¿Bʉra naʉ̃ra kĩrãkʼa krĩchabasika? Abedaeda bʉa DaizezeBedʼea akʉkĩrãbasimina ũdubʉrʉdera leamabasi. Daizeze Bedʼea akʉita krĩchabʉrʉdera ẽbẽrarãitara jipa zare. Mamina bʉa kʼawuara naʉ̃ librodebʉbara kʼarebaseabʉta bʉ audre sobia bʼaita akʉza bʉ bebʉ audre bia bʼaita, ¿abarika krĩchaika? ¿Bʉa kʼawuara kʼãrẽta oibarata Daizeze Bedʼea masẽ ẽã akʉita, akʉkĩrãika mama kʼãrẽta jarabʉta?

Akʉra kʼãrẽta berabarisita ʉ̃kʉrʉ ẽbẽrarãba Daizeze Bedʼea akʉ jʉ̃drʉside akʉza ãya kʼawuaside naʉ̃ba kʼãrẽ nebia erbʉta.

Ezekiel, 20 poagabʉba jarabʉ: «Mʉ̃a Daizeze Bedʼea akʉ jʉ̃drʉi nawedara jipa kʼawua ẽ basi kʼãrẽta oita mamina Daizeze Bedʼea akʉda tẽã kʼawuasi kʼãrẽta oita. Nama jarabʉba kʼarebabʉ mʉ̃a nrʉemaza oibarade».

Frieda, 20 poaga ʉ̃tabʉba jarabʉ: «Mʉ̃ra mejãcha kĩrʉmia basi mamina Daizeze Bedʼea akʉbʉba kʼarebabʉ mʉ̃ mejãcha kĩrʉbʉta wĩñã wĩñane idubʉ wãita akʉza idi audre erbʉ neũdukʼawuarata»

Eunice, 50 poaga ʉ̃tabʉba jarabʉ: «Daizeze Bedʼea leibara kʼarebabʉ mʉ̃a nãã kʼayiruara obadara idubʉ wãita»

Akʉza Daizeze Bedʼea akʉibara kʼarebaseabʉ bʉsida sobia bʼaita naʉ̃ra ẽbẽrarã berabarida kĩrãkʼa (Isaías 48:​17, 18). Maʉ̃ daucha kʼarebayi bʉa nekʼãrẽ jidaide biʼia jidamarẽã adewara kʼarebaseabʉ aukʼara krĩcha ẽ baita, neũdukʼawua bia erbaita adewara wãrĩnuta kʼawuaita dayirã parãna ʉ̃rʉ. Naʉ̃ ʉ̃rʉ kʼawuaita audre yibia. Ũrãgʼa Daizeze Bedʼeadebʉra Daizezedeba zebʉ baera ũrãgʼa biara, iya jarabʉra aña jarabʉ baera.

Naʉ̃ba yibiabayi Daizeze Bedʼea le jʉ̃drʉita. Wuarebema artikuloraba kʼarebayi Daizeze Bedʼea akʉkĩrã akʉita.

¿Bʉa kʼãrẽta oseabʉ Daizeze Bedʼea akʉkĩrã akʉita? Akʉdayi ũrãgʼa juesoma ẽbẽrarã sãwũã kʼareba zebʉrʉta.

Jʉrʉda sama leita. Wãra mio neẽ bʉmae. Mõbe jʉra kʼawua bara nekʼãrẽ awuru ʉ̃rʉ krĩcha ẽ baita akʉza jʉrʉda sama mejãcha ũnabʉta adewara sama mejãcha jʉ̃wʉrʉa ẽãta. Mawũã ora bʉa lebʉ ʉ̃rʉ krĩchayi.

