Sãwũã sobia baseapanʉ zõnabasimina

1, 2. ¿Sãwũã akʉbʉ Jeowabara mebẽrã zõrãpanʉra kʼẽrẽpapanʉra? (Salmo 92:​12-14; akʉza akʉra poto yi nããrabemata).

Ʉ̃KɄRɄ drʉadera zõna bʼaira bia akʉpanʉ, mamina ʉ̃kʉrʉ drʉadera ʉ̃kʉrʉ ẽbẽrabara nekʼãrẽ jõma obʉ zõna ba ẽ baita. Bari jaraita, botorroa ʉ̃tʉ zebʉrʉdera ʉ̃kʉrʉbara maʉ̃ra waña ẽbʉ mamina mawũã botorroa waña ẽbʉba jarakĩrãbʉ ẽ wua botorroa ʉ̃tʉ ze ẽ baita, ãya mawũã nekʼãrẽ mejãcha obʉmina zõna ba ẽ baita zõnabayi.

² Mamina, ¿Jeowabara sãwũã akʉbʉ mebẽrã zõrãpanʉrãra? (Prov. 16:31). Iyara naʉ̃ra mebẽrãra bakuru biʼia pawãrabaribida kĩrãkʼa akʉbʉ (akʉra Salmo 92:​12-14). Wãrĩnu maʉ̃ra bakurura mejãcha ewari biobayedabʉra kidua biʼiakiru akʉza tũãpoabʉ. Japónʼnebʉ bakuru aba mawũãbʉta maʉ̃ bakurura mil poaga audrebayedabʉ, maʉ̃ kĩrãkʼa mebẽrã zõrãpanʉrãra jipade nebia zroma mamina audre Jeowa dabʉ nãã. Jeowabara bari akʉ ẽ ãyi botorroatrʉ, awuarabʉrʉ akʉbʉ ãya ãyi sode kʼãrẽ nebia erbʉta, iyi bari kʼãrẽ ozebʉdata ãyi bedʼea zromane berabaribʉrʉde, mawũã ẽ bʉrʉ ãyi biapanʉnebida, maʉ̃ta akʉbʉ Jeowabara audrera.

3. Jara ũrĩbira Jeowaba sãwũã zokʼasita iyi odepanʉra zõrãpanʉrata iya kãgabʉta aripe berabaribita.

³ Jeowabara krĩcha ẽ dayirã zõrã babʉrʉdera kʼãrẽita zeri ẽãta.a Awuarabʉrʉ iyara mawũãsidu bia akʉbʉ, maʉ̃ta ũdubisi naweda iyi odepanʉra zõrãpanʉmina jidaside iya kãgabʉta aripe berabaribita. Bari jaraita, Sara yõdrabaside Jeowaba jarasi iyira wũãwũã baraita akʉza maʉ̃ wũãwũãneba zeibasita pʉwʉrʉ zromata adewara iyideba zeibasita Mesíasʼra (Gén. 17:​15-19). Adewara Moisés zõrãbasimina Jeowabara Moisésʼa jarasi iyi pʉwʉrʉ Israelta ẽdrʉbimarẽã Egiptodeba (Éx. 7:​6, 7). Adewara apostol Juan zõrãbasimina Jeowaba Daizeze Bedʼeadebema librota juesoma bʉbisi.

4. Proverbios 15:15ba jarabʉdebara, ¿kʼãrẽba kʼarebabʉ mebẽrã zõrãpanʉraba ãya bedʼea zroma erbʉ awuantaita? (Akʉra potota).

⁴ Wãrĩnubaira dayirã zõna babʉrʉdera, bedʼea zromata mejãcha ũdupanʉ. Mebẽã wẽrã abaʉba jarasi, zõna bʼaidu bʼaira zowãĩnĩgʉabʉta ũdubibarata maʉ̃nera bedʼea zromata mejãcha ũdubʉ baera, mamina mebẽrã zõrãpanʉraba ãya bedʼea zroma erbʉ awuantaira ũdubidaibara sobiatab (akʉra Proverbios 15:15). Naʉ̃ artikulode kʼawuadayi nããra kʼãrẽ bedʼea zromata ũdupanʉta mebẽrã zõrãpanʉraba, adewara ãya kʼãrẽta oseapanʉta sobia bʼaita bedʼea zroma erpanʉmina. Tẽã kʼawuadayi kongregasionebemaraba sãwũã kʼarebaseabʉta mebẽrã zõrãpanʉrata.

