¿Kʼaibasi Jobʼra?

Pʉwʉrʉ Uzde basi yumakẽrã aba Jeowa kãgabʉta, maʉ̃ trʉ̃ra Jobʼbasi. Akʉza erbasi platata mejãcha, adewara wũãwũãrata mejãcha erbasi. Jobʼra jipa ẽbẽra biabasi. Iyara akʉbasi pẽdrarata, jẽrãmararãta akʉza kʼãrẽ neẽã beta. ¿Bʉmara iyi mawũãbʉba bedʼea zroma neẽbasika?

Jobʼba kʼawua ẽ basi Diaruba iyi akʉnʉmʉra. Aramaʉ̃ta Jeowaba jarasi Diaruʼa: «Mʉ̃a ũdubʉrʉ bʉa mʉ̃ nezokʼa Jobʼra akʉbʉta, naʉ̃ drʉadera neẽ mia abaʉta Job kĩrãkʼara. Iyara wawiata ũdubibʉ mʉ̃ bedʼea ũrĩbʉde». Diaruba jarasi: «Iyara ũrĩbʉ bʉ bedʼeara bʉa akʉbʉ baera, kʼarebabʉ baera, drʉata diabʉ baera akʉza nedʉwʉrʉrata. Mamina bʉa maʉ̃ta jõma jãrĩra, iyara ũrĩ ẽ bayi bʉ bedʼeara». Jeowaba jarasi: «Mawũãra zʉbʉriabira mʉ̃me kʼẽrẽpa baseabʉ kʼawuaita, mamina bearãra». Jeowabara iduaribisi Diaruba Jobʼra zʉbʉria omarẽã. ¿Kʼãrẽa Jeowabara mawũã omarẽã iduaribisi? Wãrĩnu kʼawuabasi baera Jobʼra iyiʉ̃me kʼẽrẽpa bʼaibasita.

Diarubara Jobʼra mejãcha zʉbʉria osi, mawũã ũdubita Jobʼbara Jeowaba nebia diabʉ kʼarea ũrĩbasita. Nããra Diarubara obisi ʉ̃kʉrʉ ẽbẽrarãba zrʉgamarẽã pakarata, burrorata akʉza tororata. Maʉ̃ tẽã obisi obejarata tʉbʉ pʉreaba bawamarẽã, adewara kameyorata zrʉgabisi. Adewara beibisi nezokʼara nedʉwʉrʉra akʉbadarasida. Jobʼba bedʼea zroma ũdudadebara naʉ̃ta audre yi zromabasi, ewari aba Job wũãwũãra jõma ãba yi jʉrebarabʉde de tega wãbʉrʉba makenasi. Maʉ̃ba Jobʼra mejãcha sopʉabisi, mawũãsidu iyara iduaribi ẽ basi Jeowa bedʼea ũrĩ bʼaira.

Diarubara Jobʼra kãgabasi audre zʉbʉriamarẽã, osi yagaba jidamarẽã iyi yarade, maʉ̃ba mejãcha pʉabibasi. Kʼawua ẽ basimina kʼãrẽa bedʼea zroma ũdubʉta, mawũãsidu Jobʼra kʼẽrẽpabasi Jeowaʉ̃me, maʉ̃ kʼarea Daizezera mejãcha sobiasi.

Maʉ̃ tẽã Diarubara zokʼasi yumakẽrãra ũbea Jobʼta audre zʉbʉria oita. Maʉ̃ra yumakẽrãraba Jobʼa jarasi: «Bʉra Daizezeba kʼãwũã zʉbʉriabinʉmʉ nekayirua odata merabʉ baera». Jobʼba jarasi: «Mʉ̃ara nekʼãrẽ kayiruara oẽã». Tẽã iya krĩchasi Daizezeba zʉbʉriabinʉmʉta, maʉ̃ba jarasi Daizezeba iyira bia eda ẽãta.

Yumakẽrã warrarabʉba, yi trʉ̃ Elihúba chupea ũrĩbasi wuabemara bedʼeabʉta. Maʉ̃ tẽã jarasi: «Marara Daizeze ʉ̃rʉ aña bedʼeabarabʉ, Daizezera jipa yi zroma akʉza iyara nekayiruara oẽ. Iya jõma akʉbʉ baera, kʼarebabʉ ẽbẽrarã bedʼea zroma ũdubʉrʉdera».

Jeowara bedʼeasi Jobʼa: «Mʉ̃a bajãta akʉza naʉ̃ drʉa osidera, ¿bʉra samabasi? ¿Kʼãrẽa krĩchabʉ mʉ̃ara nekʼãrẽ obʉra aripe oẽãta? Bedʼeai naweda krĩcha ẽ bʉra». Jobʼbara kʼawuasi aña bedʼeasita maʉ̃ kʼarea jarasi: «Wãrĩnu, mʉ̃ra aña bedʼeasi. Kĩrãduara mʉ̃a nãã kʼãrẽ jarada kʼarea. Mʉ̃a ũrĩsi bʉ ʉ̃rʉra, mamina idibʉrʉ wãrĩnu kʼawuabʉrʉ bʉra mejãcha zarea barabʉta».

Job bedʼea zroma taʉside, Jeowabara iya erbadaira audre diasi akʉza iyi kayasida bebisi. Jobʼra zõna baba beiyeda mejãcha sobiabasi. Edaʉde iyitara zarebasimina, Jobʼbara ewari jõmaʉ̃nẽ ũrĩbasi Jeowaba jarabʉra, maʉ̃ kʼarea Jeowabara nebiata diasi Jobʼa. Bʉara, bedʼea zroma ũdubʉrʉde, bedʼea zroma neẽãne, ¿ewari jõmaʉ̃nẽ Jeowa bedʼeara ũrĩ bʼaika Jobʼba oda kĩrãkʼa?