Nebia zeita jʉ̃ãpanʉ

«Ewari jõbodoarera ũdu wãnañi bedʼea zroma daya obe ẽãta» (2 TIMOTEO 3:1).

¿NAɄ̃RA ZɄBɄRIARA ũdubarika bʉa? Mawũã ẽ bʉrʉ, ¿maʉ̃ ʉ̃rʉ ũrĩbarika?

● Kaya kayiruaba mejãcha beabʉ ẽbẽrarãra.

● Jarrababa bio makenabʉ ẽbẽrarãra.

● Drʉa ureba ẽbẽrarã mejãcha makenabʉ akʉza mãrĩbʉ ãyi desida.

Atiara bedʼeadayi nekʼãrẽ maʉ̃ ʉ̃rʉ berabaribʉ kĩrãkʼabʉta naʉ̃ drʉade. Bʉa bʉyikʉzaʉba kʼawuayi idi kʼãwũã berabaribʉra Daizeze Bedʼeaba yatebeda jarabarisita.a

Naʉ̃ artikulodera bedʼea zroma ʉ̃rʉ bedʼeabʉmina, ũdubibʉ aranʉbai nebiata ũdudaita dayirãba, propesiaba idi berabaribʉba ũdubibʉ naʉ̃ ewari jõbodoarepanʉta akʉza akʉdayi ʉ̃kʉrʉba kʼaseapanʉta adewara dayirãba kʼãrẽa ĩjãseabʉta aranʉbai nebiata ũdudaita.

[Nota]

1. Drʉa ureta

«Menajacha nʉmeña ẽjũã ureta» (LUCAS 21:11, Daizeze Bedʼea, Wycliffe Inc.).

● Drʉa ure berabarida tẽã ʉ̃kʉrʉ ẽbẽrarãba ũrĩsida wũãwũã zaketa ne mãrĩna edre jẽgatakirʉta, wũãwũã trʉ̃ra Winnie basi, maʉ̃neba ãĩbʉeda kʼãrãpe wũãwũãra neneẽãbasi, mamina yibarirara beisi maʉ̃ drʉa ure berabariside.

¿KʼÃRẼTA ŨDUBIBɄ NEKʼÃRẼ BERABARIBɄBA? Drʉa ure Haitíde berabaridaba 2010baside, tresientos mil ẽbẽrarã ʉ̃ta makenasi, akʉza 1 millon tresientos mil ẽbẽrarã de neẽã amaesi maʉ̃ drʉa ure berabaridade. Abril 2009deba abril 2010 bayedara 18 drʉa ure berabarisi naʉ̃ drʉa jõmaʉ̃nẽ.

¿ẼBẼRABA KʼÃRẼTA JARAPANɄ? Atiara drʉa urera audre berabarinʉmʉ ẽ nãã badaira, awuarabʉrʉ internetʼneba audre kʼawuabibʉ drʉa ure berabarida ʉ̃rʉ.

¿ẼBẼRARÃBA JARAPANɄRA WÃRĨNUKA? Daizeze Bedʼeaba jara ẽ basi sõbe berabarita, awuarabʉrʉ jarasi «drʉa ure zromara «drʉaza» berabarita , naʉ̃ drʉa jõmaʉ̃nẽ naʉ̃ drʉa ure zroma berabaribʉ kʼarea kʼawuapanʉ ewari jõbodoarepanʉta (Marcos 13:8; Lucas 21:11).

¿BɄA KʼÃRẼTA KRĨCHABɄ? ¿Wãrĩnu drʉa urera berabarinʉmʉka Daizeze Bedʼeaba jarada kĩrãkʼa?

Drʉa ure berabaribʉdeba, bari maʉ̃ba jarakĩrãkʉ ẽ naʉ̃ ewari jõbodoare panʉta, awuarabʉrʉ Daizeze Bedʼeaba jaradata aripe berabarinʉmʉ, akʉdayi awuru Daizeze Bedʼeaba jaradata aripe berabarinʉmʉta.

[Bedʼea jarabʉta]

«Ẽbẽrarãba bari drʉa ure apanʉra [geopisikoraba] jarapanʉ drʉa ure zromarata». (KEN HUDNUT, SERVICIO ­GEOLÓGICO DE ESTADOS UNIDOS)

[Poto diasi]

© William Daniels/Panos Pictures

2. Jarrabata

«Bayi jarrabata» (MARCOS 13:8).

