare, dayirãʼa so zarea diabʉ. Jeowaba dayirã jarabʉ krĩcha ẽã kʼãrẽ bedʼea zromane berabaribʉta dayirã kʼawa bʼaita, maʉ̃ba dayirãbara kʼawuapanʉ Jeowabara dayirãra doba amae ẽ baita.

JEOWABA JARADIABɄ

3, 4. ¿Jeowabara dayirãra sãwũã jaradiabʉ? (Salmo 48:14).

³ (Akʉra Salmo 48:14). Jeowabara jʉ̃ã ẽ dayirã dobaʉba kʼawua jidamarẽã kʼãrẽta oita. Jeowabara dayirã iyi bedʼeata diabʉ kʼãrẽ dayirãba krĩcha biata jidamarẽã. Adewara dayirãba kʼãrẽ obʉdeba akʉza sãwũã krĩchabʉdeba ũdubimarẽã iyide kĩrãkʼa obʉta (Sal. 119:105). Dayirãba ũrĩpanʉbʉrʉ Daizeze Bedʼeaba jaradiabʉta idi ewade dayirãra sobia baseabʉ akʉza ʉ̃ra zeidebida, maʉ̃ awuara dayirãra ewari jõmaʉ̃nẽ baseapanʉ.a Bari jaraita, Jeowabara jaradiabʉ wuabemaraba dayirã ʉ̃rʉ mitiata osidabʉrʉ kĩrãduaibarata maʉ̃ra, wãrĩnuta jaradiaibarata akʉza kãga ũdubibarata wuabemara (Sal. 37:8; Heb. 13:18; 1 Ped. 1:22). Dayirãba naʉ̃ra nebiadebemata ũdubipanʉbʉrʉ zeze bia bayi, papa bia bayi, kima bia bayi akʉza neũdukʼawua bia bayi.

⁴ Jeowabara iyi Bedʼeade amaesi ʉ̃kʉrʉ ẽbẽrarã dayirã kĩrãkʼa bedʼea zromane berabaridata (1 Cor. 10:13; Sant. 5:17). Dayirãba naʉ̃ta lebʉrʉdera nekʼãrẽ ũme kʼawuapanʉ. Nããra, naʉ̃ drʉadera dayirãtrʉ abapai bedʼea zromane berabaribʉ ẽ, wuabemara ẽbẽrarãsida bedʼea zromane berabaribʉ akʉza maʉ̃neba ẽdrʉsidata Jeowa kʼarebadeba (1 Ped. 5:9). Ũme, kʼawuayi kʼãrẽba kʼarebaita bedʼea zroma erpanʉra sobiade awuantaita (Rom. 15:4).

5. ¿Jeowabara kʼairata zokʼabʉ dayirã jaradiaita?

⁵ Adewara Jeowabara zokʼabʉ mebẽrãta dayirãʼa jaradiaita.b Bari jaraita zõrãrã kongregasion akʉbariraneba. Naʉ̃rabara diskursota diabʉ maʉ̃neba dayirãba ĩjãbʉta audre zarea babibʉ akʉza kʼarebabʉ mebẽrãbawara ãba bʼaita (Hech. 15:40–16:5). Zõrãrã kongregasionebemabida biode kʼarebabʉ. Naʉ̃rabara mebẽrã kongregasionebema aba abaka akʉbʉ (1 Ped. 5:​2, 3). Yibarirabara biode kʼarebabʉ ãyi wũãwũãra jaradiaita audre kãgamarẽã Jeowata akʉza krĩcha biata jida kʼawuamarẽã. Adewara Daizeze ode kʼẽrẽpa panamarẽã (Prov. 22:6). Mebẽrã wẽrãra Daizeze ode kʼẽrẽpabʉbara biode kʼarebabʉ ãyi yizadeba mebẽrã wẽrãra warrarata akʉza maʉ̃ra ũrãgʼata ibiade jaradiabʉdeba (Tito 2:​3-5).

6. ¿Kʼãrẽta odaibara Jeowaba jaradiabʉdeba bia wãnaita?

