Zõrãrã kongregasionebemarabara kʼarebabʉ sobia panamarẽã

1. ¿Titobara kʼãrẽta jarasi Pabloʼara mebẽrã Corintodebemara ʉ̃rʉra?

POAGA 55de Pabloba ũrĩsi mebẽrã Corintodebemarata mejãcha bedʼea zroma erbasita. Pablobara maʉ̃ra ãyi wũãwũã kĩrãkʼa kãgabasi, maʉ̃ kʼarea bʉsi kartata maʉ̃neba ũrãgʼa diaita (1 Cor. 1:​11; 4:​15). Iyi neũdukʼawua Titoʼa jarasi mebẽrã akʉde jʉ̃ẽmarẽã, maʉ̃are jarasi Troa pʉwʉrʉde yi ũduita mawũã nebʉramarẽã kʼãrẽ berabaridata. Maʉ̃ jedeko berabaridade Pablobara jʉ̃ãbasi Titota jʉ̃ẽmarẽã Troa pʉwʉrʉidu, mamina Titora jʉ̃ẽ ẽ basi. Maʉ̃ kʼarea Pablora wãsi Macedoniaena, maʉ̃nebʉrʉ yi ũdusida ãyira. Pablora mejãcha sobiasi yi ũdusida baera akʉza Titobara bedʼea biata jarasi mebẽrã Corintodebemara ʉ̃rʉ. Jarasi ãyara ũrĩsidata ãya ũrãgʼa dia bʉedara akʉza ũdukĩrãbasita Pablota (2 Cor. 2:​12, 13; 7:​5-9).

2. (1) ¿Apostol Pablobara kʼãrẽta bʉsi Corintodebemaba ĩjã erbʉ kʼarea akʉza sobiapanʉ kʼarea? (2) ¿Kʼãrẽ ʉ̃rʉ panʉnai?

² Poaga berabarida tẽã Pablobara akʉza bʉsi kartata mebẽrã Corintodebemara. Mama jarabasi: «Mʉ̃a jara ẽ, daira maraba ĩjãbʉ yibarita (marara zareapanʉ maya ĩjãpanʉba), awuarabʉrʉ daibara kʼarebabʉ marata sobia panamarẽã» (2 Cor. 1:​24). Mebẽrã zõrãrãbara Pabloba mawũã jaradadeba, ¿kʼãrẽta kʼawuaseapanʉ idi ewade?

DAYA ĨJÃBɄTA AKɄZA SOBIATA

3. (1) ¿Pablobara kʼãrẽta jarakĩrãbasi naʉ̃ bedʼea jaraside: «Marara zareapanʉ maya ĩjãpanʉba»? (2) ¿Idi ewadera zõrãrãbara sãwũã Pabloba obada kĩrãkʼa opanʉ?

³ Apostol Pablobara jarasi kristianorabara nekʼãrẽ ũme erbaibarata: ĩjãita akʉza sobiata. Iya jarasi ĩjãbʉ ʉ̃rʉ: «Mʉ̃a jara ẽ, daira maraba ĩjãbʉ yibarita (marara zareapanʉ maya ĩjãpanʉba)». Pablobara kʼawuabasi mebẽrã Corintodebemarãra kʼẽrẽpabasita ãya ĩjãta erbasi baera, mawũã awuru ẽbẽrarã kʼarea kʼẽrẽpa ba ẽ basi akʉza Pabloba jaradiabʉ kʼarea, iyara jaranʉma ẽ basi mebẽrãba kʼãrẽta oẽ baibarata akʉza maʉ̃ta okĩrã ẽ basi, wãrĩnu ĩjãbasi baera mebẽrãra kʼẽrẽpa bakĩrãbasita (2 Cor. 2:3). Zõrãrã idi ewadebemarabara Pabloba obada kĩrãkʼa opanʉ: ãyara wãrĩnu ĩjãbʉ mebẽrãbara wãrĩnu ĩjãbʉta ũdubipanʉ Daizezede akʉza maʉ̃ra opanʉ ãya okĩrã baera (2 Tes. 3:4). Ãyara jara ẽ mebẽrãra kʼãrẽta oibarata, maʉ̃ oi kaude, jaradiapanʉ Daizeze Bedʼeadeba akʉza organizasioneba ãyidobaʉba kʼãrẽta jida kʼawuaibarata (1 Ped. 5:​2, 3).

