Jesúsʼra jẽda wãsi ʉ̃ta

Jesúsʼra iyi kʼaidupanʉrabawara ãba yi jʉresi Galilea pʉwʉrʉde. Maʉ̃ kʼarea naʉ̃ta omarẽã jarasi: «Mʉ̃ ʉ̃rʉ ĩjãnamarẽã naʉ̃ drʉa jõmaʉ̃nẽ ẽbẽrarã jaradia wãidua. Akʉza jaradiaidua mʉ̃a mara jaradiabʉrʉta akʉza buru kʼoeidua». Tẽã Jesúsba ãya jarasi: «Kĩrãbeidua, mʉ̃ra marabawara ewari jõmaʉ̃nẽ bayi».

Jeowaba Jesús jẽda piradrʉbida tẽã, Galileade akʉza Jerusalénʼne iyi kʼaidupanʉra mejãchaʉʼa yi ũdubisi 40 ewaribayeda. Nekʼãrẽ biata mejãcha jaradiasi akʉza miõba okata mejãcha osi. Jesús ʉ̃ta wãi nãã iyi apostolerabawara, ãba yi jʉresi katuma Olivosde. Jesúsbara ãya jarabarisi: «Wãraidua Jerusalénʼnebara, awuarabʉrʉ jʉ̃ãidua mʉ̃ Zezeba mara diaya adata».

Jesús apostolerabara Jesúsba kʼãrẽ jarakĩrãbadara ũrĩbeda ẽ basi, maʉ̃ kʼarea widisida: «¿Bʉra Israel nokʼo bʼaika namabʉde?». Jesúsba jarasi: «Jeowabara wabida jara ẽ mʉ̃ra nokʼo bamarẽã. Aranʉbai mara ʉ̃rʉ zeyi Daizeze jaure zareata, maʉ̃ba zarea diayi maraʼa akʉza mʉ̃ ʉ̃rʉ jaradiadayi. Maʉ̃ kʼarea wãidua jaradiade Jerusalénʼena, Judeaeda, Samariaeda akʉza wawara, naʉ̃ drʉa jõmaʉ̃nẽ».

Aramaʉ̃ta Jesúsʼra ʉ̃ta wãsi, audre ẽãne jãrãraba ũdubi ẽ totosi. Iyi kʼaidupanʉrabara ʉ̃ta akʉpanasimina wua ũduda ẽ basi Jesúsʼra.

Maʉ̃ne Jesús kʼaidupanʉrãra wãsi katuma Olivosdeba jẽda Jerusalénʼena. Ãyira de abaʉde badua ãba yi jʉrepanasi akʉza yiwidʼipanasi. Adewara jʉ̃ãpanasi Jesúsba audre jaradiamarẽã, mawũã ãya audre owãnaita.