⁶ Jeowabara dayirãra nekʼãrẽ jõma diabʉ bia wãmarẽã. Mamina, ¿kʼãrẽta sãwũã odaibara Jeowaba dayirã jaradiabʉdeba dayirã bia wãita? Daizeze Bedʼeaba Proverbios 3:​5, 6de naʉ̃ ũrãgʼa biata jaradiabʉ: «Wãrĩnu soiduba ĩjãra Jeowata, adewara bʉa biʼia ũdukʼawuabʉta ĩjãrãra». Dayirãba nama jarabʉta odara, ¿sãwũã wãnai? «Mawũãra iya bʉra jipa wãbiyi». Nama jarabʉta opanʉbʉrʉ dayirãra mejãcha bedʼea zroma ũduda ẽ bayi akʉza audre sobia panañi. Jeowaʼa biga diapanʉ iya dayirãta ũdukʼawuabʉ baera akʉza aba abakaʉba ũrãgʼa nesidabʉta diabʉ baera (Sal. 32:8).

JEOWABARA DIABɄ DAYIRÃBA NESIDABɄRA

7. ¿Filipenses 4:19dera Jeowabara sãwũã kʼarebaita jarabʉ dayirãra?

⁷ (Akʉra Filipenses 4:19). Jeowabara dayirã jaradiabʉ sãwũã iyi ode kʼẽrẽpa bʼaita, mamina maʉ̃ awuara dayirãta zarea opanʉbʉrʉ yiko ũduita, wua edaita akʉza dayirã sama bʼaita Jeowaba maʉ̃nebida biode kʼarebabʉ (Mat. 6:33; 2 Tes. 3:12). Mamina edaʉde dayirãra krĩcha zroma obʉ dayirãba nesidabʉ erbaita, maʉ̃ kʼarea Jeowaba jarabʉ aukʼara krĩcha oẽ marẽã maʉ̃ ʉ̃rʉ (akʉra nããbema nota de estudio Mateo 6:25debʉta). ¿Kʼãrẽa? Jeowaba jarabʉ iyi ode kʼẽrẽpa panʉrata doba amae ẽ baita akʉza ãya nesidabʉra jõma diaita (Mat. 6:8; Heb. 13:5). Maʉ̃ba dayirãbara ĩjãseapanʉ Jeowaba jarabʉra aripe oita, dayirãba nesidabʉra diaita.

8. ¿Jeowabara sãwũã kʼarebasi Davidʼra?

⁸ Akʉdaya Jeowaba sãwũã kʼarebasita Davidʼta iyi nokʼo Saúlba pewãbaside. Jeowabara Davidʼa akʉza iyi gorogorora ãya nesidabʉra diabasi. Maʉ̃ba Davidbara naʉ̃ta jarasi: «Mʉ̃ra warrara basi atiara mʉ̃ra zõrãrã, mamina mʉ̃ara ũduka ẽbẽra kʼẽrẽpabʉra doba amaepanʉta, mia yi wũãwũãrasida pan jʉrʉbʉta» (Sal. 37:25). Davidʼde kĩrãkʼa bʉabida ũdu zebʉrʉbaibara sãwũã Jeowaba bʉ kʼareba zebʉrʉta bʉa bedʼea zroma erbʉde akʉza kʼãrẽ nesidabʉta akʉza ũdubʉbaibara sãwũã wuabemara mebẽrãsida iyaba kʼarebabʉta.

9. ¿Jeowabara sãwũã kʼarebabʉ iyi pʉwʉrʉra neida berabaribʉrʉdera? (Akʉra potota).

