Jesúsbara jaradiabasi Daizeze Nokʼo ʉ̃rʉ

Jesús iyi buru kʼoeda tẽã naʉ̃ ʉ̃rʉ jaradia jʉ̃drʉsi: «Daizeze Nokʼora arakʼaitabata». Jesúsba akʉza iyi kʼaidupanʉraba jaradia jʉ̃drʉsida Galileade akʉza Judeade. Maʉ̃ tẽã Jesúsʼra iyi pʉwʉrʉ Nazaretʼeda wãsi, mama sinagogade Daizeze Bedʼea Isaíasdebʉta ewa kʼãrãpe lesi: «Jeowabara mʉ̃a diabʉrʉ jaure zareata, mawũã iyi bedʼea biata jarakamarẽã». Iya jaradaba, ¿kʼãrẽta jarakĩrãbasi? Ẽbẽrarãbara Jesúsba nekʼãrẽ obʉta ũdukĩrãbasi. Mamina Jeowabara Jesúsʼra jaure zareara dia ẽ basi miõba okatrʉ oũdubita, awuarabʉrʉ diasi kãgabasi baera iyi Nokʼo ʉ̃rʉ jaradiamarẽã. Maʉ̃ kʼarea Jesúsba jarasi: «Idibʉrʉ aripe berabaribʉrʉ naʉ̃ propesiara».

Maʉ̃ tẽã Jesúsʼra wãsi Galilea puzaeda. Mama ũdusi ẽbẽrarã iyi kʼaidupanʉranebema kimarebʉta, ãyira beda beamiabasi. Jesúsba jarasi: «Mʉ̃ kʼaidu zeidua. Mʉ̃a marara ẽbẽra wuabibari baya». Maʉ̃ra yumakẽrãra trʉ̃ra naʉ̃rabasi: Pedro, Andrés, Santiago akʉza Juan. Aramaʉ̃ta yumakẽrãra kimareba ãya obadara iduaribi kʼãrãpe, wãsi Jesús kʼaidu Galileaeda jaradiaita Daizeze Nokʼo ʉ̃rʉ. Jaradiasida sinagogade, ode akʉza yiko nẽdobadamae. Ẽbẽrarã mejãchaʉta ãyi kʼaidu wãpanasi. Jesúsba jaradiadara pʉwʉrʉra biodebemaba ũrĩsida, Siria pʉwʉrʉdebida, maʉ̃ pʉwʉrʉra jipa jĩgarabasi.

Tẽã Jesúsbara ʉ̃kʉrʉra iyi kʼaidupanʉra diasi zareata, ẽbẽra kayabe bebimarẽã akʉza wawabera bebikʉaita. Awuru ẽbẽrarã iyi kʼaidubemarata Jesúsʼʉ̃me pʉwʉrʉraza jaradia wãpanasi. Adewara panasi wẽrãra kʼẽrẽpapanʉrata, maʉ̃rabara kʼareba neo diapanasi Jesústa akʉza iyi kʼaidupanʉrata. Maʉ̃ranebema wẽrãra trʉ̃ra naʉ̃basi: María Magdalena, Juana akʉza Susana.

Jesúsbara nããrãra iyi kʼaidupanʉrãra nekʼãrẽ mejãcha jaradiasi, maʉ̃are jarasi jaradia wamarẽã. Galileade mawũã jaradiabʉeda ẽbẽrarãra mejãchaʉta Jesús kʼaidubemabasi akʉza buru kʼoesida. Ẽbẽrarã mejãchaʉta Jesús kʼaidu wãkĩrãpanasi. Maʉ̃ kʼarea Jesúsba jarasi maʉ̃ra ẽbẽrarã ne u kĩrãkʼa jʉrepeyawabʉta. Akʉza jarasi: «Daizezeʼa yiwidʼidua mawũã zokʼa bʉemarẽã ẽbẽrarã mejãchaʉta jaradia wãita». Maʉ̃ tẽã iyara 70 ẽbẽrarãbʉta jʉrʉ kʼãrãpe ũme ũmekade zokʼa bʉesi Judeaeda jaradia wamarẽã. Maʉ̃rabara ẽbẽrarã jaradia wãsi Daizeze Nokʼo ʉ̃rʉ. Ãyi jẽda zesidera jõma nebʉrakĩrãpanasi Jesúsʼa ãyi kʼãrẽ berabaridata. Diarubara nekʼãrẽ obe ẽ basi ãya jaradiabʉta idubʉmarẽãra.

Jesúsbara kʼawuabasi iyira ʉ̃ta wãita, maʉ̃ kʼarea nekʼãrẽ mejãcha jaradiasi iyi kʼaidupanʉraba iduaribi ẽ bamarẽã ãya jaradiabʉta. Iya jarasi: «Jaradiaidua Daizeze Bedʼea ʉ̃rʉ ẽbẽrarã, mõbe buru kʼoebidua».