Karsel akʉbariba Daizeze Bedʼea ʉ̃rʉ kʼawuasi

Filiposde basi ẽbẽra wẽrãta aba, iyira nezokʼabasi, maʉ̃bara ẽbẽrarã ʉ̃ra kʼare berabarira aripe jarabasi, iyira wawabasi baera. Maʉ̃ nezokʼa yibaribara plata mejãcha ganabasi maʉ̃ ẽbẽra wẽrãneba. Pablo Silasʼʉ̃me Filipos pʉwʉrʉ eda jʉ̃ẽsidera, maʉ̃ ẽbẽra wẽrãra, ãyi kʼaidu wãbasi ãbʉdeare. Angel kayiruabara maʉ̃ ẽbẽra wẽrãra mejãcha jʉrabibasi: «Naʉ̃ra yumakẽrãra Daizeze nezokʼa». Maʉ̃ tẽã ewari aba Pabloba jarasi maʉ̃ angel kayirua: «¡Jesús trʉ̃neba mʉ̃a bʉaʼa jarayi ãĩ wãra kaʉ̃ ẽbẽra wẽrã kakuadebara!». Aramaʉ̃ta maʉ̃ angel kayiruara ãĩ wãsi maʉ̃ ẽbẽra wẽrãnebara.

Maʉ̃ta kʼawuaside yi nezokʼa yibariba mejãcha kĩrʉsi, wua plata erba ẽ bai baera. Maʉ̃ kʼarea Silasta Pabloʉ̃me edesida nokʼo nãã, mõbe jarasida: «¡Naʉ̃ra yumakẽrãbara oẽ leyba jarabʉra akʉza ẽbẽrarã aduʼa bamarẽã iduaribi ẽ!». Nokʼobara zokʼasi Silasta Pabloʉ̃me mejãcha poda kʼãrãpe karselʼeda bʉedamarẽã. Maʉ̃ karsel akʉbadabara karsel pãrĩgʉabʉde eda bʉesi akʉza zepode ibalbʉesida.

Pablota Silasʼʉ̃me Daizezeʼa trã jʉ̃drʉsida, maʉ̃ta wuabemara karseldebʉrabida ũrĩpanasi, maʉ̃ne drʉa ureta deguesi. Karsel pʉertara ewa totosi, kadenarãra tʉdʉzʉa totosi akʉza zepo jʉ̃badasida ena totosi. Karsel akʉbariba eda deguebʉrʉdera ũdusi pʉertarãra jõma ewekʉanʉmʉta, iyara krĩchasi mama eda karselde badarãra jõma ãĩ wãkʉasita. Maʉ̃ kʼarea kuchota jirada kʼãrãpe iyikʉza beibasi.

Maʉ̃ne Pablota jʉrasi: «¡Bʉyikʉza beirãra, daira nama jõma panʉ!». Maʉ̃ karsel akʉbarira Pabloidu jʉ̃ẽ kʼãrãpe sãkokodekʉbesi, maʉ̃ne jarasi: «Mʉ̃ra kʼãrẽta oibara ẽdrʉira». Pabloba Silasʼʉ̃meba jarasida: «Bʉa bʉ mebẽrãbawaraʉba Jesús ʉ̃rʉ ĩjãibara». Aramaʉ̃ne Pabloba Silasʼʉ̃meba Jeowa ʉ̃rʉ jaradiasida mawũã iyita yi mebẽrãbawara buru kʼoesida.