KʼÃRẼA ZAREABɄ SOBIA BʼAITA ZÕNA BABɄRɄDERA

5. ¿Kʼãrẽba sopʉabiseabʉ dayirã zõna babʉrʉdera?

⁵ ¿Kʼãrẽba sopʉabiseabʉ dayirã zõrãpanʉrãra? Edaʉde sopʉapanʉ dayirãba nãã obadata idi ewade obeda ẽ baera, mawũã ẽ bʉrʉ jẽda krĩchapanʉ warrarabasieda sãwũã badata akʉza kaya ẽ baside sãwũã badata (Ecl. 7:10). Mebẽã wẽrã aba yi trʉ̃ Rubyba naʉ̃ta nebʉrabʉ: «Mʉ̃itara jipade zareabasi mʉ̃yikʉza wua jʉ̃ira, bia pirabe ẽ basi baera akʉza pʉbasi mʉ̃ kakua jõma. Adewara mʉ̃itara mʉ̃ jĩrʉ jira edape media jʉ̃ira mejãchade pʉbasi akʉza mʉ̃ra artrosisba kayabʉ baera mʉ̃ juwara mejãcha pʉabʉ, adewara mʉ̃ juwa jiwinira bia pirabe ẽ, maʉ̃ba nekʼãrẽ badu oita pʉ mʉ̃itara». Harold, Beteldebadaba naʉ̃ta jarabʉ: «Edaʉde mʉ̃ra mejãcha kĩrʉbʉ nãã mʉ̃a nekʼãrẽ okĩrãbadata obe ẽ baera. Mʉ̃ra warrarainʉba zareabasi akʉza mʉ̃ara bateta jemekĩrãbasi, dai jemebʉrʉdera wuabemarabara jarapanasi ‹Haroldʼa batatara iya gana diamarẽã› mamina mʉ̃a atiara mia bataʉ ẽ kĩrã maʉ̃ balon zakera».

6. (1) ¿Adewara kʼãrẽba sopʉabiseabʉ dayirã? (2) ¿Zõrãpanʉrabara sãwũã kʼawuaseabʉ sõbede iduaribita nekʼãrẽ manejabʉta? (Naʉ̃ kartade akʉra artikulo «¿Nekʼãrẽ manejabʉta iduaribibaraka?» abʉta).

⁶ Adewara edaʉde dayirãra sopʉaseabʉ daya nãã nekʼãrẽ dobaʉba obadata obe ẽ baera. Dayirãba nesidabʉ edaʉde kʼaiba akʉita. mawũã ẽ bʉrʉ wãibara edaʉde dayirã wũãwũãra deda ãya akʉdamarẽã. Adewara dayirã zareasida audre jõ wã baera mawũã ẽ bʉrʉ bia ũdu ẽ baera manejabe ẽ, mawũã ẽ bʉrʉ doba wãbe ẽ daya kãgama. Naʉ̃ jõmaʉ̃ba dayirã mejãcha sopʉabiseabʉ, zare maʉ̃ra. Mamina yibia kĩrãbeita mawũã dayidoba wãbe ẽ mina mawũã ẽ bʉrʉ nekʼãrẽ dayi dobaʉba obe ẽ mina, mawũã ẽ bʉrʉ nekʼãrẽ manejabe ẽ mina Jeowaba dayirã sãwũã akʉbʉta, iyitara dayirãra nebia zroma akʉza mebẽrãitabida. Adewara kĩrãbeibara Jeowaba kʼawuabʉta dayirã sãwũã sentibʉra, iya akʉ ẽ dayirã ʉ̃rʉ sãwũãpanʉta awuarabʉrʉ akʉbʉ dayi sode kʼãrẽtabʉta, dayirãba kʼãrẽaba kãga ũdubibʉta iyaʼa akʉza kongregasione mebẽrã (1 Sam. 16:7).

7. ¿Kʼãrẽba kʼarebaseabʉ Jeowaba naʉ̃ ewari jõbi ũdu ẽ bai kʼarea sopʉabʉbʉrʉ?

