Bakuru pʉreabadata

Moisésʼra 40 poagabayeda basi Madián drʉade. Iyira maʉ̃ ewaribayedara juwa jida kʼãrãpe wũãwũãra barasi. Ewari aba iya Sinaí katuma kʼawa obejara akʉbʉde, nekʼãrẽ iya ũdukata berabarisi. Moisésba ũdusi bakuru aba pʉreabʉta mamina bawa ẽãta, iya maʉ̃ bakuru pʉreabʉ orraedade ũrĩsi angel bedʼeata. Angelba jarasi: «¡Moisés! Wua orrarãra, bʉa jĩrʉne jʉ̃bʉta wẽãra, naʉ̃ drʉa bʉ edaʉnʉmʉra neneẽãbʉ baera». Mamara Jeowara bedʼeabasi Moisésʼa angeldeba.

Moisésʼra perasi baera iyi kĩrãta anasi. Angelba jarasi: «Mʉ̃a ũdubʉrʉ israelitarãra sãwũã mejãcha zʉbʉrianʉmʉta, maʉ̃ kʼarea mʉ̃ara Egiptodeba ẽdrʉbiyi, mõbe edeyi drʉa biaeda. Mʉ̃ara kãgabʉ bʉa ẽdrʉbimarẽã mʉ̃ pʉwʉrʉ israelitarãra Egiptodeba». Bʉmara, ¿kʼãrẽta krĩchasi Moisésʼra?

Moisésba widisi: «Mʉ̃aʼa wididara mʉ̃ra kʼaiba zokʼasita, ¿kʼãrẽta panʉi?». Daizezeba jarasi: «Jarada Jeowaba zokʼa bʉesita, iyira Abrahán, Isaac akʉza Jacob zeze». Moisésba jarasi: «¿Mamina mʉ̃ara kʼãrẽta oi israelitaraba ũrĩkĩrã ẽ bʉrʉ mʉ̃ bedʼeata?». Jeowaba nekʼãrẽ osi mawũã ũdubita iya kʼarebaita. Jarasi iya bakuru juwade erbʉta balbʉetamarẽã. ¡Maʉ̃ bakurura dama ba totosi! Maʉ̃ne Moisésbara dama drʉma jidasi, maʉ̃ damara akʉza jẽda bakuru ba totosi. Aramaʉ̃ta Jeowaba jarasi: «Bʉa maʉ̃ oũdubibʉrʉde ẽbẽrarãbara kʼawuadayi wãrĩnu mʉ̃a zokʼasita bʉra».

Mamina Moisésba jarasi: «Mʉ̃ra wuabemara ẽbẽrarã daidura bia bedʼeabe ẽ». Jeowaba jarasi: «Mʉ̃a bʉaʼa jarayi kʼãrẽta jaraibarata akʉza bʉ mebẽã Aarónta zokʼa bʉeyi, bʉta kʼarebamarẽã». Moisésba kʼawuasi baera iyira Jeowaba kʼarebaita, jẽda wãsi Egiptoeda, edesi yi kimata akʉza yi wũãwũãrata.