Jesús jẽda piradrʉdata

Jesús beida tẽã, ẽbẽra aba plata mejãcha erbʉba iyi trʉ̃ Joséba, Pilatoʼa widisi Jesús bei jirabʉta iyaʼa edebimarẽã. Maʉ̃ tẽã Josébara Jesúsʼra nekʼãrẽ tũãpoabʉba chiratʉ kʼãrãpe wua biaba bʉratʉsi. Tẽã eda bʉesida mõgara zobeade, maʉ̃ zobeadera wabida miõta eda bʉedakabasi, tẽã maʉ̃ zobeara mõgaraba tapasida. Saserdoteraba Pilatoʼa jarasida: «Daira krĩcha zroma opanʉ Jesús kʼaidupanʉraba Jesús beida adedai kʼarea, maʉ̃neba ãya jaraseabʉ baera Jesúsʼra jẽda piradrʉsita». Maʉ̃ kʼarea Pilatoba jarasi: «Akʉza mama bʉeidua jenenerata, mawũã miõba ededa ẽ bamarẽã Jesús kakuata».

Ewari ũbea berabarida tẽã, diapeda wẽrãrata jʉ̃ẽsi Jesús joʉdapeadaidu. Ãyara ũdusi mõgara zobea tapabadara ãĩ bʉesidata. Maʉ̃ zobeade eda i wãbʉrʉde ãya ũdusi angelta aba, maʉ̃ba jarasi: «Peraraidua Jesúsʼra jẽda piradrʉbʉrʉa. Jarada iyi kʼaidupanʉra wãnamarẽã Galileaeda mama ũduita».

María Magdalenabara mesera akʉ jʉ̃ẽsi Pedrota Juanʼʉ̃me, maʉ̃ne jarasi: «Jesús kakuara edesida». Aramaʉ̃ta Pedrota Juanʼʉ̃mera Jesús joʉbadaidu akʉde wẽba wãsi. Ãya ũdu ẽ bai jẽda zesida.

Maʉ̃ tẽã Maríara akʉza jẽda wãsi Jesús joʉbadaidu, mama eda i wãside ũdusi angelerata ũme. Maʉ̃ne Maríaba jarasi: «Kʼawua ẽ Jesúsʼra sama edesidata». Maʉ̃ tẽã iya ẽbẽra aba ũduside krĩchasi maʉ̃ra ne u ara obarita. Aramaʉ̃ta iya maʉ̃ ẽbẽra widisi: «Mʉ̃aʼa jarada, sama bʉesita Jesús kakuara». Ẽbẽraba jarasi: «¡María!». Aramaʉ̃ta iya kʼawuaedasi maʉ̃ ẽbẽra Jesúsbasita. Maríaba jarasi: «¡Nejaradiabari!». Aramaʉ̃ta iyima jidasi. Jesúsba jarasi: «Jarada mʉ̃ mebẽrã bʉa mʉ̃ra ũdusita». Maríara wẽba wãsi, jarasi Jesús kʼaidubemara Jesúsʼra iya ũdusi abarita.

Maʉ̃ tẽã iyabaʉ ewaride, Jesús kʼaidupanʉrata ode ũme wãbasi Jerusalénʼneba Emaúsʼeda. Aramaʉ̃ne ẽbẽra aba ãyi kʼaidubʉsasi. Maʉ̃bara ãyaʼa widisi kʼãrẽ ʉ̃rʉ bedʼeapanʉta. Ãya jarasi: «¿Bʉara wabida kʼawua ẽka saserdoterabara Jesúsʼra bea zokʼasidata? Mawũã berabaridara ewari ũbea ba. Atia wẽrãraba jarapanʉ Jesúsʼra zokʼaibʉta». Aramaʉ̃ta maʉ̃ ẽbẽraba widisi: «Marabara ¿ĩjãna ẽka propetara ʉ̃rʉra? Ãyara jarasida Kristora beibarabasita akʉza jarasida jẽda piradrʉita». Emaúsʼena jʉ̃ẽbʉrʉde Jesús kʼaidubemarabara jarasi maʉ̃ ẽbẽra ãyibawara bamarẽã. Ãyi nekoi nãã, maʉ̃ ẽbẽrarã yiwidʼisi, mama Jesús kʼaidubemarabara kʼawuasida maʉ̃ ẽbẽrarã Jesústa. Aramaʉ̃ta Jesúsʼra neẽã totosi.

Maʉ̃ra Jesús kʼaidubema ũmera Jerusalénʼena wẽba wãsida. Jʉ̃ẽsida apostolera ãba jʉrebadamae, jarasida kʼãrẽ berabaridata. Maʉ̃ deda dʉanaside Jesúsʼra yi ũdubisi. Nããrãra apostolerabara ĩjãna ẽ basi maʉ̃ra Jesústa, mamina iya tẽã jarasi: «Akʉidua mʉ̃ juwata, mõbe taidua. Naʉ̃ra yi bʉmabasi, Kristo beida tẽãra jẽda piradrʉibasita».