Mebẽrãra ũme Zõrãrã Burubiadebema babisida

OCTUBRE 5 2024DE ãba yi jʉrepanʉne, jarasida mebẽã Jody Jedele akʉza Jacob Rumph Zõrãrã Burubiadebema babisida. Ãyira dããraba Daizeze ode kʼẽrẽpapanʉta.

Mebẽã Jedele tosida Missouride (Estados Unidos). Ãyi badamaera mejãcha neẽbasi Jeowa ʉ̃rʉ Kʼawuabibarirãra, mawũãsidu yibarirabara jaradiasida iyaʼa Jeowa ʉ̃rʉ. Ãyi badamaera Jeowa ʉ̃rʉ Kʼawuabibarirãra mejãcha neẽ baera, mebẽrã drʉa jãpedebemarata mejãcha jʉ̃ẽpanasi jaradiade. Maʉ̃ba iyara mebẽrã drʉa biodebemata ũdukʼawuasi. Iya maʉ̃ne ũdusi Jeowa pʉwʉrʉrãra ãbapanʉta akʉza kãga ũdubipanʉta, maʉ̃ba iyabida audre kʼawuakĩrãsi Jeowa ʉ̃rʉ akʉza buru kʼoesi 15 octubre 1983de akʉza iyabida jaradiakĩrãbasi. Kolegiodeba ẽdrʉda tẽã jidasi septiembre 1989de prekursor regular bʼaita.

Iyi wikayiru eda akʉza iyi mebẽã wikakiru eda, ãyira yibariraba edesi Betelʼeda. Maʉ̃ba ãya trajakĩrãbasi Betelde. Ãyi yi zroma bada tẽã mawũã traja jʉ̃drʉsida. Iyira septiembre 1990de traja jʉ̃drʉsi Betel Wallkillde. Nããra traja jʉ̃drʉsi Departamento Limpiezade akʉza tẽã Servicios Médicosde.

Maʉ̃ ewaride iyi bʉ kʼawa basi kongregasionʼra español bedʼeadebemata, mamara mejãcha nesidabasi yumakẽrã kʼarebata, maʉ̃ba iyira maʉ̃ kongregasionʼena wãsi mama kʼarebaita akʉza kʼawua jʉ̃drʉsi español bedʼeata. Tẽã iyara ũdukʼawuasi mebẽã wẽrã yi trʉ̃ Dámarista, iyira prekursorabasi, tẽã juwa jidada kʼãrãpe ãyira ãba trajapanasi Betelde.

Ãyira 2005de ãĩ wãsi Beteldeba ãyi yibarira akʉita, ãyira yibarira akʉpanʉena prekursor regularta opanasi. Mebẽã Jedeleba Escuela del Servicio de Precursor nejaradiabaribasi, adewara kʼarebabasi Comité Enlace con los Hospitalesde akʉza Comité Regional Construcciónʼne iyi badamae.

Poaga 2013de ãyira jẽda trʉ̃sida Betelma, mamina maʉ̃nera trajadamarẽã trʉ̃si Warwickde de parãine. Maʉ̃neba iyira trajabasi Pattersonʼne akʉza Wallkillde akʉza iyira trajasi Departamento Local de Diseño y Construcciónʼne akʉza Servicios Información sobre Hospitalesde. Marzo 2023de Comité de Servicio kʼarebabari babisida iyira. Iya naʉ̃ta jarabʉ iya trajo ozebʉrʉ ʉ̃rʉ: «Edaʉde zare baseabʉ daya asignasion yiwidi diabʉdadera, mamina mama kĩrãbedaibara Jeowata ĩjãibarata Jeowabʉrʉ oseabʉ baera iya kãgabʉta».

Mebẽã Rumphra tosida Californiane (Estados Unidos). Iyi wikayiruedara yi papara Jeowa ʉ̃rʉ Kʼawuabibaribasimina Daizeze ʉ̃rʉ jaradia wã ba ẽ basi, mawũãsidu yi papara zarea osi yi wũãwũã jaradiaita Daizeze Bedʼea ʉ̃rʉ. Akʉza iyara poagaza akʉ wãbasi yi payorata. Yi payorara kʼẽrẽpabasi, maʉ̃ba kʼarebasi iyabida audre kʼawuakĩrãmarẽã Daizeze ʉ̃rʉ. Iyi 13 poagabʉta iya jarasi Daizeze ʉ̃rʉ jaradiadamarẽã. 27 septiembre 1992de iyira buru kʼoesi wabide warraraena. Yi papabara tẽã jẽda jaradia jʉ̃drʉsi akʉza yi zezeba yi mebẽrãbawara audre Jeowa ʉ̃rʉ kʼawuada kʼãrãpe buru kʼoesida.

Mebẽã Rumph warraraena iya ũdubasi prekursorerãra sãwũã sobiapanʉta, maʉ̃ba iyi kolegiodeba ẽdrʉda tẽã jidasi prekursor regular bʼaita septiembre 1995de. Poaga 2000de iyira wãsi pʉwʉrʉ Ecuadordebemaena, mawũã jaradiaita audre, mamara neẽbasi baera mebẽrã mejãcha jaradiabʉta Jeowa ʉ̃rʉ. Mama iya ũdukʼawuasi prekursora iyi trʉ̃ Ingata, maʉ̃ra Canadádebemabasi. Maʉ̃ tẽã ãyira juwa jidasida. Ãyi juwa jidada audre eade awuru pʉwʉrʉ zake Ecuadordebemaena wãsida, jaradiabarira mejãcha neẽãma. Idi ewadera mamabema kongregasionebemarãra kʼẽrẽpapanʉ.

Tẽã ãyira prekursorera espesial babisida akʉza maʉ̃ tẽã zõrãrã kongregasion akʉbari babisida, adewara 2011de trʉ̃sida klase 132 Galaadʼdebemaena wãmarẽã. Maʉ̃ eskueladeba ẽdrʉda tẽã ãyira zokʼasida drʉa awuara awuaraka eda wãnamarẽã. Maʉ̃ne ãyira betelitarabasi, misionerorabasi akʉza zõrãrã kongregasionʼra akʉbaribasi. Mebẽã Rumphsida Escuela para Evangelizadores del Reino nejaradiabaribasi.

COVID-19 kʼarea ãyira trʉ̃sida Estados Unidosʼeda, mamaʉ̃ba zokʼasida Betel Wallkillʼeda. Mama mebẽã Rumphra trajabisida Departamento Serviciode. Tẽã iyira zokʼa bʉesida sukursal Ecuadordebemaʼena akʉza mama iyira Betel akʉbaridebemabasi. 2023de jẽda zokʼa bʉesida ãyira Warwickʼeda akʉza enero 2024de trʉ̃gasida Comité de Servicio kʼarebabari bamarẽã. Iya naʉ̃ta jarabʉ drʉa iya trajabadara ʉ̃rʉ: «Audre yibia ẽ dayi saʉ̃ drʉade Jeowaita trajabʉta, awuarabʉrʉ audre yibia daya kʼairabawara trajabʉta, mebẽrãbawara».

Dayirãbara biʼia akʉpanʉ naʉ̃ra mebẽrãba kʼãrẽta opanʉra (Filip. 2:29).