Daizeze Bedʼea akʉbʉrʉdera krĩchata ewa erbaibara mawũã nebiata audre kʼawuaita. Daizezebara iyi bedʼeata nebia kĩrãkʼa diasi dayirãʼa. Maʉ̃ba iyira dayirã Zeze baera wũãwũãba kʼawuakĩrãbʉ kĩrãkʼa, dayirãbida kʼawuakĩrãbaibara iyi bedʼea ʉ̃rʉ. Daizeze Bedʼea akʉbʉrʉdera bʉa nãã aña krĩchabadata idubʉra (Salmo 25:4).

Yiwidʼira akʉ jʉ̃drʉi nãã. Daizeze Bedʼeara Daizezedeba zebʉ baera yibia bayi iyaʼa kʼareba widita audre biʼia ũrĩta. Iya jarabʉ iyi jaure zareata diaita iyaʼa widibʉraʼa (Lucas 11:13). Maʉ̃ jaure zareaba kʼarebayi bʉa biʼia kʼawuaita Daizeze sãwũã krĩchabʉta. Bʉita Daizeze ʉ̃rʉ kʼawuai zarebʉra wiña wiñane kʼawua wãñi (1 Corintios 2:10).

Lera biʼia ũrĩta. Bʉa lebʉrʉdera bari ʉ̃rʉ lerãra. Awuarabʉrʉ krĩchara kʼãrẽta kʼawuabʉta maʉ̃neba. Bʉyikʉza widira: «¿Kʼãrẽ nebiata ũdubisi naʉ̃ nebʉradebʉ mebẽrãbara?, ¿sãwũã oũdubiseabʉ mʉ̃a kʼawua wãra?».

Biʼia kʼawuabaibara kʼãrẽ nebia ũduya akʉbʉta Daizeze Bedʼeara. Bʉa Daizeze Bedʼea akʉbʉrʉdera, jʉrʉra kʼãrẽba kʼarebaseabʉta bʉ bia bʼaita akʉza sobia bʼaita. Bari jaraita, jʉrʉseabʉ Daizeze audre ũdukʼawuaita, zeze bia bʼaita akʉza kima bia bʼaita. Maʉ̃are jʉrʉda nebʉrata mawũã ẽ bʉrʉ ũrãgʼata bʉa kʼawuakĩrãbʉ ʉ̃rʉ bedʼeabʉta.a

Atia kʼawuatabeda kʼãrẽ nebia juesomaba kʼarebaseabʉta Daizeze Bedʼea le jʉ̃drʉbʉrʉde, mamina bʉra, ¿kʼãrẽba kʼarebaseabʉ Daizeze Bedʼea akʉbʉrʉde akʉkĩrã akʉita? Wuarebema artikulode maʉ̃ ʉ̃rʉ bedʼeadaya.

Bʉde bʉ Daizeze Bedʼea akʉbʉrʉde ma sẽ bʼaita, mawũã ẽ bʉrʉ sobia bʼaita naʉ̃ akʉbʉrʉde. Sobia akʉkĩrãbʉbʉrʉ akʉra bʉa kʼãrẽta oseabʉta.

Lera tradusion bʉa audre biʼia ũrĩbʉta. Bʉa tradusion aba lebʉrʉde ũrĩ ẽ bʉrʉ bedʼea zareata erbʉ baera akʉ amaeñi, maʉ̃ba jʉrʉra tradusion bʉa biʼia ũrĩbʉta mawũã bʉ soidu jʉ̃ẽmarẽã. Adewara bʉa kʼawuabaibara naʉ̃ tradusionba jarabʉra aripe bedʼeabʉta.a

Daizeze Bedʼea akʉbʉrʉdera kartara awa akʉrãra. Idira Daizeze Bedʼeara bʉara ʉ̃tʉ zebiseabʉ akʉza leseabʉ Internetʼneba teleponoena, trabletʼeda, komputadorʼeda. Adewara Daizeze Bedʼea dayirã selulardeba akʉbʉdera, iyabaʉ testota tradusion awuara awuarakabʉde akʉseabʉ akʉza ũduseabʉ testora bʉa lenʉmʉ kĩrãkʼa bedʼeabʉrata. Adewara bʉa lebe ẽ bʉrʉ mamina ũrĩkĩrãbʉbʉrʉ bʉ selulardeba ũrĩseabʉ. Ʉ̃kʉrʉba Daizeze Bedʼeara ũrĩkĩrã ãyi ode wãne, wua tõbʉde mawũã ẽ bʉrʉ ãyi deda nekʼãrẽ obʉde. Bʉitara, ¿saʉ̃ta audre yibia?, ¿kʼãrẽa jʉrʉ ẽ Daizeze Bedʼea awuara akʉita?

