¿Naʉ̃ Drʉara ãrĩ wãika?

Daizeze Bedʼeaba panʉbʉta

Mawũã ẽ, naʉ̃ drʉara ãrĩ wã ẽ, bawa ẽ akʉza awuru drʉata oda ẽ. Daizeze Bedʼeabara jaradiabʉ naʉ̃ drʉara ewari jõmaʉ̃nẽ bamarẽã osita.

• «Ẽbẽra biaratrʉ duanañi maʉ̃ drʉadera akʉza ewari jõmaʉ̃nẽ bayi maʉ̃ ʉ̃rʉra» (Salmo 37:29).

• «Iya osi naʉ̃ drʉara, ewari jõmaʉ̃nẽ bʼaita jõbari ẽãta» (Salmo 104:5).

• «Ẽbẽrarã bei wã akʉza wuabemarãra to wã, mamina naʉ̃ drʉara ewari jõmaʉ̃nẽ bayi» (Eclesiastés 1:4).

• «Naʉ̃ drʉa parãnata akʉza maʉ̃ odata. Iya ãrĩ ẽ baide parãsi, bari ewari abaʉde parã ẽ basi, awuarabʉrʉ parãsi ẽbẽrarãta panamarẽã» (Isaías 45:18).

¿Ẽbẽrabara naʉ̃ drʉara jõma mãrĩka?

Daizezebara naʉ̃ drʉara idu mãrĩbi ẽ bayi ẽbẽrarã yõ kʼarea akʉza nekʼãrẽ awuarabʉ kʼarea. Awuarabʉrʉ Daizeze Bedʼeaba jarabʉ makenaita naʉ̃ drʉa ãrĩbʉrata (Apocalipsis 11:18). ¿Sãwũã oi iya maʉ̃ra?

Daizezebara iyi nokʼota weyi, ãĩ bʉeyi ẽbẽrarã nokʼo naʉ̃ drʉadebʉra (Daniel 2:44; Mateo 6:9, 10). Maʉ̃ nokʼora Daizeze warraba zokʼayi, yi trʉ̃ra Jesús (Isaías 9:​6, 7). Jesús nama naʉ̃ drʉaeda zesidera Jesúsbara taʉbiseabasi pʉãdrʉ zromata, kue zromata akʉza bata (Marcos 4:35-41). Jesúsʼra Daizeze nokʼota zokʼabʉ baera aranʉbai iya nekʼãrẽ naʉ̃ drʉade berabarinʉmʉra zokʼabeseabayi. Bari jaraita, badu pʉãdrʉ zromata, ba zromata akʉzade kue zromata. Adewara iya naʉ̃ drʉara ara oyi, mõbe nããra Edén drʉa kĩrãwãreã bada kĩrãkʼa babiyi (Mateo 19:28; Lucas 23:43).

¿Daizeze Bedʼeaba jarabʉ ẽka naʉ̃ drʉara tʉbʉba ba wãita?

Mawũã ẽ, edaʉde ẽbẽrarãbara maʉ̃ta krĩchaseabʉ ãya bia kʼawua ẽ baera 2 Pedro 3:7ba jarabʉta, naʉ̃ testoba jarabʉ: «Ãĩ wagabʉ kʼãrẽ, bajãta, egorota tʉbʉ pʉreaba makenaita». Akʉdaya maʉ̃ bedʼeaba kʼãrẽta jarakĩrãkʉta.

1. Daizeze Bedʼeaba bajãta, egorota akʉza tʉbʉ pʉreata jarabʉrʉdera maʉ̃bara kĩrã bio jarakĩrãkʉ. Bari jaradaita, Génesis 11:1ba jarabʉ «naʉ̃ drʉadebema ẽbẽra jõmaʉ̃ta bedʼea abarika bedʼea basi». Naʉ̃ testode drʉa ʉ̃rʉ bedʼeabʉrʉdera jarakĩrãkʉasi ẽbẽrarãta.

2. 2 Pedro 3:7ba jaradata nãã akʉza maʉ̃are jarada naʉ̃ba jara ũrĩbibʉ bajãta, egorota akʉza tʉbʉ pʉreata kʼãrẽta jarakĩrãbʉta. Bersikulo 5 akʉza 6ba jara ũrĩbibʉ Noé ewaride kue zroma zeda ʉ̃rʉ. Noé ewaride kue zroma zesidera ẽbẽrarãtrʉ makenasi, naʉ̃ drʉara neida berabari ẽ basi. Kue zromabara naʉ̃ drʉara mãrĩ ẽ basi awuarabʉrʉ majõbisi ẽbẽra kayiruaratrʉ (Génesis 6:​11). Nama bajã ʉ̃rʉ bedʼeabʉrʉdera jarakĩrãbasi jãrĩ ẽbẽrarã yi zokʼabadarata maʉ̃rasida makinisi. Ẽbẽrarã kayiruaratrʉ makinisi, mamina naʉ̃ drʉara neẽãbasi. Noéʼta yi mebẽrãbawara beida ẽ basi, neneẽã ẽdrʉsida maʉ̃ neba, maʉ̃ba ãya naʉ̃ drʉa jõma jẽda ẽbẽrarãba birabisi (Génesis 8:​15-​18bayeda).

Kʼãwũã kue zromaba ẽbẽra kayirua makenana kĩrãkʼa, abarika 2 Pedro 3:7de tʉbʉ pʉrea jarabʉbara abarika makenañi ẽbẽra kayiruarata. Daizeze Bedʼeaba jarabʉ: «Bayi bajã yiwidita, drʉa yiwidita, mama neneẽbayi iyi bedʼeaba jarabʉ kĩrãkʼa akʉza mama nekʼãrẽ aripe obayi» (2  Pedro 3:​13). Drʉa yiwidibara jarakĩrãbʉ ẽbẽrarã kʼẽrẽpa panʉrata akʉza bajã yiwidibara jarakĩrãbʉ Daizeze nokʼota. Daizeze nokʼoba naʉ̃ drʉa zokʼabʉrʉdera naʉ̃ drʉara jõma kĩrãwãreã bayi (Apocalipsis21:​1-4).