⁷ Adewara dayirãra sopʉaseabʉ krĩchapanʉ baera Jeowaba naʉ̃ ewari jõbi zei ewarita ũduda ẽ bai kʼarea. Mamina kĩrãbedaibara Jeowabara iyi ewarira we ẽãta jʉ̃ãnʉmʉ baera (Is. 30:18). Mamina, ¿kʼãrẽa jʉ̃ãnʉmʉ iyara? Iya jʉ̃ãnʉmʉ ewarita diabʉ baera ẽbẽrarãba iyita ũdukʼawuadamarẽã akʉza ẽdrʉdamarẽã (2 Ped. 3:9). Maʉ̃ba dayirã sopʉabʉrʉdera krĩchadaibara Jeowaba iyi ewari weita jʉ̃ãnʉmʉ baera ẽbẽrarã mejãchaʉta ẽdrʉseabʉta, maʉ̃rane eda baseabʉ bʉ mebẽrãsida.

8. ¿Zõrãpanʉrabara ãyi kayanʉmʉnera, mawũã ẽ bʉrʉ pʉapanʉnera kʼãrẽta oseapanʉ?

⁸ Dayirã jõmaʉ̃ta kʼãwũã berabaribʉ, dayi kayanʉmʉnera mawũã ẽ bʉrʉ dayi pʉanʉmʉnera edaʉde nekʼãrẽ awurura sopʉabibʉta jaraseabʉ mawũã ẽ bʉrʉ oseabʉ (Ecl. 7:7; Sant. 3:2). Mawũã barabarisi Jobta, iyi zʉbʉriade berabarinʉmasidera iya jara ẽ baibadata jarasi (Job 6:​1-3, nota). Maʉ̃ba dayirãba kʼawuapanʉ dayi kayanʉmʉnera mawũã ẽ bʉrʉ daya remedio donʉmʉnera nekʼãrẽ daya jara ẽ baibadata, mawũã ẽ bʉrʉ oẽ baibadata oseabʉ. Mamina mawũã kayabʉba mawũã ẽ bʉrʉ zõrãbʉba jarakĩrãkʉ ẽ dayirãbara wuabemarãra mitia edaibarata, mawũã ẽ bʉrʉ widibarata daya kãgabʉta odamarẽã, adewara daya jaradadeba mawũã ẽ bʉrʉ odadeba awururata sopʉabisibʉrʉ zarea odaibara ãyaʼa jaraita daya odata kĩrãduamarẽã (Mat. 5:​23, 24).

KʼÃRẼBA KʼAREBASEABɄ SOBIA BʼAITA

9. ¿Kʼãrẽa yi kʼarebabidaibara dayirãra? (Akʉra potorata).

⁹ Idu yi kʼarebabidadrʉ (Gál. 6:2). Abedaedara dayitara zareabʉ awurura yi kʼarebabira. Mebẽã aba yi trʉ̃ Gretlba naʉ̃ta jarabʉ: «Edaʉde mʉ̃itara zare awurura yi kʼarebabira, mʉ̃a krĩchabʉ ãyabida nekʼãrẽ mejãcha oibarade mʉ̃sida akʉibarata, mamina wiña wiñane kʼawuabʉrʉ eda krĩchabʉta ũdubibarata akʉza mʉ̃ara wãrĩnu nesidabʉta kʼarebadamarẽã». Dayirãba awurura yi kʼarebabibʉrʉdera kʼarebapanʉ maʉ̃rabida ũdudamarẽã awurura kʼarebabʉrʉdera sobiapanʉta (Hech. 20:35). Adewara dayirãsi sobiapanʉ ũdupanʉ baera mebẽrãbara dayirã ʉ̃rʉ krĩchapanʉta akʉza dayirãra wãrĩnu kãgapanʉta.

10. ¿Kʼãrẽa yibia biga diaira? (Akʉra potorata).

