Cornelio ʉ̃rʉ Daizeze jaure zareata zesi

Cesarea pʉwʉrʉde chuasi yumakẽrã aba yi trʉ̃ Corneliota, iyira romanobasi akʉza gorogorora nokʼobasi. Judiorabara iyara wawiata ũdubipanasi judio ẽ basimina. Iyira jipa ẽbẽra biabasi, iya nekʼãrẽ bia erbʉta ẽbẽrarã nekʼãrẽ neẽbʉʼa diabasi baera. Cornelioba Jeowade ĩjãbasi baera, badua yiwidʼibasi. Ewari aba angelta Cornelioʼa yi ũdubi kʼãrãpe jarasi: «Daizezeba ũrĩbʉrʉ bʉ yiwidʼira. Zokʼara bʉ nezokʼadebemata Jope pʉwʉrʉidu, mamachu Pedrota, mõbe trʉ̃bʉera bʉma zemarẽã». Aramaʉ̃ta Corneliobara mesera bʼai zokʼasi yumakẽrãrata ũbea Jope pʉwʉrʉeda, maʉ̃ pʉwʉrʉidu jʉ̃ẽira 50 kilometro wãibarabasi.

Leyba jarabasi judiorabara ʉ̃kʉrʉ nedʉwʉrʉta kobe ẽãta. Pedro pʉwʉrʉ Jopede baside Daizezeba ũdubisi saʉ̃ nedʉwʉrʉta kobe ẽãta. Maʉ̃ne angel abaʉba jarasi maʉ̃nebemata komarẽã. Pedrobara maʉ̃ra koamabasi, mõbe jarasi: «Mʉ̃ara ko ẽ nedʉwʉrʉ daiʼa ko ẽ bamarẽã jaradara, maʉ̃ra mitiachu baera». Angelba jarasi: «Maʉ̃ra nedʉwʉrʉra Daizezeba yi neneẽã oma, maʉ̃ kʼarea wua jarabe ẽ mitiachuta». Maʉ̃ tẽã Daizezeba jarasi: «Bʉ de kʼawabʉ yumakẽrãra ũbea, ãyi kʼaidu wãra». Pedrora ãyi bʉidu jʉ̃ẽsi mõbe widisi kʼarea zesita. Yumakẽrãraba jarasi: «Daira zokʼasi Cornelioba, iyira gorogoro nokʼo Romanebema. Iyira bʉ Cesarea pʉwʉrʉde, iyara kãgabʉ bʉta jʉ̃ẽmarẽã». Pedrobara jarasi iyi deda kʼãĩmarẽã, maʉ̃ nrʉema wãsi Pedrora maʉ̃ra yumakẽrã kʼaidu. Ʉ̃kʉrʉ mebẽrã Jopedebemarasida Pedro kʼaidu wãsi.

Cornelioba Pedro ũduside sãkokode kʉbesi, mamina Pedroba jarasi: «Piradrʉra mʉ̃sida bʉ kĩrãkʼa abarika yumakẽrã. Dai judiora, dei wã ẽ judio de ẽ bʉrʉ, mamina Daizezebara bʉ deda zemarẽã jarasi. Jarada kʼãrẽa trʉ̃bʉesita».

Cornelioba jarasi: «Mʉ̃ra ewari kimare ba Daizezeʼa yiwidʼidata, maʉ̃ne angel abaʉba jarasi bʉta trʉ̃marẽã. Mʉ̃aʼa Jeowa ʉ̃rʉ jaradiara». Pedroba jarasi: «Idibʉrʉ mʉ̃ara kʼawuabʉrʉ Daizezebara ẽbẽrarã jõmaʉ̃ta daucha kãgata, iyi bedʼea wãrĩnu ũrĩkĩrãbʉra». Pedrobara mejãcha jaradiasi Jesús ʉ̃rʉ. Maʉ̃ne Cornelio ʉ̃rʉ akʉza wuabemara iyi kʼawapanana ʉ̃rʉ, zesi Daizeze jaure zareata akʉza buru kʼoesida.