Anaba wũãwũãta widibʉ Jeowaʼa

Elcanáʼra, yumakẽrã Israeldebemabasi akʉza kimata ũme erbasi. Maʉ̃ra trʉ̃ra: Ana akʉza Peninábasi. Mamina iyara audre kãgabasi Anata. Peninára mejãcha wũãwũã barabasi, mamina Anara wũãwũã neẽbasi. Maʉ̃ kʼarea Peninára Ana kʼarea mejãcha ipidabasi akʉza zʉbʉriabibasi. Poagaza Elcanábara iyi kimara ũmeta akʉza yi wũãwũãrata edebasi tabernakuloeda Silóde, Jeowa yiwidʼidaita. Ewari aba ãyi mamapanʉne Elcanábara ũdusi Ana mejãcha sopʉabasita, maʉ̃ kʼarea iya jarasi: «Ana jẽgarãra wuara, bʉara mʉ̃ta erchu. Akʉza bʉara kʼauchu mʉ̃a bʉra mejãcha kãgata».

Maʉ̃ audre ẽãne, Anara doba wãsi yiwidʼide. Mamina Anara jẽgada ʉ̃rʉ jẽgabasi akʉza widisi Jeowa iyita kʼarebamarẽã. Iya jarasi: «Jeowa, bʉa mʉ̃aʼa wũãwũãta diara, maʉ̃ wũãwũãra mʉ̃a bʉaʼa diayi ewari jõmaʉ̃nẽ bʉ deda bamarẽã».

Sumo saserdote Elíbara ũdusi Anara jẽgabʉeda iyidoba bedʼeanʉmʉta, maʉ̃ kʼarea krĩchasi Anara kĩrã pʉrranʉmʉta. Anaba Elíra jara ũrĩbisi: «Yãba, mʉ̃ra kĩrã pʉrrabʉ ẽ. Mʉ̃ara erbʉ mejãcha bedʼea zromata, maʉ̃ta jõma jarabasi Jeowaʼa». Elíbara mama kʼawuasi iya krĩchabadara biga ẽ basita, maʉ̃ kʼarea Anaʼa jarasi: «Jeowaba diayi bʉa wididara». Anara sobiabi kʼãrãpe wãsi mamaʉ̃bara. Poaga aba bʼai nãã iyira wũãwũã barasi, trʉ̃gasi Samuel. ¿Bʉmara Anara mejãcha sobiabasika?

Anabara kĩrãdua ẽ basi iya Jeowa bedʼea jaradara. Anaba iyi wũãwũã ju amabiside edesi tabernakulo eda, Jeowaba jarabʉrʉde bamarẽã ewari jõmaʉ̃nẽ. Iya jarasi Elíʼa: «Mʉ̃ra Jeowa yiwidʼisi naʉ̃ wũãwũãta mʉ̃aʼa diamarẽã. Mʉ̃ara atiara Jeowa diayi naʉ̃ wũãwũãra, Jeowaba jarabʉde ewari jõmaʉ̃nẽ bamarẽã». Elcanába Anaʉ̃mebara poagaza akʉ wãpanasi ãyi wũãwũãra, maʉ̃nera ãyara edebasi wua yiwidita. Tẽã Anabara tosi yumakẽrãrata ũbea akʉza yuwẽrãta ũme, Jeowa kʼarebadeba.