⁹ Jeowabara mejãcha kʼarebabʉ iyi ode kʼẽrẽpa panʉra neida berabaribʉrʉdera. Bari jaraita, Jerusalénʼne mebẽrãra jarrababa mejãcha zʉbʉrianʉmasi. Maʉ̃ne wuabemara mebẽrãba biode kʼarebasi maʉ̃raba nesidabʉta diaita (Hech. 11:​27-30; Rom. 15:​25, 26). Idi ewadera abarika obʉ. Jeowabara mebẽrãneba kʼarebabʉ neida berabaribʉrʉdera ãya erbʉta diapanʉneba, yikota, wuata, baniata, remediota, mawũã ãyi zʉbʉriabʉ kʼarebaita. Akʉza bʉ mebẽrã de ãrĩna ara obarita akʉza ãba yi jʉrebari de ãrĩnata. Adewara Jeowabara zokʼa bʉebʉ mebẽrãta naʉ̃ra mebẽrãba ãya nekʼãrẽ aduada kʼarea mawũã ẽ bʉrʉ ãyi mebẽrã beida kʼarea so zarea diamarẽã.c

10, 11. ¿Kʼãrẽta kʼawuapanʉ Boris nebʉradeba?

¹⁰ Jeowabara bia edabʉ wuabema ẽbẽrarã iyi ode panʉ ẽã sida, maʉ̃rabida ãya nesidabʉta diabʉ. Dayirãbara Jeowade kĩrãkʼa opanʉ kʼarebapanʉne wuabemara ẽbẽrata ãya nesidabʉde (Gál. 6:10). Mawũã obʉba kʼarebaseabʉ naʉ̃raba Jeowa ʉ̃rʉ ibia bedʼeadamarẽã. Akʉdaya Boris berabaridata, iyira kolegiodebema rector akʉza Ucranianebema. Adewara iyira Jeowa ʉ̃rʉ Kʼawuabipanʉrã ẽ. Borisbara Jeowa ʉ̃rʉ Kʼawuabipanʉrã warrara iyi kolegiode estudiabʉra bia edasi. Akʉza wawiabasi maʉ̃raba ĩjãbʉra. Mawũãbʉta yõta baesi maʉ̃ drʉade maʉ̃ kʼarea wãibarabasi mamaʉbara. Iyi jʉ̃ẽnainʉ Jeowa ʉ̃rʉ Kʼawuabipanʉrãbara bia edasida. Tẽã Borisʼra Jesús beida jẽda kĩrãbepanʉma wãsi. Iya jõma krĩchabʉde Jeowa ʉ̃rʉ Kʼawuabipanʉrãba kʼãrẽ odata iyi kʼarebadaita, naʉ̃ta jarabʉ: «Jeowa ʉ̃rʉ Kʼawuabipanʉrãbara mʉ̃ra bia edasida maʉ̃ kʼarea ãyaʼa ewari jõmaʉ̃nẽ biga diabʉ».

¹¹ Dayirã jõmaʉ̃ba wuabema ẽbẽrarã bia edaibara Jeowade kĩrãkʼa maʉ̃rata Jeowa ʉ̃rʉ Kʼawuabipanʉrã ẽ mina (Luc. 6:​31, 36). Dayirãba ãyaʼa mawũã kãga ũdubibʉba akʉza bia edabʉda kʼarebaseabʉ naʉ̃rasida Jeowa ode bamarẽã (1 Ped. 2:12). Maʉ̃ra ẽbẽrata Jeowa ode wãsita mawũã ẽ bʉrʉ wã ẽãta dayirãitara audre yibia wuabemara kʼareba bʼaita maʉ̃ba dayirãta mejãcha sobiabibʉ baera (Hech. 20:35).

JEOWABA AKɄBɄ DAYIRÃRA

12. ¿Kʼãrẽta oya abʉ Jeowabara iyi ode panʉrabari? (Salmo 91:​1, 2, 14).

¹² (Akʉra Salmo 91:​1, 2, 14). Idi ewade Jeowaba jarabʉ iya kʼarebaita iyi pʉwʉrʉdebemarãra iyideba jĩga wã ẽ marẽã. Jeowa ode panʉrabara iyaʼa yiwidʼipanʉ iya kãgabʉde, maʉ̃ba Jeowabara iduaribi ẽ bayi Diaruba iyaʼa mawũã yiwidʼipanʉta aduabimarẽã (Juan 17:15). Zʉbʉria zroma zebʉrʉdera dayirãbara kʼawuapanʉ Jeowabara iya jarabʉra aripe oita, iya wãrĩnu akʉita dayirãra, dayirãba nesidabʉ diabʉde akʉza kʼarebabʉde iyideba jĩga wã ẽ baita (Apoc. 7:​9, 14).

