Katumane bedʼea bia jaradata

Jesúsba apostolera 12 jidada tẽã, wãsi ẽbẽrarã mejãchabʉidu. Maʉ̃ra ẽbẽrarã zesida Galileadeba, Judeadeba, Tirodeba, Sidónʼneba, Siriadeba akʉza Jordán do kĩrãbarideba. Wepanasi ẽbẽrarã kayabeta akʉza wawaberata, Jesúsbara maʉ̃rãra jõma bebikʉabasi. Maʉ̃ tẽã jeweda kʼãrãpe ẽbẽrarã jaradia jʉ̃drʉsi. Jaradiasi dayirãbara kʼãrẽta oibarata wãrĩnu Daizeze ũdukʼawuakĩrãbʉbʉrʉ. Jesúsbara jaradiasi dayirãbara nesidabʉta Jeowaba jaradiamarẽã kʼãrẽta oibarata. Adewara Jesúsbara jaradiasi dayirãbara kʼãrẽta oibarata Jeowa kãgaita. Dayirãba ẽbẽrarãta kãga ẽ bʉrʉ, mawũãra Jeowasida kãga ẽ bayi. Dayirãbara jõmaʉ̃ta bia edadaibara akʉza bia akʉdaibara dayirã bia edada ẽ mina.

Jesúsba jarasi: «Bari bʉ neũdukʼawua awabʉrʉ kãgabe ẽ. Awuarabʉrʉ kãgaibara bʉ nejʉrarasida akʉza soiduba kĩrãdua kʼawuaibara. Bʉa kʼawuara ẽbẽra abaʉta bʉme kĩrʉsita, wãra iyidu meserabai, maʉ̃ bedʼea ara oita. Wuabemarãra bia edara, bʉ edadamarẽã kãgabʉ kĩrãkʼa».

Jesúsbara ũrãgʼa diasi plata sãwũã akʉi ʉ̃rʉbida. Iya jarasi: «Audre yibia Daizeze neũdukʼawua bʼaita plata mejãcha erbai kaude. Nezrʉgamiabara bʉ platara zrʉgaseabʉ, mamina miõ ẽbẽraba kʼãrẽ obe ẽ bayi bʉ Jeowaʉ̃me neũdukʼawua bʼaira. Maʉ̃ kʼarea aukʼara krĩcharãra nekʼãrẽ koi ʉ̃rʉ, nekʼãrẽ doi ʉ̃rʉ akʉza kʼãrẽ wua jʉ̃i ʉ̃rʉ. Akʉra ibana zakerata, Daizezebara maʉ̃rãra yiko diabʉ ãya nesidabʉde. Bʉ mejãcha krĩcha zroma obʉmina ewari biobayeda ba ẽ bayi. Krĩchara: Jeowaba kʼaubʉ bʉa kʼãrẽ nesidabʉta».

Ẽbẽrarãbara Jesús bedʼeabʉ kĩrãkʼara miõta jãpera ũdukabasi. Mia pariseoraba, mia eskribaraba maʉ̃ ʉ̃rʉ jaradiakabasi ãyira religion burubasimina. ¿Kʼãrẽa Jesúsba biʼia jaradiabasi? Jõma iya jaradiabadara Jeowadeba zebasi baera.