Israelitarabara ãyara nekʼãrẽ oita jarasi Jeowa

Israelitarãra Egiptodeba jedeko ũme wãna tẽã, katuma Sinaínʉ jʉ̃ẽ kʼãrãpe panesi. Aramaʉ̃ta Jeowabara jarasi Moisésʼa, Sinaí katumata wãzemarẽã, mõbe jarasi: «Mʉ̃a ẽdrʉbisi israelitarãra. Ãya mʉ̃a jaradata ũrĩra mʉ̃ pʉwʉrʉ bayi». Moisés jẽda wãsidera Jeowaba jaradata jarasi israelitara. Israelitarabara jarasida: «Daibara Jeowaba jõma zokʼabʉra soiduba oyi».

Maʉ̃ tẽã Moisésʼra jẽda wãze wãsi katumaena. Jeowaba jarasi: «Ewari ũbea babʉrʉde mʉ̃ra bedʼeayi pʉwʉrʉbawara. Jaradua pʉwʉrʉʼa mia abaʉta wãze ẽ marẽã Sinaí katumaena». Moisés maʉ̃ katumaneba jẽda zeside israelitara jarasi ãyi sora ũrĩñawa panamarẽã, mawũã ũrĩnamarẽã Jeowaba bedʼea jarai badata.

Ewari ũbea babʉrʉde, israelitarabara ũdusi ba baenʉmʉta akʉza bajãra pãrĩgʉa jĩraʉta maʉ̃ Sinaí katuma ʉ̃rʉ. Ũrĩsida mejãcha bachidiwanʉmaenata akʉza ũrĩsida kachu mejãcha biabʉta. Maʉ̃ne Jeowara katuma pʉreade zesi. Maʉ̃ katumara jõma nãrĩba audu purra totosi akʉza mejãcha urebʉsawasi. Kachu biabʉsida audre ũrĩbʉsawasi. Aramaʉ̃ta Jeowaba jarasi: «Mʉ̃ra Jeowa. Daizeze zeri ẽã yiwidʼiraidua».

Moisésʼra jẽda wãbʉrʉdera Jeowaba leirata diasi pʉwʉrʉʼa, maʉ̃ra leirane jarabasi iyaʼa sãwũã yiwidʼibarata akʉza sãwũã bʼaibarabasita. Moisésbara bʉsi Jeowaba jaradara, maʉ̃ tẽã israelitara jara ũrĩbisi. Ãya jarasida: «Daibara ũrĩñĩ jõma Jeowaba jarabʉrʉra». ¿Ãya Jeowa maʉ̃ bedʼea jaradara wãrĩnu oibasika?