13. ¿Jeowabara iyi ode panʉra aba abaka sãwũã kʼarebabʉ?

¹³ Mamina, ¿Jeowabara iyi ode panʉra aba abaka sãwũã kʼarebabʉ? Nããra, Jeowabara iyi Bedʼeata diabʉ kʼãrẽ mawũã kʼawuadamarẽã saʉ̃ta bigata akʉza saʉ̃ta zeri ẽãta (Heb. 5:14). Adewara iyi Bedʼeaba jarabʉde opanʉbʉrʉ naʉ̃ba kʼarebayi dayi sobia bʼaita, dayi kakua bia erbaita akʉza audre Jeowa kʼawa bʼaita (Sal. 91:4). Maʉ̃ awuara Jeowabara diabʉ mebẽrã kongregasionebemarata kʼarebaita Jeowa ode kʼẽrẽpa panamarẽã (Is. 32:​1, 2). Dayirãta mebẽrã kongregasionebemarabawara ãba panʉbʉrʉ naʉ̃ba kʼarebayi so zarea bʼaita akʉza nemitia oita zebʉa yi edebi ẽ baita (Prov. 13:20).

14. (1) ¿Kʼãrẽa Jeowabara dayirã bedʼea zroma jõmaʉ̃ta ãĩ bʉe ẽ? (2) ¿Salmo 9:10dera kʼãrẽta oya abʉ Jeowabara? (Akʉra notata).

¹⁴ Jeowabara nawedara iyi ode pananara diabasi ãya kʼãrẽ nesidabʉta, mamina ewari jõmaʉ̃nẽ mawũã ba ẽ basi. Daizeze Bedʼeaba jaradiabʉ badu ẽbẽrata bedʼea zromane berabariseabʉta (Ecl. 9:11). Adewara nawedara Jeowabara iduaribisi iyi ode panʉrãra bedʼea zromane berabarimarẽã akʉza idi ewadebida mawũã berabaribibʉ. Mamina, ¿kʼãrẽa mawũã obʉ? Mawũã obʉ ũdubita Diarura sewanebʉrʉ omiata (Job 2:​4-6; Mat. 23:34). Idi ewadera Jeowabara iyi ode panʉra bedʼea zromara jõma ãĩ bʉe ẽ, mamina iyi ode panʉrabara kʼawuapanʉ Jeowabara iyaʼa kãga ũdubipanʉrãra doba amae ẽãta (Sal. 9:10).d

JEOWABA SO ZAREA DIABɄ

15. ¿Jeowabara sãwũã so zarea diabʉ Daizeze Bedʼeadeba, yiwidʼibʉdeba akʉza mebẽrãneba? (2 Corintios 1:​3, 4).

¹⁵ (Akʉra 2 Corintios 1:​3, 4). Dayirã bedʼea zromane berabaribʉrʉdera mejãcha krĩcha zroma obʉ, mawũã ẽ bʉrʉ neida berabaribʉrʉde. Atiara maʉ̃ne berabarinʉmʉbaibara bʉra. Mawũã berabarinʉmʉnera doba sentibʉ, dayima kʼaiba kʼarebai neẽ kĩrãkʼa. Edaʉde krĩcha zeseabʉ bʉ mawũã berabarinʉmʉnera mia kʼaiba kʼawua ẽãta bʉ kʼãrẽãba sopʉabʉra. Mamina kʼawuabara Jeowabara kʼawuabʉta bʉ kʼãrẽãba sopʉabʉra akʉza iya kʼarebaseabʉta, adewara bʉa badu bedʼea zroma ũdubʉrʉde Jeowaba so zarea diaseabʉta bʉaʼa. ¿Sãwũã oseabʉ Jeowabara maʉ̃ra? Iyi bedʼeadeba, yiwidʼibʉdeba akʉza mebẽrã kongregasionebemaneba. Bʉta Jeowaʼa soiduba yiwidʼibʉrʉdera Jeowaba kʼarebabʉ bʉ aduʼa sentita, so aduʼa bʼaita (Filip. 4:​6, 7). Adewara bʉa Daizeze Bedʼea akʉbʉrʉde ũduyi Jeowaba bʉ kʼãrẽãba kãgata akʉza iyi krĩcha biata ũduyi. Adewara aduʼa bayi kʼawuabʉ baera Jeowaba kʼãrẽ nebiata weita bʉita. Adewara dayirã ãba yi jʉrebarieda wãbʉrʉdera mama jaradiapanʉba so zarea diabʉ akʉza mamara mebẽrãbawara ãbapanʉ, ũdupanʉ mebẽrãba dayirã kʼãrẽãba kãgata.

