Jesúsbara iyi kʼaidupanʉrãra jaradiasi sãwũã yiwidʼi kʼawuaibarata

Pariseorabara nekʼãrẽ obasi wuabemaraba ãyita akʉdamarẽã. Ãya nebia opanʉra opanasi wuabemara daidu. Bari jaradaita yiwidʼibasi mejãchabʉmae, mawũã ẽbẽrarãba ãyita akʉdamarẽã. Pariseorabara bedʼea drazoata kʼawua kʼãrãpe ẽbẽrarã kĩrãbita yiwidʼipanasi, ẽbẽrarãba kʼawuadamarẽã ãyi kʼãrẽ ʉ̃rʉ yiwidʼibʉta. Maʉ̃ kʼarea ẽbẽrarãra kĩrãmigasi Jesúsba naʉ̃ jaraside: «Yiwidʼiraidua pariseora kĩrãkʼa. Ãyara krĩchabʉ ãyi kʼãwũã mejãcha bedʼea jarabʉdeba, Daizezera sobia bʼaita, mamina wãrĩnu bʼaira maʉ̃ra mawũã ẽ. Bʉ yiwidʼibʉrʉdera bʉta Jeowaʉ̃mepai bʼaibara. Badua jararaidua iyabaʉta. Awuarabʉrʉ Jeowabara kãgabʉ bʉ soiduba jaramarẽã».

Adewara Jesúsba dayirã yiwidʼibʉrʉdera naʉ̃ta jaramarẽã jarasi: «Zeze ʉ̃tʉbema, bʉ trʉ̃ra neneẽã baidebʉa. Zebira bʉ nokʼota. Bʉa kãgata oseabʉa ʉ̃tre obʉ kĩrãkʼa, mawũã oseabʉa naʉ̃ drʉadebida». Maʉ̃ tẽã Jesúsbara jarabarisi yiwidʼibʉrʉdera widimarẽã yiko maʉ̃ ewaridebematrʉ, adewara kĩrãduabimarẽã daya nekayirua ewariza obʉta akʉza dayirã aba abaka nekʼãrẽ berabaribʉta.

Adewara Jesúsba jarasi: «Badua yiwidʼira. Mõbe nekʼãrẽ nebia widira Jeowaʼa. Yibarira jõmaʉ̃ba ãyi wũãwũãra nebiata diakĩrãbʉ, mawũẽra ¿bʉ wũãwũãba panta widira diaika mõgarata? Mawũã ẽ bʉrʉ, ¿bʉ wũãwũãba bedata widira diaika damata?».

Jesúsbara maʉ̃ yizaba jara ũrĩbisi maʉ̃ba kʼãrẽta jarakĩrãbasita. Iya jarasi: «Bʉ wũãwũãʼa bʉa nebiata dia kʼaubʉbʉrʉ Jeowabara bʉara audre diayi jaure zareata. Jeowaba bʉaʼa jaure zarea diamarẽã, iyaʼa widira». ¿Bʉara obʉka Jesúsba jarada kĩrãkʼa? ¿Kʼãrẽta widibʉ Jeowa yiwidʼibʉrʉdera?