Mateo
¿Kʼaita audre zhi zromape?
(Marcos 9:33-37; Lucas 9:46-48)
18 Jari ewadera izha jʉrʉkuadʼabara Jesús orradʼape mawũãsidʼa: ¿Kʼaita audre zhi zromape Daizezeta Nokʼodʼebemanerã?
2 Mawũãnaĩ Jesúsbara wũãwũãta trʉ̃pe ãzhi ẽsadra kʼobʼʉpe, 3 mawũãsia: Mʉã wãrĩnu marãã jaraya, bia ẽãrã idu bʼʉdʼape marãta wũãwũãrã kĩrãkʼa zhi zroma ẽãne duanu ẽbʉrʉ, edʼa wãna ẽã ʉ̃tre Daizezeta Nokʼo maẽrã. 4 Aramaʉ̃nerã naʉ̃ wũãwũã kĩrãkʼa zhi zromane bʼʉ ẽãta zhi zroma Daizezeta Nokʼodʼebemanerã. 5 Mʉnebemata ĩjã bʼʉdʼeba bariduba naʉ̃ wũãwũã kĩrãkʼa bʼʉta bia edabʉrʉra mʉta bia edabʉrʉa.
Zhãrãta bʼaebibʉrʉdʼebema
(Marcos 9:42-48; Lucas 17:1-2)
6 Bariduba iabʼa kʼazhiruadʼe bʼaebibʉrʉta za zhi zromarã ẽãta mʉnebema ĩjã bʼeta mawũã ora, maʉ̃ Daizezebara pua kʼawua oya. Mawũẽ biga bakʼausia osidaudʼe yuta tãjʉ̃nape tabuedʼaita pusa nabuadʼe. 7 ¡Naʉ̃ ẽjũãne bʼera zuburia bʼea kʼazhiruadʼe bʼaebibadata nʉmʉneba! Kʼazhiruadʼe bʼaebibadara nʉmaña, mawũãmina Daizezebara zuburia oya zhãrãta kʼazhiruadʼe bʼaebibʉrʉra. 8 Maʉ̃ba bʉ juwuaba o bʉ jẽrũba bʉta kʼazhiruadʼe bʼaebiidʼebema orãrũã, aramaʉ̃ne bʼʉatukuape bʉdʼebara pepekuabʉrʉkʼarua. Audre biga Daizeze ũme bʼai jõ ẽã maẽ edʼa wãĩta juwua abʼa o jẽrũ abʼa bʼʉta, juwua ũme jẽrũ ũme bʼʉta bʼaribuedʼai kʼãñabara tebʉ kikʼadʼe. 9 Bʉ dabʉba bʉta kʼazhiruadʼe bʼaebiidʼebema orãrũã, aramaʉ̃ne bʉ dabʉra ẽũtape bʉdʼebara bʼaribuebʉrʉkʼarua. Audre biga Daizeze ũme bʼai jõ ẽã maẽ edʼa wãĩta dabʉ abʼa bʼʉta, dabʉ ũme bʼʉta bʼaribuedʼai kʼãñabara tebʉdʼe.
Oveja aduadʼadʼebema
10 Seri ẽãne edarãũdua iabʼabidʼa za wĩka kedʼeta, mʉã marãã jaraya, ángelerã ãzhi akʉ bʼera ʉ̃trera baridua bʼea mʉ Zeze ʉ̃tre bʼʉ kĩrãbita. 11 Mʉ Beubari Bape bʼʉra zesia adua bʼeta ẽdrʉbigaita.
12 ¿Marãma sãwũãpe? Iabʼaʉba oveja cien erubʼʉta abʼa aduara, ¿zhi noventa y nueve kʼatumane ãzhi duanubada maẽ ãmaẽpe aduadʼata meã jʉrʉ wã ẽka? 13 Mʉã wãrĩnu marãã jaraya, ũdura maʉ̃ kʼarea audre sobiaya noventa y nueve aduadʼa ẽbadʼa kʼãñabara. 14 Aramaʉ̃ kĩrãkʼa marã Zeze ʉ̃tre bʼʉbara krĩña ẽã iabʼa aduaira za wĩka kedʼeta.