● Yumakẽrã aba iyi mebẽrãbawara ãĩ wãsi iyi drʉadeba jarraba kʼarea, ãyira wãsi komunida Quaratadji (Níger) drʉa eda. «Maʉ̃ yumakẽrãra esterade tabadogo, krĩcha obʉ iyi mebẽrãra yiko dia be ẽ baera», naʉ̃ta jarasi Sidi nokʼo maʉ̃ komunidadebemaba.

¿KʼÃRẼTA ŨDUBIBɄ NEKʼÃRẼ BERABARIBɄBA? Naʉ̃ drʉa jõmaʉ̃nẽ ẽbẽra mejãchaʉta zʉbʉriapanʉ jarrababa, mamina Áfricade audre ẽbẽrarã zʉbʉriapanʉ jarraba kʼarea. Bari jaraita mebẽrãta panʉ, yi zezeta, yi papata akʉza yi wũãwũãta, mamina yikora bʉ ẽbẽra ũmepaiba koita, maʉ̃ kʼarea ãya krĩchadaibara kʼaita neko ẽ baita, yi papata mawũã ẽ bʉrʉ yi zezeta.

¿ẼBẼRABA KʼÃRẼTA JARAPANɄ? Naʉ̃ drʉade bʉ yiko ẽbẽra jõmaita, mamina yi zokʼapanʉraba bia dedeka ẽ maʉ̃ yikora.

¿ẼBẼRARÃBA JARAPANɄRA WÃRĨNUKA? Nokʼoraba zarea opanʉmina yiko ẽbẽra jõmaita dedekaita, wabida ũdupanʉ ẽbẽrarã jarrababa zʉbʉrianʉmʉta.

¿BɄA KʼÃRẼTA KRĨCHABɄ? Marcos 13:8de jarabʉra, ¿wãrĩnu berabarinʉmʉka? Zarea ozebʉrʉmina yiko dedekaita, ¿wabida basidu ẽbẽrarãra zʉbʉriapanʉka jarraba kʼarea?

Drʉa ureta akʉza jarraba awuara, awuru bedʼea zromata ũdupanʉ ewari jõbodoarepanʉ baera.

[Bedʼea jarabʉta]

«Wũãwũãrata kayasida neumoniaba akʉza amĩba mamina ãyira beu ẽ bakasi jarraba opana ẽ basibʉrʉ». (ANN M. VENEMAN, EX DIRECTORA EJECUTIVA DE UNICEF)

[Poto diasi]

© Paul Lowe/Panos Pictures

3. Kaya zromarata

«Bayi kaya zromarata» (LUCAS 21:11).

● Bedʼeadayi Bonzali ʉ̃rʉ, iyira Áfricadebasi, ẽbẽrarãta kʼarebabasi Marburgo kayaba baribʉta.a Maʉ̃ne iya kʼareba widisi nokʼora maʉ̃ kaya kʼareba akʉita, mamina berabarisi jedeko kimare iyi bedʼeara panʉna ẽ basi, maʉ̃ tẽã zesi maʉ̃ kʼareba iya wididara, mamina maʉ̃ enara iyira beisi maʉ̃ kayaba wuabemara kʼarebabʉeda.

¿KʼÃRẼTA ŨDUBIBɄ NEKʼÃRẼ BERABARIBɄBA? Sidaba, tuberkulosiba, ãmiba akʉza paludismoba, ẽbẽrarã makenasi 11 millones 2004baside, maʉ̃bara jarakĩrãkʉ 3 segundo babʉrʉza ẽbẽra aba beibasi maʉ̃ kayara kʼarea.

¿ẼBẼRABA KʼÃRẼTA JARAPANɄ? Ẽbẽrarã audre eaba wã baera, maʉ̃ba ẽbẽrarãra audre kayapanʉ.

¿ẼBẼRARÃBA JARAPANɄRA WÃRĨNUKA? Ẽbẽrarã audre kabana wã akʉza ũdu wãna kayara sãwũã bebira, mamina mawũãsidu ẽbẽrarã mejãcha beipanʉ kayaba.

¿BɄA KʼÃRẼTA KRĨCHABɄ? ¿Ẽbẽrarã kaya zromane berabaripanʉka Daizeze Bedʼeaba jarada kĩrãkʼa?

