Puza Rojode nekʼãrẽ berabaridata

Paraonba ũduside israelitara Egiptodeba wãsita, maʉ̃ audre ẽãne jarasi ãĩbe bʉesita. Iya iyi nezokʼara jarasi: «Ara okʉaidua karrurãra, ãyita kʼaidu pẽwã wãi baera. Idu bʉe ẽ baibarabasi israelitarãra». Aramaʉ̃ta ãyara kʼaidu pẽwã wãsi israelitarãra.

Jeowabara iyi pʉwʉrʉara ũdubisi samare wãibarata, maʉ̃ kʼarea diamasira tʉbʉ pʉreata bʉebasi akʉza ewaridera jãrãra zromata bʉebasi. Jeowabara puza Rojoeda ede kʼãrãpe jarasi mama piki adamarẽã.

Maʉ̃ tẽã israelitaraba ũdusi paraonba akʉza iyi gorogororabawaraʉba ãyira kʼaidu pẽwã uruta, maʉ̃ awuara puza zromatabasi ayi kĩrãbita, maʉ̃ba ãyira bebʉdepanasi. Israelitarãra maʉ̃ kʼarea Moisésʼa mejãcha jʉra jʉ̃drʉsida, mõbe ãya jarasida: «¡Daira beiyi! ¿Kʼãrẽa ẽdrʉbisi bʉara daira Egiptodebara?». Mõbe Moisésba panʉsi: «Jʉ̃ãidua Jeowade, akʉidua sãwũã Jeowaba ẽdrʉbita dayirãra». Bʉmara, ¿Moisésbara mejãcha ĩjãbʉta ũdubisika Jeowade?

Tẽã Jeowabara jarasi israelitara wãñawa panamarẽã. Maʉ̃ diamasi Jeowabara jãrãrara bʉesi israelitara ãbʉdeare, mawũã egipsioraneba jĩgara bamarẽã. Maʉ̃ba israelitara bʉarera basi ũnata, waya egipsiora bʉarera jõma pãrĩgʉanʉmasi.

Maʉ̃ tẽã Jeowaba jarasi Moisésʼa iyi juwata ʉ̃ta wuamarẽã puza ʉ̃rʉ, aramaʉ̃ta Jeowabara maʉ̃ diamasi pʉãdrʉta mejãcha zebisi, mawũã maʉ̃ puzara ũmene dra totosi, israelitara maʉ̃ne berabari wãmarẽã akʉza yi drʉara põasãbasi, adewara maʉ̃ra dra wãnarãra muro kĩrãkʼa ũme edaʉnʉmasi.

Maʉ̃ne egipsiorabara kʼaidu pẽwã jʉ̃drʉsi israelitarãra eda maʉ̃ puza ẽzadra põasãbʉde. Mamina Jeowabara osi egipsiorãra kʼawua ẽ marẽã kʼãrẽ oita. Adewara ãyi karru jĩrʉnebemara ãĩ wãbisi. Mawũã egipsiorabara jarasida: «¡Wãdrʉ namaʉ̃bara!. Jeowara iyi pʉwʉrʉare yõbʉ».

Jeowaba jarasi Moisésʼa: «Bʉ juwara ʉ̃ta wuara puza ʉ̃rʉ». Mawũã obʉrʉba puzara jẽda iyi nãã bada kĩrãkʼa totosi, mawũã egipsiora ʉ̃rʉ zesi. Paraonta iyi gorogororabawara beisi.

Puza Rojo kĩrãbarida tẽã, ãya jarasida: «Jeowaʼa trãña, iyira yi zromata ũdubisi baera, kabayo baribarirata puzade balbʉesi baera». Pʉwʉrʉra trãbasieda, wẽrãrabara zapanasi panderetata, mõbe berapanasi. Jeowaba ẽdrʉbisi baera sobiapanasi.