Ũdubidadrʉ wuabemara wawiapanʉta

1. ¿Dayirãitara kʼãrẽa yibia wawia ũdubidaira? (Proverbios 22:1).

DAYIRÃ jõmaʉ̃ba kãga dayirãʼa wawia ũdubira mamina maʉ̃ awa ẽ, nesidapanʉ dayaʼa wawia ũdubidamarẽã, maʉ̃ kʼarea Daizeze Bedʼeaba naʉ̃ta jarabʉ: «Dayaʼa wawia ũdubidaira audre biga plata akʉza oro erbaira» (akʉra Proverbios 22:1).

2, 3. ¿Kʼãrẽa zareabʉ wuabemara wawia ũdubira akʉza kʼãrẽta akʉdai naʉ̃ artikulodera?

² Mamina edaʉde dayirãitara zareabʉ wuabemara wawia ũdubira, ¿kʼãrẽa? Dayirãba akʉpanʉ baera wuabemaraba kʼãrẽ mitia opanʉta, adewara ẽbẽrarã mejãchaʉba wuabemara wawia ũdubikĩrã ẽ baera. Mamina dayirãbara wawia ũdubikĩrãpanʉ awururãra Jeowaba jarabʉ baera wuabemara wawia ũdubimarẽã (1 Ped. 2:17).

³ Naʉ̃ artikulode kʼawuadayi kʼãrẽta jarakĩrãbʉta wawia ũdubibara akʉza sãwũã wawia ũdubibarata dayirã mebẽrãʼa, mebẽrã kongregasionebemara akʉza Jeowa odepanʉra ẽã. Mamina audre bia akʉdayi sãwũã wawia ũdubibarata zareabʉde.

¿KʼÃRẼTA JARAKĨRÃBɄ WUABEMARA WAWIA ŨDUBIBARA?

4. ¿Kʼãrẽta jarakĩrãbʉ wuabemara wawia ũdubibara?

⁴ Wawia ũdubibara jarakĩrãbʉ sãwũã akʉbʉta ẽbẽra abaʉ ʉ̃rʉ akʉza sãwũã edapanʉta maʉ̃ ẽbẽrata. Dayirãba kʼawuabʉrʉde ẽbẽra aba ẽbẽra biata, nekʼãrẽ biata ozebʉrʉta mawũã ẽ bʉrʉ dayita zokʼabʉta daya nekʼãrẽ obʉ maʉ̃ʼa wawia ũdubita, mamina biga bayi maʉ̃ oira soiduba odaita (Mat. 15:8).

5. ¿Kʼãrẽa wawia ũdubipanʉ wuabemara?

⁵ Jeowabara kãgabʉ dayirãba wuabemara wawia ũdubidamarẽã. Bari jaraita, Daizeze Bedʼeaba naʉ̃ta jarabʉ: «Nokʼora edre panaidua» (Rom. 13:​1, 7, TNM). Mamina ʉ̃kʉrʉ ẽbẽraba jaraseabʉ: «Mʉ̃ara ẽbẽra abaʉa wawia ũdubiyi iya nekʼãrẽta obʉbʉrʉ iyaʼa wawia ũdubita». Mamina, ¿bigaka mawũã krĩchadaira? Mawũã ẽ. Dayirã Jeowa ode panʉrabara wawia ũdubipanʉ wuabemarãra Jeowaba mawũã omarẽã kãgabʉ baera akʉza iyita sobiabikĩrãpanʉ baera, mawũã opanʉ ẽ ẽbẽrarãba obʉ kʼarea mawũã ẽ bʉrʉ oẽ kʼarea (Jos. 4:14; 1 Ped. 3:15).

6. ¿Wawia ũdubiseapanʉka dayirã wawia ũdubipanʉ ẽãra? (Akʉra poto yi nããrabemata).

