Jesúsʼra yi ũdubisi ẽbẽra beda beamiara

Jesúsʼra iyi apostolera yi ũdubida tẽã, Pedrora wãsi puza Galilea eda beda beade. Maʉ̃ne wãsi Tomásta, Santiagota, Juanta akʉza awurura Jesús kʼaidubemarata. Ãyira diamasi beda bea ʉ̃nadrʉsida, mamina beda jidada ẽ basi.

Maʉ̃ nrʉema diapeda, playa oriyade ũdusida ẽbẽra aba edaʉnʉmʉta. Maʉ̃ ẽbẽrabara mamaʉ̃ba widisi: «¿Marabara bedara beasika?». Ãya panʉsi: «Mia ababida beada ẽã». Maʉ̃ne ẽbẽraba jarasi: «Maraba atarraya erbʉra jãba juwarare doi balbʉeidua». Ãya atarraya balbʉebʉrʉde beda zʉgʉaba ʉ̃tʉ zebi ẽ basi atarrayara. Juanbara kʼawuaedasi maʉ̃ ẽbẽrarã Jesúsbasita, maʉ̃ kʼarea jarasi: «¡Kaʉ̃ra Jesús!». Aramaʉ̃ta Pedrora doi toto kʼãrãpe dowigui wãsi playaidu akʉza wuabemarãra jãbade jʉ̃ẽsi.

Ãyi jʉ̃ẽnadogode ũdusi Jesúsbara babʉta bedata akʉza panta. Mõbe Jesúsba jarasi ãya ʉ̃kʉrʉ beda beadasida ededamarẽã wiaita. Aramaʉ̃ta Jesúsba jarasi: «Zeidua nekoita».

Ãyi neko berabariside, Jesúsba Pedroʼa widisi: «¿Bʉa mʉ̃ra mejãcha kãgaka naʉ̃ bedaira?». Aramaʉ̃ta Pedroba jarasi: «Jesús bʉara kʼawuabʉ mʉ̃a bʉra mejãcha kãgata». Aramaʉ̃ta Jesúsba jarasi: «Mawũãra yiko diara mʉ̃ obeja zakerãra». Akʉza jẽda Jesúsba jarasi: «Pedro bʉa mʉ̃ra wãrĩnu kãgaka». Pedroba jarasi: «Jesús bʉara biʼia kʼawuabʉ mʉ̃ara bʉra wãrĩnu kãgata». Jesúsba jarasi: «Biʼia akʉra mʉ̃ obeja zakerãra». Jesúsbara iyabaʉ bedʼeata widisi Pedroʼa, maʉ̃ kʼarea Pedrora sobia ẽ totosi, maʉ̃ne jarasi: «Jesús bʉara jõma kʼawuabʉ. Adewara kʼawuabʉ mʉ̃a mejãcha kãgabʉta». Jesúsba jarasi: «Yiko diara mʉ̃ obejarãra. Idʉbʉraidua ewari jõmaʉ̃nẽ mʉ̃ kʼaidu bʼaita».