¿Bʉra zokeabʉka ẽbẽrarã jaradia wãita?

1. ¿Jesúsbara kʼãrẽta jarasi yumakẽrãra beda wuabarira kimarebʉra, maʉ̃ne ãyira sãwũãsi?

PEDROTA, Andrésta, Santiagota akʉza Juanta Jesús kʼaidubemarabasi akʉza maʉ̃rãra beda wuamiarabasi. Ãyira kĩrãmigasibaibara Jesúsba naʉ̃ bedʼea jaraside: «Mʉ̃ kʼaidu bʼaidua mõbe mʉ̃a maraba beda wuabʉ kĩrãʼka ẽbẽrarãta wuabiyi».b ¿Ãyara kʼãrẽta osi? Daizeze Bedʼeaba jarabʉ: «Aramaʉ̃ta ãyara ãyi atarrayara amaekʉesida mõbe iyi kʼaidu wãsida» (Mat. 4:​18-​22). Ãya kʼãwũã jidadadeba ãyi bebʉra jipa awuarabaibasi, ẽbẽrarã jaradiaibasi baera. Akʉza ãya beda nãã beadata idubʉibasi baera (Luc. 5:​10). Abarika idi ewadebida Jesúsbara abarika omarẽã kãgabʉ jari ẽbẽrarã yi wãrĩnuta kãgabʉra (Mat. 28:19, 20). ¿Bʉara ĩjãsika Jesúsba omarẽã jaradara?

2. ¿Kʼãrẽa ĩjãnaibara Jesúsba bedʼea jarada ʉ̃rʉ akʉza kʼãrẽba kʼarebai maʉ̃ oita?

² Dããrabakĩrã bʉa Daizeze Bedʼea akʉbʉta maʉ̃ kʼarea krĩchabʉbaibara Daizeze Bedʼea bia jaradia wãita. ¿Bʉra perabʉka? Jesús kʼaidu babari bʼaita perarãra, maʉ̃ta krĩcharãra mejãcha. Mawũẽra bʉa kʼawua ẽ bʉrʉ maʉ̃ oita mawũã ẽ bʉrʉ oẽãta, maʉ̃ba ũdubibʉ maʉ̃ jidaira bʉitara yibiata. Nama Daizeze Bedʼeaba jarabʉ Pedro ʉ̃rʉ akʉza iyi kopaerora ʉ̃rʉ: «Aramaʉ̃ta ãyara ãyi atarrayara amaekʉesida». Mamina Pedroba akʉza yi mebẽã Andrésbara nãã bia krĩchasida maʉ̃ jidaita. Maʉ̃ba ũdubibʉ ãya Jesús ũdukʼawuadadeba akʉza Jesús kʼaidu babari zeyedara 6 jedekobasi. Maʉ̃ne ãyara ĩjãsi Jesúsʼra Dayirã ẽdrʉbibarita (Juan 1:​35-​42). Maʉ̃ kĩrãkʼa bʉara kʼawuabʉbaibara Jesús ʉ̃rʉ akʉza Jeowa ʉ̃rʉ, maʉ̃ba audre okĩrãbʉkĩrã ãyita. Mamina jaradia wãkĩrãbʉbʉrʉ nãã bia krĩchaibara. Mawũẽra, ¿kʼãrẽba kʼarebasi Pedrota akʉza iyi kopaerorata bia krĩchaita mawũã Jesús kʼaidu wãita?

3. ¿Kʼãrẽba kʼarebaseabʉ Jesús kʼaidu babari bʼaita?

³ Jesús kʼaidubemarãra naʉ̃ kimare erbʉba kʼarebasi: okĩrã oita, kʼawuaita kʼãrẽ oita, zowaĩnĩgʉata akʉza ãyikʉza zokʼa kʼawuaita. Maʉ̃ jõma erbaiba kʼarebasi ãyira ẽbẽrarã wuaita.

ZAREA ORA AUDRE OKĨRÃ OITA

4. ¿Kʼãrẽa Pedrora beda beabasi?

⁴ Pedrora beda beabasi yi mebẽrã maʉ̃ba nekobita. Pedrobara bari bedara beaba ẽ basi, awuarabʉrʉ iyara kãgabasi beda beaita (Juan 21:​3, 9-​15). Maʉ̃ kĩrãkʼa kãga zesi ẽbẽrarã wuaita. Iyara Jeowa kʼarebadeba bia osi (Hech. 2:​14, 41).

