Ãya oya adara oẽ

Jeowaba jarasi Moisésʼa: «Wãzera katuma mʉ̃ bʉidʉ. Mama mʉ̃a bʉyi mõgarade mʉ̃a leira diaita». Moisésʼra wãsi maʉ̃ katumaena, mama besi 40 ewaribayeda. Mama bʉeda Jeowabara maʉ̃ mõgarade bʉsi iya bedʼea 10 diadata, mõbe maʉ̃ta diasi Moisésʼa.

Maʉ̃ audre ẽãne israelitarabara krĩchasi Moisésbara ãyira kĩrãduasita, maʉ̃ kʼarea Aarónʼa jarasida: «¡Ora daita, daizeze dai nãã wãbʉta!». Aarónba panʉsi: «Weidua oro maraba erpanʉta». Aramaʉ̃ta ãya oro wedarãra Aarónba dorrabari okʼãrãpe paka zaketa osi. Ẽbẽrarãba jarasida: «¡Naʉ̃ paka zakera daizeze, naʉ̃ba edrʉbisi daira Egiptodebara!». Mawũã piestata osida akʉza maʉ̃ paka zakeʼa yiwidʼi jʉ̃drʉsida. ¿Ãya maʉ̃ odara kayiruabasika? Mawũã, naʉ̃ pʉwʉrʉba Jeowaʼabʉrʉ yiwidʼi bʼaita jaradara oda ẽ basi.

Jeowaba ũdusi kʼãrẽ berabarinʉmanara, mõbe jarasi Moisésʼa: «Pʉwʉrʉbara mʉ̃a jaradara jipa ũrĩkĩrã ẽ, daizeze zeri ẽ yiwidʼipanʉ. Wãra jẽda pʉwʉrʉeda». Moisésʼra jẽda wãsi, maʉ̃ne wesi Jeowaba leira diadata.

Moisés pʉwʉrʉeda jẽda wãsidera, ũdu jʉ̃ẽsi ẽbẽrarã beranʉmasita akʉza paka zakeʼa yiwidʼipanʉta. Maʉ̃ba Moisésʼra mejãcha kĩrʉ kʼãrãpe iya maʉ̃ mõgarade Jeowaba Ley diadara balbʉesi, maʉ̃ba todozoa totosi. Aramaʉ̃ta mesera wãsi paka zake mãrĩne, mõbe Aarónʼa widisi: «¿Israelitarabara bʉara kʼãrẽta jarasi bʉa kʼãwũã nekayirua zromata omarẽãra?». Aarónba panʉsi: «Mʉ̃me kĩrʉrãra, bʉara kʼauchu sãwũãpanʉra ãyira. Ãyara kãgabasi daizezeʼa yiwidʼidaita, maʉ̃ kʼarea mʉ̃a oro tʉbʉde bʉe kʼãrãpe, mamaʉ̃ba paka zake oro omata ʉ̃tʉ zesi». Aarónbara maʉ̃ra oẽ bʼaibarabasi. Moisésʼra jẽda wãsi Sinaí katumaena widita Jeowaba kĩrãduamarẽã israelitaraba nekayirua odata.

Israelitara Jeowa bedʼea ũrĩkĩrãbadadetrʉ Jeowabara kĩrãduasi ãya nekayirua obʉra. Arigʉ yibiabaibasi ãya Jeowa bedʼeata ũrĩnamarẽã akʉza Moisés bedʼeasida, ¿bʉmabida?