16. ¿Kʼãrẽta jaradiabʉ Nathan akʉza Priscilla berabaridadeba?

¹⁶ Jeowaba Daizeze Bedʼeadeba dayirã sãwũã so zarea diabʉta biʼia ũrĩta akʉdaya naʉ̃ nebʉrata. Nathan akʉza Priscilla nebʉrata. Ãyira Estados Unidosdebema. Aranʉweda ãya krĩchasida wãita kʼarebade kongregasion nesidabʉmae awuru pʉwʉrʉde. Nathanba naʉ̃ta jarabʉ: «Daibara ĩjãpanasi Jeowaba kʼarebaita daira». Mamina ãyi mainʉ jʉ̃ẽnata dããraba ẽãne Nathan Priscillaʉ̃mera kayasida akʉza ãyira plata mejãcha erba ẽ basi. Maʉ̃ba jẽda wãsida ãyi drʉaeda. Mamina mainʉ jʉ̃ẽbʉrʉdebida ãyitara zare basi plata ũduira. Nathanba jara ũrĩbibʉ ãyi mawũã berabariside kʼãrẽta krĩchasidata. Iya jarabʉ: «Daiba maʉ̃nera krĩchasida Jeowabara kʼãrẽa kʼareba ẽãta daira, iyira kʼãrẽa kĩrʉbʉta daiʉ̃mera». Mamina tẽã ãya kʼawuasida Jeowara ãyiʉ̃me kĩrʉba ẽ basita, Jeowabara ãyira doba amae ẽ basita. Nathanba naʉ̃ta jarabʉ: «Dai mawũã bedʼea zromane berabarinʉmʉbasidera Daizeze Bedʼeara dai neũdukʼawua kĩrãkʼa basi, maʉ̃ba ũrãgʼa diabasi baera, so zarea diasi baera daiba nesidabʉde. Maʉ̃ne daiba kʼawuasi yibia ẽãta aukʼara daiba kʼãrẽ bedʼea zroma ũdunʉmʉ ʉ̃rʉ krĩchaira, awuarabʉrʉ krĩchaibarata Jeowaba sãwũã kʼarebanʉmʉ ʉ̃rʉ akʉza naʉ̃ba kʼarebasi daiba ʉ̃ra zeide badu bedʼea zroma ũdubʉrʉde awuantaita».

17. ¿Kʼãrẽba kʼarebasi mebẽã Helga so zarea bʼaira? (Akʉra potota).