5. (1) Lucas 5:​8-​11ba jarabʉdebara, ¿kʼãrẽa Pedrora perabasi? (2) Daizeze Bedʼea kʼawuabarita, Pedro kĩrãkʼa perabʉbʉrʉ, ¿kʼãrẽba kʼarebaseabʉ?

⁵ Jeowata kãgapanʉ baera jaradia wãpanʉ. Maʉ̃ kʼarea jaradia wãita perapanʉbʉrʉ, maʉ̃ kãgaba kʼarebaseabʉ pera ẽ baita. Jesúsba jaraside Pedroʼa iyi kʼaidu wãmarẽã ẽbẽrarã wuaita, naʉ̃ta jarasi: «Perarãra» (akʉra Lucas 5:​8-​11). Pedrora pera ba ẽ basi Jesús kʼaidubema bʼaita akʉza iyi kʼãrẽ berabari kʼarea. Mamina iya ũdusi Jesúsba sãwũã miõba oka odata beda mejãcha beaside. Maʉ̃ba iyara krĩchasi maʉ̃ra iyita ẽãta akʉza iyara kʼawua ẽ basi sãwũã oita. ¿Bʉsida abarika Jesús kʼaidubema bʼaita akʉza nekʼãrẽ mejãcha oibara baera krĩcha zroma obʉka? Maʉ̃ta mawũã berabaribʉbʉrʉ zarea ora audre Jeowa kãga wãita, Jesústa akʉza ẽbẽrarãta. Mawũã ẽbẽrarã jaradiakĩrã jaradia wãita (Mat. 22:37, 39; Juan 14:15).

6. Adewara, ¿kʼãrẽa jaradiade wãkĩrãpanʉ?

⁶ Adewara jaradia wãkĩrãpanʉ Jesúsba jaradata okĩrãpanʉ baera. Iya jarasi: «Mawũẽ wãidua, mõbe mʉ̃nebemata ĩjãnamarẽã jaraidua drʉaza yãrã jõmaʉ̃’a» (Mat. 28:19, 20). Adewara jaradia wãkĩrãpanʉ ẽbẽrarãra zʉbʉriapanʉ baera akʉza dobapanʉ baera, maʉ̃ kʼarea ãyara nesidabʉ kʼawuaita Daizeze Nokʼo ʉ̃rʉ (Mat. 9:​36). Jeowabara kãgabʉ ẽbẽrarã jõmaʉ̃ba wãrĩnuta kʼawuamarẽã, mawũã ẽdrʉdamarẽã (1 Tim. 2:4).

7. Romanos 10:13-​15 bayeda jarabʉdebara, ¿kʼãrẽa yibia jaradia wãira?

⁷ Bʉa kʼawuabʉbʉrʉ kʼãrẽta berabaribʉta jaradia wãbʉrʉde, maʉ̃ba kʼarebayi okĩrã oita. Yi beda beabʉrabara obʉ ãya koita mawũã ẽ bʉrʉ nẽdo bʉeita, mamina dayirãbara ẽbẽrarãta wuabʉ mawũã ãyi ẽdrʉbita (akʉra Romanos 10:13-​15; 1 Tim. 4:​16).

AUDRE KʼAWUARA KʼÃRẼ OITA

8, 9. Beda beabarirabara, ¿kʼãrẽta kʼawuabaibara akʉza kʼãrẽa?

⁸ Jesús ewaribasidera ẽbẽrarãbara kʼawuabaibarabasi kʼãrẽ bedata beaita (Lev. 11:​9-​12). Adewara kʼawuabaibarabasi sama bea wãita. Bedara bakĩrã yiko mejãchabʉmae akʉza ãyi bia baseabʉmae. Yi beda beabarirãra, ¿badu ũmadaʉde wãseabʉka beda beadera? Akʉdaya kʼãrẽta berabarisita mebẽrã misionerota. Mebẽã abaʉba jarasi misioneroʼa beda beade wãita. Misioneroba jarasi: «Nu wãnaña 9 diapeda». Aramaʉ̃ta mebẽãba jarasi: «Dayi beda bea wãira wã ẽ baibara daya ũmadaʉ kãgade, awuarabʉrʉ akʉibara kʼãrẽ ũmadaʉde beda beaseabʉta».

