Mia kʼaiba taʉbi ẽ basi ãya obʉra

Templo puerta kʼawa ẽbẽra wãbe ẽã bʉta aba basi, iyara ewariza widibasi platata. Ewari aba Pedrota Juanʼʉ̃me jʉ̃ẽsi temploeda. Maʉ̃ ẽbẽraba jarasi: «Mʉ̃ bia oda kʼãrãpe mʉ̃aʼa nekʼãrẽ baduta diaidua». Pedroba jarasi: «Mʉ̃a bʉara plataira, audre nekʼãrẽ biata diaseabʉ. Jesús trʉ̃neba, piradrʉ kʼãrãpe taibara». Aramaʉ̃ta maʉ̃ ẽbẽrarã Pedroba kʼarebasi piradrʉmarẽã, mawũã iyira taibawasi, maʉ̃ba ẽbẽrarãra mejãcha kĩrãmigasida akʉza mejãchaʉba ĩjãsida.

Saserdoterata akʉza saduseorata mejãcha kĩrʉsida. Apostolerãra edesida Sanedrín nãã, mama widisida: «Kʼaiba diasi zareara kaʉ̃ ẽbẽra bebimarẽãra». Pedroba jarasi: «Naʉ̃ zareara daiʼa diasi Jesúsba, jari ẽbẽra maraba beadaba». Sanedrínba jarasida: «¡Bedʼearaidua Jesús ʉ̃rʉ!». Apostoleraba jarasida: «Daira bedʼeaibara iyi ʉ̃rʉ. Chʉpea ba ẽ bayi».

Juanta Pedroʉ̃mera idubʉesida, aramaʉ̃ta mesera wãsida wuabemara Jesús kʼaidubemara nebʉraita ãyi kʼãrẽ berabaridata. Jõmaʉ̃ta ãba yi jʉreda kʼãrãpe Jeowa yiwidʼisida: «Dai bia okʼãrãpe zowãnĩgʉata diara, bʉ ʉ̃rʉ bedʼeaita». Jeowaba ãyaʼa iyi jaure zareata diabasi baera jẽda jaradia jʉ̃drʉsi akʉza ẽbẽrarã kayabeta bebikʉasi, maʉ̃ba ẽbẽrarã mejãchaʉba ĩjãsida. Saduseorãra mejãcha kĩrʉbasi baera ibalbʉesida apostolerãra karselde. Maʉ̃ diamasi Jeowabara zokʼasi angelta aba karselʼeda, puerta ewa kʼãrãpe angelba jarasi: «Akʉza wãidua jẽda temploeda, mõbe mama jaradiaidua».

Maʉ̃ nrʉema ẽbẽra aba Sanedrínʼinʉ wã kʼãrãpe jarasi: «¡Karselʼra yabeba bia serrabasi, mamina yumakẽrãra nama eda bʉedapeadara, eda neẽ. Atiara templode jaradianʉmʉta ũdupanʉ!». Jẽda jidasida maʉ̃ra apostolerãra akʉza Sanedrínʼinʉ edesida. Sumo saserdoteba jarasi: «¡Daibara yi jaramabasi, wua jaradia ẽ marẽã Jesús ʉ̃rʉ!». Pedroba jarasi: «Daibara Daizezeba jarabʉrʉtrʉ ũrĩñi, nokʼo nama udabemaba jarabʉ ũrĩ kaude».

Sanedrín mejãcha kĩrʉbasi baera beakĩrãpanasi apostolerãra. Maʉ̃ne pariseo abaʉba iyi trʉ̃ Gamalielba jarasi: «¡Jʉra kʼawuapanaidua! Daizezera naʉ̃ra ẽbẽrarã arebʉkĩrã. ¿Marara Daizezeʉ̃me yõkĩrãbʉka?». Ãyara ũrĩsida maʉ̃ bedʼeara. Apostolera karseldeba ãĩ bʉei nãã, mejãcha posida akʉza jarasida wua jaradiada ẽ bamarẽã. Mamina apostolerabara iduaribida ẽ basi jaradiaita, awuarabʉrʉ ãyara pera ẽã jaradiasida templode akʉza deza deza.