4. (1) Pabloba naʉ̃ bedʼea jaraside «daibara kʼarebabʉ marata sobia panamarẽã» maʉ̃bara, ¿kʼãrẽta jarakĩrãbasi? (2) ¿Idi ewadera zõrãrãbara sãwũã Pabloba obada kĩrãkʼa opanʉ?

⁴ Pabloba jarasi: «Daibara kʼarebabʉ marata sobia panamarẽã». ¿Kʼairaba kʼarebasi mebẽrã Corintodebemarãra? Pabloba akʉza ʉ̃kʉrʉ mebẽrã iyi kʼaidupananaraba. ¿Kʼãrẽa mawũã kʼawuapanʉ? Karta yi ũmenebema corintioraita bʉdapeadabara jarabasi iyira kʼarebasita Silvianoba akʉza Timoteoba Corinto pʉwʉrʉde jaradiabaside (2 Cor. 1:​19). Iya kartara bʉsidera Pablobara jarasi iyi kʼarebabarira ʉ̃rʉ. Maʉ̃ta jarakĩrãbasi mebẽrã iyibawara jaradiabadata. Bari jaradaita, Apolos, Áquila, Prisca, Timoteo akʉza Tito (Rom. 16:​3, 21; 1 Cor. 3:​6-9; 2 Cor. 8:​23). Pabloba naʉ̃ bedʼea jaraside «daibara kʼarebabʉ marata sobia panamarẽã», ¿maʉ̃bara kʼãrẽta jarakĩrãbasi? Pabloba akʉza iyi kʼaidupananara mebẽrãta, zarea osida mebẽrã kʼarebaita Daizeze ode sobia panamarẽã. Idi ewadebida zõrãrã mejãcha zarea opanʉ mebẽrãba Jeowaba zokʼabʉta sobiade omarẽã (Sal. 100:2; Filip. 1:​25).

5. ¿Kʼãrẽta widisida mebẽrã bioʉra, adewara bʉara kʼãrẽta krĩchaibara?

⁵ Mebẽrã mejãcha widisida mebẽrã zõrãrãba ãyi kʼarea kʼãrẽta osidata, mawũã Daizeze ode audre sobia bʼaita. ¿Kʼawuakĩrãpanʉka kʼãrẽta panʉsidata? Bʉ maʉ̃ krĩchabʉeda krĩchara bʉ zõrãrãba sãwũã kʼarebasita bʉ audre sobia bʼaita Jeowa ode. Adewara krĩchara bʉa kʼãrẽta oseabʉta mebẽrã kongregasione sobia bamarẽã.a

«SALUDO DIAUDUA MɄ NE KɄÃGʼA [...] PÉRSIDA»

6, 7. (1) ¿Zõrãrãbara sãwũã Pabloba, Jesúsba akʉza wuabemara kristionaraba oda kĩrãkʼa oseapanʉ? (2) ¿Kʼãrẽa yibia mebẽrãitara ãyi trʉ̃ta kĩrãbepanʉbʉrʉ?

