Juwaʼãkʼare: Nãgʉ zroma Ian, (Florida, Estados Unidos), septiembre 2022de (Sean Rayford/Getty Images); ẽzadra: Yi papata yi wũãwũãʉ̃me ãĩ edesida (Donetsk, Ucrania), julio 2022de (Alex Chan Tsz Yuk/SOPA Images/LightRocket via Getty Images); juwarare: esamenta obarabʉ COVID ba baribʉ kʼawuaita (Pekín, China), abril 2022de (Kevin Frayer/Getty Images).
DAUBA BʼAIDUA
2022: Naʉ̃ poaga mejãcha bedʼea zromata ũdu zebʉrʉ | ¿Kʼãrẽta jarabʉ Daizeze Bedʼeabara maʉ̃ ʉ̃rʉ?
Naʉ̃ poaga 2022de mejãcha ũdu zebʉrʉ yõta, plata neẽãta akʉza naʉ̃ drʉa sãwũã audre mitia wãta. Daizeze Bedʼeaba jara ũrĩbibʉ naʉ̃ drʉara kʼãrẽa mawũã wãta.
2022de wãrĩnu kʼãrẽ berabari wãta
Idi ewade naʉ̃ poagade kʼãwũã kʼãrẽ berabaribʉba ũdubibʉ wãrĩnu dayirãra ewari jõbodoarebʉta (2 Timoteo 3:1). Maʉ̃ ewari jõbodoarebʉra jʉ̃drʉsi poaga 1914deba ʉ̃ta. Akʉra idi kʼãrẽ berabarinʉmʉra Daizeze Bedʼeaba jarada kĩrãkʼabʉ:
«Yõnʉmʉta» (Mateo 24:6).
«2022: Naʉ̃ poagade jẽda Europade yõ jʉ̃drʉsi».a
Akʉra artikulo «Rusia invade Ucrania».
«Bayi jarrabata» (Mateo 24:7).
«2022: Mejãchabasi jarrabata maʉ̃ra nããrãra ũdukadebasi».b
Akʉra artikulo «Ucraniane yõ berabarinʉmʉba audre eababinʉmʉ jarrabata».
«Kaya zromarata» (Lucas 21:11).
«Jẽda zebʉrʉ kaya poliota, adewara audre eaba wã kaya viruela del monota akʉza COVID-19 bara wãbidabasidu ẽbẽra mejãcha bea wã. Naʉ̃ba ũdubibʉ naʉ̃ kayara jipa kayiruata, naʉ̃ kayara badumae wã baera mesera kayabiseabʉ ẽbẽrarãta».c
Akʉra artikulo «Ẽbẽrarã 6 millón beisi COVID-19ba».
«Ũdudayi nekʼãrẽ dayi daʉperabʉta» (Lucas 21:11).
«Poaga 2022dera mejãcha basi jʉ̃wʉrʉata akʉza jipa kue ze ẽ basi, oira bawasi, dota mejãcha berabarisi [...] Kʼãwũã berabaribʉba drʉara mejãcha ãrĩ wã, maʉ̃ba mejãchaʉta bea wã akʉza maʉ̃ kʼarea ẽbẽra mejãchaʉta ãyi drʉadeba aña wãbibʉ».d
Akʉra artikulo «Naʉ̃ drʉa jõmaʉ̃nẽ jipa jʉ̃wʉrʉabʉ».
«Nokʼo bawara zhõ nʉmeta» (Lucas 21:9).
«Ẽbẽrarã mejãcha kĩrʉnʉmʉ platata mejãcha neẽ baera akʉza nekʼãrẽ edaita audre balebʉ baera. Maʉ̃ kʼarea poaga 2022de ũdusida ẽbẽrarã nokʼorabawara audre yõbarabʉta».e
Akʉra artikulo «Naʉ̃ drʉadera nekʼãrẽra audre bale wã».
¿Kʼãrẽta berabari wuarebema poaga zebʉrʉdera?
Mia abaʉba kʼawuada ẽ kʼãrẽ berabarita poaga 2023dera. Mamina wãrĩnu kʼawuapanʉ aranʉbai Daizeze Nokʼoba nebia weita naʉ̃ drʉade, naʉ̃ Nokʼora ʉ̃tʉbema. (Daniel 2:44) Daizeze Nokʼobara jõbiyi ẽbẽrarã mejãcha zʉbʉriabʉra adewara oyi ẽbẽrarã jõmaʉ̃ba odamarẽã Daizezeba kãgabʉta naʉ̃ drʉade (Mateo 6:9, 10).
Kãgapanʉ Jesuba jarada kĩrãkʼa opanamarẽã akʉza jʉra kʼawua akʉpanaidua kʼawuaita, sãwũã aripe berabari wãta propesia Daizeze Bedʼeaba jaradara naʉ̃ drʉade berabarinʉmʉba (Marcos 13:37). Bʉa kãgabʉrʉ daibawara bedʼeaseabʉ audre kʼawuaita sãwũã Daizeze Bedʼeaba idi ewaride kʼarebaseabʉta akʉza sãwũã Daizeze Bedʼeaba jarabʉba nebia ʉ̃ra zeide.
a Jill Lawless: “2022 Was Year the Horror of War Returned to Europe,” AP News, 8 diciembre 2022de.
b “Una crisis alimentaria mundial”, Programa Mundial de Alimentos.
c Lawrence O. Gostin, JD: “Living in an Age of Pandemics—From COVID-19 to Monkeypox, Polio, and Disease X”, JAMA Health Forum, 22 septiembre 2022de.
d Martina Igini: “Whatʼs Behind the Record-Breaking Extreme Weather Events of Summer 2022?”, Earth.Org. 24 octubre 2022de.
e Thomas Carothers y Benjamin Feldman: “Economic Anger Dominated Global Protests in 2022”, Carnegie Endowment for International Peace, 8 diciembre 2022de.