Marcos
Uvadʼe trajabadata bia ẽãta bʼeadʼa
(Mateo 21:33-46; Lucas 20:9-19)
12 Mobebʉrʉ Jesúsbara ne bio jarakʼa mawũãsia: Ũmakĩrãba uvata upe serrape osia uva bʼata piabarita. Mobe uva akʉita pãrãsia deta ʉ̃tʉ drasoa, mobe uvadʼe trajabadaa arrendape wãsia wawara. 2 Uva bʼʉabada ewade nezokʼata zokʼasia uvadʼe trajabadama, uva izhaa diabʉdata jidamarẽã. 3 Mawũãmina maʉ̃rãbara jirtopota jirachisidʼa, aramaʉ̃ne buesidʼa juwuaawa. 4 Wakusa nezokʼa awʉrʉta ãzhima zokʼabʉrʉra mongʼaraba tabʼari puosidʼa buruta, mobe ikʼazhirua jarasidʼa. 5 Wakusa awʉrʉta zokʼabʉrʉra beasidʼa. Dewara bio zokʼabʉrʉra ʉ̃kʉrʉ jirachisidʼa, ʉ̃kʉrʉ beasidʼa.
6 Wadʼi abʼa erubʼʉta erubʼasia zhi warra izha kʉãgʼata. Maʉ̃sidʼa maʉ̃rãma zokʼabʉrʉta mawũãsia: Wawiadʼaya mʉ warrara. 7 Mawũãmina uvadʼe trajabadara ãzhirãĩnu mawũãsidʼa: Ne zhi zezedʼera naʉ̃ba jidaya. Mawũẽ beadʼaya, izha jidaita bʼʉra aramaʉ̃ne dazhirãba jidadʼaya. 8 Aramaʉ̃ne jirtopota beasidʼa, mobe ãĩ bʼaribuesidʼa uvadʼebara.
9 ¿Aramaʉ̃nerã uva zhibaribara sãwũã oipe? Wãpe beakuaya uvadʼe trajabadara, mobe uva izhidʼera chãbʼariya awʉrʉrãã.
10 ¿Aramaʉ̃ kĩrãkʼa mʉ seribidʼa ẽãnebemata zhi bʼʉmarã marãbara ledʼakʼa kĩrãkʼa duanu ẽka?:
¿Jara bʼʉ ẽka de obadaba mongʼara seri ẽãne bʼʉdʼapeadʼara wagʼauta bʼesita.
11 Daizezeba mawũã osi baera dazhirãma ne bia abʼʉ ẽka?*
12 Jida krĩñasidʼa mawũã ne jarabʉrʉbara ãzhita jarabʉrʉta kʼawuabʉdaba. Mawũãmina kʼabanata wawiabʉdaba ãmaẽbʉdata wãsidʼa.
Rey Romanebemaĩta plata diabadadʼebema
(Mateo 22:15-22; Lucas 20:20-26)
13 Fariseorãta ʉ̃kʉrʉ rey Herode pẽwã bʼeta ʉ̃kʉrʉ Jesúsma zokʼasidʼa wãẽã bedʼeabidʼamarẽã. 14 Mawũẽ maʉ̃rã zekuape mawũãsidʼa: Miã Ũrãgʼabari, daiba kʼawua bʼedʼera bʉara jara bʼʉa wãrãta, bʉra krĩcha zhãrãneã zhi edebi ẽã bʉara akʉ ẽbaera zhãrãnebemata. Awuarabʉrʉ wãrĩnuta jara bʼʉa Daizeze ota. ¿Diasia bʼʉka rey César plata diabadara, o dia bʼe ẽ? ¿Diadʼaidʼe bʼʉka o diadʼaidʼe bʼʉ ẽ?
15 Jesúsbara kʼawuasia ãzhira sewa bibaʉta kʼobʼeta, mawũẽ mawũãsia: ¿Mʉrã kʼãrẽã wãẽãbidʼaita kʼopanʉ? Denario abʼa mʉma weudua mʉã akʉita.
16 Ãzha wedʼai Jesúsbara mawũãsia: ¿Naʉ̃nerã kʼai zata nʉmʉ, kʼai trʉ̃ta bʼʉ nʉmʉ?
