Jesús kʼaidupanʉra ʉ̃rʉ Daizeze jaure zareata zesi

Jesús ʉ̃ta wãna ewari 10 babʉrʉde Jesús kʼaidubadara ʉ̃rʉ Daizeze jaure zareata zesi. Poaga 33de ẽbẽrarã pʉwʉrʉ biodebemata jʉ̃ẽsi Jerusalénʼena Piesta Pentecostésdebema oita. Ẽbẽrarã Jesús kʼaidubadarata 120 ãba yi jʉrepanasi de abaʉde. Mama ãya jʉ̃ã ẽ badata berabarisi. Ãyi buru ʉ̃rʉ tʉbʉ pʉrea kĩrãkʼabʉta basi. Maʉ̃ba awuru bedʼeade bedʼea jʉ̃drʉsi. Adewara maʉ̃ de jõmaʉ̃nẽ ũrĩsida pʉãdrʉta.

Ẽbẽrarã awuru pʉwʉrʉraneba zedarabara, kʼãrẽ berabarinʉmʉ kʼawuaita akʉde wẽba wãsida. Mejãcha kĩrãmigasida ãya ũdusidade Jesús kʼaidupanʉrãra awuru bedʼeade bedʼeapanʉta. Ãya jarasida: «Naʉ̃ra ẽbẽrarã Galileadebema, ¿naʉ̃rãra sãwũã kʼawua bedʼeaseabʉ dayirã bedʼeade?».

Pedrota akʉza wuabemara apostolerata maʉ̃ra ẽbẽrarã kĩrãbita basi. Pedroba jarasi: «Marabara beasi Jesúsʼra, mamina Jeowaba jẽda piradrʉbisi. Atiara Jesúsʼra ʉ̃tʉbʉ Daizeze juwarare. Adewara iya daiʼa diasi iyi jaure zareata iya nãã jarada kĩrãkʼa. Maʉ̃ba daira mara bedʼeade bedʼeapanʉ».

Ẽbẽrarãra mejãcha kĩrãmigasida. Pedroba bedʼea jaradara ẽbẽra soidu zesi baera, ãya widisida: «¿Daibara kʼãrẽta oibara?». Iya jarasi: «Maraba nekayirua opanʉ kʼarea sopʉaidua akʉza maʉ̃ta wua oraidua, adewara buru kʼoeidua Jesús trʉ̃neba. Maʉ̃ tẽã marabida erbayi Daizeze jaure zareara». Maʉ̃ ewaridera 3.000 ẽbẽrarã buru kʼoesida. Maʉ̃ ewarideba ʉ̃ta Jerusalénʼnera ẽbẽrarã mejãchaʉta Jesús kʼaidubemarabasi. Apostolerabara Daizeze jaure zareadeba kongregasionta mejãcha osida, mawũã Jesús kʼaidubemara jõmaʉ̃ba jaradiaseabasi Jesúsba jaradiadata.