Daizeze Bedʼeaba jarabʉra ewari jõmaʉ̃nẽ aripebʉ

KRĨCHARA bʉ museoma wãta mama bʉa akʉnʉmʉ nekʼãrẽ zõrãrãweda badata. Maʉ̃ta bʉa akʉbʉ maʉ̃ranebemara ãrĩbʉta. Adewara ʉ̃kʉrʉra jõmabʉ ẽ. Maminabʉ aba jõmabʉta akʉza biʼia parãmatabʉ. Bʉa bʉ yi nãã edebʉa maʉ̃ta widibʉ maʉ̃ ʉ̃rʉ: «¿Audre yiwidika wuabemaraira?», maʉ̃ ẽbẽraba jarabʉ: «Mawũã ẽ, kaʉ̃ra audre kikibari akʉza miõba ara oka». Aramaʉ̃ta bʉa widibʉ: «¿Wuaga erpanasika kaʉ̃ra?». Maʉ̃ ẽbẽraba panʉbʉ: «Mawũã ẽ, awuarabʉrʉ naʉ̃ra berabarisi kuede, pʉãdrʉde akʉza awuruba ãrĩkĩrãpanasi». Bʉa maʉ̃ kʼarea naʉ̃ta krĩchaseabʉ: «Mawũãra ¿kʼãrẽ omaba?».

Daizeze Bedʼeara atia dayirãba museode jarada kĩrãkʼachu. Daizeze Bedʼeara kikibarimina, maminabʉ librora maʉ̃ne ʉ̃ta kikibarita, maʉ̃rãra ãrĩ wã ewari berabari wãne. Ẽbẽrarãba ewariza nekʼãrẽ kʼawuabʉba, ũdubisi maʉ̃ra libroraba jarabadara siensia ʉ̃rʉ aripe jara ẽ basita. Adewara maʉ̃ra libroraba medisina ʉ̃rʉ jarabadara, ẽbẽrarã bebikaude audre kayabibasi. Maʉ̃ra libroradebemara ʉ̃kʉrʉra mazõrekʉasi adewara ʉ̃kʉrʉra maãrĩkʉasi.

Mamina Daizeze Bedʼeara jipa awuarabʉ. 3.500 poaga audre bamina ariyabʉ. Mejãcha pẽwãbʉmina (babʉesida, kãgada ẽ akʉdamarẽã maʉ̃ ʉ̃rʉ akʉza imitia bedʼeapanʉ), Daizeze Bedʼeaba jarabʉra aripe jarabʉ. Ẽbẽrarãba nekʼãrẽ awuara kʼawua wãmina Daizeze Bedʼeabara maʉ̃ ʉ̃rʉra yi nãã yi jaramabasi (akʉra rekuadro «¿Anticuada, o adelantada para su tiempo?»).

IDI EWADE NEKʼÃRẼ AUDRE YIBIA DAYIRÃBA NESIDABɄTA

Bʉa naʉ̃ta widiseabʉ: «¿Idibasidu Daizeze Bedʼeaba ũrãgʼa diabʉra yibiaka?». Maʉ̃ bedʼea panʉita, krĩchara ẽbẽrarãba idi ewade sãwũã bedʼea zroma ũdupanʉta. ¿Maʉ̃ bedʼea zromaranebemara saʉ̃ audre mitiara? Krĩchakʉbʉbaibara yõta, naʉ̃ drʉa sãwũã ãrĩ wãta, ẽbẽra kayiruarata mawũã ẽ bʉrʉ ẽbẽraba zokʼabʉde aña opanʉta. Akʉra Daizeze Bedʼeaba kʼãrẽta jarabʉta, maʉ̃ obʉrʉde naʉ̃ ʉ̃rʉ krĩchara: «¿Naʉ̃ drʉara bia bakasika jõmaʉ̃ ẽbẽraba ãyi sodeba nebiata ũdubibasibʉrʉ?».

JɄRɄIBARA IBIADE BʼAITA

«Sobiaudua zhãrãta zhiya adu-a duanabi bʼera, mawũãrã Daizeze warrarã adʼaya» (Mateo 5:9 Daizeze Bedʼea, Wycliffe Inc.). «Marãba osia bʼʉra obʉdata adu-a bʼeaudua jõmaʉ̃ bawara» (Romanos 12:18 Daizeze Bedʼea, Wycliffe Inc.).