Ẽbẽrarã mejãchaʉta beipanʉ drʉa ureba, kaya zromaba akʉza jarrababa, mamina ẽbẽrarãba abari ẽbẽraba zʉbʉriabipanʉ edaʉde ariya yi mebẽrãba, akʉra kʼãrẽta jarabʉta Daizeze Bedʼeaba maʉ̃ ʉ̃rʉ.

[Nota]

[Bedʼea jarabʉta]

«Mejãcha zʉbʉriayi dayita imamaba makora, maʉ̃ kĩrãkʼabʉ maʉ̃ kayaba dayi biteda ariya ko wãne». (MICHAEL OSTERHOLM, EPIDEMIÓLOGO)

[Poto diasi]

©William Daniels/Panos Pictures

4. Mebẽrãra ãyirainʉ yi kãga eã wã

Ẽbẽrarãbara «kãga ũdubida ẽ bayi» ãyi mebẽrãta (2 TIMOTEO 3:1-3).

● Chrisra trajabʉ wẽrãra kʼareba diabarimae yi kimaraba upanʉne Gales pʉwʉrʉde. Iya jarasi: «Ewari aba zesi yuwẽrãta mejãcha pobʉta, mʉ̃a iyi kĩrãra bia ũdu ẽ basi» adewara jarasi: «Ʉ̃kʉrʉ wẽrãra mejãcha zʉbʉriapanʉ, maʉ̃ba dayi kĩrãra akʉ ẽ jipa».

¿KʼÃRẼTA ŨDUBIBɄ NEKʼÃRẼ BERABARIBɄBA? Áfricadera wẽrãra ũbeadebemata aba wawa osida yi zake kiraside. Yumakẽrãra mejãchaʉba krĩchapanʉ ãyi kima uira kʼãrẽ ẽãta, mamina yuwẽrã awa mawũã upanʉ ẽ, Canadádera yumakẽrãsida yi kimabara pobʉ.

¿ẼBẼRABA KʼÃRẼTA JARAPANɄ? Yumakẽrãbara iyi kimara pozebʉrʉ dããrawedaʉba, awuarabʉrʉ idira audre akʉpanʉ maʉ̃ ʉ̃rʉ.

¿ẼBẼRARÃBA JARAPANɄRA WÃRĨNUKA? Ẽbẽrarã audre bedʼeapanʉ iyi kima pobʉ ʉ̃rʉ, mamina maʉ̃bara, ¿kʼarebabʉrʉka wãrĩnu yumakẽrãba iyi kima wua po ẽ baita? Mawũã ẽ. Awuarabʉrʉ yi kãga ẽã wãna baera maʉ̃ta berabaribʉ.

¿BɄA KʼÃRẼTA KRĨCHABɄ? 2 Timoteo 3:1-3eda jarabʉra, ¿aripe berabarinʉmʉka?

Ẽbẽra mejãchaʉba iyi mebẽrãra, ¿aride kãgabʉka wãrĩnu?. Atia bedʼeadayi propesia dayirã drʉa ʉ̃rʉ bedʼeabʉta, akʉseabʉ kʼasea jarabʉta Daizeze Bedʼeaba.

[Bedʼea jarabʉta]

«Yumakẽrãba iyi kima pobʉra, yi kima wẽrãbara badua jarapanʉ ẽ kabildoara, awuarabʉrʉ yumakẽrãbara iyi kimara pobʉ 35 bayeda mawũãtrʉ yi kimabara kabildoʼa jaraita». (PORTAVOZ DEL SERVICIO DE AYUDA CONTRA EL MALTRATO DOMÉSTICO DE GALES)

5. Naʉ̃ drʉa arĩ wãta

Daizezebara makenañi yi ẽbẽra «naʉ̃ drʉa ãrĩbʉrata» (APOCALIPSIS 11:18).

● Yumakẽrãba Nigeria drʉade nedobʉ bino palma kiduaba obʉta, mamina ẽbẽrarãbara petroleota weabʉesida palmeranʉmʉmae, maʉ̃ba palmerara makenasi akʉza bedasida beikuasida adewara ẽbẽrarãra yarade kayakuasida doba, dosida zeri ẽ doira akʉza neẽ sãwũã plata ũduita.

