Pedrobara jarabʉ Jesúsʼra ũdukata

Jesúsʼra iyi apostolerabawara ãba nekosi iyi bei naã. Jesúsba jarasi: «Idi diamasi mara jõmaʉ̃ba mʉ̃ra doba amaenañi». Pedroba jarasi: «Mʉ̃ara doba amae ẽ bayi. Wuabemaraba bʉta amaera, mʉ̃ara bʉra jipa amae ẽ bayi». Jesúsba jarasi Pedroʼa: «Idi diamasi gayo berui nãã, jarama ũbea jarayi bʉara mʉ̃ra ũdukata».

Gorogororaba Jesús Caifás deda edesidera apostolera bioʉta mĩrʉma wãsida, mamina apostolera ũme kʼaidu wãsida. Maʉ̃ranebema abaʉra Pedrobasi. Caifás deda basi tʉbʉ pʉreata, mama ẽbẽrarãbara orrapanasi maʉ̃ tʉbʉ jʉ̃wʉrʉata kʉrãza baera, Pedrosida mamabasi. Mama yuwẽrã abaʉba Pedro ũdui naʉ̃ta jarasi: «¡Mʉ̃a ũdubari bʉra! ¡Bʉra Jesús kʼaidubema!».

Pedroba panʉsi: «Mawũã ẽ, ¿bʉra kʼãrẽ ʉ̃rʉ bedʼeabʉpe?», maʉ̃ne puerta bʉidu wãsi. Awuru yuwẽrãba Pedro ũdui jarasi wuabemara: «¡Kaʉ̃ yumakẽrãra Jesús kʼaidubasi!». Pedroba jẽda panʉsi: «¡Mʉ̃ara kʼawua ẽ kʼaisi Jesúsʼra!». Yumakẽrã abaʉba akʉza jarasi: «Bʉra Jesús kʼaidubemakĩrã, ẽbẽra Galileadebema kĩrãkʼa bedʼeabʉ bʉra. Kʼãwũã bedʼeabʉ Jesúsʼra, bʉ bedʼeabʉ kĩrãkʼa». Pedroba akʉza jarasi: «¡Mʉ̃ara jipa ũduka!».

Maʉ̃ daucha eterre gayota berusi. Jesúsbara akʉ edaʉnʉmasi Pedrora. Pedroba Jesúsba akʉ edanʉmʉta ũdui, kĩrãbesi Jesúsba nãã kʼãrẽ jarada ʉ̃rʉ, maʉ̃ kʼarea ãĩ wã kʼãrãpe mejãcha jẽgasi.

Maʉ̃ ewaridera ẽbẽrarã Sanedrínʼnebemata (religion bururãra) Caifás deda ãba yi jʉresida krĩchaita Jesús sãwũã odaita. Sanedrínbara krĩchabasi Jesúsʼra beadaita, mamina kʼarea beadaira ũduda ẽ basi baera kʼawuada ẽ basi ẽbẽrarã sãwũã jaraita. Maʉ̃ tẽã Caifásba widisi Jesúsʼa: «¿Bʉra Daizeze warraka?». Jesúsba panʉsi: «Ãjã. Mʉ̃ra Daizeze warra». Aramaʉ̃ta Caifásba jarasi: «¡Maʉ̃ra sewida!, maʉ̃ kʼarea daiba bʉra beaseabʉ». Wuabemara yumakẽrãra mama badasida bedʼea abarikabasi. Maʉ̃ne jarasida: «Kaʉ̃ yumakẽrãra beadaibara». Kĩrãdarrama tachida kʼãrãpe, daiduda kʼãrãpe, iyi buruta jõma anana kʼãrãpe posida. Maʉ̃ne jarasida: «¡Bʉta wãrĩnu propetabʉrʉ jarada kʼaiba potabeta bʉra!».

Akʉza maʉ̃ nrʉema edesida Jesúsʼra Sanedrín nãã. Maʉ̃ne jẽda widisida Jesúsʼa: «¿Bʉra Daizeze warraka?». Jesúsba panʉsi: «Ãjã. Maraba jarabʉ mʉ̃ra Daizeze warrata». Aramaʉ̃ta jarasida Jesúsʼra sewa nebʉrʉ omiata akʉza Daizeze ʉ̃rʉ ibia bedʼea ẽãta. Adewara edesida nokʼo Poncio Pilato nãã. Iyira nokʼo Romanebemabasi. ¿Maʉ̃ tẽã kʼãrẽta berabarisi? Akʉdaya.