Jʉrʉda audre kʼawuaita. Bʉ kartarata dayirã kʼarebaita Daizeze Bedʼea audre biʼia ũrĩta. Bari jaraita bʉ mapata, naʉ̃bara kʼarebaseabʉ daya biʼia kʼawuaita Daizeze Bedʼeade pʉwʉrʉra jarabʉ sãwũã badata akʉza bʉ karta jarakabʉta, naʉ̃ne bʉ bedʼea dayi kʼarebabʉta akʉza jw.org de jʉrʉseabʉ «Daizeze Bedʼeadeba jaradiabʉta», kama ũduseabʉ bedʼea Daizeze Bedʼeadebema bʉa audre kʼawuaita.

Jʉrʉra Daizeze Bedʼea sãwũã awuara akʉita. Bʉita Daizeze Bedʼea jiruneba joñiena akʉita zareabʉbʉrʉ, akʉ jʉ̃drʉseabʉ bʉa audre kãgamaeba. Bʉa ẽbẽra Daizeze Bedʼeade jarabʉ ʉ̃rʉ audre kʼawuakĩrãbʉbʉrʉ, nrʉemaza jʉrʉseabʉ abaʉ ʉ̃rʉ kʼawuaita. Bʉa kãgabʉrʉ akʉseabʉ rekuadro «Audre kʼawuara Daizeze Bedʼea ʉ̃rʉ ũdukʼawuabʉde iyi ẽbẽrarã mama jarabʉ ʉ̃rʉ», naʉ̃ba kʼarebaseabʉ kʼawuaita, sama bedʼeabʉta ẽbẽrarã Daizeze Bedʼeade jarabʉ ʉ̃rʉ. Adewara akʉseabʉ badu bedʼea bʉa kʼawuakĩrãbʉta, mawũã ẽ bʉrʉ arare arare. ¿Kʼãrẽa jʉrʉ ẽ Daizeze Bedʼea awuara akʉita?

Daizeze Bedʼeara badu libro kĩrãkʼa bʉ ẽ. Daizeze Bedʼeadera dayirã parãnaba ũrãgʼa diadata ũdupanʉ (2 Timoteo 3:​16). Daizeze Bedʼeabara mejãcha kʼarebabʉ dayirãra. Maʉ̃ kʼarea jarabʉ: «Wãrĩnu Daizeze Bedʼeara zokʼaibʉ akʉza zareabarabʉ» (Hebreos 4:12). Nekʼãrẽ ũmene kʼarebabʉ: ũrãgʼata diabʉ dayirãba nrʉemaza kʼãrẽ oibara ʉ̃rʉ akʉza Daizezeta audre ũdukʼawuabibʉ adewara Daizezebara kʼãrẽ asekĩrãbʉta (1 Timoteo 4:⁠8; Santiago 4:⁠8).

Ũrãgʼata diabʉ dayirãba nrʉemaza kʼãrẽ oibara ʉ̃rʉ. Daizeze Bedʼeaba diabʉ ũrãgʼa dayirã bebʉ sãwũã bia erbaibara ʉ̃rʉ akʉza diabʉ ũrãgʼata bedʼea kĩrãtanabʉ ʉ̃rʉbida.

• Wuabemaraʉ̃me sãwũã biʼia bʼaita (Efesios 4:​31, 32; 5:​22, 25, 28, 33).

• Dayi kakua akʉza dayi krĩcha bia erbaita (Salmo 37:⁠8; Proverbios 17:22).

