Jesús audu mejãchabʉ ẽbẽrarã awuara awuarakadebemata

¿Jesubara dayirãra sãwũã ẽdrʉbibʉ?

Daizeze Bedʼeaba panʉbʉ

Jesúsba ẽdrʉbisi ẽbẽrarã kʼẽrẽpabʉra iyi maʉ̃ra bari beiside (Mateo 20:28). Maʉ̃ba, Daizeze Bedʼeaba jarabʉ Jesúsʼra naʉ̃ drʉara ẽdrʉbidata (1 Juan 4:14). Adewara Daizeze Bedʼeabara jarabʉ: «Awʉrʉdʼebara ẽdrʉ ẽã, naʉ̃ ẽjũãnerã awʉrʉrã ne ẽã Daizezeba zhãrã bʼea diadʼara dazhirã maʉ̃neba ẽdrʉdʼaira» (Hechos 4:12).

Jesúsʼra beisi ẽbẽrarã wãrĩnu iyi bedʼea ĩjãbʉ kʼarea (Hebreos 2:9; Juan 3:16). Maʉ̃are, iyi beida tẽã Jeowaba jẽda piradrʉbisi jaurede, mawũã ʉ̃ta wãsi (Hechos 3:15). Jesúsbara ʉ̃tʉba bajãneba «ẽdrʉbiseabʉ iyideba Daizeze orrapanʉrãra, iyira ewari jõmaʉ̃nẽbʉ baera, badua dayirãbari Daizezeʼa Bedʼea zʉbʉria bedʼeabʉa» (Hebreos 7:25).

¿Kʼãrẽa nesidapanʉ Jesústa dayirãre bedʼeamarẽã?

Dayirã jõmaʉ̃ta kayirua omia baera (Romanos 3:23). Kayiruabara dayirãra beibibʉ akʉzade iduaribida ẽ dayirã Jeowa kʼaita bʼaita (Romanos 6:23). Jesúsʼra dayirã kʼarebabari kĩrãkʼabʉ, dayirãre bedʼeabʉ jari ẽbẽra wãrĩnu iyi beida ʉ̃rʉ ĩjãbʉ kʼarea (1 Juan 2:1, nota). Jesúsʼra beisi baera, Daizezeʉ̃me bedʼeaseabʉ dayirãre dayirã yiwidʼita ũrĩmarẽã, akʉza kĩrãduadamarẽã dayirãba aña obʉta (Mateo 1:21; Romanos 8:34). Jesús dayirãbari bedʼeabʉrʉdera Jeowaʼa, Jeowabara ũrĩbʉ iyi bedʼeara, Jesúsba Jeowaba kãgabʉta obʉ baera. Jeowabara Jesústa ʉ̃tʉba zebisi dayirã ẽdrʉbita beideba (Juan 3:17).

¿Jesústrʉ ĩjãibaraka beideba ẽdrʉira?

Mawũã ẽ. Jesúsʼta ĩjãibaramina audre oibara (Hechos 16:30, 31). Daizeze Bedʼeaba jarabʉ :«Ãyi kakuata ĩñaba neẽbʉrʉ beibʉ, maʉ̃ kĩrãkʼa daya ĩjãbʉta ũdubi ẽ bʉrʉ beibʉ» (Santiago 2:26). Dayirã ẽdrʉira, naʉ̃ta oibara:

Kʼawuadaibara Jesús ʉ̃rʉ, akʉza yi zeze Jeowa ʉ̃rʉ (Juan 17:3).
Ĩjãibara Jesús ʉ̃rʉ akʉza Jeowa ʉ̃rʉ (Juan 12:44; 14:1).
Ũdubibara wãrĩnu ĩjãbʉta iyi bedʼeaba jarabʉta obʉde (Lucas 6:46; 1 Juan 2:17). Jesúsba jarasi yi jari señor señor abʉrʉ ẽdrʉ ẽãta, awuarabʉrʉ oibarata yi zeze Jeowaba Jarabʉta (Mateo 7:21).
Dayirã bedʼea zroma erbʉmina dayirãba ũdubibara wãrĩnu ĩjãnapanʉta. Jesúsba jarasi: «Mawũãmina izhi ewarita jõñeẽna mʉta pẽwã bʼʉra ẽdrʉya» (Mateo 24:13).