Mawũãĩ ãzhara mawũãsidʼa: Césardʼea.
17 Mawũãnaĩ Jesúsbara panaʉ̃ mawũãsia: Césardʼera César diaudua, Daizezedʼera Daizezea diaudua.
Mawũãĩ bia akʉdruasidʼa izhira.
Beudʼata piradrʉdʼaidʼebema
(Mateo 22:23-33; Lucas 20:27-40)
18 Maʉ̃ne saduceorãta zesidʼa Jesúsma, maʉ̃rãbara jara bʼea beudʼara piradrʉ ẽãta, mawũẽ widʼi mawũãsidʼa: 19 Miã Ũrãgʼabari, Moisébara bedʼeata bʼʉdʼata mawũãsia: Mebea iabʼaʉdʼeta beubʉrʉdʼe zhi kĩma ãmaẽbʉrʉta warrata ãmaẽ ẽbʉrʉ zhi mebeaba edaibara, aramaʉ̃ne zhi mebea beudʼata warra barabiya. 20 Ewari abʼa mebẽrãta siete pãĩna bazhia, nabemata miã kʼãĩpe beusia warra ne ẽã. 21 Mawũẽ maʉ̃ wũẽrã zhi tẽãbemaba kʼãĩpe maʉ̃sidʼa beubʉrʉba warra ãmaẽ ẽbasia. Abʼarika berabʼarisia zhi ũbeasidʼa. 22 Sietera jõma mawũã berabʼaribʉrʉba miõba warrarã ãmaẽ ẽbasia. Nʉmʉne beusia wũẽrãsidʼa. 23 Kʼõbe beudʼata piradrʉbʉdadʼera, ¿ãzhirãnebemabara sãʉ̃ba izhi wũẽrã baipe mawũã sieteba ãzhi wũẽrã babidʼapeadʼara?
24 Mawũãnaĩ Jesúsbara panaʉ̃ mawũãsia: Marã wãẽã bʼeba maʉ̃ẽnabemata zhi bʼʉmarã sãwũãta kʼawuadʼa ẽã, miã Daizeze zareara sãwũãta kʼawuadʼa ẽã. 25 Beudʼata piradrʉbʉdadʼera miã kʼãĩna ẽã, awuarabʉrʉ ángelerã ʉ̃tre bʼe kĩrãkʼa bʼeaya. 26 Mawũãmina beudʼata piradrʉdʼaidʼebema, ¿marãbara Moisé librodʼera ledʼakʼa kĩrãkʼa bʼeta Daizezebara ʉrʉta nʉmʉ maẽba Moiséa mawũãsi ẽka?: ¿Mʉrã Abraham Zhibaria, Isaac Zhibaria, Jacobo Zhibaria asi ẽka? 27 Aramaʉ̃nerã Daizezera beukuadʼa Zhibari ẽã, awuarabʉrʉ zokʼai bʼe Zhibaria. Mawũẽ marã biodʼe wãẽã bʼea.
Zhi zromata bʼʉa aribʼaedʼai bʼʉta
28 Ũrãgʼa Moisédʼe jarabadaba abʼaʉba Jesús orrasia, saduceorãba widʼibʉdata bia panaʉ̃bʉrʉta ũrĩpe widʼi mawũãsia: ¿Sãʉ̃ta zhi zromape Daizezeba aribʼaemarẽã jara bʼʉta jõmaʉ̃nebema?
29 Mawũãĩ Jesúsbara jarabʉrʉta panaʉ̃ mawũãsia: Jõmaʉ̃nebema zhi zromata Daizezeba aribʼaemarẽã jara bʼʉra mawũã bʼʉa: Israel bʼebara ũrĩũdua: Nokʼo Daizezera abʼa bʼʉa. 30 Nokʼo Daizezera soidʼu kʉãgʼarua, bʉzhi jawureidʼuba, bʉzhi krĩchaidʼuba, bʉzhi zareaidʼuba. 31 Maʉ̃ zhi ũmeta dewara mawũã bʼʉa: Zhãrã kʉãgʼarua bʉzhi kĩrãkʼa. Daizezeba aribʼaemarẽã jara bʼʉra awʉrʉ audre zhi zroma ne ẽã maʉ̃rã kʼãñabara.
