Marcos
Jesús beudʼata piradrʉdʼa
(Mateo 28:1-10; Lucas 24:1-12; Juan 20:1-10)
16 Sábado ẽnaʉ̃bada ewarita berabʼaribʉrʉdʼera, María Magdalenaba, dewarabema María Jacobo papaba, dewara Saloméba kerata edasidʼa wãnaĩta Jesús kʼakuata tũã odʼaita. 2 Diapedʼa semana ewarita nabemane domingodʼe Jesús wuagʼadʼapeadʼaidʼu zesidʼa ʉ̃madau ʉ̃tʉ zebʉrʉdʼe. 3 Maʉ̃nerã ãzhirãĩnu mawũãsidʼa: ¿Mongʼara kʼaiba ãña ʉratʉ dedʼekaipe peña zobʼeadʼe edʼa wãbari maẽ kʼobʼʉra?
4 Mawũãmina akʉbʉdadʼera mongʼara ãña ʉratʉ kʼobʼʉta ũdusidʼa jipadʼe zhi zromata. 5 Mawũẽ peña zobʼeadʼe edʼa wãbʉdadʼera, juwua araare kũrãta jewedʼa bʼʉta ũdusidʼa, wua torrota eidʼu ãnabʼari jʉ̃ bʼasia. Wũẽrãrã perasidʼa. 6 Mawũẽ maʉ̃bara mawũãsia: Perarãũdua, marãbara jʉrʉ panʉã Jesús Nazaredʼebema cruzdʼe kʼachidʼapeadʼata. Beudʼata piradrʉsia, nama ne ẽã. Akaudua izhi tabʼʉdʼapeadʼata. 7 Wãũdua, mobe izha jʉrʉkuadʼaa, Pedroa jaraudua izhira marã na Galileaedʼa wãta. Maĩnu ũdudʼaya izha marãã jaradʼa kĩrãkʼa.
8 Peña zobʼeata nʉmʉ maẽbara wũẽrãrã wãẽbasidʼa ure perabʉdaba. Mawũẽ miõã miã kʼãrẽta jaradʼa ẽbasia peraba.
Jesús zhi ũdubidʼa María Magdalenaa
9 Jesús beudʼata diapedʼa piradrʉbʉrʉra semana ewarita nabemata domingodʼera naara zhi ũdubisia María Magdalenaa, maʉ̃ wũẽrãnebara jʉrekua bazhia jai siete. 10 Maʉ̃ wũẽrã wãpe maʉ̃ta jarasia Jesús bawara bʼeadʼaa, ãzhira sopua bʼeba jẽga duanasia. 11 Maʉ̃rãbara Jesús zokʼai bʼʉta ũrĩbʉdara, maʉ̃ wũẽrãba ũdudʼara ĩjãna ẽbasia.
Jesús zhi ũdubidʼa izha jʉrʉkuadʼata ũmeã
12 Maʉ̃ tẽã Jesús zhi ũdubisia izha jʉrʉkuadʼata ũmeã, maʉ̃rã odʼe tebasidʼa. 13 Ãzhira wãnape dewaraurãã maʉ̃ta jarasidʼa. Mawũãmina miã maʉ̃rãba jarabʉdasidʼa ĩjãna ẽbasia.
Jesúsba jaradʼa izha jʉrʉkuadʼaba kʼãrẽ odʼaita
(Mateo 28:16-20; Lucas 24:36-44; Juan 20:19-23)
14 Nʉmape izha jʉrʉkuadʼata oncea Jesús zhi ũdubisia ãzhi jewedʼa nekʼo kʼobʼedʼe. Mobe ĩjã ẽbaita sota zarea bʼedʼeba kẽãkuasia ĩjãna ẽãba zhi ũdudʼapeadʼaba jarabʉdata beudʼata piradrʉdʼata. 15 Mobe mawũãsia: Ẽjũã jõmaʉ̃ maẽ wãũdua, aramaʉ̃ne bedʼea biata mʉnebemata jõmaʉ̃ã jaraudua. 16 Mʉnebemata ĩjãpe buru kʼoebʉrʉra ẽdrʉya, mawũãmina zhi ĩjã ẽãrã aduaya. 17 Mʉnebemata ĩjã bʼebara ũdudʼakʼata bio odʼaya: Mʉ trʉ̃neba jaita ãĩ jʉrekuadʼaya, bedʼeadʼaya bedʼeata zhiwidʼita. 18 Kʼawua ẽãne dãmata tãbʉdasidʼa, neãrãta dobibʉdasidʼa maʉ̃bara nene ẽbaya. Kʼayarã ʉ̃rʉ̃ juwuata bʼʉbʉdadʼera bʼekuaya.
Jesús wãna ʉ̃taa
19 Nokʼo Jesús ma bedʼeabʉrʉdʼera Daizezebara ʉ̃taa edesia, aramaʉ̃ne Nokʼota bʼaita jewedʼasia Daizeze juwua araare. 20 Izha jʉrʉkuadʼara wãnape izhidʼebemata jarasidʼa baridu maẽ. Nokʼo Jesúsbara ãzhira kʼareba nʉmʉneba bedʼeara wãrãta jara panʉta kʼawuabiga nʉmasia ũdudʼakʼata obiga nʉmʉneba.
Amén.