• Sãwũã audre ẽbẽra bia bʼaita (1 Corintios 6:​9, 10).

• Plata sãwũã bia zokʼaita (Proverbios 10:⁠4; 28:19; Efesios 4:​28).a

Ʉ̃rabʉrʉ juwa jidadaraba ũdusida Daizeze Bedʼeaba ãyi kʼãrẽaba kʼarebasita. Ãyitara zareabasi ãyirai yi biʼia edadaita, mamina Daizeze Bedʼeaba ũrãgʼa diabʉ zokʼabʉba kʼarebasi ãyi bia wãita. Yi kima Vicenteba jarabʉ: «Naʉ̃ra ũrãgʼa mama jarabʉta zokʼaiba kʼarebabʉrʉ dai bedʼea zroma ũdubʉrʉde kãgade ara odaita akʉza daira audre sobiababibʉ». Yi kima Annalouba jarabʉ: «Yiza Daizeze Bedʼeade bʉta zokʼaibara mejãcha kʼarebabʉ mʉ̃ra akʉza mejãcha sobiabʉ, dai ũmeba iyabaʉta kʼãgapanʉ baera».

Daizezeta audre ũdukʼawuabibʉ. Adewara Vicenteba jarabʉ: «Kʼãwũã Daizeze Bedʼea akʉbʉdeba atiara mʉ̃ra audre Jeowa kʼawa bʉ». Naʉ̃ba ũdubibʉ Daizeze Bedʼeaba kʼarebaseabʉta bʉra bia wãmarẽã mamina maʉ̃ awa ẽ, awuarabʉrʉ audre Daizeze neũdukʼawua bayi. Adewara kʼawuayi Daizeze Bedʼeadera jarabʉta aranʉbai kʼãrẽ nebia zeita. Bʉra mamara audre sobiabayi akʉza ewari jõmaʉ̃nẽ bayi (1 Timoteo 6:​19). Maʉ̃ nebiara wuabemara librodera ũdu ẽ bayi bʉara.

Bʉa Daizeze Bedʼeata akʉ jʉ̃drʉbʉrʉde akʉza nrʉemaza akʉbʉbʉrʉ audre ẽbẽra bia bayi akʉza Daizezeta audre ũdukʼawuayi. Daizeze Bedʼea akʉbʉrʉdera bʉa edaʉde ũduyi bedʼea biʼia ũrĩ ẽãta, maʉ̃ba nesidayi awuruba biʼia jara ũrĩbita. Bari jaraita, Daizeze Bedʼeaba nebʉrabʉ yumakẽrã Etiopiadebema ʉ̃rʉ. Etiopeba Daizeze Bedʼea akʉbasidera kʼawua ẽ basi mama kʼãrẽta jarabʉra, maʉ̃ba Felipeba iyaʼa widiside biʼia ũrĩbʉ kʼawuaita iya lenʉmʉta, iya jarasi: «¿Mʉ̃ara sãwũã ũrĩpe neẽbʉrʉ kʼaiba jaradiaita?».b Maʉ̃ tẽã Etiopebara iduaribisi Felipeba iyaʼa jara ũrĩbimarẽã, Felipera jaradiabari biabasi baera (Hechos 8:​30, 31, 34). Bʉa Daizeze Bedʼea ʉ̃rʉ audre kʼawuakĩrãbʉbʉrʉ jw.org de bʉseabʉ Jeowa ʉ̃rʉ Kʼawuabipanʉrãba bʉa jaradiamarẽã, mawũã ẽ bʉrʉ bʉseabʉ naʉ̃ karta Jarakabʉ odapeadamae Jeowa ʉ̃rʉ Kʼawuabipanʉrã bʉchumae, adewara jʉrʉseabʉ ãyi ãba yi jʉrepanʉmae. Bʉta audre sobiabakĩrãbʉbʉrʉ jʉrʉda Daizeze Bedʼeata, mõbe le jʉ̃drʉra.