Ẽbẽrarã Jerusalénʼnebema makenanata

Judá pʉwʉrʉra Jeowaʼa yiwidʼipe akʉza awuru daizezeʼa yiwidʼipanasi, poaga biobayeda mawũã osida. Jeowaba ãyita kʼarebakĩrãbasi baera zokʼa bʉebasi propetarata. Mamina ẽbẽrarãbara ũrĩna ẽ basi, propetara kʼarea ipidapanasi. Jeowaba jõbikĩrãbasi nekʼãrẽ oma yiwidʼipanʉta. ¿Sãwũã oibasi maʉ̃ra?

Nokʼo Babilonianebemaba yi trʉ̃ Nabucodonosorba iyi juwa edre baebi wãbasi pʉwʉrʉrata. Jerusalén pʉwʉrʉra nããra iyi juwa edre baebisidera, jidasi Joaquínta, prinsiperata akʉza nekʼãrẽ okʼauchuberata, maʉ̃rãra edesi Babiloniaena. Akʉza edesi nekʼãrẽ bia Daizeze templode badata. Maʉ̃ tẽã Nabucodonosorbara Sedequíasta nokʼo babisi Judá pʉwʉrʉde.

Nããra nokʼo Sedequíasbara ũrĩbasi nokʼo Nabucodonosorba jarabadara. Mamina propetara zeri ẽãraba akʉza ʉ̃kʉrʉ pʉwʉrʉ arakʼaitabemaba jarapanasi Sedequíasʼa ũrĩ ẽ marẽã nokʼo Nabucodonosorba jarabʉta. Jeremíasbara jarada ʉ̃rʉ jarasi: «Bʉa ũrĩ ẽ bʉrʉ bayi beita, jarrabata akʉza kayata Judá pʉwʉrʉde».

8 poaga berabarida tẽã nokʼo Sedequíasbara ũrĩ ẽ basi nokʼo Nabucodonosorba jarabʉra akʉza kʼarebata widisi gorogorora Egiptodebemara. Maʉ̃ kʼarea Nabucodonosorbara zokʼasi iyi gorogororata Jerusalén pʉwʉrʉta makenamarẽã. Gorogorora Babilonianebemarabara Jerusalén pʉwʉrʉra audu pʉrrasida. Jeremíasba jarasi Sedequíasʼa: «Bʉta Babiloniaʼa idu yi edebira, neida berabari ẽ bayi bʉta akʉza naʉ̃ pʉwʉrʉta. Mamina bʉa maʉ̃ta oẽ bʉrʉ ãyara Jerusalénʼra babʉedayi akʉza bʉsida jidadayi». Sedequíasba panʉsi: «¡Mʉ̃ra yõñi!».

Poaga aba berabarida tẽã gorogoro babiloniorabara Jerusalén murorata ẽzadra mãrĩsida. Eda wãna kʼãrãpe, Jerusalén pʉwʉrʉra babʉesida akʉza templosida babʉesida, ẽbẽrarãta mejãcha makenasida akʉza ẽbẽrarãta mejãcha jida edesida.

Sedequíasʼra mĩrʉ wãsibasi Jerusalénʼnebara, mamina babiloniorabara pẽwãsida mawũã Jericó kʼaita jida jʉ̃ẽsida Sedequíasʼra, mõbe edesida Nabucodonosorma. Nabucodonosorbara ajuerzade akʉbisi Sedequíasʼa sãwũã yi wũãwũã makena jirpanʉta. Maʉ̃ tẽã daʉberre osida akʉza karselde eda ibalbʉesi. Sedequíasʼra mama beisi. Jeowaba naʉ̃ bedʼeata jarasi Judá pʉwʉrʉʼa: «Poaga 70 berabarida tẽã mʉ̃a marara jẽda edeyi mara drʉa Jerusalénʼena».

¿Kʼãrẽba sãwũãsi warrarãra Babiloniaena ededapeadara? ¿Ãyira Jeowaʉ̃me kʼẽrẽpapanasika?