⁹ Maʉ̃ kĩrãkʼa Jesús kʼaidupanʉrabara oibarabasi ẽbẽrarã wuaita mawũã jʉ̃ẽita ẽbẽrarã bʉidʉ. Bari jaraita, Jesús kʼaidupanʉrabara jaradiabasi templode, sinagogade, merkadode akʉza deza deza (Hech. 5:​42; 17:17; 18:4). Dayirãba jaradia wãbʉmaera bia ũdukʼawuadaibara ẽbẽrarãba kʼãrẽ obʉta. Dayirãba ẽbẽrarã wuaita kʼawuapanaibara sama ũduseabʉta ãyira. Dayirãba ẽbẽrarã akʉ wãbʉde ũduda ẽ basibʉrʉ jʉrʉdaibara awuru ũmadaʉde akʉ wãita (1 Cor. 9:​19-​23).

10. ¿Jeowa organizasionbara dayirãra kʼãrẽta diabʉ kʼãrẽ, jaradia wãmarẽãra?

¹⁰ Beda beabarirabara kʼawuabʉ ãya nekʼãrẽ erbaibarata akʉza maʉ̃ra bia zokʼa kʼawuaibarata. Dayirãbida abarika maʉ̃ta odaibara. Jesúsbara bia jara ũrĩbisi iyi kʼaidupanʉra sãwũã ẽbẽrarã wua kʼawuaita. Iya jaradiasi kʼãrẽta edeibarata, kʼãrẽta jaraita akʉza sama jaradia wãibarata (Mat. 10:​5-7; Luc. 10:​1-​11). Idi ewadebida Jeowa organizasionbara nekʼãrẽ diabʉ kʼãrẽ, mawũã dayirãba jaradia wãita, maʉ̃ba dayirãba jaradia wanamarẽã.c Maʉ̃neba dayirãbara bia jaradiaseabʉ akʉza ãyara kʼarebabʉ sãwũã bia zokʼa kʼawuaita. Maʉ̃ba kʼarebabʉ dayirãba pera ẽã oita akʉza bia jaradiaita (2 Tim. 2:​15).

ZOWAĨNĨGɄABARA

11. ¿Kʼãrẽa ẽbẽrarã beda wuabʉrãra zowaĩnĩgʉapanaibara?

¹¹ Beda beabarirãra zowaĩnĩgʉapanaibara. Pusa zromanera edaʉde diamasidera pʉãdrʉbadogo baera. Maʉ̃ kĩrãkʼa ẽbẽrarã wuabarirasida zowaĩnĩgʉapanaibara . Maʉ̃ kĩrãkʼa dayirãba Daizeze Bedʼea ʉ̃rʉ jaradia jʉ̃drʉbʉrʉdera pʉãdrʉ zromata ũdubʉ kĩrãkʼabʉ. Bari jaradaita, dayirã mebẽrã dayirã ʉ̃rʉ zebʉrʉde, dayirã neũdukʼawuara dayirã kʼarea ipidabʉdade akʉza ẽbẽrarãba dayirãba jarabʉ ũrĩkĩrã ẽãne. Dayirãba maʉ̃ra kʼawuapanasi. Jesúsba jarabarisi iyi kʼaidupanʉraba jaradia wãbʉrʉdera ẽbẽrarã kayiruarane eda bʼaita (Mat. 10:16).

12. Josué 1:​7-9 bayeda jarabʉdebara, ¿dayirãra kʼãrẽba kʼarebaseabʉ zowaĩnĩgʉa bʼaita?

¹² ¿Kʼãrẽba kʼarebaseabʉ zowaĩnĩgʉa bʼaita? Kĩrãbera atiara Jesúsbara iyi pʉwʉrʉra kʼarebanʉmʉta bia jaradia wãnamarẽã (Juan 16:33; Apoc. 14:14-​16). Soiduba ĩjãra bʉra Jeowabara kʼarebaita (Mat. 6:​32-​34). Bʉa audre ĩjã wãbʉrʉza audre zowaĩnĩgʉabayi. Pedroba akʉza iyi kopaeroraba ũdubisi wãrĩnu Jesúsde ĩjãbʉta ãyi beda beabada amaekʉaside. Bʉabida abarika mawũã ũdubisi bʉ neũdukʼawuara jaraside akʉza bʉ mebẽrã jaraside bʉara Daizeze Bedʼea akʉbʉta akʉza ãba yi jʉrebarima wã jʉ̃drʉsita. Bʉara idubʉsi bʉ nãã sãwũã krĩchabadata akʉza bʉa nãã obadata, mawũã Jeowaba kãgabʉ ozeita. Mawũã ũdubisi bʉa wãrĩnu ĩjã erbʉta akʉza zowaĩnĩgʉata. Bʉta zarea obʉbʉrʉ zowaĩnĩgʉa erbaita bʉ wãsimae Jeowaba kʼarebayi bʉra (akʉra Josué 1:​7-9).

