Burro aba bedʼeasi

Israelitarãra 40 poagabasi drʉa ibʉawabʉde akʉza pʉwʉrʉra zromarata ãyi juwa edre baebikʉa zebʉrʉbasi. Ãyira panasi Moab drʉa kʼawa, maʉ̃ra Jordán do kʼawabasi, israelitarãra Jeowaba drʉa diaya adade wãbodobasi. Balacʼra Moab pʉwʉrʉdebema nokʼobasi, perabasi israelitaraba iyi drʉa jãrĩseabʉ kʼarea. Maʉ̃ kʼarea Balacbara jʉrʉ wãsi yumakẽrã Balaamta, jaramarẽã israelitara ʉ̃rʉ nemitia zeita.

Mamina Jeowaba jarasi Balaamʼa: «Bʉara jara ẽ baibara israelitara ʉ̃rʉ nemitia zeita». Maʉ̃ kʼarea Balaamʼra wã ẽ basi. Nokʼo Balacbara jẽda jʉrʉ wãsi Balaamʼra akʉza jarasi nebiata diaita, mamina Balaambara ĩjã ẽ basi. Aramaʉ̃ta Daizezeba jarasi Balaamʼa: «Bʉra wãseabʉ, mamina mʉ̃a jarabʉrʉtrʉ jarayi bʉara».

Balaamʼra burrode Moabʼeda wãsi. Iya krĩchasi israelitara ʉ̃rʉ imitia bedʼeaita, Jeowaba oẽ marẽã jarasimina. Maʉ̃ba Jeowabara angel aba zokʼama ũbea zokʼasi. Balaambara ũdu ẽ basi angelʼra, mamina burrobara ũdusi. Tẽã burrora mõgara arakʼaita wãsi, mawũã Balaam jĩrʉta birachi totosi. Maʉ̃ne burrora jewedachua totosi. Maʉ̃ kʼarea Balambara burrora mejãcha u jidasi bakuruba.

Maʉ̃ne osi Jeowabara maʉ̃ burrora bedʼeamarẽã. Burroba widisi Balaamʼa: «¿Kʼãrẽa unʉmʉ bʉa mʉ̃ra?». Balaamba panʉsi: «Ẽbẽrarãba krĩchada ẽ bamarẽã mʉ̃ra kʼawua ẽ nʉmʉ kĩrãkʼa nʉmʉta. Mʉ̃a kuchota juwade erbasibʉrʉ bea balbʉkasi bʉra». Burroba jarasi: «Bʉra mʉ̃ ʉ̃rʉ baribʉra poaga bio ba. ¿Mʉ̃a bʉra nawedara zʉbʉriabibaribasika?».

Jeowabara osi Balaamba ũdumarẽã angelta. Angelba iyaʼa jarasi: «Jeowabara jarasi bʉa jara ẽ bamarẽã israelitara ʉ̃rʉ nemitia zemarẽã». Balaamba panʉsi: «Wãrĩnu mʉ̃ara aña obʉrʉ, jẽda wãñi deda». Angelba jarasi: «Bʉra wãseabʉ Moabʼedara, mamina jaraseabʉ Jeowaba jarabʉrʉtrʉ».

¿Bʉmara Balaambara Jeowaba jaradara ũrĩsika? Ũrĩ ẽ basi, maʉ̃ tẽã Balaambara zarea osi ũbeabayeda israelitara ʉ̃rʉ imitia bedʼeaita, mamina Jeowabara maʉ̃ra iduaribi ẽ basi, bedʼea biata jarabisi. Maʉ̃ tẽã israelitarãra yõ wãsi Moabdebema pʉwʉrʉme, maʉ̃ne Balaamʼra beisi. Yibiabakasi Balaamba naena Jeowa bedʼeata ũrĩbasibʉrʉ, ¿bʉmabida?