Babelde de drazoa odapeadata

Kue zroma berabarida tẽã Noé warrarata akʉza ãyi kimata wũãwũãra mejãcha barasi. Mawũã ãyita eaba wã baera, ʉ̃kʉrʉta drʉa awuara awuarakaeda wãsi, Jeowaba zokʼada kĩrãkʼa.

Mamina ʉ̃kʉrʉ mebẽrãba ũrĩ ẽ basi Jeowaba zokʼadara. Ãya jarasida: «Zeidua odadrʉ pʉwʉrʉta. Maʉ̃ne odadrʉ de drazoa bajãinʉ jʉ̃ẽbʉta. Mawũã dayirãra jõmaʉ̃ba ũdukʼawuadayi».

Jeowabara kãga ẽ basi ãya kʼãrẽ obadara, maʉ̃ kʼarea iduaribi ẽ basi maʉ̃ de drazoa odamarẽã. ¿Kʼaubʉka Jeowaba maʉ̃ra sãwũã osita? Osi maʉ̃ra ẽbẽrarã awuru bedʼeade bedʼeadamarẽã. Ẽbẽrarãbara maʉ̃ pʉwʉrʉra trʉ̃gasida Babel, maʉ̃ trʉ̃bara jarakĩrãbʉ «ãyirai ũrĩ ẽã totosita». Mawũã ãyirai yi ũrĩ ẽã totosi baera ãyirai yi ũrĩbʉtrʉ ãba wã kʼãrãpe, wãsida awuru drʉa eda. Mamina ãyi wãmae nekayiruara opanasi. ¿Bʉmara maʉ̃ ewaridera chuasika ẽbẽra Jeowaʼa kãgabʉra? Maʉ̃ ʉ̃rʉ kʼawuadayi wuarebema kapitulode.