SO ZɄBɄRIA AKɄITA AKɄZA WUABEMARA NEMITIA KĨRÃDUAITA

«Sobiaudua zhãrã sozuburia bʼera, mawũãrã Daizezebara sozuburiaya» (Mateo 5:7 Daizeze Bedʼea, Wycliffe Inc.). «Yiya jʉ̃ãbeidua akʉza ibiade kĩrãduaidua bʉ ʉ̃rʉ nemitiata osidamina. Jeowabaa mara nemitia ibiade kĩrãduabʉ kĩrãkʼa marabida abarika mawũã oibara» (Colosenses 3:13).

KRĨCHA ẼÃ YARA AWUARABɄMINA, ÃBA BʼAIBARA

Daizezebara «abʼaʉdʼeba zhãrã bio eababisia drua jõmaʉ̃ne bʼeamarẽã» (Hechos 17:26 Daizeze Bed’ea, Wycliffe Inc.). «Daizezebara zhãrã awuara eda ẽãta. Awuarabʉrʉ zhãrã jõma izhima biga izhi wawia kʼãrẽ sãwũã oi bʼʉdʼe obʼʉra» (Hechos 10:34, 35 Daizeze Bedʼea, Wycliffe Inc.).

AKɄDAIBARA DAYIRÃ DRɄARA

«Daizeze Jeowabara bʉsi yumakẽrãta ẽjũã kĩrãwãreã Edéne mawũã ne uta umarẽã akʉza akʉmarẽã» (Génesis 2:15). Daizezebara makenañi «naʉ̃ drʉa ãrĩbʉrata» (Revelación [Apocalipsis] 11:18).

JɄRADAIBARA NEKʼÃRẼ MEJÃCHA ERBAITA AKɄZA DAYI KAKUA NEIDA OITA

«Mawũãpe mawũãsia: Kĩrãkuita bʼeaudua, ne wuaabʉrʉ krĩña bʼearãũdua, beubarira bʼʉ ẽã ne bio erubʼʉba» (Lucas 12:15, Daizeze Bedʼea, Wycliffe Inc.). «Dayi kakua neida oita, nekʼãrẽ badu jaigʉabʉta mawũã ẽ bʉrʉ mejãcha nekʼãrẽ erbaita, maʉ̃ra ʉ̃rʉ marara bedʼea ẽ baibara mayirai, ẽbẽra neneẽãbʉba obʉ kĩrãkʼa» (Efesios 5:3).

KʼẼRẼPA OITA AKɄZA ZAREA TRAJAITA

«Dai kʼarea yiwidʼidua, wãrĩnu dai krĩchara aduʼabʉ baera, jõma daiba opanʉra bia okĩrãpanʉ» (Hebreos 13:18). «Yi zrʉgabʉbara wua zrʉgarãra, awuarabʉrʉ zarea trajaibara iyi juwaba. Mawũã iya erbʉba awuruba nesidabʉ kʼarebaita» (Efesios 4:28).

K’AREBAITA AWURUBA K’AREBATA NESIDABɄBɄRɄ

«Adewara mebẽrã, widipanʉ kʼẽrẽpabʉ ẽã kʼẽãmarẽã, so zarea diadua yi sopʉabea, kʼarebaidua yi zarea ẽãbera akʉza jõmaʉ̃me mesera kĩrʉrãra» (1 Tesaloncenses 5:14). Adewara «jẽrãmara akʉita akʉza pẽdrata ãyi zʉbʉriabʉrʉde» (Santiago 1:27).

Daizeze Bedʼeabara bari maʉ̃ra nebia jara ẽ awuarabʉrʉ jaradiabʉ maʉ̃ra nebia sãwũã kãgaita akʉza sãwũã ũdubita. Ẽbẽrarã mejãchaʉba maʉ̃ta erbasibʉrʉ, ¿maʉ̃ba kʼareba ẽ bakasika ẽbẽrarã idi ewade mejãcha bedʼea zroma ũdubʉra? Wãrĩnu bʼaira maʉ̃ ewaridebʉrʉ audre yibia Daizeze Bedʼeaba ũrãgʼa jarabʉ oita. Mamina, ¿kʼãrẽta oseabʉ Daizeze Bedʼea bʉ kʼarea?