⁶ Dayikʉza naʉ̃ta widiseabʉ: «¿Ẽbẽra abaʉba mʉ̃aʼa wawia ũdubi ẽãnera mʉ̃ara iyara wawia ũdubiseabʉka?». Wawia ũdubiseabʉ. Krĩchadaya naʉ̃ra yizara ʉ̃rʉ. Bari jaraita, nokʼo Saúlbara yi warra Jonatánʼa jõmaʉ̃ra daidʉ kĩrʉ bedʼeasi (1 Sam. 20:​30-34). Mamina mawũãsidʉ yi warra Jonatánbara iyaʼa wawia ũdubisi akʉza iyi kʼawa yõsi iyi beiyeda (Éx. 20:12; 2 Sam. 1:23). Israelitara jõmaʉ̃ba kʼawuabasi sumo saserdote Elíra zeze bia ẽãta akʉza sumo saserdote bia ẽãta kʼẽã ẽ basi baera yi wũãwũãrata mawũã oibarabasimina (1 Sam. 1:​15-18; 2:​22-24). Maʉ̃ta ewari aba Elíba jarasi Anaʼa kĩrã pʉrrabʉta. Maʉ̃nera Anabara ibiade panʉsi akʉza wawiabʉta ũdubisi, kʼawuabasimina Elí sãwũãbʉta (1 Sam. 1:​12-14). Adewara yumakẽrãra Atenasnebemarabara jarasida Pablora bedʼeamiata (Hech. 17:18). Mamina Pablora ãyara ibiade bedʼeabasi akʉza wawiabʉta ũdubibasi (Hech. 17:22). Naʉ̃ra yizaba ũdubibʉ dayirãba Jeowata mejãcha kãgapanʉbʉrʉ akʉza oamapanʉbʉrʉ iya kãga ẽata naʉ̃ba kʼarebaita wuabemara wawia ũdubita dayirãita zareabʉmina. Atia akʉdayi kʼaira wawia ũdubibarata akʉza kʼãrẽa.

WAWIA ŨDUBIDADRɄ DAYIRÃ MEBẼRÃ

7. ¿Kʼãrẽa zarea baseabʉ dayirã mebẽrã wawia ũdubira?

⁷ ¿Kʼãrẽa zareabʉ? Dayirãra dayirã mebẽrãbawara ewari bio berabaribʉ, maʉ̃ba biʼia kʼawuabʉ ãya kʼãrẽ nebia erbʉta akʉza kʼãrẽta aña obʉta. Maʉ̃ta neẽbʉrʉ dayirãbara erbʉbaibara dayirã mebẽrãnebemata kayabʉta, maʉ̃ akʉita mejãcha zareabʉbaibara mawũã ẽ bʉrʉ dayirã mebẽrãnebemata krĩcha zroma obʉbaibara. Maʉ̃ta neẽbʉrʉ ʉ̃kʉrʉ dayirã mebẽrãnebemaba nekʼãrẽta oseabʉ mawũã ẽ bʉrʉ jaraseabʉ dayi sopʉabiseabʉta. Adewara dayirã mebẽrãi wawia ũdubi ẽãnera dayirãi yõseabʉ aduʼapanai kaude. Naʉ̃ jõmaʉ̃ba oseabʉ bia wã ẽ marẽã dayirã mebẽrãbawara. Krĩchara naʉ̃ ʉ̃rʉ, dayirã mebẽrãra dayi kakua kĩrãkʼabʉ, dayita kayara dayi kakuara biabʉ ẽ. Abarika dayirã mebẽrãnebemaba wawia ũdubi ẽ bʉrʉ bia wã ẽ, mamina kayara mejãchaʉta beseabʉ, maʉ̃ kĩrãkʼa dayirã mebẽrãrabida wawiabʉta ũdubiseapanʉ.

8. ¿Kʼãrẽa wawia ũdubidaibara dayirã mebẽrãra? (1 Timoteo 5:​4, 8).

