Bedʼea jẽda kĩrãbeita

Yi audrera buru kʼoepanʉ Jeowa ʉ̃rʉ Kʼawuabipanʉrã asambleade, diskurso jõbʉrʉdera yi diskurso diabʉba jarayi buru kʼoeiraʼa piradrʉdamarẽã naʉ̃ bedʼea ũmebʉta nemi jĩgʉa panʉnamarẽã:

1. ¿Wuara o ẽ baika bʉa nekayirua obadara bʉa Jeowaʼa diasi baera bʉ bebʉta akʉza ĩjãbʉ baera Jesuba bʉta ẽdrʉ̃bisita?

2. ¿Kʼawuabʉka bʉ bebʉ diadaba akʉza buru kʼoedaba ũdubibʉta Jeowa ʉ̃rʉ Kʼawuabipanʉrãta akʉza Daizeze organizasione yi jaure zareaba zokʼabʉde eda bidata?

Bʉa maʉ̃ bedʼea panʉbʉrʉba ũdubiyi wuabemara wãrĩnu ĩjãbʉta Jesuta beisita dayira ẽdrʉbi kʼarea akʉza bʉ bebʉra Jeowaʼa diasita (Rom. 10:9, 10). Mamina nããra yi buru kʼoeirãra ãyi doba panʉne yiwidʼibara, mawũã panʉnamarẽã ãya ĩjãbʉ kĩrãkʼa.

¿Bʉra Jeowa yiwidʼipe jarasika iyitrʉ abapai kãgaita akʉza obaita iya jarabʉta?

¿Soiduba bʉra wãrĩnu aranʉbai buru kʼoekĩrãbʉka?

¿Kʼãrẽ wuata jʉ̃seabʉ bʉara buru kʼoei ewaridera? (1 Tim. 2:9, 10; Juan 15:19; Filip. 1:10).

Dayirãra kʼẽrẽpa wua jʉ̃kĩrãpanʉ mawũã Daizeze wawia ũdubita. Yi buru kʼoeibara jʉ̃ ẽ baibara wua dayi kakua ũdubibʉta wuabemaraba akʉdamarẽã akʉza wua letra barabʉta adewara yi buru kʼoeirãra biʼia wua jʉ̃ibara, maʉ̃ra jarakĩrãbʉ kʼẽrẽpa wua jʉ̃ĩta akʉza mitia wua jʉ̃ ẽ baita.

¿Sãwũã baibara buru kʼoei ewaridera? (Luc. 3:21, 22).

Jesu buru kʼoedadeba yiza biata amaesi yi kristianora buru kʼoeira. Iyara bia kʼawuabasi naʉ̃nera kʼẽrẽpa baibarata iya maʉ̃ra ũdubisi iyi sãwũã badadeba iyi buru kʼoesi ewaride. Bigabayi yi buru kʼoeirãra ijaramia o ẽ baita, mama jemene kʉi ẽ baibara mawũã aña krĩchada ẽ marẽã ãyi sãwũã bʉ deba wuabemaraba. Mamabʉdera yi ʉ̃ra buru kʼoedara pinãdrʉ jemene ẽ baibara iyita buru kʼoesi baera, maʉ̃ ewaridera mejãcha sobiabara bayi mamina kʼẽrẽpabʉta ũdubibara.

¿Sãwũã kʼarebai bʉ wãbʉde ãba yi jʉrebarima akʉza kongregasionebemarabawarabʉba mawũã aribaeita bʉa bʉ bebʉ Jeowaʼa diaya adata?

¿Kʼãrẽa biga bʉ buru kʼoeda tẽãra bʉyi dobaʉba akʉbaita Daizeze Bedʼeata akʉza jaradia wãita ewariza?

ŨRÃGʼATA ZÕRÃRÃ KONGREGASIONEBEMARAITA

Yi buru kʼoekĩrabʉbara zõrãrãʼa jaraibara. Ãya jarayi akʉmarẽã «Bedʼea widita yi buru kʼoekĩrãpanʉraita» maʉ̃ra ũduseabʉ pagina 12-49 bayeda naʉ̃ kartade, akʉza akʉmarẽã «Bedʼeata yi buru kʼoe ẽ bʉita» pagina 7de ũduyi, maʉ̃ne jarabʉ sãwũã bedʼeaibarata zõrãrãbawara ãba bedʼeabʉde. Maʉ̃ ewaride yi kartara bʉara ewa erbaseabʉ adewara bʉa bedʼea bʉdata, maʉ̃ kartade ãyibawarabʉde jaraita. Mamina nesida ẽ bayi zõrãrãbawara bedʼeai nãã, naʉ̃ karta akʉita awuruʉ̃meba.