⁶ Mejãcha mebẽrãba jarapanʉ ãyira biabʉta mebẽrã zõrãrãba ãyi ʉ̃rʉ krĩchabʉde. ¿Zõrãrãbara maʉ̃ra sãwũã oseabʉ? Maʉ̃ra ũdubibʉ Davidba, Elihú akʉza Jesúsba oda kĩrãkʼa obʉde (akʉra 2 Samuel 9:6; Job 33:1 akʉza Lucas 19:5). Ãyi ẽbẽrabawara bedʼeabʉrʉdera trʉ̃neba jarapanasi, maʉ̃ba ũdubibasi ãyi ʉ̃rʉ krĩchabasita. Pablobara kʼawuabasi arigʉ yibiata mebẽrã trʉ̃ kĩrãbeira. Pabloba mebẽrã Romanebema kongregasionʼa karta bʉdadera eda bʉsi mebẽrã trʉ̃ta 25. Bari jaradaita, Pabloba jarasi: «Saludo diaudua mʉ ne kʉãgʼa mebea wũẽrã Pérsida» (Rom. 16:​3-​15).

⁷ Ʉ̃kʉrʉ zõrãrãitara jipa zare mebẽrã trʉ̃ jẽda kĩrãbeira, mamina ãya zarea ora mebẽrã trʉ̃ kĩrãbeita, mawũãra mebẽrãbara krĩchayi ãyira wãrĩnu kãgabʉta (Éx. 33:17). Adewara mebẽrãba juwa ʉ̃ta wuabʉrʉdera ãyi bedʼeaita, kãgabʉ zõrãrãba ãyi trʉ̃neba trʉ̃namarẽã (bedʼea naʉ̃ kĩrãkʼabʉta ũdudayi Juan 10:3​de).

«IZHIRA BIODʼE NOKʼO CRISTODʼEBEMA KʼAUDʼA BʼɄA»

8. ¿Pablobara sãwũã Jeowade kĩrãkʼa akʉza Jesúsde kĩrãkʼa oũdubisi?

⁸ Mebẽrã Daizeze ode sobia bamarẽã ãyaʼa jaraibara kʼãrẽta bia obʉta. Bari jaradaita, Pabloba mebẽrã Corintodebema karta bʉsidera jarasi iyira sobiabʉta ãyi kʼarea (2 Cor. 7:4). Mebẽrãrãra sobiasibaibara Pabloba maʉ̃ bedʼea jarada kʼarea. Pablora ibia bedʼeasi awurura kongregasionebema kʼareabida, ãya trajo biata opanana kʼarea (Rom. 1:8; Filip. 1:​3-5; 1 Tes. 1:8). Karta kongregasionebema Roma zokʼada tẽã jarasi Persidata saludamarẽã, maʉ̃ awuara naʉ̃ta jarasi: «Izhira biodʼe Nokʼo Cristodʼebema kʼaudʼa bʼʉa» (Rom. 16:​12). Persidara mejãcha sobiasibaibara Pabloba iyi ʉ̃rʉ mawũã jarada kʼarea. Pabloba mawũã ibia jaradaba Jeowaba akʉza Jesúsba oda kĩrãkʼa osi (akʉra Marcos 1:​9-​11; Juan 1:​47; Rev. 2:​2, 13, 19).

9. (1) ¿Kʼãrẽa yibia zõrãrãba jaraita mebẽrãba obʉra bia akʉbʉta? (2) ¿Sãwũã dayirãbara maʉ̃ne kĩrãkʼa abarika oseapanʉ?