¿IDI EWADERA BɄRA DAIZEZE BED’EABARA SÃWŨÃ K’AREBASEABɄ?

Yumakẽrã arigʉ burubiaba naʉ̃ drʉade badaba naʉ̃ta jarasi: «Mawũãmina Daizeze krĩchara bigata kʼawua nʉmeã izhidʼebema ĩjã bʼeta bia nʉmeba» (Mateo 11:19, Daizeze Bed’ea, Wycliffe Inc.). ¿Maʉ̃ra yibia ẽka? Maʉ̃ ũrãgʼa bia jarabʉ kʼawuaira, nãã ũrĩbara, maʉ̃are akʉibara kʼãrẽta berabarita. Maʉ̃ kʼarea bʉa widiseabʉ: «Wãrĩnu Daizeze Bedʼeaba dayirãta kʼarebabʉbʉrʉ, ¿Daizeze Bedʼeaba mawũã ũrãgʼa diabʉba mʉ̃ra bia wã ẽ baika? ¿Mʉ̃a bedʼea zroma kʼãwũã erbʉra wãrĩnu kʼarebaseabʉka?». Akʉdaya yiza aba.

Dianarab nekʼãrẽ obasi akʉza arigʉ sobiabasi, mamina iyi bebʉra awuarabesi mejãcha nemitiata berabarisi: yi kau awera zaketa beisi, yi kimaʉ̃me bia wã ẽ basi akʉza platasi jõsi. Iya jarabʉ: «Mʉ̃ kʼaisida kʼawua ẽ basi; kau neẽbesi, kimasi neẽbesi akʉza desida neẽbesi. Aduasi jõma: mʉ̃ sãwũãbʉta, mʉ̃ zareata akʉza mʉa jʉ̃ãbʉta».

Dianabara kʼawuasi naʉ̃ bedʼea jarabʉra wãrĩnuta: «Dayirã ewarirabʉ poaga 70 akʉza zareaba babibʉ poaga 80, biode trajapanʉ akʉza zʉbʉriapanʉ; mesera berabaribʉ baera akʉza wãbaripanʉ» (Salmo 90:10).

Maʉ̃ bedʼea zroma mawũã berabarinʉmʉne Dianabara jʉrʉsi Daizeze Bedʼea kʼarebata akʉza maʉ̃neba nebiata ũdusi. Wuarebema artikulo ũbea zebʉrʉde akʉdayi sãwũã ẽbẽrarãba ara ozebʉdata ãyi bedʼea zroma Daizeze Bedʼeaba jarabʉ obʉde, maʉ̃ mawũã zokʼadaba nebiata ũdubʉrʉ. Maʉ̃ra ẽbẽrarãbara kʼawuabʉda Daizeze Bedʼeara wuabemara libro kĩrãkʼabʉ ẽãta, awuarabʉrʉ ewari berabari wãmina idibasidu kʼarebabʉ. ¿Mõbemata, Daizeze Bedʼeabara kʼarebabʉka iyira libro wuabemara awuarabʉ baera? ¿Mawũãra mama Daizeze Bedʼeade edabʉra Daizezedeba zesika mawũã yumakẽrãdeba ze ẽ basika? (1 Tesalonicenses 2:13).

Bʉa krĩchabaribaibara dayi bebʉra wikabʉta akʉza mejãcha bedʼea zroma ũdubʉta. ¿Kʼai kʼarebata jʉrʉbʉ bʉaʼa so zarea diada marẽã akʉza ũrãgʼa diadamarẽã bedʼea zroma ũdubʉrʉde?

Akʉdaya nekʼãrẽ ũbea sãwũã Daizeze Bedʼeaba bʉ bebʉra kʼarebaseabʉta. Baizeze Bedʼeaba bʉta kʼarebaseabʉ:

1. Bedʼea zromane eda ba ẽ baita.

2. Bedʼea zroma ũdubʉrʉde ara ok’awuaita.

3. Bʉ bedʼea zroma ara oẽmina maʉ̃ba b’aita.

Naʉ̃ra artikulora atia k’awuadaide k’awuadayi naʉ̃ra bed’ea ũbeata.