Yi buru kʼoekirãbʉbara jaraibara kongregasion zõrãrã ãba yi jʉrebariaʼa. Buru kʼoekĩrãbʉba jarada tẽã buru kʼoekĩrãbʉta nããra akʉibara «Bedʼea widita yi buru kʼoekĩrãpanʉraita», kongregasion zõrãrã ãba yi jʉredabaribara widiyi yiwidʼisi kʼawũãita iyi bebʉ diaya abarita Daizezeʼa. Bia panʉra zõrãrã abaʉba widiyi yi nabemata akʉza zõrãrãba widiyi yi ũmenebemata. Jʉ̃ã ẽ baibara jarayi eda kʼãrẽ ewaride odaita asambleara mawũãtrʉ bedʼea widi jʉ̃drʉita buru kʼoeita.

Yi nããrabema bedʼea widira buru kʼoeita oseapanʉ ora (hora) abaʉde mamina audre nesidabʉbʉrʉ mawũã oseapanʉ akʉza yi ũmenebemasida abarika oseapanʉ, naʉ̃ oira nãã yiwidʼi jʉ̃drʉibara akʉza jõbʉrʉdera yiwidʼibara. Zõrãrãbara akʉza yi buru kʼoekĩrãpanʉrabara mesera widibara ẽ aramaʉ̃ta jõita, ewari mejãcha jʉ̃ã ẽ baibara zõrãrã bedʼea widipanʉrabara ãba yi jʉreita yi ẽbẽra buru kʼoeiʉ̃me.

Bedʼea widibʉrʉdera yi buru kʼoeira bigabayi aba abakaʉ̃me bedʼeaita, mamina bedʼea ẽ baibara jõmabawara ãba daʉcha. Bedʼeabʉde yi buru kʼoekĩrãʉ̃me maʉ̃ne kʼawuayi iya sõbe kʼawuabʉta Daizeze Bedʼea ʉ̃rʉ, mawũãtrʉ ãya akʉyi iyira buru kʼoeseabʉ kʼawũãita. Mawũã yi buru kʼoeira pera ẽ bayi panʉita iya bedʼea widibʉdade. Yi juwajidapanʉrãʼa bedʼea widibʉrʉdera buru kʼoeita ãbapanaseabʉ.

Yi buru kʼoekĩrãbʉra yuwẽrãbʉrʉ, yi bedʼea widibara buru kʼoei ʉ̃rũ abapai ba ẽ baibara awuarabʉrʉ jʉrʉibara kopayamarẽã zõrãrã abaʉba mawũã ẽ bʉrʉ zõrãrã kʼarebabariba iyiʉ̃me ãba yi jʉreibara wuabemaraba ũduseabʉmae mamina bedʼea barabʉdera wuabemaraba ũrĩ ẽ baide. Jaraibʉrʉ abaʉʼa kopayamarẽã nããra akʉibara kʼãrẽ ʉ̃rʉ bedʼeadaita.

Zõrãrã mejãcha neẽ maera, yi nããrabema bedʼea widibʉra oseabʉ zõrãrã kʼareba kʼẽrẽpabʉba «Kristianorãba ĩjãpanʉta», zõrãrãbʉrʉ widiseabʉ yi «Sãwũã baibara kristianorãrã» mamina mia abaʉta neẽ bʉrʉ bedʼea widita yi buru kʼoegaira, kongregasion akʉbari zõrãrãba jʉrʉseabʉ awuru kongregasionebema zõrãrãta, maʉ̃ba widimarẽã bedʼea yi buru kʼoegaira.

Yi nejaradiabari buru kʼoegaira poaga 18 neẽ bʉrʉ, yibarira Jeowa ʉ̃rʉ Kʼawuabipanʉrarã iyiʉ̃me bʼaibara, yi nããrabema widibʉrʉde akʉza yi ũmenebemane; mamina yibarirata neẽ bʉrʉ, zõrãrã ũmeba widiseabʉ mãwũã ẽ bʉrʉ kopayaseabʉ zõrãrã kʼarebabariba yi nããrabema akʉpanʉnebʉrʉ.