⁹ Zõrãrã idibemarabida bia kʼawuapanʉ yibiata jaraita mebẽrãba kʼãwũã Daizezeita obʉ kʼareara bigabʉta (Prov. 3:​27; 15:23). Zõrãrãba kʼãwũã ibia jarabʉdeba mebẽrã ũdubibʉ wãrĩnu kãgabʉta akʉza akʉpanʉta daya zarea opanʉta. Mebẽã abaʉba 55 audrebʉba jarabʉ, iya trajo bia obʉ kʼareara biga diada ẽãta ẽbẽrarã iyibawara ãba trajabʉrãra, ãyabʉrʉ jõma bia okĩrãbʉ akʉza ãyitrʉ jʉ̃zaba krĩchabʉ. Maʉ̃ kʼarea zõrãrãba iyi ʉ̃rʉ ibia bedʼeabʉrʉdera iyira sentibʉ zõrãrãba akʉbʉta. Adewara jarabʉ maʉ̃ba ũdubʉta Jeowabara iyira wãrĩnu kãgabʉta. Yumakẽrã mebẽã abaʉba wũãwũã ũme dapʉẽbʉba, iya nebʉrasi zõrãrã abaʉba jaradata: «Mʉ̃ara bia akʉbʉ bʉa kʼãrẽ obʉra». Akʉza maʉ̃ba zarea jidasi audre Daizezeita nekʼãrẽ oita. Maʉ̃ba ũdubibʉ yibiata mebẽrã zõrãrãbara soiduba jaraita mebẽrãba nekʼãrẽ bio obʉ kʼarea. Akʉza maʉ̃ba kʼarebayi mapae ẽ baita akʉza Daizezeba kãgabʉta sobiade oita (Is. 40:31).

OBEJA AKɄBARI KONGREGASIONEBEMARATA

10, 11. (1) ¿Zõrãrãbara sãwũã Nehemíasba oda kĩrãkʼa oseapanʉ? (2) Zõrãrãba mebẽrã akʉ wãbʉrʉdera, ¿sãwũã ãya ĩjãbʉta audre waribiseabʉ?

¹⁰ Adewara, ¿zõrãrãbara kʼãrẽta audre oseabʉ mebẽrã Daizeze ode sobiapanamarẽã? Akʉbaibara mebẽrã kʼairaba zarea nesidabʉta akʉza maʉ̃ta mesera diaibara (akʉra Hechos 20:28). Maʉ̃ta osida Daizeze ode naweda pananara ẽbẽrarãba. Bari jaradaita, Nehemíasba ũduside iyi mebẽrã sopʉabʉta mesera wãsi kʼarebade (Neh. 4:​14). Zõrãrãbara maʉ̃ne kĩrãkʼa idi ewade opanʉ. Yi mebẽrã sopʉabʉ ũdubʉrʉdera, nekʼãrẽ baduta opanʉ so zarea diaita. Edaʉde wãpanʉ mebẽrã sopʉabʉrainʉ, mawũã ãya ĩjãbʉta audre zarea erbamarẽã (Rom. 1:​11). ¿Kʼãrẽ ʉ̃rʉ bedʼeaseabʉ?

¹¹ Mebẽã sopʉabʉ akʉ wãi nãã, nãã zõrãrãbara ãyi ʉ̃rʉ krĩchaibara kʼãrẽba sãwũãbʉta. Maʉ̃ kʼarea naʉ̃ta widibara: «¿Mebẽãbara kʼãrẽ bedʼea zromata erbʉ? ¿Mʉ̃ara kʼãrẽta jaraseabʉ iyi so aduʼa bamarẽã? ¿Kʼãrẽ testo ʉ̃rʉ ũdubiseabʉ akʉza kʼãrẽ nebʉrabʉ ʉ̃rʉ, mawũã so zarea diaita?». Maʉ̃ta ora wãrĩnu kʼareba wãñi akʉza bari ewarade bedʼeaba ẽ bayi (Sant. 1:​19). Mebẽã wẽrã abaʉba jarasi: «Arigʉ yibia zõrãrãba dayi bedʼeabʉ kĩrãkita ũrĩbʉde» (Luc. 8:​18).

12. ¿Kʼairata nesidapanʉ so zareara kongregasionera, adewara kʼãrẽa?