¹⁰ Biga diadadrʉ (Col. 3:15; 1 Tes. 5:18). Wuabemaraba dayirãbari nekʼãrẽ obʉrʉdera dayirã sobiadogo, mamina daya maʉ̃ta jaraira kĩrãduabari edaʉde. Mamina yibia awururaba dayirãbari nekʼãrẽ obʉrʉde ipidaita, mawũã ẽ bʉrʉ biga aita, mawũã ũdubipanʉ baera kʼãrẽaba kãgapanʉta dayirãbari obʉta. Mebẽã aba Betelde zõrãpanʉra akʉbʉba, yi trʉ̃ Leahba naʉ̃ta jarabʉ: «Mebẽã yõdrakiru abaʉba kartata amaebʉ mʉ̃ita, iya mama bedʼea jarabʉra mejãcha ẽ mamina maʉ̃neba ũdubibʉ iya kʼãrẽaba kãgabʉta mʉ̃ta. Mʉ̃ra mejãcha sobiabʉ iya mawũã obʉrʉdera kʼawuabʉ baera iya wãrĩnu kãgata mʉ̃a iyibari obʉra».

11. ¿Sãwũã kʼarebaseapanʉ wuabemarãra? (Akʉra potorata).

¹¹ Kʼarebadadrʉ wuabemarata. Dayirã ewarita, dayirã zareata zokʼapanʉbʉrʉ wuabemara kʼarebaita, mawũãra aukʼara krĩchada ẽ bayi dayirãba kʼãrẽ bedʼea zroma erbʉ ʉ̃rʉ, awuarabʉrʉ wuabemara ʉ̃rʉ krĩchadayi. Zõrãpanʉrãra jarapanʉ libro nebia jaradiabari kĩrãkʼabʉta, ẽbẽrarãba maʉ̃ librota leda ẽ bʉrʉ kʼãrẽ kʼawuai neẽ, maʉ̃ kĩrãkʼa dayirã zõrãpanʉraba dayirãba kʼawuabʉta wuabemara jaradia ẽ bʉrʉ wuabemaraba neẽ bayi kʼãrẽ ʉ̃rʉ kʼawuaira. ¿Sãwũã jaradiaseapanʉ ãyaʼa? Dayirã ãyiʉ̃me bedʼeabʉrʉde bedʼeata widiseapanʉ akʉza kĩrãkita ũrĩseapanʉ ãya kʼãrẽta jaraita, adewara jara ũrĩbidaibara ãyaʼa kʼãrẽa yibiata ewari jõmaʉ̃nẽ Jeowaba zokʼabʉta oita akʉza maʉ̃bʉrʉ ãyira wãrĩnu sobiabita. Dayirãba warrara mawũã jaradiapanʉbʉrʉ dayirãsida sobiapanañi ãyita kʼarebapanʉ baera akʉza ãyaʼa so zareata diapanʉ baera (Sal. 71:18).

12. ¿Isaías 46:4de kʼãrẽta jarabʉ Jeowabara iyi odepanʉra zõrãpanʉrãra? (Akʉra potorata).

¹² Jeowaʼa kʼarebata wididadrʉ. Edaʉde dayirãra mapae sentiseapanʉ akʉza zarea neẽã sentiseabʉ, maʉ̃ba mejãcha sopʉabiseabʉ. Mamina kĩrãbedaibara Jeowara audre zareabarabʉta dayirãira, Daizeze Bedʼeaba jarabʉ iyira pae ẽãta (Is. 40:28). Maʉ̃ba Jeowaba zarea dayirãba nesidabʉta diaseabʉ (Is. 40:​29-31). Akʉza Jeowabara jarabʉ kʼarebaita (akʉra Isaías 46:4). Iya kʼarebaya abʉbʉrʉ, iyara maʉ̃ra aripe oyi (Jos. 23:14; Is. 55:​10, 11). Dayirãta Jeowa yiwidʼira iya kʼarebayi dayirãba nesidabʉde. Jeowaba maʉ̃ obʉrʉdera dayirãba ũdudayi Jeowaba dayirã kʼãrẽaba kãgata akʉza maʉ̃ba sobiadayi mejãcha.

13. 2 Corintios 4:​16-18 jarabʉdeba, ¿kʼãrẽta kĩrãbedaibara? (Akʉra potota).

¹³ Kĩrãbedaibara aranʉbai dayirãra audre warrara bʼaita akʉza kaya ẽã bʼaita. Dayirãba kʼawuapanʉbʉrʉ dayi zʉbʉriabibʉta jõita arakʼaitabata mawũãra aukʼara zare ẽ bayi awuantaita. Daizeze Bedʼeaba dayirã jarabʉ zõna bʼaira akʉza kayara wua ũduda ẽ baita (Job 33:25; Is. 33:24). Maʉ̃ba dayirãra sobia baseapanʉ kʼawuapanʉ baera aranʉbai kaya ẽã panaita, zarea panaita akʉza kĩrãwãreã panaita (akʉra 2 Corintios 4:​16-18). Atia akʉdayi wuabemaraba sãwũã kʼarebaseapanʉta dayirãta.