Zõrãrãbara akʉibara nejaradiabariba samapai kʼawuabʉta wãrĩnu ara Daizeze Bedʼeade bʉta. Akʉza zõrãrãbara akʉibara iyitara audre yibiata adewara wawia ũdubibʉta Jeowa organizasionta. Mamina yi buru kʼoekĩrãbʉba wabida bia kʼawua ẽ bʉrʉ wãrĩnu Daizeze Bedʼeadebʉta zõrãrãbara kʼarebayi, maʉ̃ tẽã buru kʼoemarẽã wuarebema asambleade. Adewara yi nejaradiabaribara ʉ̃dubibara Daizeze Bedʼea jaradia wãkĩrãta akʉza ũrĩbʉta Daizeze Organisasionba jarabʉta. Zõrãrãbara krĩchaibara sõbebayeda bedʼeaibarata bedʼea aba abaka widibʉde, mawũãtrʉ bia kʼawuabaita iyira buru kʼoeseabʉta. Adewara kĩrãdua ẽ baibara jõma bedʼea widibarata.

Zõrãrãba bedʼea widida tẽã nejaradiabariʉ̃me, ãba yi jʉredayi bedʼea abarika zeita buru kʼoeseabʉ kʼawuaita. Adewara akʉibara kolegiode estudiasi kʼawuaita, iya kʼãrẽaba oseabʉta akʉza iya nããra sãwũã badata. Yi audrera dayirãbara kãgapanʉ ẽbẽrarãbara kʼawuadamarẽã wãrĩnu Daizeze Bedʼeade bʉta adewara soiduba kãgadamarẽã Jeowata. Mara kʼarebadeba yi buru kʼoeirãrabara biʼia kʼawuapanañi sãwũã biʼia jaradiaita Daizeze Bedʼeara.

Maʉ̃ tẽã zõrãrã abaʉba iya bedʼea wididaba, iyiʉ̃me bedʼeaibara jaraita buru kʼoeseabʉ kʼawuaita. Iyita buru kʼoebidara ãba akʉyi yi «Bedʼea jẽda kĩrãbeita» maʉ̃ra bʉ pagina 51deba 53 bayeda. Wabida jõma estudia ẽ bʉrʉ libro Bʉra ewari jõmaʉ̃nẽ sobia baseabʉ, jaradayi jõma estudiamarẽã iyi buru kʼoeda tẽã. Jaradayi yi buru kʼoeda ewarira bʉdaita Registro del publicador de la Congregación. Zõrãrãbara widiyi yi nejaradiabariʼa iyi trʉ̃ta, yi toda ewarita akʉza buru kʼoedata, mawũã Jeowa ʉ̃rʉ Kʼawũãbipanʉrã organizasioneba jõma erbadamarẽã mebẽrã ʉ̃rʉ akʉza ãya kʼarebaita. Adewara kĩrãbedayi yi nejaradiabari yiwidiraʼa ãya bʉdara iyi ʉ̃rʉ, wuagadaita mawũã jarabʉ baera «Política global de protección de datos personales de los Testigos de Jehová» jw.orgde; 10 minutodeba ʉ̃ta berabari ẽ baibara ãba yi jʉrepanʉnera.

Poaga aba berabarida tẽã iyi buru kʼoedadeba, zõrãrã ũme akʉ jʉ̃ẽnañi iyaʼa zareata diadaita akʉza ũrãgʼa biata jaradaita. Maʉ̃ranebema zõrãrã superintendente de grupo bʼaibara. Poaga 18 neẽ bʉrʉ yibarira Jeowa ʉ̃rʉ Kʼawuabipanʉrã iyiʉ̃me bʼaibara. Zõrãrãra iyiʉ̃me ibiade bedʼeadayi. Iyiʉ̃me bedʼeadayi nebia owãmarẽã Daizeze ode, akʉza idubʉ ẽ bamarẽã Daizeze Bedʼea iyi dobabʉde akʉita, ewariza Daizeze Bedʼea akʉmarẽã, semanaza mebẽrãbawaraʉba kʼawuaita Jeowaba jarabʉ oita, akʉza semanaza jaradia wãmarẽã (Efes. 5:15, 16). Wabida jõma estudia ẽ bʉrʉ libro Bʉra ewari jõmaʉ̃nẽ sobia baseabʉ, zõrãrãbara jʉrʉyi abaʉʼa jaradiamarẽã. Audre yibia bedʼea bia jaraita iyaʼa, mamina iya ũrãgʼata nesidabʉbʉrʉ ũrãgʼaseabʉ mamina badua obe ẽ.