WARRARABA WIDIPANɄTA
¿Kʼãrẽa yibia yiwidʼira?
Warrara Américadebemara mejãchaʉʼa widisida ãyi yiwidʼibʉ kʼawuaita, maʉ̃ranebema mejãchaʉba jarasida opanʉta ewariza. Maʉ̃ kʼarea ʉ̃kʉrʉba widipanʉ: «¿Bari Daizezeʼa yiwidʼibaibaraka, mawũã bia bʼaita?».
¿Wãrĩnu bʼaira kʼãrẽ yiwidʼi bʼaira?
Yiwidʼi bʼaira jarakĩrãbʉ Jeowaʉ̃me bedʼea bʼaita. Krĩchara maʉ̃ba kʼãrẽta jarakĩrãbʉta: Daizezera yi zromamina akʉza naʉ̃ drʉa parãnamina, «iyira jĩgarabʉ ẽ dayirã aba abakaʉdebara» (Hechos 17:27). Akʉza Daizeze Bedʼeaba naʉ̃ta omarẽã jarabʉ: «Daizeze kʼaita bʼaidua, mawũãra iyira mara kʼaita baya» (Santiago 4:8).
¿Kʼãrẽta oseabʉ Daizeze kʼawa bʼaita?
Daizezeʼa yiwidʼira, mawũã iyiʉ̃me bedʼeayi.
Daizeze Bedʼeata akʉra, mawũã iyira bʉme bedʼeabʉ kĩrãkʼabayi.
Bʉta Daizeze Bedʼeata akʉbʉbʉrʉ akʉza iyaʼa yiwidʼibʉbʉrʉ, maʉ̃ba kʼarebayi iyi neũdukʼawua bʼaita.
«Jeowaʉ̃me bedʼeaita, naʉ̃ drʉa parãnaʉ̃me bedʼeaira, jipa mawũã bʼaira arigʉ yibia» (Jeremy).
«Mʉ̃ sãwũãbʉta Jeowaʼa jarabʉde, audre iyi kʼawa sentibʉta krĩchabʉ» (Miranda).
¿Daizezebara mʉ̃ yiwidʼibʉra wãrĩnu ũrĩbʉka?
Edaʉde Daizezeʼa bʉ yiwidʼimina, iyiʉ̃me bedʼeaimina, krĩchaseabʉ zareata iyara ũrĩta bʉ yiwidʼira, mamina Daizeze Bedʼeaba jarabʉ Jeowara «Yiwidʼibʉ ũrĩbari» (Salmo 65:2). Adewara zarea diabʉ jaramarẽã bʉ kʼãrẽba krĩcha zroma obʉta. ¿Kʼãrẽa? Daizezebara bʉra wãrĩnu «krĩchabʉ baera» (1 Pedro 5:7).
Krĩchara naʉ̃ta: ¿Bʉra badua bʉ neũdukʼawuarabawara bedʼeabʉka? Maʉ̃ kĩrãkʼa oseabʉ Daizezeʉ̃me bedʼeabʉrʉde. Iyiʉ̃me badua bedʼeara akʉza iyi trʉ̃ta jarada, Jeowa (Salmo 86:5-7; 88:9). Daizeze Bedʼeaba jarabʉ badua yiwidʼimarẽã (1 Tesalonicenses 5:17).
«Mʉ̃ yiwidʼibʉrʉdera Daizezeʼa bedʼeabʉ kĩrãkʼabʉ akʉza mʉ̃a jõma jarabʉ mʉ̃ sode kʼãrẽ edabʉta» (Moises).
«Mʉ̃ara jõma Jeowa jarabʉ mʉ̃ papaʼa akʉza mʉ̃ neũdukʼawara jarai kĩrãkʼa» (Karen).
¿Kʼãrẽ ʉ̃rʉ yiwidʼiseabʉ?
Daizeze Bedʼeaba jarabʉ: «Nekʼãrẽ badu berabarinʉmʉne soiduba yiwidʼidua, biga diaidua akʉza bʉ krĩcha obibʉta jõma kʼawuabira Daizezeʼa» (Filipenses 4:6).
¿Yibiaka dayi bedʼea zroma Daizezeʼa jaraira? Mawũã. Daizeze Bedʼeaba jarabʉ: «Bʉ zʉgʉara Jeowa ʉ̃rʉ bʉra, iya kʼareba atʉya» (Salmo 55:22).
Mamina bari dayi bedʼea zromatrʉ jaranʉmabe ẽ. Yuwẽrã aba iyi trʉ̃ Chantelleba jarabʉ: «Mʉ̃ra Jeowa neũdukʼawua bia ẽ bayi bari yiwidʼibʉbʉrʉ iyaʼa kʼarebamarẽã, maʉ̃ kʼarea mʉ̃a krĩchabʉ mʉ̃mara nãã iyaʼa biga diaibara akʉza mejãchabʉ kʼãrẽa biga diaibarata».
Krĩchara naʉ̃ta: ¿Kʼãrẽa biga diakĩrãbʉ? Krĩchara nekʼãrẽ ũbea bʉ ʉ̃rʉ kʼãrẽa Jeowaʼa idi ewade biga diabarata.
«Bari jaradaita, daya nepono biakiru ũdubʉrʉde maʉ̃ba obiseabʉ Jeowaʼa biga diaita» (Anita).
«Daizeze Bedʼea bersikulo akʉda ʉ̃rʉ krĩchara, mawũã ẽ bʉrʉ Jeowaba nekʼãrẽ parãna ʉ̃rʉ, maʉ̃ tẽã biga diara iyaʼa» (Brian).