¿KʼÃRẼTA ŨDUBIBɄ NEKʼÃRẼ BERABARIBɄBA? Poagaza 6 millones tonelada edepanʉ basurara pusa eda, maʉ̃ basura yi ẽzadrara plastiko, adewara maʉ̃ plastiko neẽã wãira poaga mejãcha berabaribara. Ẽbẽrabara ãrĩ wãna naʉ̃ drʉara akʉza ñabasea jõbi wãna naʉ̃ drʉadebʉra. Ẽbẽrarã naʉ̃ drʉa sãwũãbʉ ʉ̃rʉ estudiabʉrabara jarapanʉ 12 jedekode ẽbẽrarãba ãrĩbʉrʉra nesidabʉta 17 jedeko jõma jẽda ara oita iyikʉza, adewara periodiko Australiadebemaba Sydney Morning Herald jarabʉ: «Ẽbẽrarãta naʉ̃ drʉade audre eaba wãnara akʉza audre jõbi wãnara nekʼãrẽ naʉ̃ drʉadebʉta, 2035edara naʉ̃ drʉadera ara ẽ bayi ẽbẽrarãra».

¿ẼBẼRABA KʼÃRẼTA JARAPANɄ? Ẽbẽrarãbara ãyi burubiadeba naʉ̃ drʉa ãrĩzebʉrʉra ara oseapanʉ.

¿ẼBẼRARÃBA JARAPANɄRA WÃRĨNUKA? Ẽbẽrarã naʉ̃ drʉa akʉpanʉraba mejãcha zarea opanʉ naʉ̃ drʉa biʼia erbaita, mawũãsidu naʉ̃ drʉara audre mitia wã.

¿BɄA KʼÃRẼTA KRĨCHABɄ? ¿Nesidapanʉka Daizezeba ara omarẽã naʉ̃ drʉa ãrĩ wãra iya jarada kĩrãkʼa?

Akʉsida 5 propesia berabaribʉ ʉ̃rʉ, kõbebʉrʉ akʉdayi bedʼea bia ʉ̃rʉ naʉ̃ ewari jõbodoare berabarinʉmʉne, akʉdayi saʉ̃ta.

[Bedʼea jarabʉta]

«Nããra basi drʉa biakirʉta mamina idira drʉa mitiadebʉ» (NAɄ̃ BEDʼEATA JARASI ERIN TAMBER, PRESIDENTE DE LA COSTA SUR DE ESTADOS UNIDOS, BEDʼEANɄMASI KʼÃRẼTA BERABARISITA PETROLEO WEA WÃSIDE MÉXICO GOLFODE, 2010BASIDE)

[Rekuadrota]

¿Daizezera berabaribibʉka nemitiara?

Daizeze Bedʼeaba jarasi idi kʼawũã berabarinʉmʉra, ¿mamina maʉ̃ba jarakĩrãbʉka Daizezeba zʉbʉriabibʉta dayirãra? Naʉ̃ bedʼea panʉbʉra ũduseabʉ libro ¿Kʼãrẽta jaradiabʉ Daizeze Bedʼeabara? Yi 11de, naʉ̃ra Jeowa ʉ̃rʉ Kʼawuabipanʉrãba oda.

[Poto diasi]

U.S. Coast Guard photo

6. Naʉ̃ drʉa jõmaʉ̃nẽ jaradiapanʉ

«Bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ» (MATEO 24:14, Daizeze Bedʼea, Wycliffe Inc.).

● Vaiateara bʉ Pacíficode, maʉ̃ne bʉ drʉa zakerata 80, maʉ̃ra drʉa zakerane 16 mil ẽbẽrarã panʉ. Maʉ̃ra wawarabʉmina akʉza ẽbẽrarã kabana ẽ mina Jeowa ʉ̃rʉ Kʼawuabipanʉrãra Vaiatea deidu jʉ̃ẽsida. ¿Kʼãrẽa jĩgara wãpanʉ? Ẽbẽrarã jaradiakĩrãpanʉ baera bedʼea bia Daizeze Nokʼoba erbʉta.

¿KʼÃRẼTA ŨDUBIBɄ NEKʼÃRẼ BERABARIBɄBA? Daizeze Nokʼo ʉ̃rʉ bedʼea biabʉra jaradiapanʉ naʉ̃ drʉa jõmaʉ̃nẽ. 2010baside jaradiasida mil seisiento millones ora bayeda, 236 drʉa awuara awuaraka Jeowa ʉ̃rʉ Kʼawuabipanʉrãba, maʉ̃ba jarakĩrãbʉ Jeowa ʉ̃rʉ Kʼawuabipanʉrãbara aba abakʼaʉba 30 minuto bayeda jaradiasidata ewariza. Poaga 2000deba 2010 bayeda kartarãra dedekasida akʉza ʉ̃tʉzebisida 20 mil millones audre.