32 Mobebʉrʉ ũrãgʼa Moisédʼe jarabaribara mawũãsia: Miã Ũrãgʼabari, bʉa wãrĩnuta jarabʉrʉ kĩrãkʼa Daizezera abʼa bʼʉta awʉrʉ izhi kĩrãkʼara ne ẽã. 33 Mawũã Daizezeta soidʼu kʉãgʼaira, dazhi jawureidʼuba, dazhi zareaidʼuba kʉãgʼaira, zhãrã dazhi kĩrãkʼa kʉãgʼaira audre biga nendʉwʉrʉta bio Daizezeita bai kʼãñabara.
34 Mawũã krĩchadʼe panaʉ̃bʉrʉba Jesúsbara mawũãsia: Bʉra Daizezeta Nokʼodʼebemane babodʼoa.
Aramaʉ̃ne miõba wueta kʼãrẽ widʼidʼa ẽbasia.
¿Kʼaidʼeba uru zhãrã Ẽdrʉbira?
(Mateo 22:41-46; Lucas 20:41-44)
35 Daizeze dedʼa ewara maẽ Jesús miã ũrãgʼa mawũãsia: ¿Ũrãgʼa Moisédʼe jarabadabara jara panʉka zhãrã Ẽdrʉbira rey Davidʼeba uruta? 36 Davidbara Jawurebiadʼeba mawũãsia:
Daizezebara mʉ Nokʼoa mawũãsia: Mʉ juwua araare jewedʼarua, bʉ jura bʼeta jõma mʉã bʉ jẽrũ edre bʼʉyeedʼa.* 37 Davidba mawũã izhi Nokʼoa adʼara, ¿sãwũã bari kʼãwũta izhidʼeba uruta bʼaipe? Kʼabanabara Jesús bedʼeara ũrĩ bʼeasia ũrĩ krĩña.
Ũrãgʼa Moisédʼe jarabadadʼebema
(Mateo 23:1-36; Lucas 11:37-54; 20:45-47)
38 Jesús miã ũrãgʼa nʉmʉnerã mawũãsia: Kĩrãkuita bʼeaudua ũrãgʼa Moisédʼe jarabada kʼarea, zhi zromane tebaita wua eidʼu drasoa jʉ̃ teba krĩñadea, ãzhi wawia saludʼaita krĩñadea pʉwʉrʉdʼe kʼabana maẽrã. 39 Nokʼorãta jewedʼabari maẽ jewedʼa krĩñadea de zhi jʉrebadata nʉme maẽrã, nokʼorãta jewedʼabari maẽ jewedʼa krĩñadea nekʼodʼe trʉ̃bʉdadʼera. 40 Deta wũẽrãrã pẽdrarãneta jãrĩ bʼea, mobe zhãrãma bia nʉmaĩta dããrã zhiwidʼibada. Maʉ̃neba maʉ̃rã Daizezebara audre pua kʼawua oya.
Ofrenda diadʼa wũẽrã pẽdraba
41 Ofrenda edʼa kenabʼaribada maẽ kĩrãbita Jesús jewedʼa kʼobʼʉdʼe, akʉ kʼobʼasia zhãrãba plata edʼa kenabʼari kʼopanʉta. Bara bʼebidʼa bioba plata bio edʼa kenabʼari kʼopanasia. 42 Maʉ̃ne wũẽrã pẽdrata zuburia bʼʉta zepe moneda zakerãta ũme edʼa kenabʼarisia bio vale ẽãta. 43 Mawũẽ Jesúsbara izha jʉrʉkuadʼata trʉ̃pe mawũãsia: Mʉã wãrĩnu marãã jaraya, naʉ̃ wũẽrã pẽdrata zuburia bʼʉbara jõmaʉ̃ kʼãñabara plata audre edʼa kenabʼaribʉrʉa. 44 Wuaabemabara edʼa kenabʼaribʉda plata audʼubemata, mawũãmina naʉ̃ wũẽrãbara zuburia bʼʉdʼe jõma edʼa kenabʼaribʉrʉa izhi nekʼoita erubʼadʼata.