Mateo
Jesúsba jaradʼa Daizeze de ãrĩnaĩta
24 Daizeze dedʼa ewara maẽba Jesús wãne, izha jʉrʉkuadʼabara orrasidʼa de nʉmeta ũdubidʼaita Daizeze dedʼebemata.
2 Mawũẽ mawũãsia: ¿Marãbara akʉ kʼopanʉ ẽka naʉ̃ jõma? Mʉã wãrĩnu marãã jaraya, namarã mongʼara abʼari mongʼara ʉ̃rʉ̃bidʼa kʼobʼa ẽbaya ãrĩbʉdaba.
Sãwũãĩnebema ẽjũã jõĩ nawedʼa
(Marcos 13:3-23; Lucas 21:7-24)
3 Olivo kʼatumane Jesús jewedʼa bʼʉdʼe izha jʉrʉkuadʼabara orradʼape dobʼaʉa mawũãsidʼa: ¿Daia jaradua, sõmbedʼepe Daizeze deta mawũã ãrĩnaĩrã, sãwũãĩpe bʉ zeira, sãwũãĩpe ewari nʉmʉta jõĩrã?
4 Mawũãnaĩ Jesúsbara panaʉ̃ mawũãsia: Kĩrãkuita bʼeaudua miõã zhi sewabidʼa ẽbaita. 5 Nʉmʉne bio sewata mʉneba zebʉdabara mawũãnaña: Mʉrã zhãrã Ẽdrʉbia. Aramaʉ̃ne bio sewadʼaya. 6 Marãbara zhõta ũrĩnaña namabidʼa ãĩbidʼa, maʉ̃nerã perarãũdua, maʉ̃ jõma mawũã berabʼariibara, mawũãmina wadʼi ẽbaya ewari nʉmʉta jõĩrã. 7 Drua tabʼeta drua awʉrʉta tabʼe bawara zhõnaña, nokʼorãta nokʼorã awʉrʉ bawara zhõnaña. Nʉmeña puata, jarrabata, ẽjũã ureta baridu maẽ. 8 Maʉ̃ jõma puata jẽdeba nʉmeña.
9 Marã chãbʼaridʼaya zuburia odʼamarẽã, aramaʉ̃ne beakuadʼaya, marã jõmaʉ̃ba juradʼaya mʉ kʼarea. 10 Mʉnebemata ĩjã bʼebara maʉ̃ ewadera bioba ĩjã ẽã duaneña, mawũẽ zhiya zhi jidabidʼaya, zhiya zhi juradʼaya. 11 Sewata Daizezeba bedʼeata jarabibaridʼe duanaĩta bio piradrʉdʼaya, aramaʉ̃ne bio sewadʼaya. 12 Bia ẽãta eababʉrʉba bioba zhãrã kʉãgʼadʼa ẽbaya. 13 Mawũãmina izhi ewarita jõñeẽna mʉta pẽwã bʼʉra ẽdrʉya. 14 Kʼãwũã bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ, aramaʉ̃ne zhãrã jõmaʉ̃ba kʼawuadʼaya, mobebʉrʉ zeya ewari nʉmʉta jõĩrã.
15 Mawũẽ Daizeze dedʼa jaidʼebema ne mitiata nʉmʉbʉdata marãba ũdubʉdadʼera, Daizezeba bedʼeata jarabibariba Danielba jaradʼata ũdudʼaya. Mawũẽ zhi naʉ̃ lebʉrʉbara maʉ̃ sãwũãta kʼawuarua. 16 Mobebaira Judeadʼe bʼera merũ wãẽbaudua kʼatumaẽna. 17 De ʉ̃rʉ̃ kʼobʼʉra udʼubʼaepe edʼa wãrãrũã kʼãrẽ bʉzhi dedʼabema jiraedaira. 18 Meã kʼobʼʉra deidʼu zerãrũã bʉzhi wua jiraedaira. 19 Bʼiogʼoa bʼera, wũãwũã judʼebema erubʼera zuburiadʼaya maʉ̃ ewadera. 20 Mawũẽ zhiwidʼiudua marã mawũã merũbʉdadʼera nʉma ẽbamarẽã kue ewarita miã ẽnaʉ̃bada ewarita. 21 Mobebaira kʼãbãẽã zuburiatrʉ nʉmaña, ẽjũã osidʼadʼebemata idʼibasiidʼu mawũãrã ne ẽãta nʉmaña, miã tẽãbidʼa mawũãrã nʉma ẽbaya. 22 Maʉ̃ ewarita Daizezeba kʼakutua nʉmʉ ẽbʉrʉ miõta zokʼai bʼa ẽã. Mawũãmina izha zhi jʉrʉmata bʼe kʼarea maʉ̃ ewarira kʼakutua nʉmʉña.
23 Mawũẽ iabʼaʉba zhãrã Ẽdrʉbita za bʼʉa abʉrʉdʼera, o zawa bʼʉa abʉrʉdʼera ĩjãrãũdua. 24 Nʉmʉne zhãrã sewata zhãrã ẽdrʉbita duaneña, sewata Daizezeba bedʼeata jarabibaridʼe duaneña, ũdudʼakʼa zromata okuabʉdaba zhãrã sewadʼaya, sewaita obʼedʼara Daizezeba zhi jʉrʉmata bʼesidʼa sewadʼaya. 25 Ya mʉãrã maʉ̃ta marãã jarabʉrʉa nawedʼa. 26 Mawũẽ drua drudrua tabʼʉ maẽ zhãrã ẽdrʉbita bʼʉa abʉdadʼera akʉdʼe wãrãũdua, o dedʼa bʼʉa abʉdadʼera ĩjãrãũdua. 27 Bata dajada pureabari kĩrãkʼa mʉ Beubari Bape bʼadʼata zebʉrʉdʼera dajada zeya. 28 Ne beuma tabʼʉra kʼawuabada ãkʼoso pouga nʉmʉba. (Mʉ zebʉrʉra aramaʉ̃ kĩrãkʼa kʼawuadʼaya.)
