Jesúsʼra beisi Gólgotade

Saserdoterabara Jesúsʼra edesida nokʼo Pilato bʉidu. Iya widisi: «¿Kʼãrẽa wesida naʉ̃ yumakẽrãra?». Ãya jarasi: «¡Jesúsbara jarabʉ iyira nokʼota!». Pilatoba widisi Jesúsʼa: «¿Bʉra judiora nokʼoka?». Jesúsba panʉsi: «Mʉ̃ Nokʼora naʉ̃ drʉadebema ẽ».

Maʉ̃ tẽã Pilatobara zokʼa bʉesi Jesúsʼra Herodes bʉidu, maʉ̃ra Galileadebema gobernadorbasi, zokʼa bʉesi Herodesba akʉmarẽã Jesúsba kʼãrẽ nemitia odata. Mamina Herodesbara ũdu ẽ basi Jesúsba nemitia odara, maʉ̃ kʼarea jẽda zokʼa bʉesi Pilato bʉidʉ. Aramaʉ̃ta Pilatoba jarasi ẽbẽrarã: «Herodesbida, mia mʉ̃abida ũdu ẽ Jesús nekayirua odara. Maʉ̃ kʼarea mʉ̃ara idubʉeyi». Mamina ẽbẽrarãra mejãcha jʉrapanasi: «¡Beaidua kaʉ̃ra! ¡Beaidua!». Gorogororaba Jesúsʼra dauidusida, rejoba usida akʉza posida. Burubari uru omata burude bʉesida. Iyi kʼarea ipidada kʼãrãpe maʉ̃ tẽã jarasida: «¡Kʉa judiora nokʼo, sãwũã ʉ̃nadrʉ!». Pilatoba akʉza jarasi ẽbẽrarã: «Mʉ̃itara naʉ̃ yumakẽrãra nekayirua oẽ chu». Mamina ẽbẽrarã mejãcha jʉrapanasi: «¡Bakurude tachi jirabʉidua!». Aramaʉ̃ta Pilatobara diasi Jesúsʼra beadamarẽã.

Maʉ̃ tẽã Jesúsʼra edesida drʉa Gólgotaeda. Mama bakuruma tachi jirabʉsida. Jesúsʼra Jeowaʼa yiwidʼisi, mõbe naʉ̃ta jarasi: «Zeze kĩrãduara naʉ̃raba nekʼãrẽ kayirua obʉra, kʼawuada ẽ baera kʼãrẽ obʉta». Ẽbẽrarãra Jesús kʼarea mejãcha ipidapanasi, maʉ̃ kʼarea naʉ̃ta jarasida: «¡Bʉta wãrĩnu Daizeze warrabʉrʉ bʉ jirabʉdeba u baera!».

Jesús kʼawa yumakẽrãra nemitia odata jirapanasi Jesús kĩrãkʼa. Maʉ̃ranebema abaʉba Jesúsʼa jarasi: «Bʉ nokʼo babʉrʉde mʉ̃ta kĩrãbera». Jesúsba jarasi: «Bʉra mʉ̃me ẽjũã kĩrãwãreãnẽ baya». Kewarare ora ũbeabayeda pãrĩgʉa totosi ewarira. María Jesús papata akʉza ʉ̃kʉrʉ Jesús kʼaidupananarata Jesús kʼawapanasi. Jesúsbara Juanʼa jarasi Maríata akʉmarẽã yi papa ara kĩrãkʼa.

Maʉ̃ tẽã Jesúsba jarasi: «¡Idibʉrʉ aripe berabaribʉrʉ!». Buru eda barrupe, iñaba zʉbʉria kʼãrãpe, maʉ̃ tẽã beisi. Maʉ̃ne drʉa ureta mejãcha bʉsawasi. Maʉ̃ne Santo Santísimone wua ẽzadra jirabadata ẽzadra kõa totosi. Aramaʉ̃ta gorogoro abaʉba jarasi: «Naʉ̃ra wãrĩnu Daizeze warrabasi».