Yumakẽrã abaʉba jʉre jʉ̃drʉsi akʉza wẽrãra ũme so zareapanasi

Josuébara Israel pʉwʉrʉra poaga biobayeda akʉsi, iyira beisi 110 poagabʉde. Josué bei ẽ bʉedara, israelitarabara ũrĩpanasi Daizezeba jarabʉra, mamina Josué beida tẽã, israelitarabara daizeze zeri ẽãta ĩjã jʉ̃drʉsida Canaánʼnebema ẽbẽrarãba opanana kĩrãkʼa. Israelitaraba Jeowaba jarabʉta oda ẽ basi baera, Jeowabara ãyira wua kʼareba ẽ basi. Maʉ̃ kʼarea nokʼo Jabín Canaánʼnebemaba ãyira zʉbʉriabisi. Mawũẽra israelitarabara akʉza jẽda Jeowa widisi kʼarebamarẽã. Maʉ̃ kʼarea Jeowabara ẽbẽrata aba jʉrʉsi ãyi akʉmarẽã, maʉ̃ trʉ̃ra Baracbasi. Baracʼbara kʼarebaibasi israelitarãra akʉza jẽda Jeowaba jarabʉta odamarẽã.

Maʉ̃ ewaridera wẽrã aba basi yi trʉ̃ra Déborabasi, iyira propetabasi. Iya jarasi Baracʼa iyita akʉ jʉ̃ẽmarẽã, iya jara ũrĩbita Jeowaba kʼãrẽta omarẽã jarasita: «Wãra Cisón do zakeidu, mõbe edera bʉ kʼaidu 10.000 yumakẽrãrata yõnamarẽã Jabín gorogororabawara. Mamara Sísarata chuayi, iyira gorogororãra nokʼo. Bʉa bʉ juwa edre baebiyi». Baracbara jarasi Déboraʼa: «Mʉ̃ra wãñi bʉta mʉ̃ kʼaidu wãra». Déboraba jarasi: «Mʉ̃ra bʉ kʼaidu wãñi. Mamina bʉa bea ẽ Sísarara. Jeowaba jarasi yuwẽrãba beaita Sísarara».

Débora, Barac akʉza 10.000 yumakẽrãrata Tabor katumainʉ ʉ̃tʉ jʉ̃ẽsida. Sísaraba maʉ̃ kʼawuaside, jõma karru yõnebemata akʉza iyi gorogororata ãba jʉre edesi koribieda. Déboraba jarasi Baracʼa: «Idira Jeowaba kʼarebayi bʉra, ãyira bʉ juwa edre baeyi». Mõbebʉrʉ Baracʼta akʉza 10.000 yumakẽrãrata katumaneba wãsida Sísara akʉza iyi gorogororaʉ̃me yõita.

Maʉ̃are Jeowaba osi Cisón do zakera do zromata zemarẽã. Mawũã karru yõnebemata egorobade joʉ wãmarẽã. Sísarara karru yõnebemaneba u bae kʼãrãpe mĩrʉ wẽba wãsi. Baracba akʉza iyi kʼaidupanʉraba ãyi juwa edre baebisida Sísara gorogororãra, mamina Sísarara mĩrʉ wãsi. Sísarara mĩrʉsi Jael deda. Jaelbara lecheta diasi domarẽã, mõbe burubaba anakʉsi kʼãĩmarẽã. Sísarara kʼãĩarata kʼãĩ totosi paebasi baera. Mawũẽra Jaelbara chuwea orraeda kʼãrãpe, bakuru zʉmiata burude tachikʉbʉsi. Mawũã beasi Sísarara.

Tẽã junea jʉ̃ẽsi Baracta Sísara jʉrʉ. Jaelba jarasi Baracʼa: «Mʉ̃ deda zera mʉ̃a ũdubiyi bʉa yumakẽrã jʉrʉnʉmʉta». Barac eda jʉ̃ẽsidera ũdusi Sísara beitabʉta. Mawũẽra Baracta Déboraʉ̃mera trã jʉ̃drʉsida biga diaita Daizezeʼa, iya kʼarebasi baera ãyi nejʉrata ãyi juwa edre baebita. Maʉ̃neba ʉ̃tara israelitarãra 40 poagabayeda aduʼapanasi.