13. ¿Sãwũã kʼarebaseabʉ yiwidʼiba akʉza bia krĩchaiba zowaĩnĩgʉa erbaita?

¹³ ¿Kʼãrẽba kʼarebaseabʉ bʉ zowaĩnĩgʉa bʼaita? Yiwidʼiba. Bʉ yiwidʼibʉrʉde zowaĩnĩgʉata widira Jeowaʼa (Hech. 4:​29, 31). Iyara ũrĩñi bʉ yiwidʼira akʉza iyira bʉ kʼaitabayi mawũã bʉ kʼarebaita. Adewara krĩchara Jeowaba iyi ode nããpananara sãwũã kʼarebada ʉ̃rʉ. Adewara krĩchara Jeowaba bʉ sãwũã zarea diasita bʉa nekayirua nãã obada idubʉita akʉza sãwũã kʼareba zebʉrʉta bedʼea zroma erbaside. Kĩrãbera Jeowabara iyi pʉwʉrʉra kʼarebasita kĩrãbarita Mar Rojode. ¿Waya bʉra kʼareba ẽka Jesús kʼaidubabari bʼaita? Kʼarebayi (Éx. 14:13). Salmistaba jarasi: «Jeowara mʉ̃arebʉ maʉ̃ kʼarea pera ẽ bayi. ¿Ẽbẽrabara mʉ̃ra kʼãrẽta oseabʉ?». Nama salmistaba ĩjã ũdubida kĩrãkʼa ĩjãta ũdubira (Sal. 118:6).

14. ¿Kʼãrẽta jaradiabʉ Masae akʉza Tomoyo nebʉrabara?

¹⁴ Jeowabara nawedara ẽbẽrarã peramiabadata kʼarebasi zowaĩnĩgʉa bʼaita. Dayirãba maʉ̃ ʉ̃rʉ krĩchadara dayirãsida mawũã zowaĩnĩgʉa baseabʉ. Akʉdaya mebẽã Masaeta kʼãrẽ berabaridata. Iyira mejãcha peramia baera krĩchabasi wuabemara iya ĩjãbʉ ʉ̃rʉ jaraira oẽ baita. Krĩchabasi iya ẽbẽrarã ũduaduabawara bedʼeaira jipa zareata, katuma zromane wãze wãi kĩrãkʼa. Maʉ̃ kʼarea krĩchabasi jipa oẽ bʼaita. Maʉ̃ kʼarea zarea osi audre Jeowa kãga wãita akʉza ẽbẽrarãta. Krĩchasi ewari jõbodoarebʉta akʉza widisi Daizezeʼa audre obikĩrã obimarẽã iya kãgabʉta ẽbẽrarã jaradiaita. Mawũã iyi perabira ãĩ wãsi. Maʉ̃ tẽãra iyira yi nãã edebaribasi. Josué 1:7-9ba jarabʉ kĩrãkʼa Jeowabara kʼarebaseabʉ ʉ̃ra Daizeze Bedʼea jaradiabarirãra zowaĩnĩgʉata erpanamarẽã. Akʉdaya kʼãrẽta berabarisita mebẽã Tomoyota. Iyi wãka wãside jaradiade, ẽbẽra wẽrã abaʉta iyaʼa jʉrasi: «Mʉ̃ara jipa kʼawuakĩrã ẽ Jeowa ʉ̃rʉ Kʼawuabipanʉrã ʉ̃rʉra», maʉ̃ne iyi wãi nãã puertara serrakʉbʉsi. Iyira maʉ̃ kʼarea sobia ẽ toto ẽ basi, awuarabʉrʉ iya jarasi mebẽã iyiʉ̃me ãba wã: «Bʉa ũdusika naʉ̃ra, jari ẽbẽra wẽrãbara mʉ̃aʼa kʼãrẽ jarai nãã, ya kʼawuabasi mʉ̃ra Jeowa ʉ̃rʉ Kʼawuabipanʉrata, yibia maʉ̃ra». Tomoyora atiara yi nãã edebari.

MAYIKɄZA BIA ZOKʼA KʼAWUABAIBARA

15. ¿Kʼãrẽta jarakĩrãbʉ dayikʉza bia zokʼa k’awuaibara akʉza kʼãrẽa oibara kristianoraba maʉ̃ra?

¹⁵ Dayikʉza zokʼa kʼawuaibara jarakĩrãbʉ dayirãbara oibarata daya oya adata. Beda beabarirabara bia zokʼa kʼawuaibara ãyikʉza. Bari jaraita, ãya jõma aribaebʉrʉde wãbʉ, adewara diapeda piradrʉibara akʉza ewari bianʉmʉne ewari bia ẽãne wãibara ãyira. Maʉ̃ kĩrãkʼa dayirã kristianorabida dayikʉza bia zokʼa kʼawuabaibara mawũã daya jaradata jõma aribaeita (Mat. 10:22).