¿ẼBẼRABA KʼÃRẼTA JARAPANɄ? Dããraba Daizeze Bedʼea ʉ̃rʉ jaradia zebʉdata.

¿ẼBẼRARÃBA JARAPANɄRA WÃRĨNUKA? Wãrĩnu baira religionrabara Daizeze Bedʼeara jaradia zebʉda mamina mawũã poaga bio bayeda jaradiapanʉ ẽ mia ẽbẽrarã kabana, mamina Jeowa ʉ̃rʉ Kʼawuabipanʉrãbara ẽbẽrarã mejãchaʉʼa jaradia zebʉda Daizeze Bedʼea akʉza mawũã osida ãyi nejʉrarãba pẽwãsidamina Daizeze Bedʼea jaradiabʉ kʼarea ẽbẽrarã (Marcos 13:13).a Jeowa ʉ̃rʉ Kʼawuabipanʉrãbara ewari jʉrʉpanʉ ẽbẽrarã soiduba jaradiaita akʉza ãyi kartarãra bari diapanʉ.

¿BɄA KʼÃRẼTA KRĨCHABɄ? ¿Bedʼea bia Daizeze Nokʼo ʉ̃rʉ jaradiapanʉka naʉ̃ ewaridera? Naʉ̃ bedʼeata aripe berabarinʉmʉ baera, ¿jarakĩrãbʉka aranʉbai nebiata uruta?

[Nota]

[Bedʼea jarabʉta]

«Zarea odayi soiduba jaradiadaita Daizeze Bedʼea ʉ̃rʉ ẽbẽrarã jõmaʉʼa Jeowaba kʼawua jarayeda» (ANUARIO DE LOS TESTIGOS DE JEHOVÁ 2010)

Nekʼãrẽ biata ʉ̃ra ũdudayi

«Aranʉbai neẽbayi jipa so kayiruaberãra [...]. Mamina ẽbẽra biarãra panañi egorode, ãyira ewari jõmaʉ̃nẽ sobiapanañi» (SALMO 37:10, 11).

¿NAɄ̃ BEDʼEA aripe berabarita akʉkĩrãbʉka? Mawũã baibara, bʉ dayirãba kʼãrẽa ĩjãseapanʉta maʉ̃ ʉ̃rʉ.

Nããrabema artikuloranera akʉsida bedʼea dayirã ĩjãbibʉta dayirãra naʉ̃ ewari jõbodoare barabʉta (2 Timoteo 3:1-5). Daizezebara iyi jaure zareadeba ẽbẽrarã ũdubisi naʉ̃ kʼãwũã berabarinʉmʉ ʉ̃rʉ, akʉza dayirãba nebiata jʉ̃ãpanamarẽã (Romanos 15:4). Idi dayirãba kʼãwũã ũdunʉmʉba ũdubibʉ aranʉbai wua ũduda ẽ baita bedʼea zromara.

¿Kʼãrẽta berabariyi naʉ̃ ewari jõbodoarera? Daizeze Nokʼo juwa edre bayi ẽbẽrarãra (Mateo 6:9, 10). Akʉra sãwũã Daizeze Bedʼede berabarita jarabʉta:

● Neẽ bayi jarrabara. «Bayi mejãcha netata naʉ̃ drʉade, katuma ʉ̃rʉra audre bayi» (Salmo 72:16).

● Kayara wua neẽ bayi. «Mia abaʉ ẽbẽraba jara ẽ bayi, kayakʉ mʉ̃ra» (Isaías 33:24).

● Naʉ̃ drʉara jẽda ara oyi. «Drʉa ibʉawabʉta akʉza egoro kʼãrẽ dia ẽãta maʉ̃rãra sobiabayi adewara koribi drʉa ibʉawabʉra sobiabayi akʉza neponorata ʉ̃tʉ zeyi azapran kĩrãkʼa» (Isaías 35:1).

Naʉ̃ba wĩka ũdubibʉ aranʉbai kʼãrẽta berabarita Daizeze Bedʼeaba jarabʉ kĩrãkʼa. Bʉa audre kʼawuakĩrãbʉbʉrʉ, widira Jeowa ʉ̃rʉ Kʼawuabipanʉrã kʼãrẽa ĩjãpanʉta aranʉ nebiata uruta.