SÃWŨÃ KʼAREBASEAPANɄ MEBẼRÃ ZÕRÃPANɄRÃRA

14. ¿Kʼãrẽa yibia zõrãrãpanʉra trʉ̃ita akʉza akʉ wãita?

¹⁴ Badua akʉ wãbaibara akʉza trʉ̃baibara (Heb. 13:16). Edaʉde mebẽrã zõrãpanʉrãra doba sentipanʉ. Mebẽã yi trʉ̃ Camilleba jarabʉ: «Edaʉde mʉ̃ra mejãcha krĩcha zroma obʉ akʉza kĩrʉbʉ dedaʉba aña wãbe ẽ baera akʉza nekʼãrẽ mejãcha oita neẽ baera». Dayirã mebẽrã zõrãpanʉra akʉ wãira jipade yibia mawũã ũdubipanʉ baera ãyi ʉ̃rʉ krĩchapanʉta akʉza ãyi kʼãrẽaba kãgapanʉta, mamina edaʉde dayirãba krĩchabaribaibara ãyi akʉ wãita, ãyi trʉ̃ita mamina kĩrãduabaribaibara maʉ̃ oita. Wãrĩnu, dayirãbara ewaridera nekʼãrẽ mejãcha oita erbʉ, mamina idu berabaribida ẽ baibara nekʼãrẽ audre yibiata oita kĩrãduaita, bari jaraita mebẽrã zõrãpanʉra akʉ wãita (Filip. 1:10). ¿Sãwũã oseabʉ dayirãba maʉ̃ra? Kongregasione mebẽrã zõrãpanʉra trʉ̃ta bʉseabʉ akʉza bʉseabʉ kʼãrẽ ewaride mensaje zokʼa bʉeita mawũã ẽ bʉrʉ trʉ̃ita ãyita. Adewara jidaseabʉ kʼãrẽ ewaride ãyi akʉ wãita, mawũã kĩrãdua ẽ baita.

15. ¿Kʼãrẽta oseapanʉ warraraba zõrãrãbawaraʉba?

¹⁵ Dayirã warrarabʉdera edaʉde krĩchaseabʉ zõrãpanʉraʉ̃mera kʼãrẽ ʉ̃rʉ bedʼeaita neẽãta mawũã ẽ bʉrʉ kʼãrẽta ãbaʉba oita neẽãta, mamina aukʼara krĩcha ẽ baibara maʉ̃ ʉ̃rʉ awuarabʉrʉ ũdubibara dayirã neũdukʼawua biata (Prov. 17:17). ¿Kʼãrẽta oseabʉ bʉa? Ãba yi jʉrebari jʉ̃drʉi nãã mawũã ẽ bʉrʉ jõna tẽã bedʼeaseabʉ ãyiʉ̃me, ãyaʼa widiseabʉ jara ũrĩbimarẽã saʉ̃ testota audre kãgata ãya mawũã ẽ bʉrʉ ãyi warrarabasieda kʼãrẽta opanasita, adewara trʉ̃seabʉ ãbaʉba JW Broadcasting^® akʉde wãita. Adewara nekʼãrẽ awurude kʼarebaseabʉ bʉa, bari jaraita kʼarebaseabʉ ãyi selularʼra atualiza diabʉrʉde mawũã ẽ bʉrʉ ʉ̃kʉrʉ kartara ʉ̃tʉ zenʉmʉta deskarga diabʉde. Mebẽã aba yi trʉ̃ Carolba jara ũrĩbibʉ kʼãrẽta oseabʉta, iya jarabʉ: «Trʉ̃ra mebẽrã zõrãpanʉrata bʉ deda jʉ̃ẽmarẽã bʉa kãgabʉta oita, bari jaraita mʉ̃ra yõdrakiru mamina mʉ̃ra ne eda wãkĩrã, nekode wãkĩrã, paseade wãkĩrã Jeowaba parãna akʉita». Akʉza awuru mebẽã yi trʉ̃ Mairaba naʉ̃ta nebʉrabʉ: «Mʉ̃a erbʉ neũdukʼawua aba 90 poagabʉta, iyira mʉ̃ira 57 poaga nãã bʉ, mamina edaʉde daira iyabaʉ poagadebema kĩrãkʼapanʉ, ãba ipidapanʉ baera, ãbaʉba pelikula akʉpanʉ baera akʉza kʼareba nesidadera yiya kʼareba jʉrʉpanʉ daira».