⁸ ¿Kʼãrẽa wawia ũdubidaibara? (Akʉra 1 Timoteo 5:​4, 8). Pabloba Timoteoa karta nããra bʉ dia bʉeside jarasi mebẽrãba kʼãrẽta odaibarabasita ãyirainʉ bia akʉita. Adewara jara ũrĩbisi mebẽrãra wawia ũdubibara ẽãta mawũã wawia ũdubibara baera, awuarabʉrʉ wawia ũdubibarata «Jeowaba mawũã omarẽã kãgabʉ baera». Naʉ̃ba jarakĩrãbʉ wawia ũdubipanʉta Jeowata kãgapanʉ baera akʉza mawũã obʉdeba Jeowa yiwidʼibʉta ũdubipanʉ baera (Efes. 3:​14, 15). Mawũẽra mebẽrã wawia ũdubipanʉnera Jeowaʼa wawia ũdubipanʉ, mebẽrãra iya parãna baera. Maʉ̃ kʼarea jipade yibia dayirã mebẽrã wawia ũdubira.

9. ¿Kimabara panʉrabara sãwũã wawia ũdubidaibara? (Akʉra potota).

⁹ ¿Sãwũã wawia ũdubibara? Yumakẽrã yi kima wawia ũdubibʉbara bia edabʉ yi kimara jõmaʉ̃ra daidu akʉza ũme paipanʉnebida (Prov. 31:28; 1 Ped. 3:7). Adewara po ẽ mia soperabi ẽ akʉza kʼãrẽ ẽ kĩrãkʼa sentibi ẽ. Mebẽã aba Argentinanebemaba, yi trʉ̃ Arielbaa naʉ̃ta jarabʉ: «Mʉ̃ kimara kayabʉ baera edaʉde iya jarabʉ nekʼãrẽ mʉ̃ mejãcha sopʉabibʉta. Mamina maʉ̃nera mʉ̃a kĩrãbebʉ iya jarabʉra soiduba jarabʉ ẽãta, mawũã aukʼara zarea totoidubaira mʉ̃a kĩrãbebʉ 1 Corintios 13:5ba jarabʉta, naʉ̃ba kʼarebabʉ mʉ̃a iyaʼa wawia ũdubita akʉza ibiade bedʼeaita» (Prov. 19:11). Adewara yuwẽrã yi kima wawia ũdubibʉbara ibia bedʼeabʉ yi kima ʉ̃rʉ wuabemara (Efes. 5:33). Iyi ʉ̃rʉ imitia bedʼea ẽ, jara ẽ ijaramia iyi sopʉabibʉta, kʼawuabʉ baera iya mawũã ora yi kimaʉ̃me bia wã ẽ baita (Prov. 14:1). Mebẽã wẽrã Italiadebemaba erbʉ yi kima mejãcha krĩcha zroma obʉta. Iya jara ũrĩbibʉ: «Edaʉde mʉ̃a sentibʉ mʉ̃ kimara nekʼãrẽ badu kʼarea mejãcha krĩcha zroma obʉta. Nawedara mʉ̃a kʼãrẽ jarabʉdeba akʉza mʉ̃ kĩrãneba ũdubibasi iyira wawia ẽãta. Mamina ẽbẽrarã wuabema wawia ũdubibʉbawarabʉba kʼarebasi mʉ̃ kimaʼa wawia ũdubita».

10. ¿Warrarabara sãwũã wawiabʉta ũdubiseabʉ yibarirãra?

¹⁰ Warrara, ũrĩdua mara yibarira bedʼeara akʉza ãyaʼa wawia ũdubidua (Éx. 21:17; Efes. 6:​1-3). Ãyi zõna babʉrʉza audre nesidayi kʼaiba akʉita, maʉ̃ba nekʼãrẽ jõma oidua ãyi bia akʉita. Akʉdaya mebẽã María berabaridata. Yi zezera Jeowa ode ba ẽ basi. Maʉ̃ta kayasi, mawũẽra maʉ̃ta akʉibarabasi iyara mamina maʉ̃ oira zareabasi. Maríaba jara ũrĩbibʉ: «Jeowaʼa widibasi kʼarebamarẽã bia krĩchaita mʉ̃ zeze ʉ̃rʉ akʉza mʉ̃a nekʼãrẽ obʉdeba iyaʼa wawia ũdubimarẽã. Mʉ̃yikʉza krĩchabasi Jeowaba widibʉbʉrʉ mʉ̃ zezea wawia ũdubimarẽã mawũãra iya mʉ̃ra biode kʼarebaita mawũã oita. Mawũãbʉta tẽã mʉ̃a kʼawuasi mʉ̃ zezeba mʉ̃aʼa wawia ũdubi ẽ mina mʉ̃ara iyara wawia ũdubibarata». Dayirãita zareabʉmina dayirã mebẽrã wawia ũdubita, mawũãsidʉ maʉ̃ta opanʉbʉrʉ Jeowaʼa wawia ũdubidayi iya parãsi baera mebẽrãta.