¹² ¿Kʼairaba nesidapanʉ so zareara kongregasionera? Pablobara jarasi zõrãrãrã obejitara jõma akʉdamarẽã. Maʉ̃ kʼarea kongregasionebemara jõmaʉ̃ba so zareata nesidapanʉ. Mebẽrãra Daizeze ode dããrabʉrabida akʉza yi nãã edebarirabida nesidapanʉ zõrãrãba so zarea diadamarẽã. ¿Ãyara kʼãrẽa nesidapanʉ so zareara? ¿Aukʼara Daizeze ʉ̃rʉ ĩjã ẽ baera? Mawũã ẽ, ãyira mejãcha bedʼea zroma ũdubʉba mapaeseabʉ akʉza doba zarea oita. Maʉ̃ kʼarea nesidapanʉ dayirãba kʼarebamarẽã. Maʉ̃ta berabarisi ewari aba nokʼo Davidta.

ABISAIBARA KʼAREBASI DAVIDTA

13. (1) ¿Sãwũãbʉde beita krĩchasi Isbí-benobara Davidʼra? (2) ¿Kʼãrẽa Abisaibara Davidba kʼareba nesidabaside diaseabasi?

¹³ Davidʼra iyi wũãwũãraena jidasida Israel nokʼo babidaita. Maʉ̃ audre ẽãne yõsi Goliatʼʉ̃me, maʉ̃ra pʉwʉrʉ Refaínʼnebemabasi. Maʉ̃ yumakẽrãra yi zromabasi, mamina Davidba ũdubisi baera zowaĩnĩgʉata beasi maʉ̃ ẽbẽra zromara (1 Sam. 17:​4, 48-​51; 1 Crón. 20:​5, 8). Maʉ̃ne akʉza poaga mejãcha berabarida tẽã, Davidʼra yõsi Filisteadebema gorogororabawara. Mama awuru ẽbẽra yi zromata eda chuasi, maʉ̃ trʉ̃ra Isbí-benobbasi, maʉ̃ra iyabaʉ tribudeba zebasi Goliat zedadeba (2 Sam. 21:16; nota). Mamina naʉ̃nera Davidʼra bera beidebasi ¿kʼãrẽa? ¿Zowaĩnĩgʉata ũdubi ẽ basi baera? Iyara zowaĩnĩgʉata ũdubibasi, mamina Daizeze Bedʼeaba jarabʉ iyira mejãcha yõbasi baera mapaesita. Maʉ̃ kʼarea maʉ̃ ẽbẽra zromaba ũduside David aukʼarasita jarasi naʉ̃nebʉrʉ beaseabʉta. Mamina Abisaira mesera wãsi kʼarebade, mõbe beasi maʉ̃ pilisteora (2 Sam. 21:15-​17). Akʉza naʉ̃nera Davidʼra bera beidebasi, mamina Abisaiba Davidta akʉ edabasi baera mesera wãsi kʼarebade. Maʉ̃ kʼarea Davidʼra mejãcha sobiabasibaibara akʉza iyi kʼãwũã kʼarebada kʼarea. Maʉ̃neba, ¿kʼãrẽta kʼawuapanʉ?

14. (1) ¿Kʼãrẽta oibara Daizezeʉ̃me kʼẽrẽpa bʼaita bedʼea zroma ũdubʉmina? (2) Dayirã mapaebʉrʉdera zõrãrãbara, ¿sãwũã kʼarebabʉ dayirã Daizeze ode sobiapanamarẽã? Yiza aba jara ũrĩbira.