Jesús zeidʼebema
(Marcos 13:24-37; Lucas 17:26-30, 34-36; 21:25-33)
29 Aramaʉ̃ta jari ewadera mawũã zuburia nʉmana tẽãne ʉ̃madaura pãrĩguya, jedʼekʼora ʉ̃na ẽbaya, chĩdaura bãjãneba jurzoaya, ne zarea zromarãta bãjãnebema pʉrʉderreadʼaya. 30 Mobebʉrʉ ũdudʼakʼata ũdubʉdata mʉ Beubari Bape bʼadʼata bãjãneba uruta ũdudʼaya, mawũã ũdubʉdaba druadʼe zhãrã bʼera jõma peraba jẽgadʼaya. Maʉ̃nerã mʉ Beubari Bape bʼadʼara bãjãneba jãrãrãne uruta ũdudʼaya zarea bara kʼãbãẽã kĩrãwãrẽã. 31 Mobebʉrʉ mʉãrã ángelerã mʉrẽrãta zokʼaya trompeta jĩgua zadʼamarẽã, aramaʉ̃ne ãba jʉredʼaya mʉã zhi jʉrʉmata baridu maẽ bʼeta wawara bʼeta.
32 Bakuru higueradʼeba sãwũãta kʼawuaudua: Zhi jĩwĩnita wikubʉrʉdʼera marãbara kʼawuabada poagʼa kʼaita bata. 33 Aramaʉ̃ kĩrãkʼa mʉã jara nʉmʉta arimaẽ berabʼari bʉsadʼewata marãba ũdubʉdadʼera kʼawuaudua mʉrã zebodʼota. 34 Mʉã wãrĩnu marãã jaraya, zhãrã bʼera neba ẽwedʼa mʉã jara nʉmʉrã jõma arimaẽ berabʼariya. 35 Bãjã, drua nebaya, mawũãmina mʉ bedʼeara bari neba ẽã.
36 Mawũãmina kʼãrẽ ewade kʼãrẽ ʉ̃madaudʼe mawũã berabʼariira miõba kʼawua ẽã, miã ángelerã ʉ̃trebemarãbidʼa kʼawuadʼa ẽã, miã mʉãbidʼa kʼawua ẽã, awuarabʉrʉ kʼawua bʼʉa mʉ Zezebʉrʉ. 37 Noé ewade berabʼaridʼa kĩrãkʼa berabʼariya mʉ Beubari Bape bʼadʼata zebʉrʉdʼera. 38 Jari ewadera do birui nawedʼara nekʼokua, kʼãrẽ dokua, miã kʼãĩkua bʼeasia Noé jãba zromane edʼa jʉ̃drʉdʼa ewariedʼabai. 39 Adu-a bʼedʼe do birupe jõma jogʼakuasia. Mawũã bʼeaya mʉ Beubari Bape bʼadʼata zebʉrʉdʼebidʼa. 40 Maʉ̃nerã ũme meã traja panʉta abʼa edeya, abʼa ãmaẽña zhi aribʼaema ẽãta. 41 Wũẽrãrã ũme nebʼa panʉta abʼa edeya, abʼa ãmaẽña.
42 Maʉ̃ba dauba bʼeaudua, marãbara kʼawuadʼa ẽbaera kʼãrẽ ʉ̃madaudʼe zeita mʉta marã Nokʼora. 43 Mʉã jaraita sãwũãta kʼawuaudua, nezrʉgamiã kʼãrẽ ʉ̃madaudʼe zeita zhidekʉba kʼawuara daukʼãrã bʼeya, aramaʉ̃ne nezrʉgabi ẽbaya izhi dedʼara. 44 Marãsidʼa aramaʉ̃ kĩrãkʼa kĩrãkuita bʼeaudua, mʉ Beubari Bape bʼadʼara zei baera marãbara zeita krĩchadʼa ẽãne.
Nezokʼaba ne aribʼae bʼʉdʼebema
45 ¿Kʼaipe nezokʼata ne aribʼae krĩchata erubʼadʼa kĩrãkʼa nʉmaĩrã? Maʉ̃ izhi nokʼobara izhi dedʼa bʼe ʉ̃rʉ̃ ãmaẽsia zhiko dedʼekamarẽã nekʼobada ʉ̃madaudʼe. 46 Nezokʼa maʉ̃ sobiaya izhi nokʼo zebʉrʉdʼe maʉ̃ta aribʼae nʉmʉta ũdu zera. 47 Mʉã wãrĩnu marãã jaraya, mawũã bʼʉra nebia izhidʼeta nʉmʉ jõmaʉ̃ ʉ̃rʉ̃ bʼʉya. 48 Mawũãmina nezokʼa maʉ̃ta bia ẽãba izhi sobitabaiba mʉ nokʼo zeira dããrã baya ape, 49 abʼarika nezokʼarãta puokua nʉmaĩbʉrʉ, mobe itua domiãrã bawara nekʼo itua do nʉmaĩbʉrʉ, 50 maʉ̃ nezokʼa nokʼora izha jʉ̃ã bʼʉ ẽã ewade zeya izha kʼawua ẽã ʉ̃madaudʼe. 51 Mobe abʼaedʼa puoya, mobe bʼʉya sewa bibaʉta bʼe bawara. Mama tebʉdʼe jẽgaya kidʼa kʼõsesea.