Jesúsbara mejãcha obasi miõba okata

Jesúsʼra naʉ̃ drʉaeda zesi jaradiaita Daizeze Nokʼoba naʉ̃ drʉade kʼãrẽ nebia oi ʉ̃rʉ. Jeowabara Jesúsʼra iyi jaure zareata diasi miõba okata omarẽã, mawũã ũdudamarẽã Jesús Nokʼo babʉrʉde ʉ̃ra zeide kʼãrẽ nebia oseabʉta. Bari jaradaita Jesúsbara badu kayata bebiseabasi. Iyi wãmae ẽbẽrarã kayapanʉrabara jarabasi ãyita bebimarẽã. Jesúsbara ẽbẽrarã jõmaʉ̃ta bebiseabasi. Bari jaradaita, yi dabʉ ũdu ẽãbʉra jẽda ũdubibasi, yi kʉwʉrʉ ũrĩ ẽã bʉrabara jẽda ũrĩbasi akʉza yi wãbe ẽã berãra jẽda wãbibasi. Ẽbẽra kayabʉba Jesús wuata wĩña tõbarisibʉrʉ waña bebibasi. Jesúsbara ẽbẽrarã wawabʉsida bebibasi. Ẽbẽrarã mejãchaʉta iyi kʼaidu wãpanasi akʉza Jesús paebasimina ẽbẽrarã jara ẽ basi iyidoba bakĩrãbʉta.

Ewari aba ẽbẽra wãbe ẽãbʉta edesida Jesús bʉidu. Mamina maʉ̃ deda ẽbẽrarã mejãchabasi baera wãbe ẽã bʉra eda edebeda ẽ basi, maʉ̃ kʼarea de ʉ̃treare edesida. Jesúsba jarasi jari yumakẽrã wãbe ẽãbʉa: «Piradrʉra akʉza teibara». Maʉ̃ yumakẽrã teibidade ẽbẽrarã mejãchaʉta kĩrãmigasida.

Tẽã ẽbẽrarã aidaba kayabʉta 10, Jesúsʼa jĩgaʉba jʉrasida: «¡Jesús kʼarebara daira!». Maʉ̃ ewaribaside Leybara jarabasi ẽbẽrarã aidaba kayabʉra ẽbẽra kaya ẽ bʉbawarara babe ẽãta. Adewara Daizeze Leyba jarabasi ẽbẽra aba aidaba kayabʉra, wãibarabasita iyi biada tẽã temploeda, maʉ̃ kʼarea Jesúsba jarabasi wãmarẽã temploeda. Ãyi temploeda wãne aidaba kayabʉra biasi, maʉ̃ranebema abaʉba kʼawuaside biadogota jẽda wãsi Jesúsʼidu biga diaita akʉza Daizeze ʉ̃rʉ ibia bedʼeaita. Maʉ̃ra aidaba kayapanʉra 10 panʉranebema abapaibʉrʉ jẽda wãsi biga diaita.

Yuwẽrã aba 12 poagabasi kayabʉta, iyira bia bakĩrãbasi mejãcha zʉbʉriabasi baera. Maʉ̃ ẽbẽra wẽrãba ũdui Jesús audu ẽbẽrarã mejãchabasita, chupea orrasi Jesús wua tãita, mawũã tõbaribʉrʉba besi. Jesúsba widisi: «¿Kʼaiba tõbaritabe mʉ̃ wuara?». Ẽbẽra wẽrãra mejãcha perasi, maʉ̃ kʼarea Jesústa orra kʼãrãpe wãrĩnuta jarasi. Jesúsbara iyira aduʼa babisi mõbe jarasi: «Kau, aduʼa wãra».

Jairora sinagogadebema nokʼobasi, maʉ̃ba jarasi Jesúsʼa: «Zera mʉ̃ deda, mʉ̃ kaura mejãcha kayabʉ». Mamina Jesús Jairo deda jʉ̃ẽi nãã yi kaura beisi. Jesús maʉ̃ deda jʉ̃ẽside ũdusi mejãchabasita ẽbẽrarãra jẽganʉmʉta, aramaʉ̃ta jarasi: «Jẽgaraidua, wũãwũãra kʼãĩnʉmʉa». Jesúsbara wũãwũã juwa jida kʼãrãpe jarasi: «¡Wẽrã zake piradrʉra!». Maʉ̃ne wũãwũãra meserabai piradrʉsi akʉza Jesúsbara jarasi yibarira, yikota diamarẽã. ¡Krĩchara yibarira sãwũã arigʉ sobia totosita!