¹⁴ Naʉ̃ drʉa jõmaʉ̃nẽ dai Jeowa ʉ̃rʉ Kʼawuabipanʉrãbara ũdupanʉ bedʼea zromata. Maʉ̃ranebema ʉ̃kʉrʉta bedʼea zroma maʉ̃ ẽbẽra zroma kĩrãkʼa. Mamina Daizezeʉ̃me kʼẽrẽpapanʉ. ¿Dayirãbara kʼãrẽta oibarabasi Daizezeʉ̃me kʼẽrẽpa bʼaita? Opanʉ Davidba oda kĩrãkʼa, iya Goliat beaside: wãrĩnu ĩjãpanʉ Jeowaba dayirã zarea diaita awuanta bʼaita. Ewariza Diaruʉ̃me yõpanʉ baera akʉza iyi kʼaidupanʉrabawara, maʉ̃ba mapaeseabʉ. Maʉ̃ kʼarea nãã awuantada kĩrãkʼa tẽã awuanta ẽã baseabʉ. Maʉ̃ba zõrãrã dayirã akʉ zebʉrʉdera diabʉ zowaĩnĩgʉata akʉza kʼarebabʉ sobia bʼaita Daizeze ode. Maʉ̃ kʼarea biga diapanʉ. ¿Bʉra mawũã berabaribarika? Akʉdaya aba yi nãã edebarita, iyira 65 poagabʉ, iya jarasi: «Nawedara mʉ̃ra bia ba ẽ basi akʉza jaradia wãbʉrʉdera aukʼarabasi. Zõrãrã abaʉba ũdusi mʉ̃ mapaebʉta, maʉ̃ kʼarea widisi mʉ̃ kʼãrẽba sãwũãnʉmʉta. Iya mʉ̃aʼa le ũrĩbisi Daizeze Bedʼeadebema testota, maʉ̃ba mʉ̃aʼa so zarea mejãcha diasi. Ũrĩsi mʉ̃a iyi ũrãgʼata, mõbe bia wãsi mʉ̃ra. Mʉ̃a arigʉ biga diakĩrãbʉ iya mʉ̃ kʼawua kʼarebada kʼarea akʉza kʼãwũã akʉbasi baera mʉ̃ sãwũã bʉta». Arigʉ yibia kʼãwũã kʼawuabʉ baera zõrãrãbara dayirãta krĩchabʉta akʉza kʼãwũã kʼarebakĩrãbʉta Abisaiba David kʼarebada kĩrãkʼa.

KʼAWUAPANASI PABLOBARA ÃYIRA KÃGABASITA

15, 16. (1) ¿Kʼãrẽa mebẽrãbara mejãcha kãgabasi Pablora? (2) ¿Kʼãrẽa kãgapanʉ zõrãrãra?

¹⁵ Zõrãrãra nekʼãrẽ mejãcha obʉ kongregasion kʼarea. Zõrãrãra mejãcha krĩcha zroma opanʉ mebẽrã kʼarea. Maʉ̃ kʼarea edaʉde diamasi piradrʉbʉ ãyira Daizezeʼa yiwidʼita akʉza krĩchabʉ sãwũã kʼarebaita (2 Cor. 11:27, 28). Mamina zõrãrãra sobiabʉ ãya trajo obʉ kʼarea kongregasione Pabloba obada kĩrãkʼa. Pabloba mebẽrã Corintodebemara karta bʉsidera, iya jarasi iyitara kʼãrẽ ẽãta iyi zarea jõbʉrʉ kʼarea mebẽrã kʼarebaita (2 Cor. 12:15). Maʉ̃ra okĩrã osi wãrĩnu ãyi kʼarea kãgata erbasi baera (akʉra 2 Corintios 2:4; Filip. 2:​17; 1 Tes. 2:8). Maʉ̃ kʼarea mebẽrãbara mejãcha kãgabasi Pablora (Hech. 20:31-​38).

¹⁶ Dayirãbida kãga zõrãrãra akʉza Jeowaʼa biga diapanʉ kʼãwũã zõrãrãta zokʼabʉ baera dayirãta akʉmarẽã. Ãyira mejãcha krĩcha zroma opanʉ dayirã kʼarea akʉza akʉ jʉ̃ẽpanʉ dayirã so zarea diaita. Zõrãrãra dayirã kʼawapanʉ so zarea diaita dayirãba bedʼea zroma ma oẽãbʉ ũdubʉrʉde. Ãya mawũã obʉba kʼarebabʉ dayi Daizeze ode sobia bʼaita.