Josíasbara kãga Daizeze Leyʼra

Josías 8 poagabaside Judá pʉwʉrʉta zokʼa jʉ̃drʉsi. Maʉ̃ ewaribasidera ẽbẽrarãbara zokʼapanasi magiata akʉza daizeze zeri ẽã yiwidʼipanasi. Josías 16 poaga chuaside kʼawuakĩrãsi Jeowaʼa sãwũã yiwidʼibarata. Tẽã 20 poaga chuidade altar daizeze zeri ẽãdebemata mãrĩbisi. 26 poaga babʉrʉde nekʼãrẽ jõma osi Jeowa templo ara oita.

Saserdote Hilquíasba templode eda ũdusi Daizeze Leyta. Baribʉrʉ maʉ̃ Leyʼra Moisésba bʉdabasibaibara. Safán, nokʼo sekretarioba edesi Josíasma. Mõbe le ũrĩbisi nemi jĩgʉa. Josíasba ũrĩsi. Mawũã kʼawuasi pʉwʉrʉrabara Jeowa bedʼeara ũrĩna ẽ basita poaga biobayeda. Mõbe nokʼo Josíasba jarasi Hilquíasʼa: «Jeowara mejãcha kĩrʉnʉmʉ dayirãbawara, bedʼeara iyiʉ̃me dayirãba kʼãrẽta oibarata». Jeowaba jarasi naʉ̃ bedʼeata propetisa Huldáʼa: «Judá pʉwʉrʉbara mʉ̃ra idu amaesi, maʉ̃ kʼarea mʉ̃a kʼawua oyi. Mamina Josíasba zokʼa bʉedara mawũã oẽ bayi, iyira eda krĩchabʉ baera».

Nokʼo Josíasba maʉ̃ bedʼea ũrĩside wãsi temploeda. Mõbe Judádebema pʉwʉrʉta ãba jʉredasi. Tẽã Jeowa Leyta nemi jĩgʉa ũrĩbisi ẽbẽrarã. Josíasba akʉza pʉwʉrʉraba jarasida soiduba ũrĩnaita Daizeze Bedʼeara.

Poaga bio berabarisi Judá pʉwʉrʉde Pascua oda ẽã. Mamina Josíasba lesi Daizeze Bedʼeade Pascua oibarata poagaza. Maʉ̃ kʼarea jarasi pʉwʉrʉʼa: «Odayi Pascuata Jeowaita». Tẽã Josíasba jarasi mejãcha sakripisiota odamarẽã akʉza mawũã templode trãnamarẽã trãbirata, mõbe ojʉ̃drʉsida Pascua piestara. Maʉ̃ tẽã osida Piesta pan oreguea neẽãbʉdebemata, maʉ̃ra osida ewari sietebayeda. Maʉ̃ piestara Samuel zokʼaibaside opanana kĩrãkʼa oda ẽã panasi. Josíasbara wãrĩnu kãgabasi Daizeze Leyʼra. ¿Bʉara audre kʼawuakĩrãbʉka Jeowa ʉ̃rʉ?