16. ¿Kʼãrẽba kʼarebai dayi kakua bia zokʼa kʼawuaita?

¹⁶ Dayirã waribʉrʉza zare dayikʉza zokʼa kʼawuaira, mawũã daya oibada jõma aribaeita. Edaʉde dayima zare ẽãta opanʉ, mamina nekʼãrẽ audre yibiara edaʉde zare maʉ̃ oira maʉ̃ba oamapanʉ. Maʉ̃ kʼarea zarea odaibara dayikʉza zokʼa kʼawuaita. Dayirãita zareabʉrʉ dayikʉza bia zokʼa kʼawuaita, mawũãra kʼarebata jʉrʉdaibara. Jeowabara iyi jaure zareadeba dayirãra kʼarebabʉ (Gál. 5:​22, 23).

17. 1 Corintios 9:​25-​27 bayeda jarabʉdebara, ¿Pablobara kʼãrẽta jarasi iyi kakua bia zokʼa kʼawuaita?

¹⁷ Apostol Pablobara iyi kakuara zokʼa kʼawuabasi, mawũãsidu pobʉ kĩrãkʼabasi iyikʉza nekʼãrẽ bia oita (akʉza 1 Corintios 9:​25-​27). Jarasi kristianora bia zokʼa kʼawuadamarẽã ãyikʉza akʉza jarasi «oidua jõma aripe, biʼia» (1 Cor. 14:40). Abarika idi ewadebida dayirãbara zokʼa kʼawuabaibara dayirã kakuara, mawũã daucha oita. Adewara badua jaradiaita Daizeze Bedʼea ʉ̃rʉ (Hech. 2:​46.)

JɄ̃ÃRÃRA

18. ¿Kʼãrẽta odaibara Jeowaba bia akʉmarẽã dayirãba jaradia wãbʉde?

¹⁸ Beda beabarira bia wã iya bedata mejãcha beara. Mamina jaradia wãira awuarabʉ beda beabariʉ̃mera, dayi nejaradiabari bia bʼaira jarakĩrãbʉ ẽ ẽbẽrarãta mejãcha buru kʼoebita (Luc. 8:​11-​15). Dayirãba bedʼea biata jaradiapanʉbʉrʉ, mawũãra Jeowara dayirã kʼarea sobiabayi, ¿kʼãrẽa mawũã bʼai? Jeowa bedʼeata ũrĩpanʉ baera akʉza yi warra bedʼeata (Mar. 13:10; Hech. 5:​28, 29).

19, 20. ¿Atiara kʼãrẽa audre jaradia wãibara?

¹⁹ Ʉ̃kʉrʉ drʉadera badu ewaride beda beabe ẽ. Maʉ̃ba beda beai ewari zebʉrʉdera audre ewari jʉrʉbʉ beda bea wãita, naʉ̃ ewari jõi naena. Maʉ̃ kĩrãkʼa idi ewade dayirãbida audre jara diakĩrãpanʉ: Daizeze ewari zeira ewariza audre arakʼaita ba baera. Dayirãba jaradia wãbʉrʉdera kʼarebapanʉ ẽbẽrarãta ãyi bebʉ ẽdrʉmarẽã. Mamina maʉ̃ obʉra ewari wika ba, maʉ̃ kʼarea bʉa bedʼea zroma ũdubʉmina jaradiara Daizeze bedʼea bia ʉ̃rʉ (Ecl. 11:4).

²⁰ Bʉara naʉ̃nebʉrʉ mejãcha zarea oibara okĩrã oita, kʼawuaita kʼãrẽa oita, zowaĩnĩgʉa bʼaita akʉza bʉyikʉza zokʼa kʼawuaita. Ẽbẽrarã 8 millones audre bʉbawara Daizeze Bedʼea ʉ̃rʉ jaradiara, mawũãra Jeowa kʼarebadeba sobiabayi (Neh. 8:​10). Jeowaba jarai ewarisida zeyi, wua jaradia ẽ bamarẽã, maʉ̃ena bʉara zarea ora jaradiaita bʉa oseabʉde. Wuarebema artikulode kʼawuadayi nekʼãrẽ ũbea dayirã sãwũã kʼarebaseabʉta jaradiakĩrã jaradia wãi ʉ̃rʉ.