MEBẼRÃ KONGREGASIONEBEMA WAWIA ŨDUBIDADRɄ

11. ¿Edaʉde kʼãrẽa zareabʉ dayirã mebẽrã kongregasionebema wawia ũdubira?

¹¹ ¿Kʼãrẽa zareabʉ? Mebẽrãra zarea opanʉ Daizeze Bedʼeaba jarabʉde odaita mamina edaʉde ãyara bia edada ẽ, ãyimabʉta jarabʉ maʉ̃ta neẽbʉrʉ dayi kĩrʉbibʉta opanʉ. Maʉ̃ba ʉ̃kʉrʉ mebẽrãba dayirã ʉ̃rʉ nemitiata osidabʉrʉ dayitara zareabʉ maʉ̃raʼa wawia ũdubira (Col. 3:13). Maʉ̃nera, ¿kʼãrẽba kʼarebaseabʉ?

12. ¿Kʼãrẽa yibia dayirã mebẽrã kongregasionebema wawia ũdubira? (2 Pedro 2:​9-12).

¹² ¿Kʼãrẽa wawia ũdubidaibara? (Akʉra 2 Pedro 2:​9-12). Pedroba iya karta ũmebʉdade jarasi kongregasionebemarabara wawia ũdubida ẽ basita gloriosora, maʉ̃ba jarakĩrãbʉ zõrãrã kongregasionebemata. Maʉ̃nera, ¿kʼãrẽta osida angelerabara? Pedroba jarasi naʉ̃rabara Jeowa wawia ũdubipanʉ baera kʼãrẽ mitia jarada ẽ basita naʉ̃ra ẽbẽrarã ʉ̃rʉ. Naʉ̃ ʉ̃rʉ kʼawuaira kʼãrẽ bia. Naʉ̃ra angelerãra nemitia okabasi, mawũãsidu ãyara kʼãrẽ mitia jara ẽ basi naʉ̃ra ẽbẽrarã ʉ̃rʉ awuarabʉrʉ iduaribisi Jeowaba kʼawua omarẽã akʉza kʼẽãmarẽã (Rom. 14:​10-12; naʉ̃ testoʉ̃me akʉra Judas 9). Dayirãbara nekʼãrẽ mejãcha kʼawuaseabʉ angeleraneba. Ãyara wawia ũdubipanasi ãyi pẽwãpanʉara. Maʉ̃ba dayirãbara audre wawia ũdubidaibara dayirã mebẽrã kongregasionebemara, ãyara Jeowata kãgapanʉ baera. Mawũẽra nekʼãrẽ jõma odaibara mebẽrã wawia ũdubidaita (Rom. 12:10). Mawũã opanʉba ũdubidayi Jeowa wawia ũdubipanʉta.

13, 14. ¿Sãwũã ũdubipanʉ mebẽrã wawia ũdubipanʉta? (Akʉra potota).

¹³ ¿Sãwũã wawia ũdubibara? Zõrãrãbara ibiade jaradiaibara wuabemarãra (Filem. 8, 9). Adewara mebẽã abaʉta kʼẽãibarabʉrʉ kĩrʉbia yi edebi ẽ baibara awuarabʉrʉ ibiade oibara. Mebẽrã wẽrãrabara awuru ʉ̃rʉ bedʼeata jarakanʉma ẽ baibara akʉza sewa nebʉrʉta jara ẽ baibara wuabemara ʉ̃rʉ. Mawũã odara kʼarebayi kongregasione dayirãinʉ wawia ũdubidaita (Tito 2:​3-5). Jõmaʉ̃ba wawia ũdubidaibara zõrãrã kongregasionebemara. Maʉ̃ra, ¿sãwũã oseapanʉ? Dayirãba ãyita kʼarebabʉde akʉza ãyaʼa biga diapanʉne ãba yi jʉrebaride Daizeze Bedʼea jaradia wãine bia edepanʉ kʼarea. Adewara biga diaibara ãya kʼarebabʉ baera mebẽrã aña nepanʉrata (Gál. 6:1; 1 Tim. 5:17).