Mebeata bedʼea ne ẽãne edaidʼebema
15 Bʉ mebeaba bʉta bĩ ẽã obʉrʉba kʼazhiruata ora wãpe dobʼaʉdʼe ũrãgʼarua, bʉ bedʼeata ũrĩrã Daizezeita ganabʉrʉa bʉ mebeara. 16 Mawũãmina bʉ bedʼeata ũrĩ ẽbʉrʉ, mʉnebemata abʼa o ũme ededua, aramaʉ̃ne ũmeba o ũbeaba wãrĩnuã adʼamarẽã bʉa jara kʼobʼʉ bedʼeara jõma. 17 Maʉ̃rã bedʼeata ũrĩ ẽbʉrʉ mebẽrã bʼea jaradua, mebẽrã bedʼeata ũrĩ ẽbʉrʉ Daizezedʼebema ĩjã ẽã bʼʉ kĩrãkʼa edarua, o rey Romanebemaĩta plata widʼibarita kʼazhirua omiã kĩrãkʼa edarua. 18 Mʉã wãrĩnu marãã jaraya, naʉ̃ druadʼe marãba kʼãrẽ idaribidʼa ẽãrã Daizezebidʼa idaribi ẽã ʉ̃treuba. Naʉ̃ druadʼe marãba kʼãrẽ idaribibʉdara Daizezebidʼa idaribiya ʉ̃treuba. 19 Dewara mʉã marãã jaraya, marãnebemata ũme naʉ̃ druadʼe krĩcha abʼarika zedʼape ne bariduta widʼidʼara, aribʼaeya mʉ Zeze ʉ̃tre bʼʉbara. 20 Mawũã aribʼaeya mʉ pẽwã panʉta ũme o ũbea ãba kʼopanʉ maẽrã mʉrã mama ãzhidʼe edʼa bʼʉ baera.
21 Jesúsba mawũãĩ Pedroba orrape mawũãsia: ¿Nokʼó, mʉãrã sõmbeidʼu bedʼea ne ẽãne edaipe mʉ mebeaba mʉta bĩ ẽã obʉrʉba kʼazhiruata ora? ¿Wagʼa sieteidʼuka?
22 Mawũãĩ Jesúsbara mawũãsia: Mʉã bʉaa jara ẽã sietebai, awuarabʉrʉ setenta bama sietea.
Nezokʼaba iabʼa bedʼea ne ẽã bʼʉ ẽbadʼa
23 Mawũãneba Daizezeta Nokʼora reyta bʼadʼa kĩrãkʼa bʼʉa, maʉ̃bara deweta widʼisia nokʼorã izhi edre bʼea. 24 Mawũã widʼibʉrʉdʼera abʼa wesidʼa millon bio deweta. 25 Maʉ̃bara pagʼa bʼe ẽãba reybara nendodʼamarẽã jarasia izhita, zhi kĩmata, zhi warrarãta, izha ne erubʼʉta jõma, aramaʉ̃ne izhaa deweta pagʼamarẽã. 26 Mawũẽ maʉ̃ nezokʼara sãkʼokʼodʼe kʼobʼepe zuburia bedʼea mawũãsia: Nokʼó, jʉ̃ãdua, mʉãrã bʉaa jõma pagʼaya. 27 Mawũãĩ maʉ̃ nezokʼa nokʼobara sozuburiape enebuesia, aramaʉ̃ne bedʼea ne ẽã bʼʉsia deweta.
28 Mawũãmina nezokʼa maʉ̃ta wãbʉrʉdʼera ũdusia abʼarika nezokʼata abʼa izhaa wĩka deweta, mawũẽ ojʉ̃ãbara jidape mawũãsia: Mʉãã dewera pagʼadua. 29 Mawũãĩ abʼarika nezokʼara izhi jẽrũ kʼaita sãkʼokʼodʼe kʼobʼepe zuburia bedʼea mawũãsia: Jʉ̃ãdua, mʉãrã bʉaa jõma pagʼaya. 30 Mawũãĩ izhara mawũãrã krĩña ẽbasia, awuarabʉrʉ wãpe cárceldʼe edʼa bʼʉsia deweta pagʼayeedʼa. 31 Abʼarika nezokʼarãbara maʉ̃ta ũdudʼape kʼãbãẽã sopuasidʼa. Mawũẽ wãnape izhi nokʼoa maʉ̃ta jõma nebʉrʉsidʼa. 32 Mawũẽ izhi nokʼobara trʉ̃pe mawũãsia: Bʉra nezokʼata biata bʼʉ ẽã. Mʉãrã deweta jõmaʉ̃nebara bedʼea ne ẽã bʼʉsia mʉãã zuburia bedʼeasi baera. 33 ¿Abʼarika nezokʼara bʉabidʼa sozuburiaidʼe bʼasi ẽka mʉã bʉta sozuburiadʼa kĩrãkʼa? 34 Aramaʉ̃ne izhi nokʼora kĩrũpe zhãrã zuburia obadaa chãbʼarisia izhaa deweta jõma pagʼayeedʼa. 35 Mʉ Zeze ʉ̃tre bʼʉbara marãta aramaʉ̃ kĩrãkʼa oya, marã abʼa abʼaʉba soidʼu bedʼea ne ẽãne edadʼa ẽbʉrʉ marã mebẽrã marã bĩ ẽã obʉdata.