Nokʼo Davidba nekayirua odata

Saúl beisidera Davidba zokʼa jʉ̃drʉsi. Maʉ̃nera iyira 30 poagabasi. Poaga bio berabarida tẽã, Davidbara akʉsi iyi dedaʉba ẽbẽra wẽrã kuinʉmʉta. Davidba kʼawuasi maʉ̃ ẽbẽra wẽrãra trʉ̃ra Bat-Sebabasita akʉza kʼawuasi iyi kimara gorogorobasita, yi trʉ̃ra Uríasbasi. Davidbara jarasi maʉ̃ ẽbẽra wẽrãra iyidu wedamarẽã, maʉ̃ tẽã iyiʉ̃me ãba kʼãĩsi, maʉ̃ne biogo besi. Davidbara iya mawũã nekayirua odara merakĩrãbasi baera, maʉ̃ kʼarea jarasi iyi gorogorora nokʼoʼa Uríasta nãã bʉemarẽã akʉza jarasi doba amaemarẽã, mawũã beadamarẽã yõne. Urías beida tẽã Davidʼra juwa jidasi Bat-Sebaʉ̃me.

Jeowabara akʉbasi Davidba kʼãrẽ nemitia obadara, maʉ̃ kʼarea, ¿Jeowabara kʼãrẽta osi? Jeowaba zokʼasi propeta Natánta Davidʼʉ̃me bedʼeamarẽã. Natánba jarasi: «Basi ẽbẽra aba plata mejãcha barabʉta akʉza obeja mejãcha erbʉta. Akʉza basi ẽbẽra aba plata erbʉ ẽãta, maʉ̃bara obejata aba erbasi, maʉ̃ obejara iya mejãcha kãgabasi. Mamina yi plata mejãcha erbʉbara maʉ̃ obeja aba erbʉra jãrĩsi». Davidba maʉ̃ ũrĩside mejãcha kĩrʉsi, maʉ̃ne jarasi: «¡Maʉ̃ yumakẽrãra beibara!». Aramaʉ̃ta Natánba jarasi: «¡Bʉra maʉ̃ yumakẽrã plata mejãcha erbʉ kĩrãkʼabʉ!». Davidʼra mejãcha sopʉa kʼãrãpe naʉ̃ bedʼeata jarasi: «Wãrĩnu nekayiruata obʉrʉ Jeowa dabʉ nãã». Davidʼra maʉ̃ nekayirua oda kʼarea mejãcha bedʼea zromata ũdusi akʉza yi mebẽrãbida. Jeowaba Davidʼra waña bea ẽ basi, awuarabʉrʉ kʼẽãsi Davidba edabʉta ũdubibasi baera akʉza soiduba jẽda krĩchasi baera.

Davidbara templota okĩrãbasi Jeowaita, mamina Jeowabara jidasi David warra Salomónta templo parãmarẽã. Maʉ̃ kʼarea Davidbara nekʼãrẽ mejãcha osi iyi warra kʼarebaita. Akʉza iya jarasi: «Jeowa templora jipa kĩrãwãreã bʼaibara. Salomónʼra wuabisidu warrara, mamina mʉ̃a kʼarebayi iya nekʼãrẽ nesidabʉde». Davidbara plata mejãcha diasi maʉ̃ templo parãita. Jʉrʉsi yumakẽrãra templo parãnaita, orota akʉza platata. Adewara wesi bakurura sedrota Sidónʼneba akʉza Tirodeba. David iyi beibodoarebʉde Salomónʼa diasi dibujo maʉ̃ templo sãwũã parãita. Akʉza jarasi: «Jeowaba mʉ̃aʼa jarasi naʉ̃ templo sãwũã oita akʉza jarasi bʉ kʼãrãpe bʉaʼa diamarẽã. Jeowaba kʼarebayi bʉra, perarãra, zowaĩnĩgʉabara, parãra templora».