¹⁴ Mebẽã aba yi trʉ̃ Rocíoitara, zarebasi zõrãrã abaʉʼa iyaʼa ũrãgʼa diada wawia ũdubira. Iya jara ũrĩbibʉ: «Mʉ̃ra kĩrʉbasi mʉ̃a sentisi baera iya mʉ̃ta bia eda ẽ basita akʉza dedara iyi ʉ̃rʉ imitia bedʼeabasi. Mʉ̃a krĩchabasi iya mʉ̃ ʉ̃rʉ wãrĩnu krĩcha ẽãta akʉza ũrĩ ẽ basi mʉ̃ara iya ũrãgʼa diabʉra, mawũãsidʉ zarea obasi maʉ̃ta ũdubi ẽ baita». ¿Kʼãrẽba kʼarebasi mebẽã Rocíora? Iya jara ũrĩbibʉ: «Mʉ̃a akʉsi 1 Tesalonicenses 5:​12, 13ta. Nama kʼawuasi mebẽã wawia ũdubibʉ ẽãta, maʉ̃ba mʉ̃ krĩchara bia ba ẽ basi, maʉ̃ kʼarea Jeowa yiwidʼisi, mõbe jʉrʉsi dayirã kartarane mebẽã ʉ̃rʉ awuara krĩchaita. Tẽãne mʉ̃a kʼawuasi mebẽã ẽ basita yi bedʼea zromara awuarabʉrʉ mʉ̃basi, mʉ̃trʉ ʉ̃tabʉta krĩchabasi baera. Mʉ̃a kʼawuasi wuabemara wawia ũdubira mʉ̃ra edabʉta ũdubibarata. Mʉ̃a kʼawuabʉ zarea oibarata mawũã oita, mamina aduʼabʉ kʼawuabʉ baera Jeowaba akʉbʉta mʉ̃ zarea obʉra».

WAWIA ŨDUBIDADRɄ JEOWA ODEPANɄRA ẼÃ

15. ¿Kʼãrẽa zarea baseabʉ Daizeze odebʉ ẽã wawia ũdubira?

¹⁵ ¿Kʼãrẽa zareabʉ? Dayirãba Daizeze Bedʼea jaradiapanʉne ũdubʉ ẽbẽrarã Daizeze Bedʼea ʉ̃rʉ kʼawuakĩrã ẽãta (Efes. 4:18). Maʉ̃ta neẽbʉrʉ ʉ̃kʉrʉbara ũrĩkĩrã ẽ Daizeze Bedʼeara ãyi wiña bʉedaʉba nekʼãrẽ awuru ʉ̃rʉ jaradiada kʼarea. Adewara dayirã trajo diabʉba mawũã ẽ bʉrʉ dayirã propesorba kãga ẽ dayirãba obʉta mawũã ẽ bʉrʉ dayirãʉ̃me trajabʉba mawũã ẽ bʉrʉ dayirãʉ̃me estudiabʉba bia edada ẽ. Maʉ̃ kʼarea aduaseabʉ dayirãba wuabemara wawia ũdubibʉta akʉza bia edapanʉta.

16. ¿Kʼãrẽa yibia wawia ũdubita waidide Jeowa odepanʉ ẽãra? (1 Pedro 2:12; 3:15).

