Miaordamiarata 12 panʉ

Israelitarãra wãsi Sinaí katumanebara Cadés drʉaeda, mamina mainʉ jʉ̃ẽira Parán drʉa ibʉawabʉde berabaribarabasi. Mama Jeowaba jarasi Moisésʼa: «12 tribu aba abakaʉdebemarata yumakẽrã aba jidara, Canaán drʉata ordade wãnamarẽã, maʉ̃ drʉara mʉ̃a diayi israelitara». Mawũẽra Moisésbara jidasi 12 yumakẽrãra akʉza jarasi: «Wãra Canaánʼena mõbe akʉidua maʉ̃ drʉara bigabʉ kʼawuaita ne uita. Akʉidua ẽbẽrarã zarea barabʉ kʼawuaita, mawũã ẽ bʉrʉ paebʉ kʼawuaita, adewara akʉidua pʉwʉrʉ de panʉ kʼawuaita mawũã ẽ bʉrʉ karpa deda». Mawũẽra ãyira wãsi Canaánʼena. Maʉ̃ne edabasi Calebta Josuéʉ̃me.

Maʉ̃ra ẽbẽrarãra 40 ewari berabarida tẽã jẽda zesi. Wesida igorata, granadarata, ubarata, mõbe jarasida: «Canaán drʉade ne uira jipa yibia, mamina mamabema ẽbẽrarãra mejãcha zareabarabʉ akʉza maʉ̃ pʉwʉrʉ audura murorãra jipa yi zromara». Aramaʉ̃ta Calebʼba jarasi: «¡Ãyira dayirã juwa edre baeyi! Wãdrʉ». ¿Bʉmara kʼãrẽa Calebʼbara maʉ̃ta jarasi? Calebʼba akʉza Josuéba Jeowa ʉ̃rʉ ĩjãbasi baera. Waya miaordabari 10 panʉba jarasida: «Wã ẽ badrʉ. Ẽbẽrarã maʉ̃ pʉwʉrʉdebʉra zarea barabʉ mejãcha, yi zromara akʉza dayirãra ãyi nããra adichichi kĩrãkʼabʉ».

Israelitarãra mejãcha sopʉada kʼãrãpe ãyirai bedʼea jʉ̃drʉsida: «Jʉrʉdadrʉ kʼaiba jẽda edemarẽã Egiptoeda. ¿Kʼãrẽa wãnaipe Canaánʼne beadamarẽãra?». Josuéba Calebʼʉ̃meba jarasida: «Ũrĩnadrʉ Jeowaba jarabʉta, iya kʼarebayi dayirãra. Peraraidua». Mamina israelitarabara ãya jarabʉra ũrĩkĩrãna ẽ basi, maʉ̃ba beakĩrãpanasida.

¿Kʼãrẽta osi Jeowabara? Iya jarasi Moisésʼa: «Mʉ̃a nekʼãrẽ biata mejãcha ozebʉrʉ israelitaraita, ãya mawũãsidu jipa ũrĩna ẽ mʉ̃ bedʼeara. Maʉ̃ kʼarea drʉa ibuawabʉde amaeñi 40 poagabayeda, ãyi beiyeda. Mamina yi wũãwũãratrʉ akʉza Calebta Josuéʉ̃mebʉrʉ panañi mʉ̃a drʉa diaya adamae».