16. ¿Kʼãrẽa yibia zõrãpanʉra kopayaita medikoma wãita?

¹⁶ Mediko eda wãita kopayaibara. Mamina bari medikoidu diabaribara ẽ ãyira, awuarabʉrʉ ãyiʉ̃me kedaseabʉ akʉita mamabema medikoraba ãya bia edabʉ kʼawuaita akʉza ãya nesidabʉta diapanʉ kʼawuaita (Is. 1:17). Adewara medikoba jarabʉta bʉseapanʉ. Mebẽã wẽrã yi trʉ̃ Ruthba jara ũrĩbibʉ: «Mʉ̃ medikoma doba wãbʉrʉdera medikorabara ĩjãna ẽ mʉ̃a jarabʉra. Ãya edaʉde mʉ̃a jarapanʉ ‹Bʉara bari krĩchanʉmʉ mawũã mamina wãrĩnubaira bʉra kayabʉ ẽ›. Mamina mʉ̃ kopaya wãbʉdadera ãyara mʉ̃ra bia edapanʉ, maʉ̃ kʼarea mejãcha biga diakĩrãbʉ mebẽrã ãya ewarita jʉrʉpanʉ baera mʉ̃ kopaya wãita medikoma wãita».

17. ¿Kʼãrẽta oseapanʉ mebẽrã zõrãpanʉrabawaraʉba Daizeze Bedʼea jaradia wãita?

¹⁷ Ãyibawaraʉba Daizeze Bedʼeata jaradia wãdrʉ. Edaʉde mebẽrã zõrãpanʉraitara zareabʉ deza deza jaradia wãira ãyira mejãcha zarea neẽ baera, maʉ̃nera dayirãba kʼarebaseapanʉ ¿sãwũã? Trʉ̃seapanʉ dayirãbawaraʉba esibidorde jaradia wãita, maʉ̃nera ãyita siyata edeseapanʉ, mawũã ẽ bʉrʉ trʉ̃seapanʉ dayirãbawaraʉba Daizeze Bedʼea kʼawuabide wãmarẽã, mawũã ẽ bʉrʉ ãyi deda Daizeze Bedʼeata kʼawuabiseabʉ dayirã nekʼawuabaria. Adewara zõrãrãba jʉrʉseapanʉ ãyi dedaʉba Daizeze Bedʼea jaradia wãita, mawũã ãyitabida zare ẽ bamarẽã jaradia wãita. Dayirãta zarea opanʉbʉrʉ mebẽrã zõrãpanʉra kãga ũdubita akʉza wawia ũdubita mawũãra sobiabidayi Jeowata (Prov. 3:27; Rom. 12:10).

18. ¿Kʼãrẽ ʉ̃rʉ kʼawuadai wuarebema artikulode?

¹⁸ Naʉ̃ artikulode kʼawuasida Jeowaba akʉza kongregasionebemarabara nebia zroma kĩrãkʼa akʉpanʉta zõrãpanʉrãra akʉza kãgapanʉta. Wãrĩnu zõna babʉrʉdera mejãcha bedʼea zromata ũdubʉ mamina Jeowaba kʼarebabʉ sobiapanaita (Sal. 37:25). Audre sobiapanʉ kʼawuapanʉ baera aranʉbai audre bia panaita nãã badaira. Mamina panʉ ʉ̃kʉrʉ mebẽrã awuru bedʼea zroma erpanʉta, ãyara akʉibara ãyi mebẽrãnebema zõrãbʉta, ãyi wũãwũãta mawũã ẽ bʉrʉ ãyi neũdukʼawua kayabʉta akʉibara. Yi wuarebema artikulode kʼawuadayi kʼãrẽba kʼarebaseabʉta naʉ̃ra mebẽrãba ãyi sobiata aduada ẽ marẽã.