¹⁶ ¿Kʼãrẽa wawia ũdubidaibara? Kĩrãbedadrʉ Jeowabara akʉbʉta dayirãba ẽbẽrarã Jeowa odebʉ ẽãta sãwũã edapanʉta. Akʉza apostol Pedroba kristianora kĩrãbebisi ãyi sãwũãbʉdeba ibia bedʼeabiseabʉta Daizeze ʉ̃rʉ. Maʉ̃ kʼarea ũrãgʼasi ãya ĩjãbʉare bedʼeabʉrʉdera «ibiade akʉza wawiade» odamarẽã (akʉra 1 Pedro 2:12; 3:15). Naʉ̃ra kristianorabara ãya ĩjãbʉare bedʼeabʉrʉdera juez nãã maʉ̃ta neẽbʉrʉ badu ẽbẽrarã Jeowa odebʉ ẽ ʉ̃me ũdubibarabasi ãyira wawiabʉta akʉza ibiade bedʼeabʉta Daizezeta ãyiʉ̃mebʉ kĩrãkʼa. Wãrĩnubaira Jeowabara akʉbʉ dayirãba kʼãrẽ jarabʉta akʉza kʼãrẽta obʉta. Maʉ̃ba wawia ũdubidaibara ẽbẽrarã Jeowa ode panʉ ẽãra.

17. ¿Sãwũã wawia ũdubiseapanʉ Jeowa odepanʉra ẽãra?

¹⁷ ¿Sãwũã wawia ũdubibara? Dayirãba Daizeze Bedʼea jaradiabʉrʉde ũdubida ẽ baibara wuabemara dayirãba ʉ̃ta kʼawuabʉta Daizeze Bedʼea ʉ̃rʉ ãyideira awuarabʉrʉ kĩrãbeibara ãyira Daizezeitara nebia zromata akʉza krĩchaibara ãyira dayirãira ʉ̃tabʉta (Ageo 2:7; Filip. 2:3). Ẽbẽra abaʉba daya ĩjãbʉ kʼarea imitia bedʼeara zarea odaibara abarika panʉna ẽ baita. Bari jaraita, dayirãba kʼãrẽ jarabʉdeba ũdubi ẽ baibara daya ãyideira ʉ̃ta kʼawuabʉta mawũã ũdubita ãyara kʼãrẽ be ẽãta akʉza kĩrʉbita (1 Ped. 2:23). Adewara bedʼea ãyi sopʉabibʉta jarara waña ãyiʉ̃me bedʼeaibara. Kõbe dayirã trajabʉmaera, ¿sãwũã wawia ũdubiseapanʉ? Zokea baseapanʉ akʉza akʉseapanʉ dayirãʉ̃me trajabʉba akʉza dayi zokʼabʉba kʼãrẽ nebiata opanʉta (Tito 2:​9, 10). Dayirã trajabʉmaera biga bayi dayirãba trajo obʉra soiduba oita akʉza yãrã sewa ẽ baita. Mawũã dayirãba nebia obʉidu edaʉde wuabema ẽbẽrarã sobiabida ẽ bayi, mamina Jeowara ewari jõmaʉ̃nẽ sobiabidayi (Col. 3:​22, 23).

18. ¿Kʼãrẽa biga wuabemara wawia ũdubira?

¹⁸ Dayirãbara kʼawuasida kʼãrẽ kʼarea wawia ũdubibarata wuabemarãra. Kʼawuasida dayirã mebẽrã wawia ũdubipanʉbʉrʉ Jeowa wawia ũdubipanʉta mebẽrã parãna. Abarika, dayirã mebẽrã kongregasionebema wawia ũdubipanʉbʉrʉ Jeowa wawia ũdubipanʉta. Akʉza ẽbẽrarã Jeowa ode panʉ ẽã wawia ũdubipanʉbʉrʉ kʼarebabʉta naʉ̃raba Jeowa wawia ũdubidamarẽã akʉza ibia bedʼeadamarẽã Jeowa ʉ̃rʉ. Ʉ̃kʉrʉba dayirã wawia ũdubi ẽãnera dayirãbara ãya wawia ũdubibara, mawũã odara Jeowabara dayirãʼa nebiata mejãcha diayi. Iya naʉ̃ta jarabʉ: «Mʉ̃ara wawia ũdubiyi yi mʉ̃aʼa wawia ũdubibʉra» (1 Sam. 2:30).