¹⁷ Mebẽrã kongregasionebemarabida dayirã so zarea diaseabʉ. ¿Ãyara sãwũã obʉ maʉ̃ra? Akʉdaya Helga nebʉrata, iyira Hungríadebema. Iyira poaga biobayeda mejãcha bedʼea zromane berabarisi. Edaʉde iyi zarea neẽ sentibasi maʉ̃ kʼarea. Mamina iya iyi mawũã berabarida ʉ̃rʉ jẽda krĩchabʉrʉdera ũdubʉ Jeowabara iyira mejãcha kʼarebasita mebẽrã kongregasionebemaneba. Iya jarabʉ: «Mʉ̃ra mejãcha krĩcha zroma obasi, nekʼãrẽ mejãcha oibarabasi, trajaibarabasi, mʉ̃ wũãwũã kayabʉsida akʉibarabasi akʉza awuru bedʼea zromarasida erbasi. Maʉ̃nera Jeowabara kʼarebasi mʉ̃ra, zarea diasi mʉ̃a nesidade. Maʉ̃ 30 poaga berabaribʉrʉdera Jeowabara mʉ̃ra doba amae ẽ basi. Iya jarabʉ kĩrãkʼa so zarea diasi mʉ̃a nesidabʉde. Adewara iya mʉ̃aʼa so zarea diasi mebẽrãneba, mebẽrãba mʉ̃aʼa ibia bedʼeapanasi akʉza so zarea diapanasi. Maʉ̃ awuara kartata zokʼa bʉepanasi. Edaʉde mʉ̃a wua obe ẽ kĩrãkʼa krĩchabʉdera maʉ̃ra bedʼearaba akʉza kartaraba kʼarebabasi».

18. ¿Sãwũã so zarea diaseapanʉ awurura?

¹⁸ Dayirãbida Jeowade kĩrãkʼa oseapanʉ awurura so zarea diabʉde. ¿Sãwũã so zarea diaseabʉ dayirãbara awururãra? Ãya kʼãrẽ jarabʉta pikãga ũrĩbʉde, dayirãba jarabʉdeba so zarea diabʉde akʉza ãya kʼãrẽ nesidabʉde kʼarebapanʉne (Prov. 3:27). Mamina dayirãbara bari Jeowa ode panʉratrʉ kʼarebapanʉ ẽ, dayirãbara kʼarebaseapanʉ badu ẽbẽra bedʼea zroma berabaribʉta Daizeze odebʉ ẽãsida. Dayirãba ũdubʉdade naʉ̃ra ẽbẽra bedʼea zroma berabarinʉmʉta maʉ̃nera akʉ wãseapanʉ ãyi deidu, ũrĩseapanʉ ãya kʼãrẽta jarabʉta akʉza dayirãba Daizeze Bedʼeadebemata ãyaʼa jarabʉrʉdeba so zarea diaseapanʉ. Dayirãba Jeowade kĩrãkʼa wuabemara so zarea diapanʉbʉrʉ kʼarebaseapanʉ mebẽrã kongregasionebemaraba bedʼea zroma ũdubʉrʉde zarea panaita. Adewara kʼarebaseapanʉ yi ẽbẽrarã Daizeze odebʉ ẽãrabida Jeowata ũdukʼawuakĩrãnamarẽã (Mat. 5:16).

JEOWARA EWARI JÕMAɄ̃NẼ DAYIRÃ KʼAWA BAYI

19. ¿Jeowaba sãwũã akʉbʉ dayirãra akʉza dayirãba sãwũã iyide kĩrãkʼa oseapanʉ?

¹⁹ Jeowabara mejãcha kãga iyaʼa kãga ũdubipanʉrãra, iyara biʼia akʉbʉ. Maʉ̃raba bedʼea zroma ũdubʉrʉdera doba amae ẽ. Jeowara zeze kĩrãkʼabʉ. Zeze abaʉba yi wũãwũã kãga ũdubibʉ kĩrãkʼa akʉza iya nesidabʉde kʼarebabʉ kĩrãkʼa Jeowabida abarika akʉbʉ iyi ode kʼẽrẽpa panʉrãra. Iyara jaradiabʉ kʼãrẽta oibarata, diabʉ ãya nesidabʉta, bia akʉbʉ akʉza so zarea diabʉ. Dayirãbida Jeowade kĩrãkʼa oseapanʉ. Awururaba bedʼea zroma erbʉta ũdubʉrʉde kʼarebaseapanʉ. Dayirãba kʼãrẽ bedʼea zroma erbʉ krĩcha ẽã kʼawuapanʉ Jeowabara dayirãra doba amae ẽãta, Isaías 41: 10ba jarabʉ kĩrãkʼa, nama jarabʉ: «Perarãra, mʉ̃ra bʉmebʉ baera».